༄༅། །ཕྱི་ལོ་ ༢༠༢༣ ཟླ་ ༡༢ པའི་ཚེས་ ༦ ཉིན་རྒྱབ་ཆུ་ཚོད་ ༢།༣༠ ཐོག་བོད་མི་མང་སྤྱི་འཐུས་དགེ་བཤེས་ལྷ་རམས་པ་ཨ་ཀྲུག་ཚེ་བརྟན་མཆོག་དང་། སྤྱི་འཐུས་དགེ་བཤེས་ལྷ་རམས་པ་གོ་བོ་བློ་བཟང་ཕན་བདེ་མཆོག་རྣམ་གཉིས་ནས་༧སྐྱབས་རྗེ་དགའ་ལྡན་ཁྲི་རིན་པོ་ཆེ་རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག་ལ་མཇལ་ཁ་ཞུས་གནང་བ་དང་། སྐབས་དེར་རིན་པོ་ཆེ་མཆོག་གིས་མ་འོངས་པར་ང་ཚོའི་སྤྱི་ཚོགས་ནང་བོད་ཀྱི་སྐད་ཡིག་ཐོག་ཡར་རྒྱས་གོང་འཕེལ་གཏོང་དགོས་པ་དང་། ལྷག་པར་དུ་བོད་མི་ཚང་མས་ནང་དོན་རིག་པའི་ཐོག་ཤུགས་སྣོན་རྒྱག་དགོས་པའི་བཀའ་སློབ་དང་། དེ་བཞིན་བོད་མི་མང་སྤྱི་འཐུས་ལྷན་ཚོགས་ཀྱི་ད་ལྟ་འགྲོ་བཞིན་པའི་ལས་འཆར་སྐོར་དྲི་བ་གནང་བར། སྤྱི་འཐུས་རྣམ་གཉིས་ནས་བོད་མི་མང་སྤྱི་འཐུས་རྣམ་པ་སྡེ་ཚན་སོ་སོར་ཆ་བགོས་ཀྱིས་རྒྱ་གར་མངའ་སྡེ་ཁག་གི་ནང་བོད་དོན་ཞུ་སྐུལ་གནང་རྒྱུའི་ལས་རིམ་སྐོར་དང་། ད་ལྟའི་ཆར་སྡེ་ཚན་གསུམ་གྱིས་ཞུ་སྐུལ་འགྲོ་མུས་ཡིན་པའི་སྐོར་སྙན་སེང་ཞུས་པར། རིན་པོ་ཆེ་མཆོག་གིས་བོད་མི་མང་སྤྱི་འཐུས་ལྷན་ཚོགས་ཀྱི་ལས་འཆར་འདིར་བསྔགས་བརྗོད་དང་། མ་འོངས་པར་ཡང་མུ་མཐུད་བོད་དོན་ཞུ་སྐུལ་གྱི་ལས་འགུལ་གང་མང་སྤེལ་དགོས་སྐོར་གསུངས་གནང་མཛད་འདུག
མཇལ་འཕྲད་སྐབས་སྦེལ་ཀོབ་ལུགས་བསམ་ས་གནས་འགོ་འཛིན་དང་། ལས་དྲུང་། སྤྱི་མི་བརྒྱ་དཔོན་ཁག་གི་སྐུ་ཚབ། ས་གནས་རང་བདེན་ཚོགས་ཆུང་གི་ཚོགས་གཙོ་བཅས་མཉམ་བཅར་ཞུས་འདུག་པ་བཅས།