ཕྱི་ལོ་ ༢༠༡༢ ཟླ་ ༣ པ་དང་༤ པའི་ནང་འབའ་རྫོང་(གལ་པ་སུམ་མདོ་)ཁོངས་ཀྱི་ཤིང་ཁྲི་དགོན་པ་གཙོས། སེར་སྐྱ་བསྡོམས་པའི་༧༠ ཡས་མས་རྒྱ་ནག་གཞུང་གིས་འཇུ་བཟུང་བཀག་ཉར་བྱས་པ་དང་། མང་ཆེ་བ་ད་ལྟ་གློད་གྲོལ་བཏང་ཡོད་ནའང་ཁག་ཅིག་ལ་དུས་བཀག་ཁྲིམས་ཐག་བཅད་འདུག ཉེ་ཆར་གནས་ཚུལ་ཤེས་རྟོགས་བྱུང་བ་ལྟར་ན་གྲྭ་འཇམ་དཔལ་བཟང་པོ་(འཇམ་དཔལ་བཟང་པོ་ནི་རྔ་པོ་བོད་རིགས་རང་སྐྱོང་ཁུལ་ཁོངས་གཏོགས་ཀྱི་སྨེ་བ་དགོན་པ་ནས་ཤིང་ཁྲི་དགོན་པར་སློབ་གཉེར་ཆེད་ཡོང་བ་ཡིན་འདུག)ལ་ལོ་གཅིག་དང་། ཀུན་བཟང་རིང་གྲོལ་ལ་ལོ་གཅིག་དང་ཟླ་དྲུག་གི་དུས་བཀག་ཁྲིམས་ཐག་བཅད་དེ། ཁོང་གཉིས་ཟི་ལིང་གི་བཙོན་ཁང་ཞིག་ཏུ་ཁྲིད་ཡོད་འདུག
དེ་སྔོན་བུད་མེད་པ་སངས་ཞེས་པ་ལ་ལོ་གཅིག་དང་། རྡོ་རྗེ་རྒྱལ་ལ་ལོ་གཅིག་དང་ཟླ་བ་གསུམ་གྱི་དུས་བཀག་ཁྲིམས་ཐག་བཅད་དེ་ཁོང་གཉིས་ཀྱང་ཞིང་ཆེན་གྱི་བཙོན་ཁང་ཞིག་ཏུ་ཁྲིད་ཡོད་འདུག གཞན་ཡང་མིང་མ་ཤེས་པའི་ཁོལ་ནགས་སྡེ་བའི་བུད་མེད་ཅིག་ལ་ལོ་གཅིག་དང་ཟླ་གསུམ་གྱི་ཁྲིམས་ཆད་དང་། ཁོལ་ལྡན་སྡེ་བའི་རིན་ཆེན་རྒྱལ་ཞེས་པའི་བཟའ་ཟླ་ལ་ཟླ་བ་དྲུག་གི་ཁྲིམས་ཐག་བཅད་དེ་ད་ལྟ་འབའ་རྫོང་ཐོག་ཏུ་བཙོན་འཇུག་བྱས་ཡོད་འདུག ད་དུང་གྲྭ་ཡེ་ཤེས་རྡོ་རྗེ་དང་གྲྭ་ཚུལ་ཁྲིམས་རིན་ཆེན། གྲྭ་བསྟན་འཛིན་རང་ཤར། གྲྭ་བློ་བཟང་བཅས་དང་། མི་སྐྱ་རྡོ་རྗེ་དོན་གྲུབ་དང་། གུ་རུ་རྡོ་རྗེ། ཚེ་བརྟན་རྒྱལ། ཚེ་རིང་དབང་རྒྱལ་བཅས་འབའ་རྫོང་ཐོག་ཏུ་བཀག་ཉར་བྱས་ཡོད་འདུག
རྒྱ་ནག་གཞུང་གིས་ཟླ་ ༣ ཚེས་ ༡༨ ཉིན་མཚོ་སྔོན་ཞིང་ཆེན་མཚོ་ལྷོ་ཁུལ་འབའ་རྫོང་དུ་སྐྱ་སེར་གཉིས་ཀྱི་ཞི་བའི་ངོ་རྒོལ་བྱས་པའི་རྐྱེན་གྱིས། ཟླ་འདིའི་ཕྱི་ཚེས་ ༡༤ བར་འབའ་ཤིང་ཁྲི་དགོན་པའི་མཁན་པོ་གདན་གྲོལ་ལགས་གཙོས་པའི་གྲྭ་པ་༡༧ དང་། མི་སྐྱ་ ༦ བཅས་འཛིན་བཟུང་བཀག་ཉར་བྱས་ཡོད་པ་ལྟར། ཉེ་ལམ་འབའ་རྫོང་ཁྲིམས་ཁང་གིས་ཁྲིམས་རྩོད་པ་དང་ནང་མི་སོགས་ཅི་ཡང་མེད་པའི་ཐོག འཁྱམས་སྐོར་རྡོ་རྗེ་རྒྱལ་ལ་ལོ་ ༡ དང་ཟླ་བ་ ༣ གྱི་དུས་བཀག་བཙོན་འཇུག་ཁྲིམས་ཐག་བཅས་ཡོད་པ་མ་ཟད། རྡུང་ལེན་པ་རྡོ་རྗེ་ཚེ་བྷེའི་བཟའ་ཟླ་པ་སངས་ལ་ལོ་ ༡ དུས་བཀག་བཙོན་འཇུག་གི་ཁྲིམས་ཐག་བཅད་འདུག་ལ། ད་དུང་ཉིན་དེར་འཛིན་བཟུང་བྱས་པའི་གྲྭ་བ་ཁག་ཅིག་དང་། རྡུང་ལེན་པ་རྡོ་རྗེ་ཚེ་བྷེ་དང་རྡོ་རྗེ་དོན་འགྲུབ། དཔའ་ཐར་རྒྱལ། ཚེ་བརྟན་རྒྱལ་བཅས་མི་སྐྱ་ཁག་ཅིག་འབའ་རྫོང་གི་ཁྲིམས་ཁང་དུ་བཀག་ཉར་གྱིས་ཉིན་མཚན་དབྱེར་མེད་དུ་སློབ་གསོ་སྤྲོད་བཞིན་ཡོད་འདུག
ཕྱི་ལོ་༢༠༡༢ ཟླ་ ༥ ཚེས་ ༡ ཉིན་བཀོད།