ཕྱི་ལོ་ ༢༠༡༥ ཟླ་ ༡ ཚེས་ ༦ ཉིན་རྒྱ་གར་བྱང་ཕྱོགས་དོན་གྲུབ་གླིང་བོད་མིའི་གཞིས་ཆགས་སུ་རྟེན་གཞི་བྱས་པའི་འཕགས་ཡུལ་སྨིན་གྲོལ་གླིང་དགོན་པ་ཕྱག་བཏབ་ནས་ལོ་ངོ་ ༥༠ ཧྲིལ་པོ་འཁོར་བའི་རྗེས་དྲན་དང་འབྲེལ་འཛམ་གླིང་ཞི་བདེ་ཡོང་བ་དང་བོད་མིའི་བདེ་དོན་ཆེད་ཚོགས་མཆོད་གནང་ཡོད་པ་རེད།
དེ་ཡང་ཚེས་ ༦ ཉིན་གྱི་སྔ་དྲོ་ཆུ་ཚོད་ ༩ དང་ཕྱེད་ཀའི་ཐོག་སྐུ་མགྲོན་རྣམས་མཛད་སྒོར་ལྷན་འཛོམས་ཐོག་རྙིང་མའི་དབུ་བླ་སྟག་ལུང་རྩེ་སྤྲུལ་རིན་པོ་ཆེ་མཆོག་གིས་སྣང་གསལ་ཞལ་ཕྱེ་གནང་སྟེ་མཛད་སྒོ་དབུ་འབྱེད་གནང་གྲུབ་བསྟུན་རྟེན་འབྲེལ་མཚོན་ཆེད་གར་འཆམ་དང་། ཆོས་རྒྱལ་གཏེར་བདག་གླིང་པའི་རྗེས་འཛིན་གསོལ་འདེབས་གསུང་འདོན་གནང་། སུ་ཇ་བོད་ཁྱིམ་གྱི་སློབ་ཕྲུག་ཁག་གཅིག་གིས་བཀྲ་ཤིས་ཞོལ་པ་འཁྲབ་སྟོན་ཞུས། སྐབས་དེར་སྐུ་མགྲོན་གཙོ་བོ་སྔ་འགྱུར་རྙིང་མ་པའི་དབུ་འཛིན་༧སྐྱབས་རྗེ་སྟག་ལུང་རྩེ་སྤྲུལ་རིན་པོ་ཆེ་མཆོག་དང། དགའ་ལྡན་ཕོ་བྲང་གི་སྐུ་ཚབ་རྣམ་གྲྭ་མཁན་པོ་ཁྲོམ་ཐོག་རིན་པོ་ཆེ། སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་དང། ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག ཆོས་རིག་བཀའ་བློན་པདྨ་ཆོས་འབྱོར་མཆོག ནང་སྲིད་བཀའ་བློན་རྒྱ་རི་སྒྲོལ་མ་མཆོག གཞན་ཡང་གནད་ཡོད་གྱི་མི་སྣ་ཁག དགོན་སྡེ་དང་བླ་སྤྲུལ་ཁག་གི་སྐུ་ཚབ་པ་དང་སེར་སྐྱ་མི་མང་ཁྱོན་ཆེ་མཛད་སྒོར་མཉམ་ཞུགས་ཡོད་པ་རེད། ཕྱི་རྒྱལ་ཡུལ་གྲུ་དུ་མ་ཞིག་ནས་དད་ལྡན་སྦྱིན་བདག་དང་ཞལ་སློབ་བཅས་གང་མང་ཞིག་སྐུ་མགྲོན་དུ་ཕེབས་ཡོད།

དེ་རྗེས་མཁོ་ཁྱིམ་རིན་པོ་ཆེ་མཆོག་གིས་འཕགས་ཡུལ་འོག་མིན་སྨིན་གྲོལ་གླིང་དགོན་པ་ཕྱག་བཏབ་ནས་ལོ་ ༥༠ འཁོར་བའི་མཛད་སྒོ་ངོ་སྤྲོད་དང་། སྨིན་གླིང་མཁན་ཆེན་རིན་པོ་ཆེ་མཆོག་དང་ཨུ་ཏྟར་ཁཎྜ་མངའ་སྡེའི་བློན་ཆེན་སྐུ་ཞབས་ (shri Dinesh Agarwal) མཆོག་གིས་དུས་དྲན་དང་འབྲེལ་བའི་གསུང་བཤད་གནང་། དེ་རྗེས་མི་ལོ་ ༥༠ འཁོར་བའི་དུས་དྲན་ངོ་སྤྲོད་གནང་བ་མ་ཟད། སྨིན་གླིང་ཁྲི་ཆེན་དབུས་པའི་རྩེ་སྤྲུལ་རིན་པོ་ཆེ་མཆོག་དང་། མཁོ་ཁྱིམ་རིན་པོ་མཆོག་བཅས་ཀྱི་མཛད་རྗེས་ལ་བཀའ་དྲིན་རྗེས་དྲན་ཞུ་དགོས་ལུགས་སོགས་ཀྱི་གསུང་བཤད་ཁག་གནང་ནས་བོད་མི་མང་སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་གིས་ཀྱང་དུས་དྲན་དང་འབྲེལ་བའི་གསུང་བཤད་གནང་།

དེ་རྗེས་བོད་མིའི་སྒྲིག་འཛུགས་ནང་སྲིད་བཀའ་བློན་རྒྱ་རི་སྒྲོལ་མ་མཆོག་དང་ཆོས་རིག་བཀའ་བློན་པདྨ་ཆོས་འབྱོར་མཆོག་གིས་གསུང་བཤད་གནང་རྗེས་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་བཙན་བྱོལ་ནང་ཡོད་པའི་བོད་མི་རྣམས་མཐུན་སྒྲིལ་ཡག་པོ་དགོས་སྐོར་དང་། དགོན་པའི་ལས་ཀྱི་སྣེ་མོ་བ་རྣམས་ཀྱིས་ཕྱག་ལས་ཡག་པོ་གནང་སྟེ་ཧ་ཅང་ཡག་པོ་ཡོད་པ་དེར་བསྔགས་བརྗོད་ཡོད་སྐོར་སོགས་ཀྱི་གསུང་བཤད་གནང་། དེ་ནས་སྟག་ལུང་རྩེ་སྤྲུལ་རིན་པོ་ཆེ་མཆོག་གིས་༸གོང་ས་མཆོག་གི་བཀའ་དྲིན་ཉག་གཅིག་ལ་བརྟེན་ནས་དེང་སྐབས་སངས་རྒྱས་ཀྱི་བསྟན་པ་འཛིན་སྐྱོང་སྤེལ་གསུམ་གང་ལེགས་ཡོང་སྐོར་དང་། ད་དུང་མགོན་པོ་གང་གི་བཀའ་སློབ་ལམ་སྟོན་བཞིན་ཚང་མས་བཀའ་བརྩི་ཧུར་བསྐྱེད་གནང་དགོས་པའི་བཀའ་སློབ་ཟབ་རྒྱས་སྩལ་ཡོད་པ་བཅས་ཀྱི་གནས་བསྡུས་སུ།