ཕྱི་ལོ་ ༢༠༡༥ ཟླ་ ༥ ཚེས་ ༡༧ ཉིན་རྡ་ས་མེག་གྷན་བོད་ཁྱིམ་ཉིན་སློབ་ཀྱི་ཚོགས་ཁང་ནང་རྒྱལ་སྤྱིའི་བོད་དོན་གདུང་སེམས་མཉམ་སྐྱེད་ཉིན་མོར་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དང་། ཁོང་གི་ནང་མི་རྣམས་གར་སོང་ཆ་མེད་དུ་གྱུར་ནས་མི་ལོ་ཧྲིལ་པོ་ ༢༠ འཁོར་བའི་དུས་ཚིགས་སྲུང་བརྩི་ཞུས་ཡོད་པ་རེད།
དུས་ཚིགས་སྲུང་བརྩི་དེར་སྐུ་མགྲོན་གཙོ་བོར་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གདན་ཞུས་ལྟར་ ཕེབས་ཡོད་པ་དང་། སྐབས་དེར་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཐུབ་བསྟན་བསམ་འཕེལ་ལགས། ཕྱི་འབྲེལ་དྲུང་ཆེ་དྭགས་པོ་བསོད་ནམས་ནོར་བུ་ལགས། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་ཚེ་རིང་མཚོ་མོ་ལགས་བཅས་དང་། གཞན་ཡང་རྡ་སྟེང་བོད་ཁྱིམ་འཛིན་རིམ་བཅུ་གཉིས་པའི་སློབ་མ་ཁག་དང་། བཙུན་དགོན་སྒྲོལ་མ་གླིང་གི་བཙུན་མ། རྡ་ས་ཁུལ་གནས་སྡོད་བོད་མི། ཕྱི་རྒྱལ་བ་ཁག་ཅིག་བཅས་ཁྱོན་མི་གྲངས་བརྒྱ་ལས་བརྒལ་བ་ཞིག་འདུ་འཛོམས་གནང་ཡོད་པ་རེད།
མཛད་སྒོའི་ཐོག་མར་ཕྱི་དྲིལ་འགྲོ་བ་མིའི་ཐོབ་ཐང་ཚན་པའི་འགན་འཛིན་སྐལ་ལྡན་མཚོ་མོ་ལགས་ཀྱིས་དུས་དྲན་དང་འབྲེལ་བའི་འཚམས་འདྲི་དང་ངོ་སྤྲོད་གྲུབ་མཚམས། ཕྱི་འབྲེལ་དྲུང་ཆེ་དྭགས་པོ་བསོད་ནམས་ནོར་བུ་ལགས་ཀྱིས་དུས་ཚིགས་དེའི་ཐོག་ཕྱི་དྲིལ་ལས་ཁུངས་ཀྱིས་དབྱིན་བོད་གཉིས་ཀྱི་ནང་སྤེལ་བའི་བསྒྲགས་གཏམ་སྒྲོག་སྦྱང་གནང་། དེ་རྗེས་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཐུབ་བསྟན་བསམ་འཕེལ་ལགས་ཀྱིས་པཎ་ཆེན་སྐུ་ཕྲེང་བཅུ་པའི་སྐོར་གསུང་བཤད་གནང་།
དེ་ནས་དཔལ་ལྡན་བོད་མི་མང་གི་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་དུས་ཚིགས་དང་འབྲེལ་བའི་གསུང་བཤད་གནང་དོན། གནད་དོན་འདིས་ག་རེ་བསྟན་གྱི་ཡོད་རེད་ཞུས་ན་རྒྱ་ནག་འགོ་ཁྲིད་ཚོས་བོད་ཀྱི་དཀའ་རྙོག་དེ་སེལ་འདོད་མེད་པའི་མཁྲེགས་བཟུང་ཅན་གྱི་བསམ་བློ་དེ་མཚོན་གྱི་ཡོད། དེ་རིང་འདིར་སློབ་ཕྲུག་མང་པོ་ཞིག་ཡོད་ཙང་གནད་དོན་ཁ་ཤས་ཤིག་གི་སྐོར་ལ་ཞུས་ན། པཎ་ཆེན་སྐུ་ཕྲེང་བཅུ་པ་ལྟ་བུ་ཡིན་ན་བོད་མི་རིགས་ཀྱི་ཆེས་དཔའ་བོ་ངོ་མ་ཞིག་ཆགས་ཡོད། གནས་སྟངས་ཆེས་དཀའ་ངལ་ཆེ་བའི་སྐབས་སྐུ་ངལ་ཆེན་པོ་སྐྱོན་མཁན་ཞིག་རེད། པཎ་ཆེན་རིན་པོ་ཆེ་གར་སོང་ཆ་མེད་དུ་སོང་བ་ཞེས་པ་འདི་མི་བརླག་སྟོར་ཤོར་བ་ཞིག་ལ་རྩིས་ཀྱི་མ་རེད། གཞུང་རང་གིས་སྲིད་བྱུས་ཤིག་གི་ཐོག་ནས་བཙན་ཁྲིད་བྱས་པའི་ཐོག་ནས་གར་སོང་ཆ་མེད་དུ་གྱུར་པ་ཞིག་ལ་གར་སོང་ཆ་མེད་ཞེས་ངོས་འཛིན་བྱ་དགོས་པ་རེད།
པཎ་ཆེན་སྐུ་ཕྲེང་བཅུ་གཅིག་པའི་ཡང་སྲིད་འཚོལ་ཞིབ་དང་འབྲེལ་བའི་༸གོང་ས་༸ སྐྱབས་མགོན་ཆེན་པོ་མཆོག་གིས་རྒྱ་ནག་དང་འབྲེལ་བ་གནང་རྒྱུ་དང་། ཐུན་མོང་ཐོག་ནས་དེ་ལ་འབད་བརྩོན་གནང་བ་དེ་བྱུང་རིམ་ཐོག་ནས་གསལ་ཡོད། ༸གོང་ས་མཆོག་གིས་ཀྱང་རྒྱ་གར་ནང་ཡོད་པའི་རྒྱ་ནག་གཞུང་གི་གཞུང་ཚབ་བརྒྱུད་ནས་བཀའ་ལན་གནང་བ་དེས་ག་རེ་བསྟན་གྱི་ཡོད་རེད་ཞུས་ན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ངོས་ནས་པཎ་ཆེན་རིན་པོ་ཆེའི་ཡང་སྲིད་འཚོལ་རྒྱུ་དེ་ཆོས་ཕྱོགས་ཀྱི་བྱ་བ་ཞིག་ཡིན་པ་དང་། ཆོས་ཕྱོགས་ཀྱི་ཐོག་ནས་ལུགས་མཐུན་འགྲོ་ཐུབ་རྒྱུ། དེའི་ཐོག་ནས་ངོས་ལེན་ཡོང་ཐུབ་པའི་པཎ་ཆེན་གཅིག་བྱུང་ན་ཞེས་དགོངས་བཞེས་མཛད་གནང་ཞུས་པ་ཞིག་ཡིན་པ་གསལ་པོ་རེད། ཡིན་ནའང་རྒྱ་ཕྱོགས་ནས་དེའི་ཐོག་ནས་ཡ་ལན་མ་བྱུང་བར་བརྟེན། ཕྱི་ལོ་ ༡༩༩༥ ཕྱི་ཟླ་ ༥ ཚེས་ ༢༣ ཉིན་དགེ་འདུན་ཆོས་ཀྱི་ཉི་མ་ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་གི་ཡང་སྲིད་དུ་ངོས་འཛིན་མཛད་ཡོད། དེ་ནས་ཉིན་མ་གསུམ་གྱི་རྗེས་ཁོང་དང་ཁོང་གི་ནང་མི་རྣམས་རྒྱ་ནག་གཞུང་གིས་བཙན་ཁྲིད་བྱས་ཡོད།
ཉིན་དེ་ནས་བཟུང་ད་བར་ཁོང་གང་དུ་ཡོད་མེད་དང་། ཁོང་གི་གནས་སྟངས་ཇི་ཡོད། བསླབ་པ་སློབ་གཉེར་གང་འདྲ་ཡོད་མེད་སོགས་ཀྱི་སྐོར་ལ་མ་ཤེས་པའི་གནས་སྟངས་ཤིག་གི་འོག་ལ་ལྷག་ཡོད། ད་ལྟ་ཡང་སྲིད་རིན་པོ་ཆེ་བཀག་ཉར་བྱས་ཏེ་གར་སོང་ཆ་མེད་དུ་ཕྱིན་དུས། སྐུ་ཕྲེང་བཅུ་པའི་མཛད་རྗེས་རྣམས་མཇུག་སྐྱོང་ཐུབ་ཀྱི་མེད་པ་དེར། ང་ཚོའི་ངོས་ནས་སེམས་ཁྲལ་ཆེན་པོ་བྱེད་དགོས་པ་ཞིག་དང་། ཆོས་ཕྱོགས་ཀྱི་ཐོག་ནས་བཤད་ན། ཁོང་ནང་པའི་བླ་མ་ཞིག་ཡིན་པའི་ཆ་ནས་དབང་ལུང་མན་ངག་མང་པོ་གསན་དགོས་པ་དང་། ཆོས་ཀྱི་བསླབ་པ་སློབ་གཉེར་མང་པོ་གནང་སྟེ། མ་འོངས་པར་མི་མང་ལ་དབང་ལུང་མན་ངག་གསུང་ཐུབ་པའི་ཆོས་འཆད་ཉན་གྱི་གནས་ཚད་ལྡན་པ་ཞིག་ཆགས་དགོས་ཀྱི་ཡོད་ཀྱང་། ཁོང་བཀག་ཉར་འོག་ཡོད་སྟབས། གལ་སྲིད་ཁོང་གློད་བཀྲོལ་ལ་ཡོང་བའི་ཉི་མ་ཞིག་འཆར་བ་ཡིན་ནའང་། ནང་ཆོས་ཀྱི་གོ་བ་རྩ་བ་ཉིད་ནས་མེད་ཅིང་། བོད་ཀྱི་སྐད་ཡིག་རྩ་བ་ནས་མི་ཤེས་མཁན་ཞིག་བཟོ་བའི་ཐབས་ཤེས་བྱེད་བཞིན་པ་བཤད་མ་དགོས་པ་རེད། ད་ལྟ་ང་ཚོས་ཁོང་སྐུ་འཚོ་བཞུགས་ཡིན་མིན་ཡང་ཤེས་ཀྱི་མེད། གལ་སྲིད་ཁོང་སྐུ་འཚོ་བཞུགས་མིན་ན། མ་འོངས་པའི་པཎ་ཆེན་རིམ་པ་ངོས་འཛིན་བྱེད་སྟངས་ཐོག་དོ་ཕོག་ཤུགས་ཧ་ཅང་ཆེན་པོ་གཏོང་བཞིན་ཡོད་པ་རེད།
མ་འོངས་པར་རྒྱ་ནག་ལ་འགྱུར་བ་ཏན་ཏན་འགྲོ་རྒྱུ་ཡིན་པས། སྐབས་དེར་པཎ་ཆེན་རིན་པོ་ཆེའི་གནས་ཚུལ་ཡང་རང་བཞིན་གྱིས་གསལ་པོ་ཆགས་སྲིད། ད་ལྟའི་དམར་ཤོག་གི་གཞུང་དེ་མུ་མཐུད་གནས་ཀྱི་རེད་ཅེས་རྩ་བ་ནས་བཤད་ཐུབ་ཀྱི་མ་རེད། རྒྱལ་ཁབ་གང་འདྲ་ཞིག་ཡིན་ནའང་དབང་སྒྱུར་ཆེན་པོ་ཡོད་པའི་དུས་དང་ཉམས་ཆག་འགྲོ་བའི་དུས་ཡོད་པ་རེད། ད་ལྟ་རྒྱ་ནག་གཞུང་དབང་སྒྱུར་ཆེན་པོ་ཡོད་པའི་དུས་སྐབས་ཤིག་ཡིན་ཡང་ཉམས་ཆག་འགྲོ་བའི་དུས་ཤིག་ཏན་ཏན་ཡོད་ངེས་རེད། ཁོ་ཚོ་མི་རིགས་གཞན་ལ་ཡིད་ཆེས་མེད་ལ། སོ་སོའི་མི་མང་ལའང་ཡིད་ཆེས་ཡོད་པ་མ་རེད། འཛམ་གླིང་ཐོག་ཕྱིའི་སྲུང་སྐྱོབ་ལས་ནང་གི་སྲུང་སྐྱོབ་ལ་འགྲོ་སོང་ཆེ་བ་གཏོང་མཁན་རྒྱ་ནག་མ་གཏོགས་ཕལ་ཆེར་ཡོད་རྒྱུ་མ་རེད།
དེ་འདྲ་ཡིན་དུས་སོ་སོའི་མི་ལའང་ཡིད་ཆེས་བྱེད་ཀྱི་མེད། སོ་སོའི་མི་ལ་ཡིད་ཆེས་མེད་པའི་གནས་སྟངས་འོག་གཞུང་སྲ་བརྟན་ཡོང་རྒྱུ་དེ་ཧ་ཅང་ཁག་པོ་ཡིན་སྟབས། རྒྱ་ནག་ལ་ཏན་ཏན་འགྱུར་བ་འགྲོ་ངེས་རེད་ལ། འགྱུར་བ་འགྲོ་བའི་ཉིན་མོ་དེར་པཎ་ཆེན་རིན་པོ་ཆེའི་གནས་སྟངས་དེ་རང་བཞིན་གྱིས་གསལ་པོ་ཆགས་རྒྱུ་རེད་བསམ་གྱི་འདུག དེ་རིང་བརྒྱུད་ལམ་དེའི་ཐོག་བོད་ནང་ཡོད་པའི་བོད་མི་ཚོར་ཞུ་རྒྱུར། རྩ་བའི་བོད་ནང་གི་བོད་མི་ཚོར་གོ་རྟོགས་གང་ལ་གང་ཙམ་ཡོད་པ་དང་ལྷག་བསམ་ནི་རི་ལྟ་བུ་ཞིག་ཡོད་སྟབས་། ང་ཚོས་ཕར་ལ་ཞུ་རྒྱུའི་གནས་སྟངས་ཆགས་ཀྱི་མ་རེད། འོན་ཀྱང་ད་ལྟའི་རྒྱ་ནག་གིས་སྤེལ་བའི་རྒྱབ་ཤ་དཀར་པོ་དེའི་ནང་བོད་ཀྱི་ལོ་རྒྱུས་དང་། དབུ་མའི་ལམ། དེ་བཞིན་བོད་མི་འི་སྒྲིག་འཛུགས་དང་། འགྲོ་བ་མིའི་ཐོབ་ཐང་སོགས་ཀྱི་སྐོར་འཁྱོག་བཤད་བྱས་པ་དེ་དག་ཆ་ཚང་བ་དེ་བདེན་པ་ཆགས་ཀྱི་མེད་། དེར་བརྟེན་བོད་མི་ཚོ་རྒྱ་ནག་གི་མགོ་སྐོར་བསླུ་ཁྲིད་འོག་མ་ཚུད་པ་གནང་རོགས་ཞུ་རྒྱུ་དང་། རྒྱལ་སྤྱིའི་སྤྱི་ཚོགས་ཡིན་ནའང་དེའི་ནང་མ་ཚུད་པ་ཞིག་གནང་རོགས་གནང་ཞུ་རྒྱུ་ཡིན་ཞེས་གསུངས་པ་བཅས་ཀྱི་གནས་ཚུལ་དུ།