༄༅། ། སྐབས་ ༡༧ པའི་བོད་མི་མང་སྤྱི་འཐུས་རྣམ་པ་ས་གནས་སོ་སོའི་མི་མང་གི་བདེ་སྡུག་གཟིགས་ཞིབ་སླད། ས་བགོས་ཕྱོགས་སྐྱོད་ཀྱི་ལས་རིམ་ཡོད་པ་ལྟར། བོད་མི་མང་སྤྱི་འཐུས་བསྟན་པ་ཡར་འཕེལ་མཆོག་དང་སྤྱི་འཐུས་ཀུན་དགའ་བསོད་སྟོབས་མཆོག་རྣམ་གཉིས་ཕྱི་ལོ་ ༢༠༢༢ ཟླ་༩ ཚེས་ ༢༩ ཉིན་རྒྱ་གར་བྱང་ཤར་ཨ་རུ་ན་ཅལ་མངའ་ཁོངས་བསྟན་འཛིན་སྒང་ས་གནས་སུ་ཕེབས་འབྱོར་བྱུང་ཡོད་པ་དང་། སྐབས་དེར་བསྟན་སྒང་ས་གནས་འགོ་འཛིན་དང་། ལས་དྲུང་། རྩིས་པ། གསང་ཆེན་བསྟན་པའི་འབྱུང་གནས་དཔལ་ལྡན་རྒྱུད་སྟོད་གྲྭ་ཚང་གི་ཕྱག་མཛོད། བསྟན་སྒང་ས་འཐུས་ཚོགས་གཙོ། ས་གནས་མཉམ་འབྲེལ། ས་གནས་འཕྲོད་བསྟེན་ལས་བྱེད། ས་གནས་སམ་བྷོ་ཊཱའི་སློབ་སྤྱི། ས་གནས་སྤྱི་མི་བཅས་ནས་ཕེབས་བསུའི་སྣེ་ལེན་གནང་།

ཕྱི་ཚེས་ ༣༠ ཞོགས་པ་དཔལ་ལྡན་རྒྱུད་སྟོད་གྲྭ་ཚང་དུ་མཆོད་མཇལ་དང་། དེ་རྗེས་བསྟན་འཛིན་སྒང་ས་གནས་ཀྱི་གནད་ཡོད་མི་སྣ་ཁག་དང་སྤྱི་མི་རྣམ་པ། ས་གནས་མི་མང་རྣམ་པ་དང་ལྷན་ཚོགས་འདུ་འཚོགས་ཤིང་། ཚོགས་འདུའི་ཐོག་ས་གནས་འགོ་འཛིན་གྱི་ལོ་འཁོར་ལས་བསྡོམས་སྙན་སྒྲོན་དང་། སྤྱི་འཐུས་རྣམ་གཉིས་ནས་༸གོང་ས་མཆོག་གི་མཛད་འཕྲིན་དང་། བོད་ནང་གི་ཛ་དྲག་གནས་སྟངས། རྒྱལ་སྤྱིའི་ཐོག་བོད་དོན་ཞུ་གཏུགས་སྐོར། བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་སྔ་རྗེས་ཀྱི་གྲོས་ཆོད་ཁག་བཅས་ཀྱི་སྐོར་བཅས་གཏམ་བཤད་གནང་། མཇུག་ཏུ་མི་མང་གི་དྲི་བ་ཁག་ལ་ལན་འདེབས་གནང་། དེ་བཞིན་ས་གནས་འཐུས་ཚོགས་ཀྱི་ཚོགས་ཁང་། ས་གནས་འགོ་འཛིན་ལས་ཁུངས། ས་གནས་མཉམ་འབྲེལ་བཅས་སུ་ཆེད་བཅར་གྱིས་ས་གནས་ཀྱི་གནས་སྟངས་ལ་རྒྱུས་ལོན་གནང་།ཉིན་རྒྱབ་བསྟན་འཛིན་སྒང་སམ་བྷོ་ཊའི་གཞི་རིམ་བར་མའི་སློབ་གྲྭ་དང་། ས་གནས་བོད་མིའི་གཞིས་ཀེམ་ཁག་ལ་གཟིགས་ཞིབ་གནང་སྟེ་ཐེངས་འདིའི་ས་གནས་བསྟན་འཛིན་སྒང་དུ་གཞུང་འབྲེལ་ཕྱོགས་སྐྱོད་ཀྱི་ལས་དོན་ལེགས་འགྲུབ་བྱུང་ཡོད་པ་བཅས།།