༄༅། ། བོད་མི་མང་སྤྱི་འཐུས་མཁན་པོ་ཀཿ བྲག་དངོས་གྲུབ་བསོད་ནམས་མཆོག་དང་། སྤྱི་འཐུས་ཀོང་རྩ་ལྷ་མོ་ཚེ་རིང་མཆོག་རྣམ་གཉིས་ཕྱི་ལོ་ ༢༠༢༦ ཟླ་ ༨ པའི་ཚེས་ ༢༤ ནས་རྒྱ་གར་ལྷོ་ཕྱོགས་ཧོན་སུར་རབ་རྒྱས་གླིང་གཞིས་ཆགས་སུ་གཞུང་འབྲེལ་འཚམས་གཟིགས་གནང་བཞིན་ཡོད་པ་ལྟར། ཕྱི་ཟླ་ ༨ པའི་ཚེས་ ༢༦ ཉིན་སྤྱི་འཐུས་རྣམ་གཉིས་ནས་གཞིས་ཆགས་ཀྱི་གྲོང་སྡེ་ཁག་ ༡༥ ལ་འཚམས་གཟིགས་དང་། མང་ཚོགས་ལ་གསུང་བཤད། བཞུགས་མོལ་ཚོགས་འདུ་དང་མི་མང་ལམ་སྟོན་སོགས་གནང་ཡོད།

དེ་ཡང་ཕྱི་ཚེས་ ༢༦ ཉིན་གྱི་སྔ་དྲོ་ཆུ་ཚོད་ ༩།༠༠ ཐོག ས་འཐུས་ཚོགས་གཙོ་དང་། ས་གནས་འགོ་འཛིན་ལས་ཁུངས་ཀྱི་དྲུང་ཡིག སྤྱི་མི་གཉིས། རྩིས་པ་བཅས་ཀྱིས་ཕེབས་བསུ་སྣེ་ལེན་གཟབ་རྒྱས་དང་བཅས། བོད་མི་མང་སྤྱི་འཐུས་རྣམ་གཉིས་གཞིས་ཆགས་ཀྱི་གྲོང་སྡེ་ A ནས་ P བར་གྱི་ཁྱོན་གཞིས་གྲོང་ ༡༥ དང་། གློག་ཀླད་སྡེ་ཚན་སོགས་སུ་འཚམས་གཟིགས་སུ་ཕེབས་ཤིང་། གཞིས་གྲོང་ ༡༥ སོ་སོའི་སེར་སྐྱ་མང་ཚོགས་ནས་སྣེ་ལེན་ཕེབས་བསུ་དང་། དེ་བཞིན་སྤྱི་འཐུས་རྣམ་གཉིས་ནས་མང་ཚོགས་ལ་འཕྲོད་བསྟེན་བལྟ་སྐྱོང་དང་། གཞིས་ཆགས་སྲ་བརྟན་ཡུན་གནས། ས་གནས་ཡུལ་ཁྲིམས་དང་བོད་མིའི་སྒྲིག་འཛུགས་ཀྱི་ཁྲིམས་སྒྲིག་ཁག་ལ་བརྩི་སྲུང་དགོས་ཚུལ། མཉམ་འབྲེལ་ལས་དོན་གོང་འཕེལ་སོགས་དང་འབྲེལ་བའི་ཐོག་ལ་གསུང་བཤད་གནད་བསྡུས་རེ་གནང་ཡོད་འདུག

རྩ་བའི་གཞིས་གྲོང་ཁག་གི་བར་ལམ་ཐག་རིང་པོ་ཡོད་པ་དང་། གྲོང་སྡེ་རེ་རེར་ལས་རིམ་གྱི་དུས་ཚོད་སྐར་མ་ ༡༥ རེ་ལས་མེད་ཀྱང་། སྤྱི་འཐུས་རྣམ་གཉིས་ནས་གྲོང་སྡེ་ཁག་གི་འཚམས་གཟིགས་ཀྱི་ལས་དོན་ཐོག་ཆུ་ཚོད་ ༥།༠༠ ཙམ་རིང་བཏང་སྟེ། འབད་བརྩོན་ཆེན་པོས་གཞིས་གྲོང་ཡོངས་ལ་གཟིགས་ཞིབ་མཐར་ཕྱིན་པ་གནང་ཡོད་འདུག

དེ་ཡང་གཞིས་གྲོང་ཁག་ནི། ༡། གྲོང་སྡེ་ F རིན་ཆེན་སྒང་། མི་འབོར་ ༡༧༣
༢། གྲོང་སྡེ་ H བསམ་གཏན་གླིང་། མི་འབོར་ ༡༦༠
༣། གྲོང་སྡེ་ B སྐྱིད་གྲོང་གླིང་། མི་འབོར་ ༡༣༣
༤། གྲོང་སྡེ་ E བཀྲིས་སྒང་། མི་འབོར་ ༢༠༠
༥། གྲོང་སྡེ་ C དཔལ་འབྱོར་རབ་བརྟན། མི་འབོར་ ༦༠
༦། གྲོང་སྡེ་ A དོན་གྲུབ་གླིང་། མི་འབོར་ ༡༤༡
༧། གྲོང་སྡེ་ D བདེ་སྐྱིང་གླིང་། མི་འབོར་ ༡༢༥
༨། གྲོང་སྡེ་ P གཞིས་སྤོས་ལས་གཞི།
༩། གྲོང་སྡེ་ J དགའ་ལྡན་ཁང་གསར། མི་འབོར་ ༩༧
༡༠། གྲོང་སྡེ་ K ཕུན་ཚོགས་གླིང་། མི་འབོར་ ༤༤
༡༡། གྲོང་སྡེ་ I བསམ་འཕེལ་གླིང་། མི་འབོར་ ༧༠
༡༢། གྲོང་སྡེ་ L བདེ་ལེགས་རབ་བརྟན། མི་འབོར་ ༨༥
༡༣། གྲོང་སྡེ་ N བྱམས་པ་གླིང་། མི་འབོར་ ༧༩
༡༤། གྲོང་སྡེ་ M/O བསམ་གྲུབ་གླིང་དང་། བཀྲིས་རབ་བརྟན་ལ་མི་འབོར་ ༡༡༧ བཅས་ཡོད་འདུག

ཉིན་རྒྱབ་ཆུ་ཚོད་ ༣།༠༠ ཐོག་ས་གནས་ཀྱི་ལས་སྣེ་རྣམ་པ་དང། ཚོགས་སྡེ་ཁག་གི་འགན་འཛིན་རྣམས་དང་ལྷན་དུ་བཞུགས་མོལ་ཚོགས་འདུ་ཞིག་བསྐོང་ཚོགས་གནང་ཞིང་། སྐབས་དེར་སྤྱི་འཐུས་མཁན་པོ་ཀཿ བྲག་དངོས་གྲུབ་བསོད་ནམས་མཆོག་གིས། སྲི་ཞུ་ལས་བྱེད་ཀྱི་ངོ་བོ་དང་། སྤྱི་མི་དང་ལས་བྱེད་རྣམས་ཀྱིས་སྤྱི་པའི་ལས་དོན་ཐོག་ཀུན་སློང་འཁྱེར་ཕྱོགས། ས་གནས་ཀྱི་གནས་བབ་དང་མཉམ་འབྲེལ་གྱི་ལས་དོན་སྤེལ་ཕྱོགས་སོགས་ཀྱི་སྐོར་ལ་གསུང་བཤད་དང་། སྤྱི་འཐུས་ཀོང་རྩ་ལྷ་མོ་ཚེ་རིང་མཆོག་གིས་ལས་བྱེད་རྣམས་ཀྱིས་སྤྱི་པའི་ཕྱག་ལས་གནང་ཕྱོགས་ཀྱི་གལ་གནད་སྐོར་དང་། མཉམ་འབྲེལ་གྱི་འཛིན་སྐྱོང་དང་ལས་དོན་གོང་འཕེལ་སྐོར་སོགས་ལ་གསུང་བཤད་གནང་འདུག

ཚོགས་འདུའི་ཐོག ས་འཐུས་ཚོགས་གཙོ་དང་། ས་གནས་འགོ་འཛིན་ལས་ཁུངས་ཀྱི་དྲུང་ཡིག ས་གནས་རང་བདེན་ཚོགས་ཆུང་གི་ཚོགས་གཙོ། རྫོང་ཆོས་ཕྱག་མཛོད། སཾ་བྷོ་ཊ་སློབ་གྲྭའི་སློབ་སྤྱི། ས་གནས་འཕྲོད་བསྟེན་སྨན་ཁང་གི་འགན་འཛིན། ས་གནས་སྨན་རྩིས་ཁང་གི་སྨན་པ། འོ་མ་མཉམ་འབྲེལ་ཚོགས་གཙོ། སྤྱི་མི་གཉིས། བརྒྱ་དཔོན་རྣམ་པ། རྩེད་རིགས་ཚོགས་གཙོ། དམག་ཟུར་ཚོགས་གཙོ། ས་གནས་བོད་ཀྱི་བུད་མེད་ལྷན་ཚོགས་དང་གཞོན་ནུ་ལྷན་ཚོགས་ཀྱི་ཚོགས་གཙོ་བཅས་ལྷན་ཞུགས་གནང་འདུག

དེ་རྗེས་ཚོགས་བཅར་བ་རྣམས་ཀྱིས་དོགས་འདྲི་གནང་བར། སྤྱི་འཐུས་རྣམ་གཉིས་ནས་ལན་འདེབས་གསལ་བཤད་འཐུས་ཚང་གནང་སྟེ། མཐར་སྤྱི་འཐུས་རྣམ་གཉིས་ནས་ས་གནས་ཀྱི་གནས་སྟངས་དང་། གཞིས་གྲོང་དང་ལས་བྱེད་དབར་གྱི་འབྲེལ་བ། ཆོལ་གསུམ་བོད་མིའི་ཆིག་སྒྲིལ་གྱི་གལ་གནད། ལྷག་པར་དུ་རྒྱལ་གཅེས་དཔའ་བོ་རང་བཙན་བློ་དགའ་ལགས་ཀྱིས་ཞལ་ཆེམས་སུ་བཞག་པ་ལྟར། བོད་མི་ཡོངས་ཀྱིས་དེ་དོན་ལག་ལེན་ལ་འཁྱེར་དགོས་པའི་རེ་བསྐུལ་དང་ལམ་སྟོན་ཟབ་མོ་གནང་སྟེ། ཕྱི་དྲོ་ཆུ་ཚོད་ ༥།༣༠ ཐོག་བཞུགས་མོལ་ཚོགས་འདུ་ལེགས་པར་གྲུབ་ཡོད་པ་བཅས།