༄༅། ། ཕྱི་ལོ་ ༢༠༡༩ ཟླ་ ༣ ཚེས་ ༡༥ ཉིན་བོད་མི་མང་སྤྱི་འཐུས་ལྷན་ཚོགས་ཀྱི་མང་ཚོགས་རྩིས་ཁྲའི་ཚོགས་ཆུང་སྐབས་ ༩ པས་བཙན་བྱོལ་བོད་གཞུང་ལས་ཁུངས་མ་ལག་དང་། ཟུར་སྐྱོང་སྡེ་ཚན་དང་བཅས་པའི་སྡེ་ཚན་གྲངས་ ༡༧༦ གི་གཙོ་བོ་རྩིས་ལོ་ ༢༠༡༥་་་༡༦ ལོའི་རྩིས་ཞིབ་སྙན་ཐོ་དང་དེ་དག་གི་ལན་འདེབས་བཅས་ལ་ཞིབ་འཇུག་དང་། མང་ཚོགས་རྩིས་ཁྲའི་ཚོགས་ཆུང་སྐབས་ ༨ པའི་སྙན་ཐོར་འཛིན་སྐྱོང་ནས་མཇུག་སྐྱོང་བྱས་ཟིན་པ་རྣམས་ལ་ཞིབ་འཇུག་གིས་མུ་མཐུད་མཇུག་སྐྱོང་དགོས་རིགས་སྙན་ཐོར་འགོད་རྒྱུ་སོགས་ལེགས་གྲུབ་ཀྱིས་ལས་དོན་མཐའ་དག་མཇུག་བསྒྲིལ་གནང་ཡོད་འདུག
དེ་ཡང་ཚོགས་ཆུང་ནས་ཕྱི་ལོ་ ༢༠༡༨ ཟླ་ ༦ ཚེས་ ༡༡ ཉིན་སྤྱི་ཁྱབ་རྩིས་ཞིབ་ལས་ཁང་ལ་རྩིས་ལོ་ ༢༠༡༥་་་༢༠༡༦ ལོའི་རྩིས་ཞིབ་ཟིན་པ་དང་། རྩིས་ཞིབ་ཟིན་ལ་ཉེ་བ། རྩིས་ཞིབ་མ་ཟིན་པ་བཅས་ཀྱི་ཐོ་གཞུང་དགོས་གནས་ཡིག་ཆུང་ཕུལ་དོན་ལྟར། སྤྱི་ཁྱབ་རྩིས་ཞིབ་ལས་ཁང་ནས་ཕྱི་ལོ་ ༢༠༡༨ ཟླ་ ༦ ཚེས་ ༡༢ ཉིན་རྩིས་ཞིབ་ཟིན་པའི་ལས་ཁུངས་སམ་སྡེ་ཚན་ཁག་ ༢༣༢ དང་རྩིས་ཞིབ་ཟིན་ལ་ཉེ་བ་ ༢༣ གྱི་ཐོ་གཞུང་འབྱོར་བར་ཞིབ་ལྟ་གནང་ཡོད་འདུག་པ་དང་། དེའི་ནང་གི་རྩིས་སྙན་ལན་འདེབས་མེད་པའི་ལས་ཁུངས་སམ་སྡེ་ཚན་ཁག་དབྱེ་བསལ་གྱིས་ཕྱི་ལོ་ ༢༠༡༨ ཟླ་ ༦ ཚེས་ ༢༠ ཉིན་ལྷན་ཁང་སོ་སོར་དུས་བཀག་རྒྱས་བཅད་ནང་རྩིས་སྙན་ལན་འདེབས་ཁག་འབྱོར་དགོས་པའི་བཀོད་ཁྱབ་བཏང་གནང་བ་དང་། རྩིས་སྙན་ལན་འདེབས་འབྱོར་ཟིན་པ་རྣམས་ལ་རིམ་བཞིན་ཞིབ་འཇུག་གིས་ཁྱོན་དུས་ཐོག་རྩིས་སྙན་ལན་འདེབས་འབྱོར་བའི་ལས་ཁུངས་སམ་སྡེ་ཚན་ཁག་གྲངས་ ༡༧༦ གི་རྩིས་སྙན་དང་། རྩིས་སྙན་ལན་འདེབས། དོགས་འདྲིའི་ལན་འདེབས། གསལ་བཤད། ཟུར་སྦྱར་དང་བཅས་པར་གཟིགས་ཞིབ་ཀྱིས་རྩིས་སྙན་ཁག་ལ་མཇུག་གནོན་མ་བྱུང་པ་དང་། མཇུག་གནོན་གནང་མུས། སྐྱོན་གནད་སོགས་གྲངས་ ༢༡༢༨ ལ་ཞིབ་འཇུག་གིས་ཐག་གཅོད་གནང་ཡོད་འདུག
ཚོགས་ཆུང་གིས་ལས་དོན་སྐབས་འབྲེལ་ཡོད་ལས་ཁུངས་སམ་སྡེ་ཚན་ཁག་གི་འགན་འཛིན་དང་། དྲུང་ཆེ་གྲངས་ ༤ དང་། དེ་བཞིན་རྩིས་ཞིབ་དང་ནང་ཞིབ་བཅས་ཀྱིས་མཚོན་པའི་འབྲེལ་ཡོད་ལྷན་ཁང་ཁག་གི་རྩིས་པ་སོགས་ཁྱོན་མི་གྲངས་ ༣༧ ཚོགས་ཆུང་དུ་ཆེད་འགུགས་ཀྱིས་འདྲི་རྩད་ཞུས་ཤིང་། དཔལ་ལྡན་ཚོགས་གཙོ་སྦྲེལ་པོའི་ལམ་སྟོན་དང་། དམིགས་བསལ་རྩིས་ཞིབ་སྙན་ཐོ་གཞི་ལ་བཞག་ནས་ཞིབ་འཇུག་གིས་ཐག་གཅོད་དང་ལམ་སྟོན་ཇི་བྱས་ཀྱི་གྲུབ་འབྲས་གནས་སྟངས་བཅས་ཀྱི་སྙན་ཐོ་སྤྱི་འཐུས་གྲོས་ཚོགས་ཚོགས་དུས་ ༧ པར་འབུལ་རྒྱུ་ཡིན་འདུག་པ་དང་། ཚོགས་ཆུང་གི་སྙན་ཐོ་ཤོག་གྲངས་ ༢༠༠ ཡོད་པར་ཚོགས་ཆུང་གི་རྒྱབ་གཉེར་དང་མུ་མཐུད་མཇུག་སྐྱོང་དགོས་པ་དོན་ཚན་གྲངས་ ༡༠༣༣ ཡོད་འདུག་པ་བཅས། །