༄༅། །བཀུར་འོས་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་རྒྱས་མཆོག་ལ།
ཆེད་ཞུ། སྐབས་བཅུ་བདུན་པའི་གྲོས་ཚོགས་ཚོགས་དུས་ ༦ པ་དེ་བཞིན་བཙན་བྱོལ་བོད་མིའི་བཅའ་ཁྲིམས་དོན་ཚན་ཞེ་དགུ་པའི་ནང་གསེས་ ༢ པ་ལྟར། སྤྱི་འཐུས་ཉུང་མཐའི་གྲངས་ཚད་མ་ལོངས་པར་ཚོགས་འདུ་ཉིན་གྲངས་བདུན་ལྷག་འཕར་འགྱངས་བྱེད་དགོས་བྱུང་ན་ཚོགས་གཙོ་སྦྲེལ་པོས་ཚོགས་འདུ་འཕར་འགྱངས་ཀྱི་ཐག་གཅོད་བྱ་རྒྱུ་ཞེས་གསལ་བ་ལྟར། ཕྱི་ཟླ་ ༩ ཚེས་ ༢༨ ཉིན་ རེ་ཞིག་ཚོགས་འདུ་འཕར་འགྱངས་དང་། ཚོགས་དུས་འདིའི་ལས་དོན་ལྷག་མ་རྣམས་མུ་མཐུད་བསྐྱང་རྒྱུའི་དུས་ཚོད་གཏན་འཁེལ་བྱུང་མཚམས་འབྲེལ་ལམ་ཞུ་རྒྱུ་གནང་བ་ལྟར། ཚོགས་དུས་དྲུག་པའི་ལས་དོན་མུ་མཐུད་སྐྱོང་དགོས་རིགས་ཕྱི་ལོ་ ༢༠༢༣ ཕྱི་ཟླ་ ༡༢ ཚེས་ ༢༥ ནས་ཚེས་ ༢༩ བར་ལས་ཉིན་ལྔ་བསྐྱང་གཏན་འཁེལ་བའི་ཡིག་ཆུང་སྔོན་སོང་ཡང་། ད་ཆ་མཚན་གཞུང་ཟུར་གསལ་སྤྱི་འཐུས་གྲངས་ ༡༦ ནས་གྲོས་ཚོགས་ཚོགས་བཅར་ཐུབ་མིན་ཡིག་ཐོག་དགོངས་ཞུ་འབྱོར་བར་བརྟེན། སླར་ཡང་བཅའ་ཁྲིམས་དོན་ཚན་ཞེ་དགུ་པའི་ནང་གསེས་ ༢ པའི་དགོངས་དོན་འཕར་འགྱངས་ཀྱིས་ཚོགས་དུས་དྲུག་པའི་ལས་དོན་མཇུག་སྐྱོང་དགོས་རིགས་ཕྱི་ལོ་ ༢༠༢༤ ཟླ་ ༣ ཚེས་ ༡༣ རེས་གཟའ་ལྷག་པ་ནས་ཚེས་ ༡༦ རེས་གཟའ་སྤེན་པ་བར་ལས་ཉིན་བཞི་རིང་བསྐྱང་གཏན་འཁེལ་སོང་བས། ཚོགས་མི་རྣམ་པ་དུས་ཐོག་ཚོགས་བཅར་ཐོག སྤྱི་འཐུས་རྣམ་པས་ཕྱི་ཚེས་ ༡༢ རེས་གཟའ་མིག་དམར་ཉིན་ཚོགས་དྲུང་ལས་ཁུངས་སུ་ངོ་བཅར་འབྱོར་ཐོ་འགོད་གནང་ཡོང་བ་དང་། དེ་བཞིན་ཕྱོགས་བཞུགས་སྤྱི་འཐུས་རྣམ་པར་བཞུགས་མཚེར་ཚོགས་དྲུང་ལས་ཁུངས་ནས་གོ་སྒྲིག་ཞུ་དགོས་རིགས་ཕྱི་ལོ་ ༢༠༢༤ ཟླ་ ༢ ཚེས་ ༡༡ འགྱངས་མེད་ཡིག་ཐོག་གནང་དགོས་ཞེས་ཕེབས་སོང་བ་དགོངས་མངའ་ཞུ། སྤྱི་འཐུས་ཚོགས་དྲུང་ལས་ཁུངས་ནས་ ༢༠༢༣ ཟླ་ ༡༢ ཚེས་ ༢༡ ལ་
ཕུལ།།