༄༅། །བོད་མི་མང་སྤྱི་འཐུས་ལྷན་ཚོགས་སྐབས་ ༡༥ པའི་ཚོགས་དུས་དང་པོའི་བཞུགས་མོལ་ཚོགས་འདུའི་ཐོག་སྤྱི་འཐུས་རྣམ་པ་ས་གནས་ཁག་ལ་ཕེབས་རྒྱུའི་སྐོར་ལ་བགྲོ་གླེང་གནང་སྐབས། སྐབས་ ༡༣ པའི་གྲོས་ཚོགས་ཚོགས་དུས་ལྔ་པའི་གྲོས་ཆོད་ཡིག་ཆ་ཨང་ ༤༠ དགོངས་དོན་ལྟར། སྤྱི་འཐུས་རྣམ་པ་བོད་མི་འདུ་སྡོད་ས་གནས་སོ་སོར་ས་བགོས་ཕྱོགས་བསྐྱོད་དུ་ཕེབས་རྒྱུ་མུ་མཐུད་གོ་སྒྲིག་གནང་ན་ལེགས་པའི་དགོངས་མཐུན་བྱུང་བ་བཞིན། སྤྱི་ལྷན་སྐབས་ ༡༥ པའི་ལས་རྒྱུན་ཧྲིལ་པོའི་རིང་སྤྱི་འཐུས་རྣམ་པ་ས་བགོས་ལྟར་ཕྱོགས་བསྐྱོད་ཐེངས་གཉིས་རེ་ཕེབས་རྒྱུ་དང་། ལོ་གཉིས་དང་ཕྱེད་ཀའི་རྗེས་ནས་ས་བགོས་ས་གནས་བརྗེ་བསྒྱུར་གནང་རྒྱུ།
༡༽ ས་གནས་ས་བགོས།
ཚོགས་གཙོ་སྦྲེལ་པོས་ས་གནས་ཀྱི་གནས་བབ་དང་བསྟུན་ནས་ས་བགོས་བྱས་ཡོད་ནའང༌། ས་ཁོངས་ཀྱི་སྤྱི་འཐུས་ནང་ཁུལ་ལས་བགོས་དང་ས་བགོས་ཇི་གནང་མོས་མཐུན་ལྟར་གནང་འཐུས། སོ་སོའི་ཁྱབ་ཁོངས་ནང་སུད་ཚོང་དང་ཁ་འཐོར་བོད་མིའི་འདུ་སྡོད་མ་ཚུད་པ་ཡོད་རིགས་དེ་དག་ལའང་སྤྱི་མཚུངས་གཟིགས་རྟོག་དགོས་རྒྱུ་དང༌། ཚོགས་དྲུང་ལས་ཁུངས་སུ་མཁྱེན་རྟོགས་སླད་འབྲེལ་བ་གནང་དགོས།
༢༽ ལས་དོན་ཞུ་སྒོ་ཁག
ཀ སོ་སོའི་ས་ཁུལ་གྱི་མི་མང་རྣམས་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཛད་འཕྲིན་དང། ཉེ་ཆར་ཆོས་ཚོགས་ཐེངས་ ༡༡ པའི་ཐོག་༸གོང་ས་མཆོག་གི་ཡང་སྲིད་ཕེབས་ཕྱོགས་ཐད་གསུང་འཕྲིན་ཕེབས་པའི་དོན་གནད་དང་། ཆོས་བརྒྱུད་ཆེན་པོ་བཞི་དང་། གཡུང་དྲུང་བོན་བཅས་པའི་དབུ་ཁྲིད་བླ་ཆེན་རྣམ་པས་ཟུར་རྒྱན་གྱི་གྲོས་ཆོད་བཞག་པའི་དོན་གནད། དེ་འབྲེལ་སྤྱི་ལྷན་སྐབས་ ༡༥ པའི་གྲོས་ཚོགས་ཚོགས་ཐེངས་ ༢ པའི་ཐོག་གྲོས་ཆོད་བཞག་པའི་དོན་གནད་རྣམས་གསལ་བཤད།
ཁ སྐབས་ ༡༥ པའི་གྲོས་ཚོགས་ཚོགས་ཐེངས་ ༢ པའི་ཐོག་བཅའ་ཁྲིམས་རྗེས་འབྲེལ་གྱི་ཁྲིམས་སྒྲིག་ཁག་བསྐྱར་བཅོས་ཟིན་པའི་དགོངས་དོན་རྣམས་མང་ཚོགས་ལ་གསལ་བཤད་བྱ་རྒྱུ།
ག ༢༠༠༨ ནས་བཟུང་བོད་ནང་གི་གནས་སྟངས་ཛ་དྲག་ཇེ་ཆེར་གནས་པ་དང། འདི་ལོ་ ༢༠༡༡ ནང་བོད་ནང་གི་དགེ་འདུན་པ་དང་བཙུན་མ། མི་སྐྱ་བཅས་གྲངས་ ༡༠ ནས་བོད་བསྟན་སྲིད་ཆེད་རང་སྲོག་བློས་བཏང་གིས་སྐུ་ལུས་མེ་མཆོད་དུ་ཕུལ་བར་རྒྱ་གཞུང་གིས་སྲིད་བྱུས་ངན་པ་ལག་བསྟར་བྱས་པའི་རྗེས་འབྲེལ་དོན་རྐྱེན་ཐོག་གསལ་བཤད།
ང བོད་མིའི་སྒྲིག་འཛུགས་ཀྱི་བོད་དོན་བདེན་མཐའ་གསལ་ཐབས་ཀྱི་ཆབ་སྲིད་ལངས་ཕྱོགས་གསལ་རྟོགས་ཐུབ་པ་བཟོ་རྒྱུ། དེ་བཞིན་རྒྱལ་སྤྱིའི་གནས་བབ་དང་རྒྱ་ནག་དང་བོད་ནང་གི་གནས་སྟངས་ཇི་བཞིན་མང་ཚོགས་ལ་གོ་རྟོགས་སྤེལ་རྒྱུ།
ཅ སོ་སོའི་ས་ཁོངས་ནང་མང་གཙོའི་ལམ་ལུགས་ཐོག་གོ་རྟོགས་སྤེལ་རྒྱུ་སྤྱི་དང༌། བྱེ་བྲག་ཏུ་འོས་འདེམས་བྱས་པའི་མི་མང་གི་འཐུས་མི་རྣམས་ལ་ལས་དོན་བྱེད་ཕྱོགས་ཀྱི་ལམ་སྟོན་དང་ཟབ་སྦྱོང་དགོས་རིགས་སྤྲད་རྒྱུ།
ཆ བོད་མིའི་འདུ་སྡོད་སོ་སོ་སྲ་བརྟན་གནས་ཆེད་ས་གནས་ཀྱི་གནས་སྟངས་ལ་ཞིབ་འཇུག་མཐིལ་ཕྱིན་གནང་སྟེ་མ་འོངས་འཆར་འགོད་ལ་ཕན་པའི་བསམ་ཚུལ་སྙན་ཐོའི་ནང་འགོད་དགོས།
ཇ ས་གནས་སོ་སོར་དབུས་དང་ས་གནས་སུ་དགོས་དངུལ་བཀའ་འཁྲོལ་ཡོད་པའི་ལས་གཞི་ཁག་ས་གནས་འཐུས་ཚོགས་དང་ལྷན་དུ་བྱ་ར་སྟངས་འཛིན་བྱ་རྒྱུ།
ཉ ས་གནས་སོ་སོར་གཞི་རིམ་དང༌། འབྲིང་རིམ། མཐོ་རིམ་སློབ་གྲྭ་ཁག་ཏུ་ཤེས་ཡོན་ཡར་རྒྱས་གཏོང་ཕྱོགས་འབྲེལ་ཡོད་ལ་གོ་བསྡུར་དང་ལམ་སྟོན་བྱ་འོས་བྱ་རྒྱུ།
ཏ སྤྱིར་བོད་མིའི་སྒྲིག་འཛུགས་ངོས་ནས་ཉམ་ཐག་དང༌། ནད་གཅོང་མགོན་མེད་ཁག་ལ་གཟིགས་རྟོག་གནང་བཞིན་ཡང་ད་དུང་དེ་རིགས་རེ་ཟུང་ལྷག་ཡོད་པ་ཡིན་ན་གཟིགས་སྐྱོང་གནང་ཕྱོགས་ལམ་སྟོན་བྱ་རྒྱུ།
ཐ སོ་སོའི་ས་ཁུལ་གྱི་རྒྱ་གར་དབུས་སའི་གྲོས་ཚོགས་འཐུས་མི་དང༌། གནད་ཡོད་མི་སྣར་འབྲེལ་ལམ་གྱིས་བོད་དོན་གསལ་བཤད་གནང་རྒྱུ་དང༌། རྒྱབ་སྐྱོར་ཐོབ་ཐབས་གནང་རྒྱུ།
ད བཙན་བྱོལ་བོད་མིའི་ཁྲོད་ནར་མ་སོན་པའི་ཕྲུ་གུ་གླ་གཡོག་ཏུ་ཉར་མཁན་རེ་ཟུང་ཡོད་པ་དེ་རིགས་རྒྱལ་སྤྱིའི་བྱིས་པའི་ཐོབ་ཐང་གི་ཆིངས་ཡིག་དང་། རྒྱལ་སྤྱིའི་ངལ་རྩོལ་ཁྲིམས་གཞི། དེ་བཞིན་གནས་ཡུལ་རྒྱ་གར་གྱི་རྩ་ཁྲིམས་དང་ཁྲིམས་གཞི་ཁག་ལ་འགལ་ཚབས་ཆེན་པོ་ཡིན་པ་དང་། སྤྱི་ལྷན་དང་འཛིན་སྐྱོང་ནས་དེའི་ཐད་ལམ་སྟོན་སྔ་རྗེས་བྱས་ཟིན་པ་སྤྱི་ཟོམ་སྣང་མེད་དུ་བསྐྱུར་འཇོག་མི་འོས་པའི་གོ་བསྐོན་སློབ་གསོ་གནང་རྒྱུ།
ན རྒྱ་ནག་གཞུང་གིས་བཙན་བྱོལ་ནང་གི་བོད་མིའི་སྒྲིག་འཛུགས་ཀྱི་ལངས་ཕྱོགས་དང་སྲིད་བྱུས་ལ་རྒྱབ་གཏོད་བྱེད་མཁན་གྱི་སྒེར་པ་རེ་ཟུང་དང་། ཚོགས་སྐྱིད། སྒྲིག་འཛུགས་ནང་གི་ལས་བྱེད་དང་། སྤྱི་ཚོགས་ནང་འགན་འཁུར་མཁན། དེ་མིན་བོད་ནས་རྗེས་འབྱོར་རེ་ཟུང་བཅས་ལ་མངོན་སུམ་འཛེམས་མེད་དུ་བསླུ་བྲིད་ཀྱིས། སྤྱི་ཚོགས་ནང་ཁུལ་དུ་དབྱེན་སྦྱོར་དཀྲུག་ཤིང་དང་། བོད་མིའི་འཐབ་རྩོད་ཀྱི་སྟོབས་ཤུགས་ཉམས་སུ་གཏོང་ཐབས་སྣ་ཚོགས་བྱེད་བཞིན་པར། བོད་མི་ཚང་མས་རྫི་གསང་པོ་དང་ཡིད་གཟབ་ཐུགས་སྣང་དགོས་པའི་འབོད་སྐུལ་གནང་རྒྱུ།
པ གཞན་དམིགས་བསལ་གནས་སྟངས་དབང་གིས་ལས་དོན་བྱེད་དགོས་ཡོད་ཚེ་ཚོགས་གཙོ་སྦྲེལ་པོར་དུས་ནས་དུས་སུ་ལམ་སྟོན་ཞུ་དགོས།
ཕ ས་གནས་སོ་སོའི་གནས་སྟངས་དང་བསྟུན་བཀུར་འོས་སྤྱི་འཐུས་རྣམ་པས་ལས་དོན་བྱེད་དགོས་རྣམ་དཔྱོད་རྩལ་དུ་བཏོན་ཏེ་སྐབས་བསྟུན་གནང་རྒྱུ།
༣༽ ཕྱོགས་བསྐྱོད་དུས་ཚོད་དང་ཡུན་ཚད།
ཀ དམིགས་བསལ་ཐག་གཅོད་ཡོད་ན་ལས་སྤྱི་འཐུས་རྣམས་སོ་སོའི་ས་ཁོངས་ནང་ལོ་རེར་ཐེངས་གཉིས་རེ་བསྐྱོད་རྒྱུ།
ཁ ཅི་སྟེ་ཆ་བགོས་ལྟར་སྤྱི་འཐུས་ཚང་མ་ལྷན་དུ་བསྐྱོད་མ་ཐུབ་པའི་གནས་ཚུལ་བྱུང་ན། ནང་ཁུལ་གོ་བསྡུར་གྱིས་ཐག་གཅོད་བྱེད་ཆོག
ག དབྱར་དུས་ཕྱི་ཟླ་ ༤ ཚེས་ ༡༥ ནས་ཟླ་ ༧ ཚེས་ ༡༥ བར་ས་བགོས་ཕྱོགས་བསྐྱོད་ཕེབས་ཟིན་པ་དགོས་རྒྱུ་དང་། དགུན་དུས་ཕྱི་ཟླ་ ༡༠ ཚེས་ ༡༥ ནས་ཟླ་ ༡ ཚེས་ ༡༥ ནང་ཚུན་ནང་ཁུལ་གོ་བསྡུར་གྱིས་ཕེབས་དགོས།
ང དབྱར་དུས་ས་བགོས་ཕྱོགས་བསྐྱོད་ཀྱི་ལས་བསྡོམས་སྙན་ཐོ་དང་རྩིས་ཁྲ་ཟླ་བ་ ༧ ཚེས་ ༣༠ ནང་ཚུན་དང༌། དགུན་དུས་ཕྱོགས་བསྐྱོད་ཀྱི་ལས་བསྡོམས་སྙན་ཐོ་དང་རྩིས་ཁྲ་ཟླ་ ༡ ཚེས་ ༣༡ ནང་ཚུན་ཚོགས་དྲུང་ལས་ཁུངས་སུ་འབྱོར་དགོས།
ཅ ས་གནས་སོ་སོར་མ་ཕེབས་གོང་འབྲེལ་ཡོད་ལ་གོ་བསྡུར་གྱིས་ལས་འཆར་རགས་ཟིན་ཚོགས་དྲུང་ལས་ཁུངས་སུ་འབུལ་དགོས། ཉིན་གྲངས་འཕར་ཆག་དགོས་རིགས་སྤྱི་འཐུས་རྒྱུན་ལས་ནས་ལམ་སྟོན་གནང་རྒྱུ།
༤༽ ལས་དོན་ཐག་གཅོད་བྱེད་ཕྱོགས།
ཀ ས་གནས་གང་དུའང་མང་ཚོགས་ཀྱི་དཀའ་ངལ་ཆུང་ཚགས་རིགས་དང༌། རྙོག་ཁྲ་ཡོད་རིགས་འབྲེལ་ཡོད་ས་གནས་འགོ་འཛིན་དང༌། ས་གནས་འཐུས་ཚོགས། རང་བདེན་ཚོགས་ཆུང་བཅས་ལྷན་དུ་གོ་བསྡུར་གྱིས་དཀའ་སེལ་གནང་འོས་གནང་རྒྱུ།
ཁ སྲིད་བྱུས་དང་འབྲེལ་ཡོད་ཀྱི་གནད་དོན་ཁག་དང༌། ལས་གཞི་རྒྱ་ཆེ་བའི་རིགས་ས་གནས་ནས་དཀའ་སེལ་ཐབས་ལམ་མེད་ཚེ་ལས་བསྡོམས་སྙན་ཐོ་ནང་ངེས་པར་འགོད་དགོས།
ག ཛ་དྲག་གི་གནས་སྟངས་དང༌། དུས་ཚོད་ངེས་ཅན་ནང་དཀའ་སེལ་དགོས་རིགས་སྙན་ཐོ་མ་ཕུལ་བར་དུ་སྒུག་མི་དགོས་ཐོག་ཞལ་དཔར་རམ་མྱུར་འཕྲིན་ཐོག་ནས་ཚོགས་དྲུང་ལས་ཁུངས་སུ་འབྲེལ་བ་གནང་དགོས།
ང ལས་དོན་གནང་སྐབས་འཛིན་སྐྱོང་དང༌། གྲོས་ཚོགས་ཀྱི་ས་མཚམས་འཛིན་དགོས་པ་དང༌། ཅི་སྟེ་ས་མཚམས་བརྒལ་མིན་གྱི་གནས་ཚུལ་བྱུང་ཚེ་འཕྲལ་དུ་ཚོགས་དྲུང་ལས་ཁུངས་སུ་འབྲེལ་བ་གནང་དགོས།
ཅ མི་མང་ལ་གསུང་བཤད་གནང་དགོས་ཀྱི་བརྗོད་གཞིའི་ནང་དོན་གྱི་སྒྲོམ་གཞི་དགོས་རིགས་ལ་ཚོགས་དྲུང་ལས་ཁུངས་ནས་མཐུན་འགྱུར་ཞུ་རྒྱུ།
ཆ སྤྱི་འཐུས་རྣམས་ས་བགོས་ས་གནས་སུ་དངོས་སུ་ཕེབས་སྐབས་ཙམ་དུ་མ་ཡིན་པར་དུས་རྒྱུན་དུ་ནས་ས་གནས་དེ་དག་ལ་བརྒྱུད་ལམ་སྣ་ཚོགས་ཀྱི་ལམ་ནས་གཟིགས་རྟོག་གནང་དགོས།
༥༽ མཇུག་སྐྱོང༌།
ཀ ས་བགོས་སོ་སོར་ཕྱོགས་བསྐྱོད་ཀྱི་ལས་བསྡོམས་སྙན་ཐོ་ཚང་མ་ཚོགས་དྲུང་ལས་ཁུངས་སུ་འབྱོར་འཕྲལ། སྤྱི་འཐུས་རྒྱུན་ལས་འཛིན་སྐྱོང་རྟོག་ཞིབ་སྡེ་ཚན་ནས་དཀའ་སེལ་གནད་དོན་འབྲེལ་ཡོད་དབུས་ལས་ཁུངས་སོ་སོར་དབྱེ་སྟེ་རྒྱུན་ལས་སུ་གོ་བསྡུར་བྱ་རྒྱུ།
ཁ དེ་ལྟར་ཕྱོགས་བསྒྲིགས་བྱས་པའི་དྲི་བ་ཁག་བཀའ་ཤག་བརྒྱུད་འབྲེལ་ཡོད་བཀའ་བློན་ལས་ཁུངས་སོ་སོར་དབྱར་དུས་ཕྱི་ཟླ་ ༨ ཚེས་ ༡༥ ནང་ཚུད་དང༌། དགུན་དུས་ཕྱི་ཟླ་ ༢ ཚེས་ ༡༥ ནང་ཚུན་འབུལ་ཐུབ་པ་བྱ་རྒྱུ།
ག དབྱར་དུས་ཟླ་ ༨ ཚེས་ ༣༠ ནང་ཚུན་དང༌། དགུན་དུས་ཟླ་ ༢ ཚེས་ ༢༨ ནང་ཚུན་འབྲེལ་ཡོད་བཀའ་བློན་སོ་སོས་ལན་འདེབས་ཡོང་ཐབས་བྱ་རྒྱུ།
ང གོང་གསལ་དྲི་བ་ལ་དྲིས་ལན་ངག་ཐོག་ཇི་གནང་བརྙན་འཕྲིན་འཁོར་ཐག་ཏུ་འཇུག་ཐབས་བྱ་རྒྱུ་དང་། དེའི་འཁོར་ལེབ་འབྲེལ་ཡོད་སྤྱི་འཐུས་སོ་སོ་དང༌། ས་གནས་སོ་སོར་གཏོང་ཐབས་བྱ་རྒྱུ་དང་། འགྲོ་གྲོན་རྩིས་ཁྲ་བཟོ་སྟངས་དང་ལས་བསྡོམས་འགོད་སྟངས་ཀྱི་ལམ་སྟོན་ཟུར་དུ་ཡོད་པ་བཅས། བོད་མི་མང་སྤྱི་འཐུས་ཚོགས་གཙོ་སྦྲེལ་པོས་ཕྱི་ལོ་ ༢༠༡༡ ཟླ་ ༡༠ ཚེས་ ༢༩ ལ།།