ཕྱི་ལོ་ ༢༠༡༢ ཟླ་ ༢ ཚེས་ ༡༣ ཉིན་གྱི་བོད་ནང་གི་ཕྱི་དྲོའི་ཆུ་ཚོད་ ༢།༣༠ ཙམ་ལ་རྔ་བ་རྫོང་གཅའ་ཤང་ནག་ཚང་མའི་ཕ་བཛྲི་དང་མ་པད་དཀར་གཉིས་ཀྱི་བུ་རང་ལོ་ ༡༩ ཅན་རྔ་པ་ཀིརྟི་དགོན་པའི་གྲྭ་བློ་བཟང་རྒྱ་མཚོ་ལགས་ཀྱིས་རྔ་བ་རྫོང་མཁར་གྱི་གཞུང་ལམ་དབུས་མའི་མགོ་སྟོད་ནས་སྐད་འབོད་བྱེད་བཞིན་རང་ལུས་མེར་བསྲེགས་གཏོང་སྐབས། དྲག་ཆས་ཉེན་རྟོག་པ་དང་དམིགས་བསལ་ཉེན་རྟོག་པས་གཅར་རྡུང་གཏོང་བཞིན་མེ་བསད་དེ་བཙན་ཁྲིད་བྱས་འདུག
གྲྭ་བློ་བཟང་རྒྱ་མཚོ་ལགས་ནི་མིང་སྲིང་ ༤ ཡོད་པའི་ནང་ནས་རྒན་ཤོས་ཡིན་ཞིང་། ཁོང་རྣམ་ཀུན་འཛིན་གྲྭའི་ནང་གི་སློབ་སྦྱོང་དང་སྤྱོད་ལམ་ཡག་ཤོས་ཤིག་དང་། ཚོགས་ལངས་ཐེངས་མང་གནང་མྱོང་མཁན་ཞིག་ཡིན་འདུག
གྲྭ་བློ་བཟང་རྒྱ་མཚོ་ལགས་ཀྱིས་རང་ལུས་མེར་བསྲེགས་གཏོང་ཡུལ་ནས་གྲྭ་བ་གཅིག་དང་ཕོ་གསར་གཉིས་ལ་གཅར་རྡུང་དྲག་པོ་བཏང་ཡོད་པ་དང་། དོན་རྐྱེན་དེའི་རྗེས་སུ་རྔ་པའི་རྫོང་མཁར་གྱི་འགྲུལ་བསྐྱོད་བཀག་སྡོམ་བྱས་འདུག་པ་དང་། རྫོང་མཁར་དུ་འགྲོ་སའི་སྔར་ཡོད་ཞིབ་བཤེར་ས་ཚིགས་རྣམས་སུ་བོད་མི་རྣམས་ལ་ཞིབ་བཤེར་དམ་དྲག་བྱེད་ཤུགས་ཆེ་རུ་བཏང་ཡོད་འདུག
ཟླ་འདིའི་ཕྱི་ཚེས་ ༡༡ ཉིན་གྱི་བོད་ནང་གི་ཞོགས་པའི་ཆུ་ཚོད་ ༡༡ ཡས་མས་སུ་ཁམས་དཀར་མཛེས་རྫོང་གི་ཁྲོམ་གཞུང་དུ་ཁོག་རྩེ་ཤང་ཨ་རུ་ར་གྲོང་ཚོའི་ཕ་བསྟན་པ་ཉི་མ་དང་མ་ཚེ་རིང་གཡང་མཚོ་གཉིས་ཀྱི་བུ་རང་ལོ་ ༢༡ ཅན་བཀྲ་ཤིས་དཔལ་ལྡན་ལགས་ཀྱིས་ ༸གོང་ས་མཆོག་སྐུ་ཚེ་ཁྲི་ལོར་བརྟན་པར་ཤོག བོད་རང་བཙན་གཙང་མ་ཡིན་ཞེས་སྐད་འབོད་བྱེད་སྐབས། ཉེན་རྟོག་པས་གཅར་རྡུང་དྲག་པོ་བཏང་སྟེ་བཙན་འཁྲིད་བྱས་ཡོད་པ་མ་ཟད། དེར་ཡོད་པའི་བོད་མི་ཚོང་པ་ཞིག་གི་སྐེ་རུ་ཡོད་པའི་བྱུ་རུ་དང་ལག་གི་ཕྲེང་བ་སོགས་འཕྲོག་པ་དང་། གཅར་རྡུང་བཏང་སྟེ་བཙན་ཁྲིད་བྱས་ཡོད་འདུག
དེའི་གོང་ཕྱི་ཚེས་ ༨ ཉིན་གྱི་དགོང་མོར། ཆུ་ཆེན་རྫོང་ཨ་ཁོ་རིས་ཤང་གི་སྲིད་གཞུང་དང་སྨན་ཁང་གཙོས་གཞུང་གི་ལས་ཁུངས་ཁག་ནང་གི་རྒྱའི་དར་དམར་མར་ཕབས་ཏེ། བོད་ལ་རང་དབང་དང་རང་བཙན་དགོས་པའི་ཡིག་ཆ་སོགས་འགྲེམས་གཏོར་བྱས་པའི་གནས་ཚུལ་ཐོན་ཡོད་པ་དང་། དེ་འཕྲལ་རྒྱ་གཞུང་གིས་དམག་མི་མང་པོ་འགྲེམས་འཇོག་གིས་ལམ་མདོ་ཁག་ཏུ་འགོག་སྲུང་ས་ཚུགས་བཙུགས་ཏེ་མང་ཚོགས་ལ་ཞིབ་བཤེར་ནན་མོ་བྱེད་བཞིན་ཡོད་འདུག
དེ་བཞིན་ཉེ་ཆར་རྒྱ་གར་དང་བལ་ཡུལ་དུ་གནས་མཇལ་དུ་བསྐྱོད་དེ་ཕྱིར་ལོག་བྱེད་མཁན་ལྷ་སའི་གྲོང་མི་རྣམས་རྒྱ་ནག་གཞུང་གིས་མིང་ཐོ་འགོད་དུ་ཡོང་དགོས་པའི་བཀའ་ཁྱབ་བཏང་སྟེ་བོད་མི་བརྒྱ་ཕྲག་དུ་མ་དོ་དམ་བཀག་ཉར་བྱས་ཡོད་པ་དང་། དེ་དག་གི་བཀག་བསྐྱིལ་བྱ་ཡུལ་གྱི་གནས་གླ་དང་ཟས་སོང་གི་འགྲོ་གྲོན་དོ་བདག་ནས་སྒྲུབ་འཇལ་དགོས་པའི་བཙན་བཀའ་བཏང་ཡོད་པའི་གནས་ཚུལ་ཐོན་ཡོད་པ་དང་། ཁམས་དང་ཨ་མདོའི་བོད་མི་མང་པོ་ཞིག་ལྷ་ས་ནས་བཙན་ཤེད་ཀྱིས་ཕྱིར་འབུད་དང་། གཉའ་ནང་དང་འགྲམ་སོགས་སུ་ཉེ་ཆར་དུས་འཁོར་དབང་ཆེན་དང་གནས་བསྐོར་ནས་བོད་ནང་ཕྱིར་ལོག་བྱས་པའི་བོད་རིགས་བཅུ་ཕྲག་ཁ་ཤས་བཀག་བསྐྱིལ་བྱས་ཡོད་པའི་གནས་ཚུལ་ཐོན་ཡོད།
འདི་སྔོན་ཕྱི་ཟླ་ ༢ ཚེས་ ༣ ཉིན་གསེར་རྟ་རྫོང་ཕུ་འུ་ཤང་དུ་བོད་མི་གསུམ་གྱིས་རང་ལུས་མེར་བསྲེགས་བཏང་སྟེ་མི་གཅིག་འདས་གྲོངས་ཕྱིན་པའི་གནས་ཚུལ་གསར་འགྱུར་བརྒྱུད་ལམ་ཁག་ཏུ་ཐོན་ཡོད་པ་དེ་ལྟར་ཡང་། ད་ཆ་གནས་ཚུལ་ཁུངས་སྤྲོད་བྱེད་མཁན་ནས་ཀྱང་ས་གནས་དེ་རང་ལ་དེ་ལྟའི་གནས་ཚུལ་བྱུང་མེད་པའི་གསལ་བཤད་བྱེད་བཞིན་ཡང་། གསེར་རྟ་ཁུལ་དུ་ཞི་རྒོལ་གྱི་རྐྱེན་ལས་གང་སར་དམག་དཔུང་འགྲེམས་འཇོག་དང་། ཁ་པར་བརྒྱུད་ལམ་བཀག་སྡོམ་གྱི་གནས་ཚུལ་རྣམས་དངོས་གནས་ཆགས་ཡོད།
རྒྱ་གཞུང་གིས་བོད་ས་ཁྱོན་ཡོངས་སུ་ཞི་བའི་མང་ཚོགས་ལ་གཡུལ་འགྱེད་ལྟ་བུའི་དྲག་གནོན་གྲབས་གཤོམ་བྱེད་བཞིན་པའི་བབ་ལ་བལྟས་ན། མདའ་མཚོན་སྐྱབས་སུ་འཛིན་པའི་སྲིད་དབང་འདིས་བོད་ནང་གཞི་རྒྱ་ཆེ་བའི་དམ་དྲག་ལ་ཁ་གཡར་ས་འཚོལ་ཆེད། བོད་ཀྱི་ས་ཆར་ཁང་ཁུང་མེར་བསྲེགས་དང་འཛུགས་སྐྲུན་འགད་གཏོར་སོགས་ཀྱི་སྐྱུགས་བྲོ་བའི་དྲག་སྤྱོད་ཆེད་བཟོས་ཀྱིས་བོད་མིའི་མགོ་ལ་ལེ་ཁག་དཀྲི་བའི་འཁྲབ་སྟོན་རྫུན་བཟོ་བྱེད་སྲིད་པ་དང་།
ཁ་སང་ཕྱི་ཚེས་ ༡༤ ཉིན་རྒྱ་ནག་གི་སྲིད་བློན་ཝུན་ཅ་པའོ་ཡིས་གསར་འགོད་པའི་དྲི་བར་ལན་འདེབས་བྱེད་སྐབས། མི་སུ་ཞིག་གིས་གྲྭ་བ་ཉུང་ཤས་ཤིག་ལ་ཚབས་ཆེའི་བྱ་སྤྱོད་སྤེལ་རྒྱུར་ངན་སྐུལ་བྱས་ཏེ། བོད་ལྗོངས་ཀྱི་བརྟན་ལྷིང་གཏོར་བཤིག་གཏོང་རྒྱུའི་རེ་སྟོང་འཆང་བ་དེ་ནི་བོད་རིགས་ས་ཁུལ་གྱི་འཕེལ་རྒྱས་དང་བོད་རིགས་མི་དམངས་ཀྱི་ཁེ་ཕན་ལ་ཕན་ཐོགས་མེད་པ་དང་། མིའི་བློ་ལ་འབབ་པ་ཞིག་ཀྱང་མིན་ཞེས་སོགས་བསྒྲགས་སྟངས་ལ་བལྟས་ན། ང་ཚོས་ད་བར་དོན་རྐྱེན་གྱི་འབྱུང་རྐྱེན་ལ་གཟུ་བོའི་སྒོ་ནས་བརྩད་ཞིབ་དང་། རྒྱ་གཞུང་གི་དྲག་གནོན་གྱི་སྲིད་ཇུས་ལ་བསྐྱར་ཞིབ་ཀྱིས་བཅོས་སྒྲིག་དགོས་པའི་གཞི་རྩའི་རེ་འདུན་ཁག་ལ་བསམ་ཞིབ་བྱེད་རྩིས་མེད་པར་མ་ཟད། བོད་ས་སྟོད་སྨད་བར་གསུམ་དུ་མཆེད་པའི་ཞི་རྒོལ་ལས་འགུལ་རྣམས་གྲྭ་བ་ཉུང་ཤས་ཤིག་དང་། དེ་དག་ཀྱང་མི་གཞན་གྱིས་ངན་སྐུལ་བྱས་ལུགས་དཀར་ནག་གོ་ལྡོག་གིས་འགྲེལ་བཤད་རྒྱག་གི་ཡོད།
ཕྱི་ལོ་ ༢༠༠༨ ལོར་ཡང་ཝུན་ཅ་པའོ་ཡིས་པེ་ཅིང་དུ་གསར་འགོད་པར་ང་ཚོས་བོད་མིའི་ཐོག་མེ་མདའ་རྐང་གཅིག་ཀྱང་བརྒྱབ་མེད་ཅེས་མགྲིན་པ་གཟེངས་སུ་བཏེགས་ནས་གསུངས་ཏེ་དྲོད་མ་ཡལ་གོང་། དེའི་ཁུངས་སྐྱེལ་དུ་བོད་མི་བཅུ་ཕྲག་མང་པོ་དམར་གསོད་བཏང་བའི་པར་རིས་རྣམས་འཛམ་གླིང་གི་མིག་མདུན་དུ་བསྟར་ཡོད་པ་དེ་ཡིན།
བོད་ནང་བརྟན་ལྷིང་མེད་པའི་རྒྱུ་རྐྱེན་ངོ་མ་ཇི་ཡིན་དང་། བོད་རིགས་མི་དམངས་ཀྱི་ཁེ་ཕན་ལ་གཏོར་བཤིག་གཏོང་མཁན་སུ་ཡིན་དོན་དམ་གྱིས་བརྩད་གཅོད་བྱེད་བསམས་ན། གཡས་ཁག་གཡོན་དཀྲིའི་འབད་པ་རྩོམ་མི་དགོས་པའི་ཐབས་ལམ་ལས་སླ་ཤོས་དེ་ནི། རྒྱལ་སྤྱིའི་རང་དབང་ལྡན་པའི་རྟོག་ཞིབ་ཚོགས་པ་དང་། གསར་འགོད་པ་བོད་ནང་འགྲོ་རུ་བཅུག་ན་དོན་དག་ཚང་མ་རང་བཞིན་གྱིས་ས་རིས་ཐང་གསལ་ཆགས་ངེས།
འཛམ་གླིང་གི་དབུ་ཁྲིད་རྣམ་པས་འགྲོ་བ་མིའི་བཟང་སྤྱོད་ཀྱི་ཐོག་ནས་རྒྱ་དཔོན་དེ་ཚོར་དྲང་བདེན་གྱི་གནས་ལུགས་གསེད་བཀྲོལ་གནང་སྟེ། བོད་མིའི་ཚེ་སྲོག་སྐྱོབ་ཐབས་ལ་ནུས་པ་ཐོན་པའི་འགན་ཁུར་འཕྲལ་མར་ལེན་རྒྱུ་དུས་ལ་གཏུགས་ཡོད་པའི་འབོད་སྐུལ་ཤུགས་དྲག་ཞུ་རྒྱུ་བཅས། བོད་མི་མང་སྤྱི་འཐུས་ལྷན་ཚོགས་ཀྱིས་ཕྱི་ལོ་ ༢༠༡༢ ཟླ་ ༢ ཚེས་ ༡༥ ལ། །