སྐུ་ཞབས་ཨེན་ རང་གྷ་ས་མཡེ་མཆོག་རྒྱ་གར་ལྷོ་ཕྱོགས་པུ་ཌུ་ཅེ་རི་མངའ་སྡེའི་སྤྱི་ཁྱབ་བློན་ཆེན་དུ་བདམས་ཐོན་བྱུང་བར་དཔལ་ལྡན་ཚོགས་གཞོན་མཆོག་གིས་འཚམས་འདྲི་ཞུས་པ།

༄༅། །ཕྱི་ལོ་ ༢༠༢༡ ཟླ་ ༥ ཚེས་ ༡༠ ཉིན་དཔལ་ལྡན་བོད་མི་མང་སྤྱི་འཐུས་ཚོགས་གཞོན་ཨཅཱརྱ་ཡེ་ཤེས་ཕུན་ཚོགས་མཆོག་གིས་གཞིས་བྱེས་བོད་མི་ཡོངས་དང་། སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ། སྐུ་ཞབས་ཨེན་ རང་གྷ་ས་མཡེ་ (Shri N. Rangasamy ) མཆོག་རྒྱ་གར་ལྷོ་ཕྱོགས་པུ་ཌུ་ཅེ་རི་ (Puducherry) མངའ་སྡེའི་སྤྱི་ཁྱབ་བློན་ཆེན་དུ་ཐེངས་བཞི་པར་བདམས་ཐོན་བྱུང་བར་འཚམས་འདྲི་ཞུས་གནང་འདུག

འཚམས་འཕྲིན་ནང་འཁོད་དོན། པུ་ཌུ་ཅེ་རི་མངའ་སྡེའི་ནང་རྟེན་གཞི་བྱས་པའི་ཆོས་ཕྱོགས་སྤྱི་ཚོགས་ཀྱི་ཨོ་རོ་བྷིན་ཌུ་བཞུགས་གནས་ (Sri Aurobindo Ashram) དང་། ཨོ་རོ་ཝི་ལེ་ (Auroville) གྲོང་ཁྱེར་ནི་ལོ་རྒྱུས་ཐོག་སྙན་གྲགས་ཆེན་པོ་ཡོད་ཅིང་། དེས་མི་མང་སྟོང་ཕྲག་མང་པོའི་ཡིད་དབང་འཕྲོག་སྟེ་ཁུལ་དེར་གཟིགས་སྐོར་ཕེབས་ཀྱི་ཡོད།

པུ་ཌུ་ཅེ་རི་མངའ་སྡེའི་གཞུང་མང་གཉིས་ནས་སྤྱིར་བོད་ཀྱི་འཐབ་རྩོད་ཐོག་ད་བར་རྒྱབ་སྐྱོར་གནང་བ་དང་། ལྷག་པར་དུ་དེ་གའི་མངའ་སྡེའི་ནང་བཞུགས་པའི་བོད་མི་རྣམས་ལ་མཐུན་འགྱུར་རོགས་རམ་གནང་བར་ང་ཚོས་ཐུགས་རྗེ་ཆེ་ཞུ་རྒྱུ་དང་། ཆབས་ཅིག་སྐུ་ཉིད་ཀྱི་མངའ་གཞུང་ནས་མུ་མཐུད་བོད་དོན་ཐོག་རྒྱབ་སྐྱོར་གནང་རྒྱུའི་རེ་སྐུལ་ཞུ་རྒྱུ་ཡིན།

པུ་ཌུ་ཅེ་རི་མངའ་སྡེའི་གཞུང་གི་བཀའ་དྲིན་ལ་བརྟེན་ནས་ཨོ་རོ་ཝི་ལེ་ས་གནས་སུ་བོད་ཀྱི་རིག་གཞུང་བསྟི་གནས་ཁང་བཙུགས་ཐུབ་ཡོད་པ་དང་། དེས་བོད་ཀྱི་ཐུན་མོང་མ་ཡིན་པའི་རིག་གཞུང་མི་ཉམས་གོང་སྤེལ་དང་སྲུང་སྐྱོབ་ཐོག་ཕྱག་ལས་གནང་བཞིན་ཡོད། ཆབས་ཅིག་བསྟི་གནས་ཁང་དེ་ནས་བོད་དོན་དང་འབྲེལ་བའི་ལྷན་ཚོགས་སོགས་གོ་སྒྲིག་ཞུ་རྒྱུའི་མཐུན་འགྱུར་གནང་གི་ཡོད།

སྐུ་ཉིད་ནས་མཁྱེན་གསལ་ལྟར། རྒྱ་ནག་དམར་གཞུང་གིས་བོད་ས་ཡོངས་རྫོགས་བཙན་བཟུང་བྱས་པ་ནས་བཟུང་ད་བར་བོད་ནང་རྒྱ་ནག་དམར་གཞུང་གིས་མུ་མཐུད་གཞི་རྩའི་འགྲོ་བ་མིའི་ཐོབ་ཐང་བརྡལ་བཤིག་བཏང་དང་གཏོང་བཞིན་ཡོད་ཅིང་། ད་ལྟའི་བོད་ནང་གི་གནས་སྟངས་ནི་ཡ་ང་བ་ཞིག་དང་ཛ་དྲག་ཅན་ཞིག་ཡིན།

ད་ལྟའི་ཆར་རྒྱ་ནག་དམར་གཞུང་གིས་རྒྱ་གར་གཙོས་པའི་ཁྱིམ་མཚེས་རྒྱལ་ཁབ་མང་པོ་ཞིག་ལ་ས་མཚམས་ཀྱི་དཀའ་ངལ་བཟོས་དང་བཟོ་བཞིན་ཡོད་པ་དེས། རྒྱ་གཞུང་ལ་རྒྱ་སྐྱེད་རིང་ལུགས་ཀྱི་བསམ་བློ་ཡོད་པ་དང་། རྒྱ་གཞུང་ནས་འཆར་གཞི་གཏིང་ཟབ་བཏིང་བའི་ཐོག་འཛམ་གླིང་ཡོངས་ལ་དབང་སྒྱུར་ཐབས་བྱེད་བཞིན་ཡོད་པ་ར་སྤྲོད་གསལ་པོ་བྱེད་ཀྱི་ཡོད། དེ་ཡང་རྒྱ་ནག་དམར་གཞུང་གིས་ཁྲིམས་འགལ་ཐོག་བོད་ས་བཙན་བཟུང་མ་བྱས་གོང་ལ། བོད་དེ་སྟོབས་ཆེན་རྒྱལ་ཁབ་གཉིས་དབར་གྱི་བར་གནས་རྒྱལ་ཁབ་ (buffer zone) ལྟ་བུར་གནས་ཀྱི་ཡོད་སྟབས། བོད་ཀྱི་གནད་དོན་ནི་ཧ་ཅང་གི་གལ་ཆེན་པོ་ཆགས་ཀྱི་ཡོད།

རྒྱ་ནག་དམར་གཞུང་གིས་ཆེད་དུ་བཟོས་པའི་ཏོག་དབྱིབས་གཉན་རིམས་ཀྱིས་འཛམ་གླིང་ཡོངས་ལ་ལོ་གཉིས་ཙམ་རིང་མི་རྒྱུ་གཉིས་ཀྱི་དཀའ་ངལ་ཆེན་པོ་བཟོས་དང་བཟོ་བཞིན་ཡོད་པ་དེར་རྒྱ་ནག་གཞུང་ནས་འགན་ཁུར་དགོས་ཀྱི་ཡོད། ད་ལྟའི་ཛ་དྲག་གི་དུས་འདིར་ང་ཚོས་རྒྱ་གར་གཞུང་མང་གཉིས་ལ་གདུང་སེམས་མཉམ་སྐྱེད་ཞུ་རྒྱུ་དང་། མགྱོགས་མྱུར་ནད་ཡམས་ཀྱི་དཀའ་ངལ་འདི་ནས་གྲོལ་ཐུབ་པའི་སྨོན་ལམ་དང་རེ་བ་ཞུ་རྒྱུ་ཡིན།

བོད་མིའི་བླ་ན་མེད་པའི་དབུ་འཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་དགོངས་གཞི་ལྟར། ང་ཚོས་གཉིས་སྨན་དབུ་མའི་ལམ་གྱི་སྲིད་བྱུས་བཟུང་བའི་ཐོག་ནས་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་རྩ་ཁྲིམས་འོག་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་བྱེད་བཞིན་ཡོད་པ་དང་། དེ་ནི་བོད་རྒྱ་གཉིས་ཀར་ཁེ་ཕན་ཡོད་པ་ཞིག་ཡིན། དེ་བཞིན་ང་ཚོས་རྒྱ་ནག་གཞུང་གི་འགོ་འཁྲིད་དང་། ༧གོང་ས་མཆོག་གི་སྐུ་ཚབ་དབར་ཞི་བའི་གྲོས་མོལ་བསྐྱར་གསོ་ཡོང་ཐབས་བྱེད་བཞིན་ཡོད་ཀྱང་། ཕྱི་ལོ་ ༢༠༡༠ ཟླ་ ༡ པོའི་ནང་བོད་རྒྱ་འབྲེལ་མོལ་ཐེངས་དགུ་པ་གནང་བའི་རྗེས་འབྲེལ་མོལ་མཚམས་ཆད་ཡོད། སྐུ་ཉིད་དང་། མངའ་སྡེའི་གཞུང་ནས་བོད་རྒྱ་ཞི་བའི་གྲོས་མོལ་བསྐྱར་གསོ་ཡོང་ཐབས་དང་། བོད་ཀྱི་འཐབ་རྩོད་ཐོག་མུ་མཐུད་རྒྱབ་སྐྱོར་གནང་རྒྱུའི་རེ་བ་ཡོད།

ངོས་དང་། བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་ལ་ཕྱི་ལོ་ ༢༠༡༦ ལོར་རྒྱལ་ས་ལྡི་ལིར་སྐུ་ཉིད་དང་ལྷན་མཇལ་འཕྲད་དང་། དེ་བཞིན་སྐུ་ཉིད་ཀྱི་སྲིད་དོན་ཚོགས་པའི་རྒྱ་གར་དབུས་གྲོས་ཚོགས་འཐུས་མི་དང་། མངའ་སྡེའི་གྲོས་ཚོགས་འཐུས་མི་བཅས་ཐེངས་མང་མཇལ་འཕྲད་ཀྱིས་བོད་དོན་སྐོར་བཀའ་བསྡུར་གནང་རྒྱུའི་གོ་སྐབས་བྱུང་སོང་། དེ་མཚུངས་འབྱུང་འགྱུར་སྐུ་ཉིད་དང་ལྷན་སླར་ཡང་མཇལ་འཕྲད་གནང་ཐུབ་རྒྱུའི་རེ་བ་བྱེད་བཞིན་ཡོད།

ངས་སླར་ཡང་སྐུ་ཉིད་དང་། སྐུ་ཉིད་ཀྱི་སྲིད་དོན་ཚོགས་པར་འོས་བསྡུའི་རྒྱལ་ཁ་ཐོབ་པར་འཚམས་འདྲི་ཞུ་རྒྱུ་དང་། སྐུ་ཉིད་ཀྱི་ལས་དོན་ཐམས་ཅད་ལམ་ལྷོངས་ལྡན་པ་ཡོང་བའི་སྨོན་འདུན་ཞུ་རྒྱུ་ཡིན་ཞེས་འཁོད་འདུག་པ་བཅས། །