༄༅། །ཕྱི་ལོ་ ༢༠༢༥ ཟླ་ ༤ ཚེས་ ༢༡ ཉིན་ཡེ་ཤུའི་བླ་ཆེན་པོབ་ཧྥ་རན་སི་སི་ (His Holiness Pope Francis) མཆོག་དགོངས་པ་རྫོགས་པར། དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་བོད་མི་མང་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ་ཡེ་ཤུའི་རྣམ་དག་ཆོས་ལུགས་ཀྱི་ཆོས་བརྒྱུད་འཛིན་པ་ཡོངས་ལ་ཐུགས་གསོ་ཞུས་གནང་འདུག
དེ་ཡང་ཐུགས་གསོའི་འཕྲིན་ཡིག་ནང་འཁོད་དོན། ཡེ་ཤུའི་བླ་ཆེན་པོབ་ཧྥ་རན་སི་སི་མཆོག་དགོངས་པ་རྫོགས་པར་བློ་ཕམ་དང་བཅས་མྱ་ངན་གུས་འདུད་ཞུ་རྒྱུ་ཡིན། ཡེ་ཤུའི་བླ་ཆེན་ཁོང་ནི་ཞི་དུལ་དང་། བྱམས་བརྩེ། བཟང་སྤྱོད་དང་ལྡན་པའི་ཐོག་དབུ་ཁྲིད་ཀྱི་མཛད་འགན་བཞེས་མཁན་ཞིག་ཡིན། དམ་པ་ཁོང་གིས་དབུལ་ཕོངས་ཉམ་ཐག་ལ་གཟིགས་རྟོག་དང་། ཁོར་ཡུག་སྲུང་སྐྱོབ། ཞི་བདེ་དང་གྲོས་མོལ་གོང་མཐོར་གཏོང་ཐབས་ཀྱི་མཛད་ཁུར་བཞེས་པའི་ཐོག་ནས། ཡེ་ཤུའི་རྣམ་དག་ཆོས་ལུགས་ཀྱི་ཆོས་བརྒྱུད་འཛིན་པ་ཙམ་མ་ཡིན་པར། འཛམ་གླིང་འདིར་གནས་པའི་མི་ཧ་ཅང་མང་པོར་སེམས་ཤུགས་སྤར་ཡོད་པ་མ་ཟད། ཤུགས་རྐྱེན་ཡང་ཟབ་མོ་ཐེབས་ཡོད། དམ་པ་ཁོང་གི་མཛད་རྗེས་རྣམས་མི་རབས་ནས་མི་རབས་བརྒྱུད་མུ་མཐུད་གནས་ངེས་ཡིན།
ངས་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ། ཡེ་ཤུའི་རྣམ་དག་ཆོས་ལུགས་ཀྱི་ཆོས་བརྒྱུད་འཛིན་མཁན་དང་། ཁོང་གི་རྗེས་འབྲངས་པ་ཡོངས་ལ་ཐུགས་གསོ་ཞུ་རྒྱུ་དང་། དམ་པ་དེ་ཉིད་ཀྱི་མཛད་རྗེས་ལ་གུས་བཀུར་དང་། ཡིད་སྨོན་ཆེན་པོ་ཞུས་པའི་ཐོག ཡིད་སྐྱོ་བའི་དུས་སྐབས་འདིར། ང་ཚོས་གདུང་སེམས་མཉམ་སྐྱེད་ཞུ་རྒྱུ་ཡིན་ཞེས་འཁོད་འདུག་པ་བཅས།