༄༅། །བོད་ཀྱི་གསོ་བ་རིག་པའི་ལྷན་ཚོགས་ཀྱི་འགན་འཛིན་ལྷན་རྒྱས་ནས་བོད་ཀྱི་གསོ་བ་རིག་པའི་ལྷན་ཚོགས་ཀྱི་གནས་བབ་དང་འབྲེལ་ཏེ་ཁྲིམས་ཡིག་བསྐྱར་ཞིབ་དགོས་གལ་གྱི་ཡིག་ཐོག་སྙན་ཞུ་ཞིག་འབྱོར་བ་ལྟར། བོད་མི་མང་སྤྱི་འཐུས་ལྷན་ཚོགས་ཀྱི་དཔལ་ལྡན་ཚོགས་གཙོ་སྦྲེལ་པོ་མཆོག་གིས་རྒྱུན་ལས་དང་བཀའ་བསྡུར་གྱིས་ཚོགས་ཆུང་ཞིག་བཙུག་རྒྱུ་གནང་བ་ལྟར་ཚོགས་ཆུང་གི་མི་འགྲོར་སྤྱི་འཐུས་དགེ་བཤེས་ལྷ་རམས་པ་ཨ་ཀྲུག་ཚེ་བརྟན་མཆོག་དང་། སྤྱི་འཐུས་སློབ་དཔོན་ཐུབ་བསྟན་རྒྱལ་མཚན་མཆོག སྤྱི་འཐུས་དགེ་བཤེས་རྔ་བ་གངས་རི་མཆོག སྤྱི་འཐུས་ཚེ་རིང་དབྱངས་ཅན་མཆོག་བཅས་བསྐོ་བཞག་གནང་།
ཕྱི་ལོ་ ༢༠༢༤ ཟླ་ ༤ ཚེས་ ༣༠ ཉིན་གྱི་ཞོགས་པ་ཆུ་ཚོད་ ༡༠།༠༠ ཐོག་ཚོགས་ཆུང་དངོས་སུ་འགོ་འཛུག་གི་ཚོགས་ཆུང་གི་ཚོགས་གཙོ་སྤྱི་འཐུས་དགེ་བཤེས་ལྷ་རམས་པ་ཨ་ཀྲུག་ཚེ་བརྟན་མཆོག་དང་། ཚོགས་ཆུང་གི་དྲུང་ཆེ་སྤྱི་འཐུས་སློབ་དཔོན་ཐུབ་བསྟན་རྒྱལ་མཚན་མཆོག་རྣམ་གཉིས་སྤྱི་མོས་ཐོག་བསྐོས་ནས་འབྲེལ་ཡོད་ཡིག་ཆ་ཁག་གཟིགས་ཞིབ་གནང་རྒྱུ་དང་། དེ་བཞིན་འབྲེལ་ཡོད་འཕྲོད་བསྟེན་ལས་ཁུངས་སོགས་ལ་འདྲི་ཞིབ་གནང་དགོས་ཆགས་རྒྱུར་སྐབས་མཚམས་འབྲེལ་བ་གནང་རྒྱུ་རེད་འདུག་པ་བཅས།
