སྤྱི་འཐུས་ཟླ་བ་ཚེ་རིང་མཆོག་དང་སྤྱི་འཐུས་མི་འགྱུར་རྡོ་རྗེ་མཆོག་རྣམ་གཉིས་གཞུང་འབྲེལ་ཕྱོགས་བསྐྱོད་གནང་གཏན་འཁེལ་བ།

༄༅། །སྐབས་ ༡༦ པའི་བོད་མི་མང་སྤྱི་འཐུས་རྣམས་བོད་མིའི་འདུ་སྡོད་གཞིས་ཆགས་ཁག་ལ་ཕྱོགས་བསྐྱོད་ཕེབས་རྒྱུའི་ས་བགོས་ཡོད་པ་ལྟར། སྤྱི་འཐུས་ཟླ་བ་ཚེ་རིང་མཆོག་དང་སྤྱི་འཐུས་མི་འགྱུར་རྡོ་རྗེ་མཆོག་རྣམ་གཉིས་ཕྱི་ལོ་ ༢༠༡༨ ལོའི་ཟླ་ ༧ ཚེས་ ༧ ནས་ཚེས་ ༡༧ བར་རྒྱ་གར་མངའ་སྡེ་མཧཱ་རཱཤཀྲ་ནང་རྟེན་གཞི་བྱས་པའི་བྷན་དཱ་ར་ནོར་རྒྱས་གླིང་གཞིས་ཆགས་དང་། རྒྱ་གར་མངའ་སྡེ་ཆ་ཏི་སི་སྒར་ནང་རྟེན་གཞི་བྱས་པའི་མན་སྤར་ཕན་བདེ་གླིང་གཞིས་ཆགས་བཅས་ལ་གཞུང་འབྲེལ་ཕྱོགས་བསྐྱོད་ཐེངས་གཉིས་པ་གནང་གཏན་འཁེལ་ཡོད།

དེ་ཡང་སྤྱི་འཐུས་རྣམ་པ་གཉིས་ཕྱི་ཚེས་ ༧ ཉིན་རྡ་ས་དང་། ཧོན་སུར་ས་གནས་སོ་སོ་ནས་ཕེབས་ཐོན་གནང་སྟེ་ཕྱི་ཚེས་ ༨ ཉིན་མཧཱ་རཱཤཀྲ་མངའ་སྡེའི་གྲོང་ཁྱེར་ནག་སྤུར་དུ་ལྷན་འཛོམས་གནང་རྒྱུ་དང་།  ཕྱི་ཚེས་ ༩ ཉིན་ནག་སྤུར་ནས་བྷན་དཱ་ར་གཞིས་ཆགས་སུ་ཕེབས་ཐོན་གནང་རྒྱུ། ཕྱི་ཚེས་ ༡༠ ནས་ ༡༢ བར་ཉིན་གསུམ་རིང་ས་གནས་སུ་ལས་རིམ། དེ་ནས་ཕྱི་ཚེས་ ༡༦ བར་མན་སྤར་གཞིས་ཆགས་སུ་ལས་རིམ་ཁག་གྲུབ་གནང་བའི་རྗེས། ཕྱི་ཚེས་ ༡༧ ཉིན་སྤྱི་འཐུས་རྣམ་པ་གཉིས་སོ་སོའི་བཞུགས་གནས་སུ་ཕེབས་ཐོན་གནང་རྒྱུ་ཡིན་པ་བཅས་ཀྱི་གནས་ཚུལ་དུ།།