སྤྱི་འཐུས་དགེ་བཤེས་རོང་པོ་བློ་བཟང་སྙན་གྲགས་ལགས་དབུས་སྣེ་ལེན་ཁང་དུ་འཚམས་འདྲིར་ཕེབས་པ།

སྣེ་ལེན་ཁང།སྣེ་ལེན་ཁང།

དགེ་བཤེས་རོང་པོ་བློ་བཟང་སྙན་གྲགས་ལགས།དགེ་བཤེས་རོང་པོ་བློ་བཟང་སྙན་གྲགས་ལགས།ཕྱི་ལོ་ ༢༠༡༢  ཟླ ༦ ཚེས ༢༥  ཉིན་སྔ་དྲོ་ཆུ་ཚོད་ ༡༠  པ་ནས་ ༡༡    བར།   སྤྱི་འཐུས་རྒྱུན་ལས་དགེ་བཤེས་རོང་པོ་བློ་བཟང་སྙན་གྲགས་ལགས།       དབུས་སྣེ་ལེན་འབྲེལ་མཐུད་ལས་ཁང་དུ་ཆེད་ཕེབས་ཀྱིས།    བོད་ནས་གསར་འབྱོར་བ་མི་གྲངས་ ༤༡  ཙམ་ལ་འཚམས་འདྲི་དང་འབྲེལ་གཏམ་བཤད་བྱས་ཡོད།    དེ་ཡང་གཏམ་བཤད་ཀྱི་སྙིང་དོན།     ཁྱེད་རང་ཚོ་བོད་ནས་ཕ་མ་སྤུན་མཆེད་དང་གཉེན་ཉེ་འབྲེལ་སྡེ་བ་གྲོང་བ་བཞག་སྟེ།  དམིགས་ཡུལ་དང་ཕུགས་བསམ་གསར་བ་ཞིག་སེམས་ལ་ཉར་ནས།   དཀའ་ལས་ཚད་མེད་བསྐྱོན་ཏེ་བཙན་བྱོལ་དུ་འབྱོར་བ་དང་།   རང་དབང་གི་ལུང་པ་འདིར་མི་ཚེ་གསར་བ་ཞིག་གི་མགོ་ཡང་བསྐྱར་ཚུགས་ཡོང་དུས།  རྟེན་འབྲེལ་མགོ་ནས་མ་འཕྱུགས་པ་ཞིག་བྱ་རྒྱུ་གལ་ཆེ་སྐོར་དང་།    བཙན་བྱོལ་བོད་མིའི་སྒྲིག་འཛུགས་ཀྱི་སྒྲོམ་གཞི་དང་།       བཙན་བྱོལ་ནང་གི་མང་གཙོའི་འཕེལ་རིམ།   བོད་རྒྱ་འབྲེལ་མོལ་གྱི་བརྒྱུད་རིམ་བཅས་ངོ་སྤྲོད་དང་འབྲེལ།         ད་ལྟའི་བོད་ནང་གི་རང་ལུས་མེར་བསྲེགས་ཀྱིས་མཚོན་པའི་གཞིས་ལུས་རྒྱ་ཆེའི་མི་མང་གི་ཛ་དྲག་གི་དཀའ་ངལ་ཉིན་རེ་ལས་ཉིན་རེར་ཆེ་རུ་འགྲོ་བཞིན་ཡོད་པས་ང་ཚོའི་འགན་ཁུར་སྔར་ལས་ཆེ་བ་དང་ལྕི་རུ་སོང་ཡོད་ཅིང་།    ཁྱེད་རང་ཚོའི་ནང་ཕལ་མོ་ཆེ་གཞོན་སྐྱེས་རྐྱང་རྐྱང་སློབ་གྲྭར་འགྲོ་མཁན་ཡིན་པས་གནའ་དེང་ཟུང་འབྲེལ་གྱི་སློབ་སྦྱོང་ཐོག་ཕྱོགས་གང་ས་ནས་འཐུས་མ་ཤོར་བ་དང་རྒྱུན་བསྲིངས་ཐོག      ཡུལ་ལུང་བརྗེ་བོ་བརྒྱབ་པའི་གནས་ཚུལ་ལ་བརྟེན་ནས་ས་ཆུ་མ་འཕྲོད་པ་སོགས་ཀྱི་དཀའ་ངལ་འཕྲད་མི་སྲིད་པ་མིན་པས་འཕྲོད་སྟེན་ལ་གཟབ་གཟབ་གནང་སྟེ།        བོད་སྤྱི་བའི་དོན་ལ་ཞབས་ཞུ་བྱེད་ཐུབ་པའི་ཤེས་ཡོན་ཅན་ཚད་དང་ལྡན་པ་ཞིག་བྱས་ཏེ།   ཕ་མ་སྤུན་མཆེད་ཚོའི་རེ་བ་མ་བརླག་པ་ཞིག་ཡོང་རྒྱུར་སྒོ་གང་ས་ནས་འབད་འབུངས་བྱེད་དགོས་པ་དང་།  རིང་མིན་བོད་ནང་གི་ཛ་དྲག་གི་དཀའ་ངལ་ལ་གདོང་ལེན་བྱེད་ཕྱོགས་ཐད་ཕྱི་ཟླ་ ༩  པའི་ནང་དམིགས་བསལ་ཛ་དྲག་ཚོགས་ཆེན་འཚོག་འཆར་ཡོད་པ་བཅས་ཀྱི་ཐོག་རྒྱས་བཤད་བྱས་ཤིང་།   གསར་འབྱོར་བ་ཚོར་དཀའ་ངལ་གང་ཡོད་སྣེ་ལེན་ཁང་གི་འབྲེལ་ཡོད་ཚོར་ཁ་བསང་ནས་ཞུ་དགོས་ཚུལ་ལམ་སྟོན་ཡང་ཞུས་ཡོད།