དེ་ལྟར་ན་ཕྱི་ལོ་༢༠༠༩ ནས་༢༠༡༣  ཟླ ༢ ཚེས ༣  བར་ང་ཚོས་ཤེས་རྟོགས་གསལ་པོ་བྱུང་བ་བོད་ནང་དུ་རང་ལུས་མེར་སྲེག་གིས་རྒྱ་གཞུང་ལ་ངོ་རྒོལ་བྱེད་མཁན་གྲངས་༡༠༡ དང་སྐུ་གཤེགས་པ་མི་གྲངས་ ༨༥  ཆགས་ཡོད། ད་དུང་གསལ་པོ་མ་ཆགས་པའི་རིགས་ཡོད་ལ། དེ་བཞིན་རྒྱ་གཞུང་གི་དམ་དྲག་འོག་ནས་རྩ་བ་ནས་ཤེས་རྟོགས་བྱུང་མེད་པའི་རིགས་ཀྱང་ཡོད་སྲིད།  བོད་ནང་རང་ལུས་མེར་སྲེག་གི་ཞི་བའི་རྒོལ་ལངས་གཅིག་མཇུག་གཉིས་མཐུད་ཀྱིས་ད་ལྟའི་སྐབས་གྲངས་བརྒྱ་ཕྲག་གཅིག་བརྒལ་ཡོད་རུང་། རྒྱ་ནག་གཞུང་གིས་ད་དུང་ཡང་སྡིག་པ་མིག་བཙུམ་གྱིས། ཕྱི་ལོ་༢༠༡༢ ཟླ་༡༡ ཚེས་༡༤ ཉིན་བོད་ཀྱི་ས་གནས་གང་སར་རང་ལུས་མེར་སྲེག་གི་གནད་དོན་ལ་དམིགས་ནས་འཁྱོག་བཤད་དང་དངོས་ཡོད་མ་ཡིན་པའི་༼དོན་ཚན་ལྔ་༽ཅན་ཞིག་ས་གནས་གང་སར་སྦྱར་འགྲེམས་བྱས་ཡོད་པ་དེ་དང་། ཡང་ཕྱི་ལོ་༢༠༡༢ ཟླ་༡༡ ཚེས་༢༠ རྨ་ལྷོ་ཁུལ་སྤྱི་བདེ་ཉེན་རྟོག་ལས་ཁུངས་ཀྱིས། རང་ལུས་མེར་སྲེག་དང་འབྲེལ་བའི་༼དོན་ཚན་བདུན་༽ཅན་ཞིག་ཁྱབ་བསྒྲགས་བྱས་ཡོད་པ་དང་། ཡང་ཕྱི་ལོ་༢༠༡༢ ཟླ་༡༢ ཚེས་༣ ཉིན་དབུས་གཞུང་གི་ཁྱབ་བསྒྲགས་ཡིག་ཆ་ནང་རང་ལུས་མེར་སྲེག་གི་ཆེད་དུ་རྩ་འཛུགས་དང་ཇུས་འགོད། ངན་སྐུལ། བཙན་ཤེད། བསླུ་བྲིད། གོ་ངན་ཀླད་བླུགས་བྱེད་མཁན། རང་ལུས་མེར་སྲེག་བྱེད་མཁན་གྱི་ཕུང་པོ་ཡར་བཏེགས་ནས་ཁྲོམ་སྐོར་དང་མི་མང་པོ་འདུ་འཛོམས། རུབ་ནས་ལྟ་བ། མི་མང་མཉམ་རུབ་ཀྱིས་རང་སྲེག་བྱེད་མཁན་གྱི་ཕུང་པོ་སྐྱེལ་བ། དེའི་དོན་དུ་ཞལ་འདེབས་སློང་བ། མེར་སྲེག་བརྒྱུད་སྐུལ་བྱེད་མཁན་མི་གསོད་ནག་ཉེས་ཀྱི་ཁྲིམས་ཐོག་སྦྱར་ཞེས་ཁྱབ་བསྒྲགས་བྱས་ཡོད་པ་ལྟར། རང་ལུས་མེར་སྲེག་གི་ངན་ཁག་གཞན་ལ་དཀྲིས་ཐབས་དང་། རྒྱ་ནག་གི་དབང་འཛིན་པ་ཚོས་རྒྱ་ནག་རང་ཉིད་ཀྱི་རྩ་ཁྲིམས་སོགས་དང་འགལ་བའི་ཁྲིམས་གཞི་སྣ་ཚོགས་གང་དྲན་དྲན་གྱིས་དྲིལ་བསྒྲགས་བྱས་ཏེ། བོད་མི་རྣམས་ལ་སྲོག་ཁྲིམས་དང་ལོ་གྲངས་རྒྱས་བཅད་ཀྱི་བཙོན་འཇུག མནར་གཅོད། ཆབ་སྲིད་ཀྱི་ཁེ་དབང་འཕྲོག་ཐབས། དགེ་འདུན་པ་རྣམས་དགོན་པ་ནས་ཕྱིར་ཕུད་བྱས་པ། བོད་མི་རྣམས་ལ་འཇིགས་སྐུལ་གྱིས་གནས་ཚུལ་རྫུན་སྒྲིག་གི་ཁྱབ་བསྒྲགས་བྱེད་བཅུག་དང་འཇུག་བཞིན་པ་ཡིན།

རྒྱ་གཞུང་གིས་ཁྲིམས་གཞི་རྫུན་མ་དེར་ཁ་གཡར་ནས། ཕྱི་ལོ་༢༠༡༣  ཟླ ༡  ཚེས༣༡ ཉིན།  སི་ཁྲོན་ཞིང་ཆེན་རྔ་པ་ཁུལ་འབྲིང་རིམ་དམངས་ཁྲིམས་ཁང་ཟེར་བས་རྔ་པའི་བློ་བཟང་དཀོན་མཆོག་དང་།  བློ་བཟང་ཚེ་རིང་གཉིས་ལ་མི་བསད་པའི་ཉེས་འཛུགས་འོག བློ་བཟང་དཀོན་མཆོག་ལ་སྲོག་ཁྲིམས་བཅད་དེ་ལོ་གཉིས་ཀྱི་རྗེས་སུ་ལག་བསྟར་བྱ་རྒྱུ་དང་། ཆབ་སྲིད་ཁེ་དབང་ཚེ་གང་བོར་འཕྲོག་རྒྱུ། བློ་བཟང་ཚེ་རིང་ལ་ལོ་ ༡༠ ཡི་དུས་བཀག་བཙོན་འཇུག་བྱས་ཡོད། དེ་བཞིན་བླ་བྲང་དང་མཚོ་སྔོན་ཁུལ་སོགས་སུ་འཇུ་བཟུང་དང་བཙོན་འཇུག་སྣ་ཚོགས་བྱས་དང་བྱེད་བཞིན་ཡོད། རང་ལུས་མེར་སྲེག་དེ་ཆོས་དང་འགལ་བ་ཡིན་ཚུལ་དྲིལ་བསྒྲགས་ཀྱི་ཆེད་དུ། ཟླ་༡ ཚེས་༡༦ ཉིན་ཀྲུང་གོའི་ནང་བསྟན་མཐུན་ཚོགས་ཟེར་བས་བཙན་སྐུལ་གྱིས་༼ནང་པའི་ཚེ་སྲོག་གི་ལྟ་བ་བགྲོ་གླེང་ཚོགས་འདུ་༽ཞེས་པ་བསྐངས་ཏེ། ༼བྱམས་སྙིང་རྗེའི་བསམ་པ་བཅངས་ནས་ཚེ་སྲོག་ལ་གཅེས་འཛིན་བྱེད་དགོས་༽ཟེར་བ་སོགས། ཆོས་བྱེད་མི་སྣ་རྣམས་ལ་ཆོས་དང་འགལ་བའི་རྫུན་དངའཁྱོག་བཤད། མི་རིགས་དབྱེན་དཀྲུག་བྱེད་བཅུག་ཡོད། ཡང་ཟླ་༡ ཚེས་༢༡ ཉིན་ཀན་ལྷོ་ཁུལ་དུ་༼རང་སྲེག་ཕར་རྒོལ་ཁུལ་ལས་དོན་འགོ་ཁྲིད་ཚོགས་ཆུང་༽ཟེར་བའི་འཐུས་མི་ཚོས། ས་གནས་ཁག་གི་དགོན་པའི་གྲྭ་པ་ཚོར་དོ་དམ་བྱེད་དགོས་པ་དང་རྒྱ་ཡིག་སྦྱོང་དུ་བཅུག་དགོས་པ། དྲ་བླུག་སྤོ་ལོའི་གདང་བུ། ཕིང་ཕང་སྤོ་ལོའི་རྒྱག་སྟེགས། རྐང་རྩེད་སྤོ་ལོའི་རྒྱག་སྟེགས་སོགས་གང་མགྱོགས་མཁོ་སྤྲོད་བྱེད་འཆར་ཡོད་བཤད་པ་དེར་མཚོན་ན། དགོན་པ་རྒྱ་ཡིག་སྦྱང་སའི་སློབ་གྲྭར་སྒྱུར་འཆར་དང་དགེ་འདུན་པ་ཚོའི་བསླབ་པ་སློབ་གཉེར་ལ་བར་ཆད་གཏོང་བའི་ལས་འཆར་སྒྲིག་པ་ཞིག་ཡིན། དེ་བཞིན་སི་ཁྲོན་ཞིང་ཆེན་རྔ་པ་ཁུལ་དང་བླ་བྲང་བསང་ཆུ་རྫོང་། རྨ་ལྷོ་རེབ་གོང་། མཚོ་སྔོན། ཁམས་བྲག་འགོ་སོགས་སུ་གནས་ཚུལ་སྣ་ཚོགས་ལ་ཁ་གཡར་ནས་བོད་མི་རྣམས་འཇུ་བཟུང་བཙོན་འཇུག་བྱེད་བཞིན་ཡོད། ཟླ ༢   ཚེས ༧ ཉིན་རྒྱ་གཞུང་གི་བརྒྱུད་ལམ་ཁག་ཏུ། མཚོ་སྔོན་ཉེན་རྟོག་པས་རྨ་ལྷོ་ཁུལ་གྱི་རང་བསྲེགས་དང་འབྲེལ་བ་ཡོད་པའི་དོགས་ཡོད་མི་སྣ་༧༠ འཛིན་བཟུང་བྱས་ལུགས་བརྗོད་པ་དང་། དེའི་ནང་མི་གྲངས་ ༥༢ ལ་དྲག་སྡོམ་འདྲི་གཅོད་དངོས་སུ་ལག་བསྟར་དང་། མི་གྲངས་ ༡༢ ལ་དངོས་སུ་འཛིན་བཟུང་ཁྲིམས་གཅོད་བྱ་གཏན་འཁེལ་ཡོད་ཅེས་སོགས་ཁྱབ་བསྒྲགས་བྱས་ཡོད།

བལ་ཡུལ་གྱི་མཆོད་རྟེན་བྱ་རུང་ཁ་ཤོར་གྱི་ཉེ་འགྲམ་དུ་རང་ལུས་མེར་བསྲེགས་གནང་མཁན་རྒྱལ་གཅེས་དཔའ་བོ་སྒྲུབ་ཚེ་ལགས།གཞན་ཡང་། ཕྱི་ལོ་༢༠༡༣ ཟླ་༢ ཚེས་༡༣ ཉིན་བལ་ཡུལ་གྱི་མཆོད་རྟེན་བྱ་རུང་ཁ་ཤོར་གྱི་ཉེ་འགྲམ་དུ་བོད་མི་སྒྲུབ་ཚེ་(འགྲུབ་བཞིན་ཚེ་རིང་)ཞེས་པ་ཞིག་གིས་རང་ལུས་མེར་སྲེག་བཏང་སྟེ། ༧རྒྱལ་བ་རིན་པོ་ཆེ་བོད་ལ་གདན་འདྲེན་ཞུ་དགོས་ཞེས་འབོད་ནས་རྒྱ་གཞུང་ལ་ངོ་རྒོལ་བྱས་ཡོད་འདུག་ལ། ཁོང་གིས་རང་ལུས་སུ་སྲིན་བལ་དཀྲིས་ཏེ་ལྕགས་སྐུད་ཀྱིས་བདམས་ནས་དེའི་ཐོག་རྡོ་སྣུམ་བླུགས་ཡོད་འདུག མེར་སྲེག་བཏང་བ་དང་ཐང་ལ་རིལ་སྐབས་བལ་ཡུལ་གྱི་ཉེན་རྟོག་པ་སླེབས་སྟེ་ཁྲིད་ཡོད་པ་རེད། དེ་ནས་ཡུན་རིང་མ་སོང་བར་སྐུ་འདས་གྲོངས་སུ་གྱུར་ཡོད། ཟླ་འདིའི་ཚེས་༡༤ ཉིན་བོད་ནས་ཁ་པར་བརྒྱུད་གནས་ཚུལ་མཁོ་སྤྲོད་གནང་བ་ལྟར་ན། སྒྲུབ་ཚེ་ནི་ཁམས་དཀར་མཛེས་ཁུལ། གསེར་རྟ་རྫོང་གནུབས་ཟུར་ཡུལ་ཚོ་རྒྱལ་ཕྱུག་སྡེ་བ་ནས་ཡིན་པ་དང་། ཡབ་སྤྲུལ་སྐུ་གསང་སྔགས་བསྟན་འཛིན་དང་མ་ཚེ་ལྷ་གཉིས་ཀྱི་སྲས་ཡིན་འདུག རང་ལོ་ཉི་ཤུ་རྩ་ལྔ་ལ་སོན་ཡོད་པ་དང་། ཁོང་གིས་ད་སྔོན་བོད་མི་རིགས་ལ་ཕན་པའི་བྱ་བ་ཞིག་སྒྲུབ་མ་ཐུབ་ཀྱང་མ་འོངས་ངས་གང་ཐུབ་ཀྱིས་བོད་མ་རིགས་ལ་ཕན་པའི་བྱ་བ་ཞིག་སྒྲུབ་རྒྱུ་ཡིན་ཞེས་འབྲེལ་ཡོད་ལ་བཤད་ཡོད་འདུག གསེར་རྟ་རྫོང་གནུབས་ཟུར་ཡུལ་ཚོ་རྒྱལ་ཕྱུག་དགོན་པར་ཆོས་ཞུགས་བྱས་ཡོད་འདུག ཁོང་རྩིས་པའི་བཙན་བྱོལ་ནང་རང་ལུས་མེར་སྲེག་གནང་མཁན་ ༦ བྱུང་ཡོད་པ་རེད།བལ་ཡུལ་གྱི་མཆོད་རྟེན་བྱ་རུང་ཁ་ཤོར་གྱི་ཉེ་འགྲམ་དུ་རང་ལུས་མེར་བསྲེགས་གནང་མཁན་རྒྱལ་གཅེས་དཔའ་བོ་སྒྲུབ་ཚེ་ལགས།

གང་ལྟར་བོད་ཕྱི་ནང་གཉིས་སུ་རང་ལུས་མེར་སྲེག་གནང་དོན་ནི། ༧གོང་ས་མཆོག་བོད་དུ་ཕེབས་ཐུབ་ཐབས་དང་བོད་མི་རྣམས་ལ་རང་དབང་ཐོབ་ཆེད་དུ་ཡིན་པས། རྒྱལ་སྤྱིའི་སྲིད་གཞུང་ཁག་དང་ཚོགས་སྡེ་ཁག གསར་འགོད་པ། ཉམས་ཞིབ་པ། མཁས་དབང་། སྤྱི་ཚོགས་ལས་འགུལ་བ། མང་གཙོ་དོན་གཉེར་བ་སོགས་ཚང་མས། བོད་ཕྱི་ནང་གཉིས་ནང་རང་ལུས་མེར་སྲེག་གནང་བཞིན་པ་འདིའི་དགོས་དོན་དང་རྒྱབ་ལྗོངས། རྒྱ་ནག་གཞུང་ཕྱོགས་ནས་འགྲེལ་བརྗོད་བྱེད་བཞིན་པ་དེ་དག་དངོས་ཡོད་ཡིན་མིན་སོགས་ལ་ཞིབ་འཇུག་དཔྱིས་ཕྱིན་པ་བྱས་ཏེ། བདེན་པ་ལ་རྒྱབ་སྐྱོར་དང་རྫུན་མ་ལ་ཐེར་འདོན་ངེས་པར་དུ་བྱེད་དགོས་ཞེས་ཞུ་རྒྱུ་ཡིན།

ཞེས་བོད་མི་མང་སྤྱི་འཐུས་ལྷན་ཚོགས་ཀྱིས་ཕྱི་ལོ་༢༠༡༣ ཟླ་༢ ཚེས་༡༥ ཉིན།།