༄༅། དེ་རིང་སྐབས་བཅོ་བརྒྱད་པའི་གྲོས་ཚོགས་ཀྱི་ཚོགས་དུས་གཉིས་པ་དེ་ལས་བསྡོམས་ཀྱི་གྲོས་ཚོགས་ཆགས་བསྡད་ཡོད་པ་རེད། དེ་ཡིན་དུས་འདིའི་ནང་ལ་ལྷན་ཁང་ཁག་གི་ལས་བསྡོམས་རྒྱས་པ་དང་བསྡུས་པ་ཡོངས་རྫོགས་ལ་སྤྱི་འཐུས་རྒྱུན་ལས་དང་། དེ་ག་ནང་བཞིན་བཀུར་འོས་སྤྱི་འཐུས་རྣམ་པས་གྲོས་ཚོགས་ནང་ལ་ཆ་ཤས་བཞེས་པའི་བརྒྱུད་རིམ་ནང་ལ་བཀུར་འོས་སྤྱི་འཐུས་རྣམ་པ་ས་བགོས་ཁག་ལ་ཕྱོགས་ཕེབས་གནང་བ་དང་། དེ་བཞིན་མི་མང་གི་སྐུ་ཚབ་མཚོན་པའི་ཐོག་ནས་མི་མང་གི་བདེ་བ་སྡུག་བསྔལ་དང་རེ་འདུན་ག་རེ་ཡིན་པ་དེ་དག་ཚང་མ་ལྷན་ཁང་ཁག་ལ་ཞུ་རྒྱུའི་གོ་སྐབས་བྱུང་བ་ཙམ་དུ་མ་ཟད། གནད་དོན་སྣ་མང་གི་ཐོག་ལ་བཀའ་བློན་རྣམ་པ་ཚོས་བཀུར་འོས་སྤྱི་འཐུས་རྣམ་པའི་ཐུགས་དོགས་དང་། མི་མང་གི་རེ་བ་དེ་འགྲུབ་ཐུབ་རྒྱུ་ཡོད་མེད་ཀྱི་གནས་སྟངས་ག་རེ་ཡོད་མེད་དེ་གསལ་པོ་ཞིག་ཆགས་བསྡད་ཡོད་པ་རེད་ཅེས་ཞུ་རྒྱུ་ཡིན།
དེ་ནས་བཀུར་འོས་སྤྱི་འཐུས་རྣམ་པས་ཆ་ཤས་ལེན་སྟངས་ལ་མཚོན་པ་ཡིན་ན། ནང་སྲིད་ལས་ཁུངས་ལ་བཀུར་འོས་སྤྱི་འཐུས་ ༤༣ གྱིས་ཆ་ཤས་ལེན་ཡོད་པ་རེད། དེ་ནས་འཕྲོད་བསྟེན་ལས་ཁུངས་ཀྱི་ཐོག་ལ་དུས་ཚོད་རྐྱེན་པས་བཀུར་འོས་སྤྱི་འཐུས་ ༡༧ གྱིས་ཆ་ཤས་ལེན་ནས་ལྷན་ཁང་ཚང་མའི་ནང་ལ་ཆ་སྙོམས་ཀྱིས་མར་བརྩིས་པ་ཡིན་ན། བཀུར་འོས་སྤྱི་འཐུས་ ༢༩།༢༩ ཡི་ཆ་སྙོམས་ཀྱིས་ཆ་ཤས་ལེན་པ་དེ་ལྟར་ཆགས་བསྡད་ཡོད་ཅེས་ཞུ་རྒྱུ་གཅིག་ཡིན། དེ་ཡིན་དུས་དཔེར་ན། ང་རང་ཚོ་འཐབ་རྩོད་བྱེད་མཁན་གྱི་མི་རིགས་ཤིག་ཡིན་པའི་ཆ་ནས་མིའི་སྤུས་ཚད་དེ་གལ་ཆེན་པོ་ཞིག་ཡིན་པ་དང་། ཕྲུ་གུ་གསོ་སྐྱོང་གི་ཐོག་ནས་དེང་སང་དེང་རབས་ཀྱི་བཟའ་འཐུང་གིས་རྐྱེན་པས་ཕྲུ་གུར་ནད་ན་ཚ་སྔར་གོ་མ་མྱོང་བ་མང་པོ་ཞིག་ཡོང་གི་ཡོད་པ་དང་། དེ་འདྲའི་གནས་བབ་ཀྱི་ཐོག་ནས་ང་ཚོར་སེམས་འཚབ་དེ་འདྲ་མ་ཡོང་བའི་ཆེད་དུ་ཐབས་ལམ་བཙལ་དགོས་པ་གལ་ཆེན་པོ་ཞེ་པོ་ཞིག་བྱུང་ཡོད་པ་རེད། ཚོགས་གཙོའི་ཐོག་ནས་དེ་གལ་ཆེན་པོ་ཞེ་པོ་ཞིག་བརྩི་ཡི་ཡོད། གང་ཡིན་ཟེར་ན། རྒྱ་ནག་ནང་ལོགས་ལ་ང་རང་ཚོའི་གཞིས་བཞུགས་བོད་མི་རྣམས་ལ་ཁྱིམ་ཚང་གཅིག་ལ་ཕྲུ་གུ་གཅིག་ཙམ་བྱས་ནས་གནས་བབ་ཀྱི་ཐོག་ནས་ཕྲུ་གུ་མང་པོ་ཞིག་སྐྱེས་པ་ཡིན་ནའང་ཐེམ་ཐོ་མ་རག་པར་བཟའ་འཐུང་གི་དཀའ་ངལ་འཕྲད་པའི་དཀའ་ངལ་དེ་འདྲ་ཡོད་རེད། ང་རང་ཚོ་འདིར་རང་དབང་ལུང་པའི་ནང་ལ་ཕྲུ་གུ་ག་ཚོད་སྐྱེས་སྐྱེས་ཡོད་རེད་དེ། ཕྲུ་གུའི་སྐྱེས་ཚད་དེ་ལ་ཆ་བཞག་པ་ཡིན་ན་ལོ་རེ་ནས་ལོ་རེར་ཉུང་དུ་འགྲོ་ཡི་ཡོད་པའི་གནས་སྟངས་ཤིག་རེད། དེ་དག་ཉུང་དུ་འགྲོ་བ་དང་མཉམ་དུ་གང་སྐྱེས་པ་དེ་དག་ཀྱང་ན་ཚ་འདྲ་མིན་གྱིས་རྐྱེན་པས་སེམས་ཁམས་རེད། སྐད་ཆ་བཤད་རྒྱུའི་དཀའ་ངལ་ཡོད་པ་ཞིག་སྐྱེས་པ་ཡིན་ན་རང་བཞིན་གྱིས་ང་ཚོ་འཐབ་རྩོད་བྱེད་མཁན་གྱི་མིའི་ནུས་པ་དེ་ཉམས་ཆག་འགྲོ་ཡི་ཡོད་པ་དེ་ང་ཚོའི་ཞན་ཆ་རེད། དེར་བརྟེན་སོ་སོ་ཨ་མ་ཞིག་དང་དགེ་རྒན་ཞིག་ཡིན་པའི་ཆ་ནས་ཕྲུ་གུ་བྱིས་པ་ཟེར་མཁན་དེ་དང་པོ་སྐྱེད་མར་འཁོར་ཡོང་བའི་སྐབས་སུ་སྦྲུམ་མའི་གནས་སྐབས་ལ་མ་ཡི་ཟས་བཅུད་བསྟེན་སྟངས། སྨན་བསྟེན་སྟངས་དེ་དག་གལ་ཆེན་པོ་ཞེ་པོ་ཆགས་ཀྱི་ཡོད་པ་རེད། དེ་ཙམ་དུ་མ་ཟད་པའི་ང་ཚོ་བོད་པ་གཙང་མ་ཞིག་སྐྱེས་དགོས་ཀྱི་འདུག་ན། མ་འདི་ཡིས་བོད་ཀྱི་ཡི་གེ་དང་སྐད། བོད་ཀྱི་གཞས། ཁྱིམ་ཚང་རང་གི་ནང་ལ་བོད་ཀྱི་ཁོར་ཡུག་དེ་བསྐྲུན་དགོས་པ་དེ་གལ་ཆེན་པོ་ཞིག་ཆགས་ཀྱི་ཡོད་པ་རེད། རྒྱ་བལ་འབྲུག་གསུམ་ལ་ཆ་བཞག་པ་ཡིན་ན་ང་ཚོར་ཁོར་ཡུག་འདི་གང་ལ་གང་འཚམ་ཞིག་ཡོད་བསྡད་པ་རེད། ཡིན་ནའང་ཕྱི་རྒྱལ་གྱི་རྒྱལ་ཁབ་ལ་ཡོད་པའི་ཕྲུ་གུ་བུ་རྒྱུད་དེ་དག་བོད་ཀྱི་སྐད་ཡིག་དང་། བོད་ཀྱི་རིག་གཞུང་། བོད་ཀྱི་གནས་བབ་ཀྱི་ཁོར་ཡུག་དེ་མེད་པའི་རྐྱེན་རང་བཞིན་གྱིས་དཀའ་ངལ་ཞིག་ཆགས་ཀྱི་ཡོད་དུས། སྦྲུམ་མའི་གནས་སྐབས་ནས་ཕ་མ་ཚོས་དེའི་ཐོག་ལ་བསམ་གཞིག་བྱེད་དགོས་རྒྱུ། ཕྲུ་གུ་སྐྱེས་ཚར་བའི་རྗེས་སུ་ཡིན་ནའང་ཁྱིམ་ཚང་ནང་ལ་རེད། དཔེར་ན། བཅའ་སྡོད་སློབ་གྲྭའི་ནང་ལ་ང་ཚོའི་ན་གཞོན་དེ་དག་ལ་བོད་ཀྱི་རི་མོ་ཙམ་ཡང་མཐོང་རྒྱུ་མེད་པའི་སོ་སོའི་སྐད་དང་རིག་གཞུང་། ཆོས་དང་བཅས་པ་སྦྱང་རྒྱུ་ཕར་བཞག དེ་འདྲའི་གནས་སྐབས་འདུག་ཟེར་གྱི་ཡོད་པ་རེད། ང་ཚོ་རང་དབང་ལུང་པའི་ནང་ལ་ཡོད་པ་ཚོས་སོ་སོའི་ཕྲུ་གུ་ལ་ཁོར་ཡུག་བསྐྲུན་ནས་བོད་ཀྱི་རི་མོ་རེད། བོད་ཀྱི་ལོ་རྒྱུས་རེད། བོད་ཀྱི་དཔའ་བོ་དཔའ་མོའི་པར་རིས་དང་སྒྲུང་དེ་དག་ངེས་པར་དུ་དགོས་རེད། ང་ཚོས་གྲོས་ཚོགས་ཀྱི་ནང་ལ་རྒྱལ་ཞེན་བསླབ་དགོས་རེད་ཟེར་དུས། དེ་དག་གི་ལམ་ནས་ཆུང་དུས་ནས་དེའི་གནས་བབ་བསྐྲུན་དགོས་པ་དེ་གལ་ཆེན་པོ་ཆགས་ཀྱི་ཡོད་རེད་ཅེས་ཞུ་རྒྱུ་ཡིན།
དེ་ནས་འདི་ལས་ཛ་དྲག་ཆེ་བ་ཞིག་ལ་སློབ་གྲྭ་ཁག་གི་ནང་མྱོས་རྫས་ངན་གོམས་ཀྱི་གནས་བབ་ཡོད་པ་དང་། དེ་དག་ལ་མཐུན་རྐྱེན་སྦྱར་མཁན་གྱི་ནང་ལ་དགེ་རྒན་གྱིས་མཐུན་རྐྱེན་སྦྱར་གྱི་ཡོད་པ་གོ་ཐོས་བྱུང་བའི་གནས་ཚུལ་དེ་ཚོ་དཔེ་ཛ་དྲག་ཆེན་པོ་རེད་དྲན་གྱི་འདུག དེ་ཡིན་དུས་སློབ་གྲྭ་ཁག་གི་དགེ་རྒན་རེད། ཕ་ཚབ་དང་མ་ཚབ་རེད། དེ་དག་ལ་བོད་ཀྱི་ན་གཞོན་གཅེས་སྐྱོང་བྱེད་རྒྱུའི་ནང་ལ་ས་མཚམས་འགལ་བའི་སྒྲིག་ལམ་ཙམ་མ་ཡིན་པར་ཕྲུ་གུ་ཚོས་དེ་འདྲའི་ངན་གོམས་ཐོག་ལ་ཡོང་རྒྱུའི་གཞི་ག་རེ་འདུག དེ་དག་ག་རེ་བྱས་ནས་བེད་སྤྱོད་བྱེད་རྒྱུའི་ཐབས་ཤེས་བྱེད་ཀྱི་འདུག་གམ། དེ་དག་རྩད་བཅད་པའི་ཐོག་ནས་ངན་གོམས་མ་ཐེབས་པའི་ཐབས་ལམ་བཙལ་དགོས་རྒྱུ་དེ་གལ་ཆེན་པོ་ཞེ་པོ་ཞིག་རེད་དྲན་གྱི་འདུག
དེ་རིང་ང་ཚོའི་ལས་བསྡོམས་ཀྱི་གྲོས་ཚོགས་འདིའི་ནང་ལ་དཔལ་ལྡན་བཀའ་ཤག་རེད། དེ་ག་ནང་བཞིན་འདེམས་བསྐོ་ལྷན་ཁང་དབར་ལ་བར་ལམ་ཞིག་ནས་ལས་བྱེད་གསར་བསྐོ་མ་ཐུབ་པའི་ས་སྟོང་ལྷག་བསྡད་པ་དེར་ང་ཚོས་དེ་རིང་སྒྲིག་གཞི་བསྐྱར་བཅོས་ཀྱི་ཐོག་ནས་བཀའ་ཤག་གིས་གང་བསྣམས་ཕེབས་པ་དེར་ང་ཚོའི་གྲོས་ཚོགས་ཀྱི་ཐོག་ནས་བསྐྱར་བཅོས་དེ་དག་ཚང་མར་ངོས་བཞེས་ཐུབ་པའི་ཐོག་ནས་མ་འོངས་པ་ལ་རེད། ད་ལྟའི་ཆ་ལ་ལས་ཀ་མང་པོ་ཡོད་པ་ཡིན་ནའང་། དཔེར་ན། ཕྱི་དྲིལ་ལས་ཁུངས་ལ་ཆ་མཚོན་པ་ཡིན་ན། མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཡིག་དང་འབྲེལ་བའི་ལས་འཆར་མང་པོ་ཞེ་པོ་ཞིག་ཡོད་བསྡད་པ་གཅིག དེ་ག་ནང་བཞིན་གྱི་དཔལ་ལྡན་སྲིད་སྐྱོང་མཆོག་གིས་བོད་ནང་ལ་བོད་ཀྱི་ཆོས་དང་རིག་གཞུང་། སྐད་ཡིག ཁོར་ཡུག་བཅས་པ་གང་དང་གང་ལ་རྒྱ་མིས་དོ་ཕོག་བཏང་གི་ཡོད་པ་དེ་དག་ཚང་མར་ཞིབ་འཇུག་བྱས་པའི་ཐོག་ནས་སྤྱི་སྒེར་དང་། ཚོགས་སྡེ་སུས་བེད་སྤྱོད་བཏང་བ་ཡིན་ན་གཏོང་རྒྱུ་ཡོད་པ་ཞིག་བཟོ་ཡི་ཡོད་གསུངས་པ་དེ་དག་རླབས་ཆེན་ཞེ་པོ་ཞིག་བྱུང་འདུག ཐུགས་རྗེ་ཆེ་གནང་ཞེས་ཞུ་རྒྱུ་ཡིན། གྲོས་ཚོགས་ཀྱི་ཐོག་ནས་ཀྱང་དེ་འདྲ་ཞིག་ང་ཚོས་དགོས་ཀྱི་འདུག་ཅེས་ཞུས་ཡོད་པ་རེད། དེ་ག་ནང་བཞིན་དེ་དག་བཟོས་ཚར་བའི་རྗེས་ལ་ང་རང་ཚོ་ཚང་མས་བེད་སྤྱོད་གཏོང་དགོས་པ། རེད་པཱ། བོད་མི་རིགས་ཀྱི་འཐབ་རྩོད་འདི་ང་ཚོས་ལམ་ལ་འཐོན་ནས་སྐད་འབོད་བརྒྱབ་པ་ཙམ་གྱིས་བོད་ཀྱི་བདེན་མཐའ་གསལ་རྒྱུ་དེ་ཡོད་མ་རེད། ལམ་དབུ་མའི་ཐོག་ནས་བོད་དོན་རྩོད་མཁན་ཡིན་ནའང་རེད། བོད་རང་བཙན་གྱི་ཐོག་ནས་རྩོད་མཁན་ཡིན་པ་རེད། ཚང་མ་གྲོས་ཚོགས་ནང་ལ་བཀའ་མོལ་བྱུང་བ་ནང་བཞིན། བོད་དོན་བདེན་མཐའ་གསལ་བར་སུས་ནུས་པ་བཏོན་གྱི་ཡོད་པ་ཡིན་ནའང་དེ་དག་ལ་གྲོས་ཚོགས་ཀྱི་ཐོག་ནས་ལེགས་གསོལ་ཞུ་ཡི་ཡོད། ད་ལྟའང་ནིའུ་ཡོག་ཁུལ་ལ་ཚ་ཚ་འུར་འུར་གྱིས་སྤེལ་བསྡད་ཡོད་རེད། དེ་དག་ལ་བསྔགས་བརྗོད་ཞུ་ཡི་ཡོད། མི་སྒེར་གྱི་ཐོག་ནས་སྤེལ་མཁན་ཡོད་པ་ཡིན་ནའང་དེ་དག་ལ་བསྔགས་བརྗོད་ཞུ་ཡི་ཡོད། ཡིན་པ་ཡིན་ནའང་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་བོད་འདི་རྩ་མེད་དང་། བོད་ཀྱི་ཆོས་དང་རིག་གཞུང་ངོ་བོ་དང་བཅས་པ་རྩ་མེད་བཟོ་རྒྱུ་དེ་རྦད་དེ་རང་འཆར་གཞི་ལྡན་པའི་ཐོག་ནས་བཟོས་ཡོང་དུས་ཙ་ནས། ང་རང་ཚོས་ཀྱང་བོད་ཀྱི་བདེན་མཐའ་གསལ་རྒྱུ་དེ་འཆར་གཞི་ལྡན་པའི་ཐོག་ནས་ང་ཚོར་ལམ་ཡིག་ཅིག་ངེས་པར་དུ་དགོས་ཀྱི་རེད་བསམ་གྱི་འདུག དེ་མེད་པ་ཡིན་ན། ལམ་ལ་ཐོན་ནས་རང་བཙན་ཡིན་ཟེར་བ་ཙམ་གྱིས་རང་བཙན་ཞིག་སྤྲོད་རྒྱུ་དཀའ་ལས་ཁག་པོ་ཞེ་དྲག་རེད། ང་རང་ཚོའི་ཐུགས་ལ་འཇགས་དགོས་པ་འདི་ག་རེ་རེད་ཞུས་པ་ཡིན་ན། དབུ་མ་ཡིན་ནའང་རེད། རང་བཙན་ཡིན་ནའང་རེད། ང་ཚོའི་མ་རྩ་འདི་གང་རེད་ཟེར་ན། བོད་རང་བཙན་ཡིན་པའི་བདེན་དཔང་དེ་རེད། འདི་བོད་ཀྱི་གཞོན་སྐྱེས་མི་རེ་ངོ་རེའི་སེམས་ནང་ལོགས་ལ་འཇགས་ཐུབ་པ་བྱ་རྒྱུ་འདི་ལམ་གཉིས་ཀའི་འགན་ཆགས་བསྡད་ཡོད་རེད། དེ་ཆགས་པའི་ཐོག་ནས་ང་ཚོས་སོ་སོའི་ལམ་གང་དུ་འཇུག་གི་ཡོད་པ་ཡིན་ནའང་ལམ་དེའི་ཐོག་ནས་བོད་དོན་བདེན་མཐའ་གསལ་རྒྱུར་འཚེ་མེད་ཞི་བའི་ལམ་ནས། ང་ཚོའི་ཆབ་སྲིད་ཀྱི་རང་བཞིན་དེ་དམག་འཐབ་སྤོང་བ་རེད། དེའི་ཐོག་ནས་ང་ཚོས་བོད་ཀྱི་བདེན་མཐའ་གང་འདྲ་གསལ་གྱི་ཡིན་པཱ། དེ་འདྲའི་ཐོག་ནས་ཚང་མས་ནུས་ཤུགས་སྤུངས་དགོས་རྒྱུ། རེད་པཱ། དེའི་ནུས་ཤུགས་སྤུངས་བར་ང་ཚོའི་གཞོན་སྐྱེས་དེ་དག་དཔེ་གལ་ཆེན་པོ་ཆགས་བསྡད་ཡོད་རེད། དཔེར་ན། སློབ་གྲྭའི་ཕྲུ་གུ་ཚོ་ཡིན་ན་རྒྱུན་དུ་ཐང་ལ་དོན་རྒྱུ་ཁག་པོ་རེད། ཡིན་པ་ཡིན་ནའང་ཕྱི་རྒྱལ་དེ་བར་ལ་སློབ་གྲྭའི་ནང་ལོགས་རང་ལ་སོ་སོའི་ངོ་བོ་སྟོན་རྒྱུའི་དུས་ཚོད་མང་པོ་ཡོད་བསྡད་པ་རེད། དེ་ཡིན་དུས་ཙ་ནས་སློབ་གྲྭའི་ནང་ལ་ཡོད་པའི་ཕྲུ་གུ་ཚོ་རེད། མཐོ་སློབ་ནང་ལ་ཡོད་པའི་མཐོ་སློབ་སློབ་མ་ཚོས་སོ་སོའི་མཐོ་སློབ་དང་སོ་སོའི་སློབ་གྲྭའི་ནང་ལ་ང་བོད་པ་ཡིན་ཟེར་བའི་འདུ་ཤེས་དེའི་ཐོག་ནས་བོད་ཀྱི་གནད་དོན་གྱི་ཐོག་ལ་དཔྱད་རྩོམ་སྤེལ་གྱི་ཡོད་ནའང་རེད། བགྲོ་གླེང་ནང་ལ་ཆ་ཤས་ལེན་གྱི་ཡིན་ནའང་རེད། ཡང་གོ་སྐབས་དམ་འཛིན་གྱི་ཐོག་ནས་ག་རེ་གནང་རྒྱུ་ཡོད་པ་དེ་དག་གནང་ཐུབ་པར་གཞོན་སྐྱེས་ཚོའི་ནང་ལ་བོད་ཟེར་བ་ཞིག་ཡོད་པའི་བག་ཆགས་འདི་བཞག་ཐུབ་པ་དང་། བོད་འདི་ད་ལྟ་དཀའ་ངལ་འདི་འདྲ་ཞིག་གི་ནང་ལ་ལྷུང་བསྡད་པ་དེ་དག་བཞག་ཐུབ་པ་ཡིན་ན། ག་ལེར་ག་ལེར་དེ་དག་ཆེན་པོ་ཆགས་ཡོང་དུས་གནད་དོན་ཐོག་ལ་དོ་དབྱིངས་ཡོད་པ་ཞིག་ཏན་ཏན་ཆགས་ཀྱི་རེད་བསམ་གྱི་འདུག
དེ་ག་ནང་བཞིན་ང་རང་ཚོའི་སྤྱི་འཐུས་ཚོར་ཆ་བཞག་པ་ཡིན་ན། ང་ཚོས་ཁ་སེང་བཞུགས་མོལ་ཚོགས་འདུ་ཚོགས་པ་རེད། བཞུགས་མོལ་ཚོགས་འདུ་ནང་ལ་ལས་དོན་མང་པོ་ཞེ་པོ་ཞིག་བང་བསྒྲིགས་ནས་ཡོད་རེད། བཀའ་སྤྱི་ཐུན་མོང་ནས་གནང་དགོས་རྒྱུ་དང་། ང་རང་ཚོས་གནང་དགོས་རྒྱུ། དེ་དག་གནང་བའི་སྐབས་དེར་ང་རང་ཚོ་ཚང་མས་མཉམ་ཞུགས་བྱེད་དགོས་རྒྱུ་གལ་ཆེན་པོ་ཞེ་པོ་ཞིག་རེད་བསམ་གྱི་འདུག མཚམས་མཚམས་ལ་ག་རེ་ཡོང་གི་འདུག་ཞུས་ན། གྲོས་ཚོགས་ནང་ལ་གསུང་དུས་གསུང་ཁ་རྒྱས་པོ་ཞེ་པོ་ཞིག་བྱས། གཅིག་བྱེད་དགོས་རེད། གཉིས་བྱེད་དགོས་རེད་ཟེར། གྲོས་ཚོགས་ཀྱིས་འདི་ནས་མར་ལས་འཆར་ཞིག་སྒྲིག་ཡོང་དུས། ང་ཡང་གཅིག་བྱས་སོང་། ཁོ་ཡང་གཅིག་བྱས་སོང་ཟེར། དེ་ཡིན་དུས་དེ་འདྲ་མེད་པར་ཆེ་བཞག་ཆུང་བསྐྱུར་གྱི་ཐོག་ནས། བོད་ཀྱི་དཔའ་བོ་རང་བཙན་བློ་དགའ་ལགས་གཙོས་པའི་དཔའ་བོ་དཔའ་མོ་ ༡༦༨ ཀྱིས་བློས་གཏོང་དེ་དག་སེམས་ལ་བཞག་ནས་ང་ཚོས་བྱེད་དགོས་པ་དེ་བོད་དོན་འཐབ་རྩོད་བྱེད་དགོས་པ་དེ་རེད། ཁོང་ཚོས་བློས་གཏོང་དེ་ལས་ཚད་མཐོ་བ་ཞིག་ཡོད་མ་རེད། འཛིན་སྐྱོང་བཀའ་ཤག་གིས་གསུངས་པ་ནང་བཞིན་རེད། བློས་གཏོང་དེ་འཚེ་མེད་ཞི་བའི་ལམ་དེ་ལས་མཐོ་བ་ཞིག་ཡོད་མ་རེད་ཅེས་པ་དེ་གྲོས་ཚོགས་ཀྱིས་ཀྱང་དེ་ག་རང་ངོས་ལེན་བྱེད་ཀྱི་ཡོད་ལ། དེ་ལས་མཐོ་བ་ཡོད་མ་རེད་དེ། ཡིན་པ་ཡིན་ནའང་ཁོང་ཚོས་བློས་གཏོང་དེ་ལ་དཔགས་པས་ང་ཚོའི་ཐོག་ནས་མི་ཡོད་མཁན་ཚོས་མི། རྒྱུ་ཡོད་མཁན་ཚོས་རྒྱུ་བཏང་བྱས་ནས། ཡི་གེ་དེ་དག་ག་རེ་ཡིན་ནའང་འཛིན་སྐྱོང་གི་ཐོག་ནས་མཉམ་འབྲེལ་རྒྱལ་ཚོགས་རེད། ཡི་གེ་ག་པར་གཏོང་ས་ཡོད་པ་ཚང་མ་ལ་གཏོང་གི་ཡིན་ཟེར་བ་ནང་བཞིན་གྲོས་ཚོགས་ཀྱིས་ཀྱང་དེ་དེ་བཞིན་གཏང་གི་ཡིན། ཚོགས་སྡེ་ཁག་གིས་ཀྱང་དེ་དེ་བཞིན་ང་རང་ཚོ་ཚང་མས་དེའི་ཐོག་ལ་ནུས་པ་སྤུངས་བྱས་ནས་གཏང་དགོས་པ་དེ་གལ་ཆེན་པོ་ཞེ་པོ་ཞིག་རེད། ང་ཚོས་བོད་ཀྱི་གནད་དོན་དེ་རྒྱལ་སྤྱིའི་གནས་བབ་ལ་སླེབས་པར་བྱེད་པ་ལ་ཡི་གེའི་ཐོག་ནས་ང་ཚོས་དེ་བྱས་ནས། ཡི་གེ་དང་མཉམ་དུ་ང་ཚོས་ལས་འགུལ་སྤེལ་ནས། ཡི་གེ་དེའི་མཚོན་བྱེད་དེ་རེད་འདུག་གཱ། ཁོང་ཚོས་དེ་འདྲ་ཞིག་འབོད་སྐུལ་བྱེད་ཀྱི་འདུག་གཱ་བསམ་པ་ཞིག་བཟོ་དགོས་པ་དེ་ང་རང་ཚོའི་དུས་ལ་བབས་བསྡད་ཡོད་རེད། དེ་ཡིན་དུས་དེ་ཚོའི་ཐོག་ལ་ཚང་མས་ཆ་ཤས་ལེན་ཐུབ་རྒྱུ་དང་། དེ་རིང་སྐབས་བཅོ་བརྒྱད་པ་འདི་ནས་ང་ཚོས་མང་ཚོགས་རྩིས་ཁྲའི་ཚོགས་ཆུང་སྐབས་ ༡༣ པ་དེ་འཛུགས་རྒྱུའི་གྲོས་ཆོད་བཞག་ཡོད་པ་རེད། དེ་བཞག་པ་ནང་བཞིན་ཚོགས་ཆུང་དེ་དག་གི་ནང་ལ་སྡོད་མཁན་དེར་མཚམས་མཚམས་སྐུ་ལས་ཞེ་པོ་ཞིག་ཡོད། སྔོན་མ་བྱས་པ་ཡིན་ན་རྒྱུན་ལས་ཚོ་ལོ་གཅིག་གང་ཚང་འདིར་བཞུགས་ཀྱི་ཡོད་དུས། རྒྱུན་ལས་དེ་དག་གང་མང་མང་བཞུགས་ཐུབ་པ་ཡིན་ན་འགྲོ་སོང་བསྲི་ཚགས་རེད། རྒྱུན་དུ་འདིར་བཞུགས་ཀྱི་ཡོད་པ་ཡིན་ཙང་གནས་བབ་མང་པོའི་ཐོག་ནས་ཡག་པོ་འདུག་ཅེས་སྐད་ཆ་བྱུང་བ་རེད། དེ་ནས་ག་ལེར་ག་ལེར་བཞུགས་མཁན་མེད་དུས། ཕྱོགས་བཞུགས་སྤྱི་འཐུས་ཚོ་ལ་ང་ཚོས་རེ་སྐུལ་ཞུས་ཡོང་གི་ཡོད་རེད། གང་བྱས་གང་མིན་སུས་དེ་གནང་གི་ཡོད་པ་ཡིན་ནའང་ག་ཚོད་ཀྱིས་ཚོགས་ཆུང་ནང་ལ་བཞུགས་པ་དེ་ག་ཙམ་གྱིས་ཁྲིམས་སྒྲིག་ཁག་ལ་རྒྱུས་མངའ་ཡོང་གི་ཡོད་པ་དང་། ཁྲིམས་སྒྲིག་ཁག་གི་གོ་རྟོགས་དེ་དག་གསལ་དུ་འགྲོ་ཡི་ཡོད་པ་དེ་གཞི་གྲུབ་པ་ཞིག་རེད། དེ་ཚོའི་ཐོག་ལ་ངེས་པར་དུ་ཆ་ཤས་ལེན་རོགས་གནང་ཞེས་ཞུ་རྒྱུ་ཡིན།
དེ་ནས་ང་རང་ཚོར་གལ་ཆེ་ཤོས་དེར་དེ་རིང་གྲོས་ཚོགས་འདིའི་ནང་ལ་བོད་ནང་གི་ཛ་དྲག་གནས་སྟངས་ཐོག་ལ་གྲོས་ཆོད་དོན་ཚན་ལྔ་ཅན་ཞིག་བཞག་ཐུབ་པ་བྱུང་ཡོད་པ་རེད། དེ་ཡིན་དུས་དེ་དག་ཚང་མས་ང་རང་ཚོ་ལ་ག་རེ་སྟོན་གྱི་ཡོད་རེད་ཟེར་ན། བློས་གཏོང་གནང་མཁན་རྒྱལ་གཅེས་དཔའ་བོ་དཔའ་མོ་ཚོའི་ཞལ་ཆེམས་རེད། རྒྱལ་གཅེས་དཔའ་བོ་དཔའ་མོ་ཚོའི་རེ་སྐུལ་དེ་དག་སྙིང་ལ་བཅངས་ནས་བོད་དོན་བདེན་མཐའ་གསལ་བར་ཐབས་བྱུས་ག་རེ་བྱེད་དགོས་ཀྱི་འདུག་གམ། ང་རང་ཚོའི་ཁ་འཐོར་ལ་ཡོད་པའི་བོད་མི་ཚོས་མཐུན་སྒྲིལ་ཡོང་བར་ག་རེ་བྱེད་དགོས་ཀྱི་འདུག་གམ། ངས་ག་དུས་ཡིན་ནའང་དེ་འདྲ་ཞིག་བསམ་གྱི་ཡོད། བཀུར་འོས་སྤྱི་འཐུས་རྣམ་པ་ང་རང་ཚོའི་ཞབས་སྟེགས་སྒང་ལ་བཞུགས་ནས་ཆ་ཤས་ལེན་པའི་སྐབས་སུ་ང་མི་རང་དགར་ལ་ཡིན་ཞེས་ཁྱོན་ནས་དགོངས་རྒྱུ་མི་འདུག ང་ཆོས་ལུགས་འདིའི་ངོ་ཚབ་ཡིན། འདིའི་ངོ་ཚབ་མཚོན་པས་ངའི་བྱ་སྤྱོད་དང་སྒོ་གསུམ་གྱི་སྤྱོད་པ་ཏག་ཏག་འདུག་གམ་མི་འདུག ཆོལ་ཁ་ཡིན་པ་ཡིན་ན་ཆོལ་ཁའི་མང་ཚོགས་ཀྱིས་ང་ལ་རེ་འདུན་ག་རེ་བྱེད་ཀྱི་ཡོད་རེད་དམ། དེ་ལ་དཔགས་པས་ངའི་སྒོ་གསུམ་གྱི་སྤྱོད་པ་དེ་འགྲིག་གི་འདུག་གམ་མི་འདུག དེ་དག་དགོངས་པ་བཞེས་དགོས་པ་དེ་དཔེ་གལ་ཆེན་པོ་རེད་བསམ་གྱི་འདུག སོ་སོ་སྒེར་གཅིག་པུ་ཡིན་བསམས་ནས་ང་དང་ཁྱོད་ཅེས་རྩོད་པ་རྒྱག་སའི་ས་ཆ་འདི་རྩ་བ་ནས་མ་རེད། དེ་བོད་མིའི་སྒྲིག་འཛུགས་དང་བོད་དོན་བདེན་མཐའ་གསལ་ཐབས། རྒྱ་ཆེའི་མང་ཚོགས་ཀྱི་བདེ་བ་དང་སྡུག་བསྔལ་གསལ་བཀྲོལ་བྱེད་སའི་སྡིངས་ཆ་ཞིག་ཡིན་དུས། གང་ཉུང་ཉུང་གིས་ང་རང་ཚོའི་ནང་ཁུལ་ལ་གཅིག་བཤད་ས་མེད་པ་མ་རེད། ལས་དོན་བྱེད་ཕྱོགས་ཀྱི་སྒྲིག་གཞིའི་ནང་ལ་སྤྱི་འཐུས་ནང་ཁུལ་ལ་དྲི་བ་གཏང་རྒྱུ་ཡོད་པ་རེད། སྤྱི་འཐུས་སྒེར་གྱིས་གསལ་བཤད་བྱེད་རྒྱུ་ཡོད་རེད། དེ་འདྲའི་ཐབས་ལམ་མང་པོ་ཞེ་པོ་ཞིག་བཏོན་ནས་བཞག་ཡོད་པ་རེད། དེ་ཡིན་དུས་ང་རང་ཚོའི་ནང་ཁུལ་ལ་མཚམས་མཚམས་ལས་རིམ་རྣམ་གཞག་བཏོན་ནས་ཁྱོད་ཀྱི་ཁ་དང་ངའི་སྣ་ཟེར་དུས། གྲོས་ཚོགས་ཀྱི་ཆེ་མཐོང་འདི་ཏག་ཏག་ཅིག་གཏན་ནས་བསྡད་ཀྱི་མི་འདུག ཐབས་ལམ་དེ་དག་ག་རེ་བཏོན་དགོས་ཀྱི་ཡོད་ནའང་ངེས་པར་དུ་དགོངས་པ་བཞེས་རོགས་གནང་། སྒེར་ལ་འཁོན་འཛིན་ཡོད་པ་འདི་ལས་རིམ་རྣམ་གཞག་གི་ཐོག་ནས་བཏོན་རྐྱང་བྱས་པ་ཡིན་ན་དེ་རྩ་བ་ཉིད་ནས་ཏག་ཏག་བསྡད་ཀྱི་མི་འདུག དེར་དགོངས་པ་བཞེས་རོགས་གནང་ཞེས་ཞུ་རྒྱུ་ཡིན།
ང་ཚོ་དེ་རིང་མར་གྲོལ་འགྲོ་ཡི་ཡོད་རེད། མར་གྲོལ་རྗེས་ཟླ་བ་དྲུག་ལ་ང་ཚོ་ཡང་བསྐྱར་དུ་འཛོམས་དགོས་ཀྱི་ཡོད་རེད། དེའི་དུས་ཚོད་ཀྱི་ནང་ལ་རྣམ་པ་ཚང་མ་སྐུ་གཟུགས་གསལ་བཞུགས་ཡོང་བ་དང་ལུས་བདེ་ཐང་། སོ་སོའི་གནས་བབ་ཀྱི་ཐོག་ནས་ལས་དོན་གང་དང་གང་བརྩམ་གྱི་ཡོད་པ་ཡིན་ནའང་དེ་དག་གི་ཐོག་ལ་བྱ་བ་ལམ་ལྷོང་ཡོང་བར་ཚོགས་གཙོས་སྨོན་འདུན་ཞུ་ཡི་ཡོད།
དེ་ནས་ང་ཚོས་གྲོས་ཚོགས་ག་དུས་ཚོགས་པ་ཡིན་ནའང་ང་ཚོ་ལ་གྲོས་ཚོགས་འདི་ཡག་པོ་ཡོང་རྒྱུའི་ཆེད་དུ་མཐུན་འགྱུར་གནང་མཁན་མང་པོ་ཞིག་ཡོད་བསྡད་པ་རེད། དང་པོ་དེ་ལ་གྲོས་ཚོགས་འཚོགས་པའི་རིང་ལ་ཕྱི་ནང་གི་ཁོར་ཡུག་སྲུང་བྱ་དང་འབྲེལ་བའི་ལྟ་སྲུང་དེ་བདེ་སྲུང་ལས་ཁུངས་ནས་འགན་བཞེས་ཀྱི་ཡོད་རེད། བདེ་སྲུང་ལས་ཁུངས་རེད། དེ་ག་ནང་བཞིན་གྲོས་ཚོགས་ཀྱི་རིང་ལ་ཚོགས་ཁང་གི་ནང་སྐད་སྦུག་དང་པར་ལེན། ཐད་གཏོང་གི་མཐུན་རྐྱེན་སྦྱར་མཁན་ཕྱི་དྲིལ་ལས་ཁུངས་ཀྱི་སྒྲ་བརྙན་ཚན་པ་རེད། དྷ་སའི་ཁུལ་ལ་གློག་རྒྱུན་དེ་ཡང་ཡང་བར་ཆད་ཀྱི་ཡོད་པའི་གནས་སྟངས་ཀྱི་འོག་ནས་གློག་དང་འབྲེལ་བའི་མཐུད་ཀ་རྒྱག་མཁན་དེ་ནང་སྲིད་ས་ཁང་བདག་གཉེར་ཁང་གིས་གནང་བཞུགས་ཀྱི་ཡོད་རེད། དེ་ག་ནང་བཞིན་གྲོས་ཚོགས་ཀྱི་ལས་རིམ་དང་འབྲེལ་བ་དེ་དག་ཚང་མ་གྲོས་ཚོགས་ཀྱི་སྐུ་ངོ་ཚོགས་དྲུང་དབུས་པའི་དྲུང་འཕར་དང་ལས་བྱེད་ཚང་མས་སྔ་ཡོང་ཕྱི་བསྡད་ཀྱི་ཐོག་ནས་ཡིག་ཆ་དེ་དག་ཚང་མའི་ཕྱག་ལ་ཡག་པོ་ཞིག་འཁྱོལ་ཐུབ་པ་ཞིག་གནང་གི་ཡོད་རེད། དེ་དག་ཚང་མ་ལ་ཚོགས་གཙོ་གཉིས་ཀྱི་ཐོག་ནས་བཀའ་དྲིན་ཆེ་ཞེས་ཞུ་རྒྱུ་ཡིན།
མཐའ་དོན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་ཞབས་པད་བསྐལ་བརྒྱར་བརྟན་པ་དང་ཐུགས་ཀྱི་བཞེད་དགོངས་མཐའ་དག་ལྷུན་གྱིས་འགྲུབ་པ། དེ་ག་ནང་བཞིན་བོད་ཀྱི་དཔའ་བོ་དཔའ་མོའི་ཞལ་ཆེམས་གང་ཡོད་པ་དེ་དག་ང་ཚོས་སྙིང་ལ་བཅངས་ནས་བོད་དོན་བདེན་མཐའ་གསལ་ཐབས་དང་། བོད་མི་ཚང་མ་མཐུན་སྒྲིལ་རྡོག་རྩ་ཆིག་སྒྲིལ་ཡོང་རྒྱུ། དེ་ག་ནང་བཞིན་བོད་ཀྱི་གནས་བབ་དེ་རྒྱལ་སྤྱིའི་ཐོག་བསྐྱལ་རྒྱུའི་ཐོག་ལ་ང་རང་ཚོ་ཚང་མས་ནུས་ཤུགས་སྤུང་རྒྱུའི་ཐོག་ལ་ངས་རེ་འདུན་ཞུ་ཡི་ཡོད། ཐུགས་རྗེ་ཆེ་གནང་།།