རྒྱལ་གཅེས་དཔའ་མོ་ཚེ་པེ་ལགས་ཀྱིས་རྒྱ་གཞུང་གི་ནོར་འཁྲུལ་དང་གདུག་རྩུབ་ཅན་གྱི་སྲིད་བྱུས་ལ་ངོ་རྒོལ་གྱིས་རང་ལུས་མེར་བསྲེགས་གནང་བར་བོད་མི་མང་སྤྱི་འཐུས་ལྷན་ཚོགས་ཀྱི་གསར་འགོད་བསྒྲགས་གཏམ།

༄༅། །ཕྱི་ལོ་ ༢༠༡༤ ཟླ་ ༡༢ ཚེས་ ༢༢ ཉིན་གྱི་བོད་ནང་གི་ཕྱི་དྲོའི་ཆུ་ཚོད་ ༤ པ་ཡོལ་ཙམ་ལ་མདོ་སྨད་རྔ་བ་རྫོང་རྨེའུ་རུ་མ་ཡུལ་ཚོའི་སྲང་ལམ་སྨད་ཕྱོགས་ནས་རང་ལོ་ ༡༩ ཡིན་པའི་བུ་མོ་ཚེ་པེ་ལགས་ཀྱིས་བོད་བསྟན་པ་ཆབ་སྲིད་ཀྱི་ཆེད་དུ་རང་ལུས་མེར་བསྲེགས་ཀྱིས་རྒྱ་གཞུང་གི་ནོར་འཁྲུལ་དང་གདུག་རྩུབ་ཅན་གྱི་སྲིད་བྱུས་ལ་ངོ་རྒོལ་བྱས་ཏེ་ས་གནས་དེ་གར་འདས་གྲོངས་སུ་གྱུར་པའི་གནས་ཚུལ་ཐོན་འདུགtsepel

ཕ་འཆི་མེད་རྡོ་རྗེ་(འཆི་རྡོར)དང་མ་ཅེན་དཔའ་གཉིས་ཀྱི་བུ་མོ་རྒྱལ་གཅེས་དཔའ་མོ་ཚེ་པེ་ནི་དེང་སྐབས་རྒྱ་གཞུང་གིས་བཅད་བཟུང་ས་བགོས་ལྟར་གྱི་སི་ཁྲོན་ཞིང་ཆེན་རྔ་བ་བོད་རིགས་རང་སྐྱོང་ཁུལ་རྔ་བ་རྫོང་རྨེའུ་རུ་མ་ཡུལ་ཚོའི་རུ་ཆེན་བཞི་བའི་ཡིན་ཞིང་། ཁོང་མོ་ད་ལྟ་རང་ལོ་ ༡༩ ཡིན་ལ་ཕ་མ་གཅིག་པའི་སྤུན་བུ་བུ་མོ་དྲུག་ཡོད་པའི་ནང་གི་བཞི་པ་དེ་ཡིན་འདུག ཁོང་ཆུང་དུས་སློབ་གྲྭར་འགྲོ་མྱོང་མེད་པར་ཕ་མ་དང་མཉམ་དུ་འབྲོག་པའི་འཚོ་བའི་ཁྲོད་འཚར་ལོངས་བྱུང་བ་ཞིག་ཡིན་ལ། ཀུན་གྱིས་བསྟོད་བསྔགས་དང་ཡིད་སྨོན་བྱེད་སའི་གཞུངས་དྲང་གཤིས་འཇམ་གྱི་བུ་མོ་ཡ་རབས་ཚུལ་མཐུན་ཞིག་ཡིན་འདུག རྒྱལ་གཅེས་དཔའ་མོ་ཚེ་པེ་ལགས་ཀྱིས་རང་ལུས་མེ་སྲེག་ཀྱི་ཞི་རྒོལ་བྱུང་རྗེས་ས་གནས་དེའི་ཉེན་རྟོག་པ་ཟེར་བ་ཚོས་དཔའ་མོ་ཚེ་པེ་ལགས་ཀྱི་སྐུ་ཕུང་བཙན་འཕྲོག་བྱས་ཡོད་པས་མ་ཚད། དགུང་ལོ་དྲུག་ཅུར་སོན་པའི་ཕ་འཆི་མེད་རྡོ་རྗེ་(འཆི་རྡོར)དང་མ་ཅེན་དཔའ། ད་དུང་གཅེན་པོ། ཡི་མེ་བཅས་བཙན་ཁྲིད་བྱས་ཡོད་འདུག་ཀྱང་བཀག་ཉར་བྱས་ཡོད་མེད་ཀྱི་གནས་ཚུལ་ད་ལྟ་ཁ་གསལ་མི་འདུག

རྒྱལ་གཅེས་དཔའ་མོ་ཚེ་པེ་ལགས་ཀྱིས་རང་ལུས་མེར་བསྲེགས་གནང་བ་འདི་ནི། ཕྱི་ལོ་ ༢༠༠༩། ༢། ༢༧ ནས་ ༢༠༡༤། ༡༢། ༢༢ བར་རང་ལུས་མེར་བསྲེགས་གནང་མཁན་གྱི་གནས་ཚུལ་ཤེས་རྟོགས་གསལ་ཁ་བྱུང་བའི་གྲངས་ ༡༣༤ པ་དེ་ཆགས་ཡོད། དེའི་ནང་འདས་གྲོངས་སུ་ཕྱིན་པའི་གྲངས་ ༡༡༥ དང་། ལྷག་མའི་མི་གྲངས་ ༡༩ ཡི་འདས་གསོན་གནས་སྟངས་གསལ་ཁ་ཡོང་ཐུབ་ཀྱི་མེད།

ད་ལྟའི་བར་དུ་རྒྱ་གཞུང་གིས་བོད་ཡུལ་སྟོད་སྨད་བར་གསུམ་གྱི་ཞིང་འབྲོག་དང་། དགོན་སྡེ། སློབ་གྲྭ་བཅས་ཀྱི་བོད་མི་རྒན་དར་གཞོན་གསུམ་གྱིས་ཞི་བའི་སྐད་འབོད་བྱེད་པ་དང་། ལྷག་པར་རང་ལུས་མེར་བསྲེགས་གནང་མཁན་རྣམས་ལ་དམའ་འབེབས་དང་སྡིགས་ར་སྐུལ་བ། ཁོ་ཚོ་ནི་རིག་འཚོ་མ་ཟིན་པ་དང་། བཟའ་ཚང་མ་འཆམ་པ། གཞན་གྱིས་བརྒྱུད་སྐུལ་དང་བཙན་སྐུལ་བྱས་པ་རེད་ཟེར་བ་སོགས་ཁུངས་ལུང་མེད་པ་དང་གནས་ལུགས་ལ་རྒྱབ་འགལ་དུ་འགྲོ་བའི་རྒྱག་གཏམ་འབའ་ཞིག་གིས་བསྙོན་དཀྲི་བཙན་འགེལ་བྱེད་པ་དང་། ད་དུང་ཁོང་ཅག་རྣམས་ཀྱི་ནང་མི། གཉེན་ཉེ་དུ། སྤུན་མཛའ་གྲོགས་སོགས་འབྲེལ་ཡོད་སྡེ་ཚོ་རེ་རེ་ལའང་དོན་མེད་ཁག་དཀྲི་སྣ་ཚོགས་བྱེད་པ་དང་། ཁྱིམ་ཚང་སྡེ་ཚོ་སོགས་ཀྱི་འཚོ་བའི་ཡོང་ཁུངས་བཙན་གྱིས་བཅད་དེ་བོད་རིགས་ཡུལ་མི་རྣམས་ལ་བཀྲེས་སྐོམ་མྱོང་དུ་བཅུག་ནས་སྤྲང་འཁྱམས་དབུལ་ཕོངས་ཀྱི་གནས་སུ་གྱར་དུ་བཅུག་ན། མང་ཚོགས་རང་བཞིན་གྱིས་རང་ལུས་མེ་བསྲེག་ལ་ཚོད་འཛིན་བྱ་ཐུབ་པའི་འདོད་རྔམ་བཅངས་ཏེ། རང་ལུས་མེ་སྲེག་ལ་ཚོད་འཛིན་དང་ཁ་སྒྱུར་བྱེད་འདོད་པ་ཙམ་ལས། ཁོང་རྣམས་ཀྱིས་གཞན་ལ་འཚེ་བ་མེད་པའི་ཐོག་ནས་རང་ཉིད་ཀྱི་ལུས་སྲོག་ལོངས་སྤྱོད་དང་བཅས་པ་བློས་གཏོང་གནང་དགོས་པའི་འཕྲལ་ཕུགས་ཀྱི་རྒྱུ་རྐྱེན་ངོ་མ་སྟེ། ཁོང་ཚོའི་མངོན་འདོད་དང་རེ་བ་ཇི་ཡིན་ལ་རྟོག་ཞིབ་ཀྱིས་གནད་དོན་དངོས་ཐག་གཅོད་ཀྱི་འགན་ཁུར་གང་ཡང་མེད་པའི་ཁར། “ རྒྱལ་ཁབ་ཁ་བྲལ ” ཟེར་བའི་ཉེས་མིང་ཞིག་བཀལ་བ་ཙམ་གྱིས་རྒྱལ་སྤྱིའི་འགྲོ་བ་མིའི་ཐོབ་ཐང་དང་། མང་གཙོ། རང་དབང༌། དྲང་བདེན་བཅས་པ་རྒྱང་དུ་དོར་ཆོག་ཆོག་དང་། ཞི་བདེ་དང་དྲང་བདེན་མང་གཙོ་བཅས་ལ་དགའ་བའི་རྒྱལ་ཁབ་ཁག་གི་གཞུང་དང་། གྲོས་ཚོགས། རྒྱལ་སྤྱིའི་གནད་ཡོད་དབུ་འཁྲིད་རྣམ་པ། གཞུང་སྒེར་ཚོགས་སྡེ་སོགས་ཀྱིས་བོད་མིའི་དཀའ་ངལ་སེལ་ཐབས་སུ་གྲོས་ཆོད་རིམ་འཇོག་དང་འབོད་སྐུལ་ཇི་གནང་བཅས་ཚང་མར་བརྩི་མེད་ཀྱིས་རྒྱ་གཞུང་གིས་རང་འདོད་ཁོ་ན་ལག་བསྟར་བྱས་དང་བྱེད་བཞིན་པའི་མཇུག་འབྲས་མཐའ་དག་རྒྱ་ནག་གཞུང་ཕྱོགས་ཀྱི་སྐབས་འབྲེལ་འགོ་ཁྲིད་རྣམས་ཀྱིས་འགན་ཆ་ཚང་འཁུར་དགོས་པ་བཅས།

བོད་མི་མང་སྤྱི་འཐུས་ལྷན་ཚོགས་ཀྱིས་ཕྱི་ལོ་༢༠༡༤ ཟླ ༡༢ ཚེས་ ༢༣ ལ།