དམིགས་བསལ་ཚོགས་ཆེན་ཐེངས་གསུམ་པའི་གྲོས་ཆོད་ཁག

༄༅། །བཅའ་ཁྲིམས་དོན་ཚན་ ༥༩ པའི་འོག་དམིགས་བསལ་ཚོགས་ཆེན་ཐེངས་གསུམ་པ་ཕྱི་ལོ་ ༢༠༡༩ ཟླ་ ༡༠ ཚེས་ ༣ ནས་ ༥ བར། དམིགས་བསལ་ཚོགས་ཆེན་ཐེངས་གསུམ་པའི་གྲོས་ཆོད་ཁག

བརྗོད་གཞི་གཉིས་པ་༸རྒྱལ་དབང་༸སྐུ་ཕྲེང་ན་རིམ་དང་བོད་མི་མང་དབར་གྱི་འབྲེལ་ལམ་ཐད།

སྔོན་གླེང་།

༄༅། །ལྷར་བཅས་སྲིད་ཞིའི་གཙུག་རྒྱན་རྒྱལ་ཀུན་སྙིང་རྗེའི་རང་གཟུགས་འཕགས་མཆོག་སྤྱན་རས་གཟིགས་དབང་གང་ཉིད་བསྐལ་པ་གྲངས་མེད་མང་པོར་བསོད་ནམས་དང་ཡེ་ཤེས་ཀྱི་ཚོགས་རྫོགས་སྨིན་སྦྱངས་གསུམ་མཛད་ཅིང་། སྒྲིབ་གཉིས་བག་ཆགས་དང་བཅས་པ་བརྩད་ནས་ཕྱུང་སྟེ་རྒྱ་ཆེ་རྒྱུན་མི་ཆད་པའི་འཕྲིན་ལས་འཇིག་རྟེན་ཡོངས་ལ་ཁྱབ་པར་མཛད་པའི་དེ་བཞིན་གཤེགས་པ་འོད་ཟེར་ཀུན་འཕགས་དཔལ་བརྩེགས་རྒྱལ་པོའི་ངོ་བོར་མངོན་པར་རྫོགས་པར་སངས་རྒྱས་ཟིན་ཡང་། གདུལ་བྱའི་ཁམས་མོས་དང་འཚམས་པ་གང་ལ་གང་འདུལ་གྱི་སྤྲུལ་པའི་རོལ་པ་བསམ་བརྗོད་ཀྱི་ཡུལ་ལས་འདས་པའི་སྒོ་ནས་སེམས་ཅན་གྱི་དོན་མཛད་པའི་ངང་ཚུལ་ནི། ཇི་སྐད་དུ། ནམ་མཁའི་ལམ་གྱི་རྗེས་སུ་སོང་བའི་འཇིག་རྟེན་རྒྱ་ཆེན་མཐའ་མ་མཆིས། །དེ་ལྟ་མོད་ཀྱི་སེམས་ཅན་གྲངས་མཚུངས་ཁྱོད་ཀྱི་སྤྲུལ་པ་དེ་སྙེད་ཅིག །རབ་ཏུ་སྤྲོ་ཡང་བ་སྤུའི་རྩེ་ཙམ་གཡོ་སྙམ་བགྱིད་པ་མ་ཡིན་ཏེ། །ཆར་སྤྲིན་ལས་ནི་ཆུ་ཆར་བཞིན་དུ་འབད་པའི་རྟོགས་པ་མངའ་མ་ལགས། །ཞེས་གསུངས་པ་བཞིན་སྤྲུལ་པའི་ཟློས་གར་མཐའ་དག་ནི་བསམ་བརྗོད་ཀྱི་ཡུལ་ལས་འགོངས་ཤིང་། འོན་ཀྱང་ཐུན་མོང་གདུལ་བྱའི་སྣང་ངོར་འཕགས་ཡུལ་དུ་གསལ་བྱེད་སོ་དྲུག་བྱོན་ནས་འགྲོ་དོན་དཔག་མེད་བསྐྱངས་པ་སྤྱི་དང་། བྱེ་བྲག་ཏུ་རྒྱལ་དང་རྒྱལ་སྲས་གཞན་གྱི་གདུལ་བྱར་མ་གྱུར་པའི་བོད་གངས་ཅན་ལྗོངས་འདི་གདུལ་བྱར་བཞེས་པའི་ཚུལ་ནི། སྔོན་གྱི་དུས་སངས་རྒྱས་འོད་མའི་ཚལ་དུ་བཞུགས་པའི་ཚེ། ཞལ་འཛུམ་པར་མཛད་པའི་འོད་ཟེར་གྱིས་བོད་ཡུལ་བཀང་བ་ན། བྱང་སེམས་སྒྲིབ་སེལ་གྱིས་སངས་རྒྱས་འཛུམ་པར་མཛད་པའི་རྒྱུ་དང་རྐྱེན་གང་ཡིན་པའི་སྐོར་བཀའ་འདྲི་ཞུས་པར། སངས་རྒྱས་ཀྱིས་དུས་གསུམ་སངས་རྒྱས་ཀྱི་གདུལ་བྱར་མ་གྱུར་པའི་མཐའ་འཁོབ་ཁ་བ་ཅན་གྱི་རྒྱལ་ཁམས་དེར། འཕགས་པ་སྤྱན་རས་གཟིགས་ཀྱི་ཐུགས་རྗེ་བཀའ་དྲིན་ལས་དམ་པའི་ཆོས་ཀྱི་ཉི་མ་ཤར་བ་ལྟར་རྒྱས་པར་འགྱུར། དེ་ཡང་སངས་རྒྱས་གཞན་གྱིས་མ་ཐུལ་བར་སྤྱན་རས་གཟིགས་ཁོ་ནས་འདུལ་ཐུབ་པའི་རྒྱུ་མཚན་ནི། སྔོན་གྱི་ཚེ། སངས་རྒྱས་སྟོང་གི་སྤྱན་སྔར་འཕགས་པ་སྤྱན་རས་གཟིགས་ཀྱིས། མཐའ་འཁོབ་གདུལ་དཀའི་སེམས་ཅན་དེ་དག་ཀུན། །བདག་གིས་ཐར་པའི་ལམ་དུ་འདུལ་གྱུར་ཅིག།།ཅེས་སོགས་དམ་བཅའ་མཛད་དོ། །ཞེས་བཀའ་བསྩལ་པ་དང་། གཞན་ཡང་བཀའ་གདམས་གླེགས་བམ་ལས། ཇི་སྐད་དུ། མཁའ་འགྲོ་རྣམས་ཀྱི་རྡོ་རྗེའི་གླུར། །ཤར་རྡོ་རྗེ་གདན་གྱི་བྱང་ཕྱོགས་ན། །གནས་པུར་རྒྱལ་བོད་ཅེས་བྱ་བ་ཡོད། །རི་མཐོན་པོ་གནམ་གྱི་ཀ་བ་ཡོད། །མཚོ་དམའ་པོ་གཡུ་ཡི་མཎྜལ་ཡོད། །གངས་དཀར་པོ་ཤེལ་གྱི་མཆོད་རྟེན་ཡོད། །སྤང་སེར་པོ་གསེར་གྱི་ལྷུན་པོ་ཡོད། །དྲི་ཞིམ་པོ་སྨན་གྱི་བདུག་སྤོས་ཡོད། །ཅེས་དང་། ཀྱེ་གངས་རིའི་མགོན་པོ་སྤྱན་རས་གཟིགས། །གནས་དེ་ན་ཁྱོད་ཀྱི་ཞིང་ཁམས་ཡོད། །ཞིང་དེ་ན་ཁྱོད་ཀྱི་གདུལ་བྱ་ཡོད། །སོགས་མདོ་རྒྱུད་དུ་མ་ནས་ལུང་བསྟན་པ་ལྟར་བོད་གངས་ཅན་གྱི་ལྗོངས་སུ་ཐོག་མར་མིའི་འགྲོ་བ་སྤེལ། བར་དུ་ཟང་ཟིང་གིས་བསྐྱངས་པ། མཐར་ཆོས་ཀྱིས་སྨིན་པར་མཛད་པ་སྟེ། དེ་ཡང་རིགས་ཀྱི་ཕྱི་མོ་སྤྲེའུ་བྱང་ཆུབ་སེམས་དཔའ། བོད་རྒྱལ་ཐོག་མ་གཉའ་ཁྲི་བཙན་པོ་ནས་ཆོས་རྒྱལ་མེས་དབོན་རྣམ་གསུམ་གཙོས་ལོ་པཎ་བྱང་ཆུབ་སེམས་དཔའི་ཚུལ་གྱིས་བོད་ཡུལ་མུན་པའི་གླིང་དུ་དམ་ཆོས་ཀྱི་སྣང་བ་དཀར་པོས་བོད་འབངས་རྣམས་འཕྲལ་ཡུན་ཕན་བདེའི་དཔལ་ལ་སྦྱོར་བར་མཛད།

དེ་ནས་རྗེ་ཙོང་ཁ་པའི་དངོས་སློབ་ཐམས་ཅད་མཁྱེན་པ་༸རྒྱལ་དབང་སྐུ་ཕྲེང་དང་པོ་རྗེ་དགེ་འདུན་གྲུབ་པ་དཔལ་བཟང་པོ་མཆོག་ནི་བཀའ་གདམས་གླེགས་བམ་ལས། སྤྱན་རས་གཟིགས་དབང་བཟང་པོར་སྤྲུལ། །ཞེས་གསུངས་པ་ལྟར་སྡོམ་བརྩོན་ངུར་སྨྲིག་གར་གྱི་རྣམ་པར་རོལ་ཏེ་སྐུ་ཕྲེང་བཞི་པ་བར་ཞྭ་སེར་རིང་ལུགས་གཙོ་བོར་གྱུར་པའི་རིང་ལུགས་ཡོངས་ལ་དག་སྣང་གིས་བསྟན་པ་གཙོ་བོར་འཛིན་ཅིང་བོད་སོག་ཡུལ་གྲུ་ཀུན་ལ་རྒྱལ་བསྟན་གསལ་བར་མཛད།

དེ་བཞིན་འཇམ་དཔལ་རྩ་རྒྱུད་ལས། སྟོན་པའི་བསྟན་པ་ས་སྟེང་དུ། །དུས་མཐར་འཇིག་ཅིང་ཉམས་པ་ན། །སྡོམ་བརྩོན་རྒྱལ་པོའི་ཚུལ་གྱིས་ནི། །འབྱུང་བར་འགྱུར་བར་ཐེ་ཚོམ་མེད། །ཅེས་གསུངས་པ་བཞིན། བོད་འབངས་རྒྱལ་བསྟན་ཆབ་སྲིད་མི་རིགས་དང་བཅས་པ་ཟུངས་ཟད་ཀྱི་ནད་པ་སྨན་པས་བོར་བ་ལྟར་ཆེས་ཉམ་ཐག་པའི་གནས་སྐབས་སུ། ༸གོང་ས་༸རྒྱལ་དབང་ལྔ་པ་ཆེན་པོའི་གཞུང་དགའ་བ་བརྒྱ་ལྡན་པའི་ཆབ་སྲིད་གདུགས་དཀར་གྱི་གྲིབ་བསིལ་འོག་ཆབ་འབངས་བདེ་བར་བསྐྱངས་པ་ནས་བཟུང་བཀའ་དྲིན་ཟླ་མེད་༸སྐུ་ཕྲེང་བཅུ་གསུམ་པ་ཆེན་པོའི་བར་བྱམས་གཟིགས་བཀའ་དྲིན་གཞལ་དུ་མེད་ཅིང། ཁྱད་པར་དུ་༸སྐྱབས་མགོན་ཐུགས་རྗེའི་གཏེར་ཆེན་གང་ཉིད་སྐུ་ཕྲེང་གོང་མ་རྣམས་ཀྱིས་ཐུགས་སྐྱེད་དམ་བཅའ་བཙན་པོས་བོད་ཁ་བ་ཅན་གྱི་སྣོད་བཅུད་སྤྱི་དང་ཆབ་སྲིད་ཀྱི་མཛད་པ་འཕྲོ་སྐྱོང་རྒྱུའི་དོན་དུ་བསམ་བཞིན་སྐུའི་སྲིད་པ་བཟུང་སྟེ་༸རྒྱལ་བའི་གསེར་ཁྲིར་རྩོད་མེད་དུ་བྱོན་ཏེ་ཆབ་སྲིད་སྣུམ་ཟད་མར་མེའི་ངང་ཚུལ་དུ་གྱུར་སྐབས་ཇི་ལྟར་གསོལ་བ་བཏབ་པ་བཞིན་ཆོས་སྲིད་ལུགས་གཉིས་ཀྱི་ཐུགས་འགན་བདག་གིར་བཞེས་གནང་ཡོད།

༸གོང་ས་༸སྐྱབས་མགོན་ཆེན་པོའི་ཡང་སྲིད་ངོས་འཛིན་གནང་ཕྱོགས་ནི་ད་ལྟའི་ཆེད་གཉེར་ཡང་སྲིད་ངོས་འཛིན་བྱེད་སྲོལ་འདིའི་ཐོག་མ་ཕྱི་ལོ་བརྒྱ་ཕྲག་བཅུ་གསུམ་གྱི་འགོ་སྟོད་ནས་བརྒྱུད་ཡོང་བའི་ལོ་རྒྱུས་རང་བཞིན་ལྡན་པའི་བོད་བརྒྱུད་ནང་བསྟན་གྱི་ཡང་སྲིད་ངོས་འཛིན་ཞུ་རྒྱུའི་སྲོལ་རྒྱུན་ཐུན་མོང་མ་ཡིན་པ་ཞིག་ཡིན།

༸གོང་ས་༸སྐྱབས་མགོན་ཆེན་པོ་སྐུ་ཕྲེང་ན་རིམ་དང་བོད་མི་མང་དབར་གྱི་འབྲེལ་བ་ནི་མགོ་དང་མཇིང་པའམ་ལུས་དང་གྲིབ་མ་བཞིན་བྲལ་ཐབས་ཡེ་ནས་མེད་པ་ཞིག་ཡིན་པས་ཏཱ་ལའི་བླ་མའི་སྐུ་ཕྲེང་ན་རིམ་གྱི་ལམ་སྲོལ་འདི་ང་ཚོ་བོད་ཁ་བ་ཅན་གྱི་མི་མང་ལ་མུ་མཐུད་གནས་དགོས་པ་ཞིག་ཡིན་སྟབས། ད་རེས་ཀྱི་དམིགས་བསལ་ཚོགས་ཆེན་འདི་བརྒྱུད་བོད་མི་མང་ཚོགས་ཀྱི་སྐུ་ཚབ་ཁྱོན་རྒྱལ་ཁབ་ ༢༤ ནས་ཚོགས་བཅར་བ་གྲངས་ ༣༤༠ ལྷན་འཛོམས་ཀྱིས་གྲོས་ཆོད་ཅིག་འཇོག་དགོས་པ་དུས་ཀྱི་དགོས་མཁོར་མཐོང་།

 

གྲོས་ཆོད།

 

༡༽  བོད་འབངས་ཡོངས་ཀྱི་དཔྲལ་བའི་མིག་དང་ཁོག་པའི་སྙིང་ལྟ་བུའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་༸ཞབས་པད་བསྐལ་པ་བརྒྱ་ཕྲག་བར་བོད་མི་རྩམ་ཟན་ཡོངས་ཀྱི་འདི་ཕྱི་གཉིས་ཀྱི་མགོན་སྐྱབས་དཔུང་གཉེན་དམ་པར་མུ་མཐུད་   བཞུགས་གནང་ཡོང་བའི་གསོལ་བ་ཕུར་ཚུགས་སུ་འདེབས་རྒྱུ་ཡིན།

༢༽ ཇི་སྲིད་བོད་ཁ་བ་ཅན་གྱི་འགྲོ་བ་ནམ་གནས་ཀྱི་བར་དུ་༸རྒྱལ་དབང་སྐུ་ཕྲེང་རིམ་བྱོན་རྣམས་བོད་གངས་ཅན་པའི་བསྟན་དང་འགྲོ་བའི་དོན་དུ་ངེས་ཕེབས་ཡོང་བ་ཚོགས་ཆེན་འདིའི་ཐོག་ནས་བོད་གཞིས་བྱེས་གཉིས་ཀྱི་ཚབ་ཞུས་ཏེ་མགྲིན་དབྱངས་གཅིག་གྱུར་གྱིས་གསོལ་བ་རྩེ་གཅིག་ཏུ་འདེབས་རྒྱུ།

༣༽    ༸རྒྱལ་བའིི་ཡང་སྲིད་ངོས་འཛིན་གནང་རྒྱུའི་འགན་དབང་ཆ་ཚང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཉིད་དང་། ༸གོང་ས་ཏཱ་ལའི་བླ་མའི་བླ་བྲང་དགའ་ལྡན་ཕོ་བྲང་ཡིད་ཆེས་དགེ་རྩའི་དབང་ལྡན་འགན་འཛིན་ཁོ་ནར་ཡོད་པ་ལས། གཞན་རྒྱལ་ཁབ་དང་། གཞུང་། སྒྲིག་འཛུགས། མི་སྒེར་བཅས་སུ་ལའང་མེད།

༤༽    རྒྱ་ནག་གཞུང་གིས་དེ་སྔོན་བོད་བརྒྱུད་ནང་བསྟན་གྱི་སྤྲུལ་སྐུ་ངོས་འཛིན་བྱས་པ་སྤྱི་དང་ལྷག་པར་དུ་ཕྱི་ལོ་ ༢༠༠༧ ལོར་གཏན་ལ་ཕབ་པའི་བླ་སྤྲུལ་ངོས་འཛིན་བྱེད་ཕྱོགས་ཀྱི་བཙན་བཀའ་ཨང་ལྔ་པའི་ཁྲིམས་ཡིག་བརྒྱུད། ༸རྒྱལ་བའི་ཡང་སྲིད་ངོས་འཛིན་བྱེད་ཕྱོགས་ཐད་ཇུས་ངན་བཏོན་དང་འདོན་བཞིན་པ་དེེར་དགག་པ་མཐའ་གཅིག་ཏུ་བྱ་རྒྱུ་ཡིན་པ་བཅས་ཀྱི་སྤྱི་མོས་གྲོས་ཆོད་དུ།།

 

བརྗོད་གཞི་དང་པོ་བོད་མིའི་སྒྲིག་འཛུགས་ཀྱི་ལྔ་དང་ལྔ་བཅུའི་ལས་འཆར་ཐད།

ཚོགས་ཆུང་སོ་སོའི་རྒྱབ་གཉེར་ཁག་དང་རྒྱ་ཆེའི་མང་ཚོགས་ཀྱི་དགོངས་འཆར་ཡིག་ཐོག་ཏུ་གང་ཡོད་པ་རྣམས་བཀའ་སྤྱི་གཉིས་ནས་བཀའ་བསྡུར་དཔྱད་ཞིབ་ཀྱིས་ལག་བསྟར་གནང་རྒྱུའི་སྤྱི་མོས་གྲོས་ཆོད་དུ།

བོད་རྒྱལ་ལོ་ ༢༡༤༦ རབ་གནས་ས་ཕག་བོད་ཟླ་ ༨ པའི་ཚེས་ ༧ ཕྱི་ལོ་ ༢༠༡༩ ཟླ་ ༡༠ ཚེས་ ༥ ལ།།

 

བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་པདྨ་འབྱུང་གནས་མཆོག

 

བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་ཨཅྰརྱ་ཡེ་ཤེས་ཕུན་ཚོགས་མཆོག