གངས་ལྗོངས་དཔལ་འབྱོར་ཞབས་ཞུ་ཁང་དེ་ཉིད་རང་སྐྱོང་ལྡན་པའི་ཁེ་གཉེར་ཁང་མིང་དོན་མཚུངས་པ་ཞིག་ཏུ་བསྒྱུར་ཐབས་སུ་གྲོས་ཆོད་དགོངས་དོན་བཞིན་ཚོགས་ཆུང་བསྐོ་འཛུགས་གནང་བ་ལྟར་ཚོགས་ཆུང་གི་ལས་དོན་མཇུག་བསྒྲིལ་བ།

༄༅། །སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཞི་པའི་ཐོག་སྣོལ་འཇོག་གནང་བའི་གཞུང་འབྲེལ་ཡིག་ཆ་ཨང་ ༤༤ པའི་གྲོས་ཆོད་དོན་ཚན་ ༢ པའི་དགོངས་དོན་གཞིར་བཟུང་། གངས་ལྗོངས་དཔལ་འབྱོར་ཞབས་ཞུ་ཁང་དེ་ཉིད་རང་སྐྱོང་ལྡན་པའི་ཁེ་གཉེར་ཁང་མིང་དོན་མཚུངས་པ་ཞིག་ཏུ་བསྒྱུར་ཐབས་སུ་སྤྱི་འཐུས་གསུམ་དང་། འཛིན་སྐྱོང་གི་ལས་བྱེད་གཉིས་བཅས་ལས་གྲུབ་པའི་ཚོགས་ཆུང་ཞིག་བསྐོ་འཛུགས་དགོས་པ་ལྟར། དཔལ་ལྡན་ཚོགས་གཙོ་སྦྲེལ་པོ་མཆོག་གིས་བསྐོ་འཛུགས་གནང་བའི་མི་འགྲོར། སྤྱི་འཐུས་ཟླ་བ་ཚེ་རིང་མཆོག་དང་། སྤྱི་འཐུས་རྡོ་རྗེ་ཚེ་བརྟན་མཆོག སྤྱི་འཐུས་དགེ་བཤེས་རྔ་བ་གངས་རི་མཆོག དཔལ་འབྱོར་ལས་ཁུངས་ཀྱི་དྲུང་ཚབ་བསྟན་འཛིན་ལེགས་གྲུབ་ལགས། དཔལ་འབྱོར་ལས་ཁུངས་ཀྱི་དྲུང་གཞོན་རྣམ་རྒྱལ་དགེ་འདུན་ལགས་བཅས་ལ་བསྐོ་གཞག་གནང་ཡོད་པ་ལྟར།  ཕྱི་ལོ་ ༢༠༢༢ ཟླ་ ༡༡ པའི་ཚེས་ ༢ ཉིན་ཚོགས་ཆུང་གི་ཚོགས་མི་རྣམ་པ་ལྷན་འཛོམས་ཀྱིས་ཚོགས་ཆུང་གི་ཚོགས་གཙོར་སྤྱི་འཐུས་རྡོ་རྗེ་ཚེ་བརྟན་མཆོག་དང་། དྲུང་ཆེ་དཔལ་འབྱོར་ལས་ཁུངས་ཀྱི་དྲུང་གཞོན་རྣམ་རྒྱལ་དགེ་འདུན་ལགས་བཅས་སྤྱི་མོས་བྱུང་རྗེས། ཚོགས་ཆུང་གི་ལས་དོན་དབུ་འཛུགས་ཀྱིས་ད་བར་གངས་ལྗོངས་དཔལ་འབྱོར་ཞབས་ཞུ་ཁང་དེ་ཉིད་རང་སྐྱོང་ལྡན་པའི་ཁེ་གཉེར་ཁང་མིང་དོན་མཚུངས་པ་ཞིག་ཏུ་བསྒྱུར་ཐབས་ཀྱི་འགྲོ་ལུགས་བཟོ་འགོད་ཀྱི་ལས་དོན་ཁག་ཡོངས་སུ་ལེགས་པར་གྲུབ་རྗེས། དེ་རིང་སྔ་དྲོ་ཚོགས་ཆུང་གི་ཚོགས་མི་རྣམ་པས་ཚོགས་གཙོའི་ལས་ཁུངས་སུ་དཔལ་ལྡན་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་ལྷན་མཇལ་འཕྲད་ཀྱིས་ཚོགས་ཆུང་གི་སྙན་ཐོ་ཕུལ་ཡོད་པ་དང་། གོང་གསལ་སྙན་ཐོ་དེ་བཞིན་གྲོས་ཚོགས་ཚོགས་དུས་ ༥ པའི་ཐོག་སྙན་སེང་གནང་རྒྱུ་ཡིན་པ་བཅས། །