ཨ་མདོ་རྔ་བ་ཁུལ་དུ་རྒྱ་དམག་གིས་དམ་བསྒྲགས་བསུན་གཙེར་བྱེད་བཞིན་པའི་ཛ་དྲག་གནས་སྟངས།

བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་དང་ཀ་ཉག་ཚེ་རིང་གཉིས་ཀྱིས་ཕྱི་ལོ་ ༢༠༡༡ ཟླ་ ༤ ཚེས་ ༡༢ ཉིན་གནས་ཚུལ་བཏང་འབྱོར་བྱུང་བ་ལྟར་ན། ཕྱི་ལོ་ ༢༠༡༡ ཟླ་ ༤ ཚེས་ ༡༢ ཉིན་བོད་ཨ་མདོ་རྔ་པའི་ནང་གི་ཛ་དྲག་གི་གནས་ཚུལ་ཐོན་པ་ལྟར་ན། ཉིན་ཤས་གོང་ནས་གྲྭ་པ་དགུང་ལོ་ ༡༨ ནས་ ༤༠ བར་ཚང་མ་ས་གནས་གཞན་ཞིག་ལ་སློབ་སྦྱོང་གི་མིང་ཐོག་ནས་འགྲོ་དགོས་ཚུལ་བཤད་ཡོད་པ་དང། གནས་ཚུལ་དེ་ཕྱི་ཚེས་ ༡༢ ཉིན་ལག་བསྟར་བྱེད་རྒྱུ་ཡིན་པའི་གནས་ཚུལ་ཕྱི་ཚེས་ ༡༡ དགོང་མོ་ནས་ཡོངས་ཁྱབ་ཆགས་ཡོད་པས་རྐྱེན་གྱིས། མི་མང་གིས་དགོན་མཐའ་གཡས་གཡོན་ནས་དོགས་ཟོན་བྱས་ཏེ་བསྡད་ཡོད་པའི་སྐབས་སུ། བོད་ནང་གི་ཆུ་ཚོད་ ༡༢ ཡས་མས་སུ་གློ་བུར་རྒྱ་དམག་འབོར་ཆེན་པོ་ཞིག་སླེབས་ཏེ། རྔ་པ་ཀིརྟིའི་དགོན་པའི་ནང་ལ་འགྲོ་བརྩིས་བྱས་སྐབས་མི་མང་གིས་དམག་མིའི་མདུན་བཀག་ནས་དགོན་པའི་ནང་ལ་གཏན་ནས་འགྲོར་མ་བཅུག་པར་བརྟེན། དྲག་ཆས་ཉེན་རྟོག་པ་དང་དྲག་ཆས་དམག་དཔུང་གིས་མི་མང་ལ་གཅར་རྡུང་དྲག་པོ་བཏང་ཞིང༌། སྦྱོང་བརྡར་སྤྲད་ཡོད་པའི་ཁྱི་མང་པོ་མི་མང་ནང་ལ་མངགས་ནས་མི་མང་པོར་ཁྱིས་རྦད་པ་སོགས་ཀྱིས་རྨས་སྐྱོན་ཚབས་ཆེན་ཕོག་པ་མང་པོ་བྱུང་ཡང་། ད་དུང་མི་མང་རྩ་བ་ནས་ཕྱི་སྣུར་མ་བྱས་སྟབས། སྐབས་དེར་དམག་མི་རྣམས་དགོན་པའི་ནང་ལ་འགྲོ་ཐུབ་མེད་ཅིང། དེ་རྗེས་དགོན་པའི་ཆོས་ལུགས་དོ་དམ་ཁང་གི་འགན་འཛིན་སོགས་ཕེབས་ནས་མི་མང་ལ་གོ་བསྐོན་ཨུ་ནན་བྱས་པས། མི་མང་ཅུང་ཙམ་ཕྱི་སྣུར་བྱས་འདུག་ཀྱང་། བོད་ནང་གི་དུས་ཚོད་ ༣། ༣༠ ཡས་མས་སུ་ད་དུང་མི་མང་དང་དམག་དཔུང་གདོང་ཐུག་རྒྱག་བཞིན་པའི་གནས་སྟངས་ཧ་ཅང་ཛ་དྲག་གི་འོག་ཡོད་པ་དང་། སྐབས་དེར་དགོན་པའི་ནང་ནས་ དགེ་འདུན་པ་མང་པོ་ཞིག་གིས་མི་མང་དང་དཔུང་བ་མཉམ་གཤིབ་ཆེད་ཕྱི་ལ་ཐོན་རྩིས་བྱས་ཀྱང་དགོན་པའི་མཐའ་ཡོངས་རྫོགས་ལྕགས་ཚེར་གྱི་ར་བ་དང་། རྩིག་པ་བརྒྱབ་ཡོད་པར་མ་ཟད། སྒོ་ཆེན་ཁག་གཏན་རྒྱག་བྱས་ཏེ་དམག་མིས་སྲུང་བྱ་དམ་པོ་བྱས་ནས་ཡོད་པས་གཅིག་ཀྱང་ཕྱི་ལ་ཐོན་ཐུབ་མི་འདུག བོད་མི་རྣམས་ཀྱིས་གནས་ཚུལ་གོ་གསལ་ལྟར་ན། རྒྱ་གཞུང་གི་འཆར་གཞི་ནི་མི་མང་གིས་མ་ཤེས་པའི་ཐབས་ཤེས་འོག  སློབ་སྦྱོང་ལ་ཁ་གཡར་ནས་ས་གནས་གཞན་གྱི་བཙོན་ཁང་ཞིག་ལ་དགེ་འདུན་པ་བཅུ་བཅུ་མཉམ་དུ་རླངས་འཁོར་ནང་བཙན་ཁྲིད་བྱ་རྒྱུ་ཡིན་འདུག་ཅིང་། གནས་ཚུལ་དེ་ཉིན་ཤས་གོང་ནས་མི་མང་གིས་ཤེས་རྟོགས་བྱུང་བར་བརྟེན། རྒྱུན་དུ་དོགས་ཟོན་བྱས་ཡོད་འདུག དེ་རིང་དངོས་སུ་རྒྱ་དམག་རྣམས་ཐོན་སྐབས་ངོས་འཛིན་དེ་ལྟར་བྱས་ནས་རང་སྲོག་ལ་མ་འཛེམས་པར་དམག་དཔུང་གི་མདུན་བཀག་པ་ཞིག་ཡིན་འདུག
གོང་ཞུས་ལྟར་བོད་ནང་གི་དུས་ཚོད་ ༣།༣༠ ཙམ་ལ་མི་མང་འབོར་ཆེན་ཞིག་རྔ་པ་ཀིརྟིའི་དགོན་པར་འགྲོ་སའི་ལམ་ཆེན་གྱི་བཞི་མདོ་ཁག་གཉིས་ལ་མཉམ་འཛོམས་བྱས་ཡོད་པ་དང་། རྔ་པ་རྫོང་གི་འགྲིམ་འགྲུལ་ཡོངས་རྫོགས་བཀག་སྡོམ་བྱས་ཡོད་པ། རྔ་པ་ཀིརྟིའི་དགོན་གྱི་ཉེ་འཁྲིས་ཀྱི་གྲོང་སྡེ་ཁག་གི་ཕྲུ་གུ་རྫོང་ཐོག་ལ་སློབ་གྲྭར་འགྲོ་གི་ཡོད་པ་རྣམས་ཉིན་ཤས་གོང་ནས་ནང་ལ་ཡོང་མི་ཆོག་པར་བཟོས་འདུག་ལ། དེའི་རྒྱུ་མཚན་ནི་དགོན་པ་གཏོར་བཅོམ་བྱེད་རྒྱུ་ཡིན་སྟབས་སློབ་མ་རྣམས་ལ་སྲུང་སྐྱོབ་བྱས་པ་ཡིན་པའི་བསམ་ཚུལ་ཡོང་གི་ཡོད་འདུག །