༄༅། ། ཕྱི་ལོ་ ༢༠༢༢ ཟླ་ ༡༠ ཚེས་ ༢༦ ཉིན་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་གཞིས་བྱེས་བོད་མི་ཡོངས་དང་། བོད་མི་མང་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ། ཨིན་ཡུལ་གྱི་སྲིད་བློན་གསར་པ་སྐུ་ཞབས་རི་ཤི་སུ་ནཱག་ (Rishi Sunak) མཆོག་ལ་དགའ་བསུའི་འཚམས་འདྲི་ཞུས་གནང་སོང་། སྐུ་ཞབས་ཁོང་ནི་རྒྱ་གར་མི་རིགས་ཨིན་ཡུལ་གྱི་སྲིད་བློན་དུ་བདམས་ཐོན་བྱུང་བ་ཆེས་ཐོག་མ་དེ་ཆགས་ཡོད།
འཚམས་འཕྲིན་ནང་། ཨིན་ཡུལ་གཞུང་མང་གཉིས་ནས་བོད་མིའི་འཚེ་མེད་ཞི་བའི་འཐབ་རྩོད་ལ་གཡོ་བ་མེད་པར་དུས་རྟག་ཏུ་རྒྱབ་སྐྱོར་གནང་བར་བཀའ་དྲིན་ཆེ་དང་། སྲིད་བློན་མཆོག་གི་དབུ་ཁྲིད་འོག་ཨིན་ཡུལ་མི་མང་གི་མངོན་འདོད་བསྒྲུབ་རྒྱུ་སོགས་ལས་དོན་མཐའ་དག་ལམ་ལྷོངས་ཡོང་བའི་སྨོན་འདུན་དང་རེ་སེམས་འཆང་བཞིན་ཡོད་བཅས་འཁོད་ཡོད།