༄༅། །ཕྱི་ལོ་ ༢༠༢༢ ཟླ་བ་ ༧ ཚེས་ ༢༢ ཉིན་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་གཞིས་བྱེས་བོད་མི་ཡོངས་དང་། བོད་མི་མང་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ། ལྕམ་སྐུ་དྲཽ་པ་དཱི་མུརྨུ་ (Smt. Droupadi Murmu) མཆོག་སྐབས་བཅོ་ལྔ་པའི་རྒྱ་གར་གྱི་སྲིད་འཛིན་དུ་བདམས་ཐོན་བྱུང་བར་དགའ་བསུའི་འཚམས་འདྲི་ཞུས་གནང་འདུག
དེ་ཡང་འཚམས་འཕྲིན་ནང་འཁོད་དོན། རྒྱ་གར་གཞུང་མང་གཉིས་ནས་ད་བར་བོད་ཀྱི་འཚེ་མེད་ཞི་བའི་འཐབ་རྩོད་དང་། བོད་མིར་རྒྱབ་སྐྱོར་ཤུགས་ཆེ་གནང་བ་དང་། ལྷག་པར་དུ་འདས་པའི་ལོ་ངོ་དྲུག་ཅུ་ལྷག་གི་རིང་བོད་མི་ཚོར་མཚོན་ན། རྒྱ་གར་ནི་བོད་མིའི་ཕ་ཡུལ་གཉིས་པ་ལྟ་བུ་ཆགས་ཀྱི་ཡོད་པ་སོགས་རྒྱ་གར་གཞུང་མང་གཉིས་ནས་ད་བར་བོད་མི་རྣམས་ལ་བཀའ་དྲིན་བསྐྱངས་པ་དེར་ཐུགས་རྗེ་ཆེ་ཞུ་རྒྱུ་ཡིན།
སྐུ་ཉིད་ཀྱི་སྲིད་འཛིན་གནང་བའི་ལས་ཡུན་རིང་རྒྱ་གར་མི་མང་གི་མངོན་འདོད་བསྒྲུབ་རྒྱུ་སོགས་མ་འོངས་པའི་ལས་དོན་མཐའ་དག་ལམ་ལྷོངས་ལྡན་པ་ཡོང་རྒྱུའི་སྨོན་འདུན་ཞུ་རྒྱུ་དང་། འཛམ་གླིང་ནང་ཞི་བདེ་བསྐྲུན་རྒྱུ་དེ་བཞིན་སྐུ་ཉིད་ཀྱི་མ་འོངས་པའི་ལས་དོན་གལ་ཆེ་ཤོས་ཁོངས་སུ་ཡོད་པའི་ཡིད་ཆེས་ཆེན་པོ་ཡོད་ཅེས་འཁོད་འདུག་པ་བཅས། །