རྒྱལ་གཅེས་དཔའ་བོ་དགུ་འགྲུབ་ལགས།རྒྱལ་གཅེས་དཔའ་བོ་དགུ་འགྲུབ་ལགས།ཕྱི་ལོ་ ༢༠༡༢ ཟླ་ ༡༠ ཚེས་ ༤ ཉིན་བོད་ནང་གི་ཆུ་ཚོད་༡༠ པའི་ཐོག་ཁམས་འབྲི་རུ་རྫོང་ཤག་ཆུ་གྲོང་བརྡལ་གྲོང་ཚོ་ཉི་ཤུ་ཡུངས་དཀར་ལྷའི་གྲོང་ནས་ནས་ཡིན་ཞིང་། རང་ལོ་༤༣ ལ་སོན་པ་མིང་ལ་དགུ་འགྲུབ་ཟེར་བ་ཁོང་གིས། ནག་ཆུ་གྲོང་ཁྱེར་གྱི་ཁྲོམ་གཞུང་དུ། ང་ཚོ་གང་དུ་སོང་ཡང་རང་དབང་མི་འདུག བོད་ལ་རང་དབང་དགོས། རྒྱལ་བ་བསྟན་འཛིན་རྒྱ་མཚོ་བོད་ལ་ཕེབས་འཇུག་དགོས་ཞེས་སྐད་འབོད་བྱས་ཏེ་རང་ལུས་མེར་སྲེག་གནང་སྟེ་སྐུ་གྲོངས་ཡོད་ན་ཡང་། རྒྱ་གཞུང་གི་ཉེན་རྟོག་པས་ཁོང་གི་ཕུང་པོ་ནང་མིར་རྩིས་སྤྲོད་བྱས་མེད་པ་རེད་འདུག
དེ་བཞིན་ཁོང་གིས་མེར་སྲེག་མ་བཏང་གོང་ཞལ་ཆེམས་ཡི་གེ་གཉིས་ཁེའུ་ཁེའུ་དྲ་ཐོག་བཞག་པའི་ནང་། ཞལ་ཆེམ་དང་པོ་དེའི་ནང་མཁོད་དོན། “ཚེ་སྲོག་གི་རྡུང་བའི་རྒྱལ་རྔ།” སྐྱིད་སྡུག་དང་ལས་དབང་གཅིག་པའི་གངས་ཅན་པའི་དམིགས་ཡུལ་ནི། རང་བཙན་གཙང་མའི་སྒོ་ནས་༸གོང་ས་མཆོག་བོད་དུ་གདན་འདྲེན་ཞུ་རྒྱུ་ནི་ང་ཚོའི་མངོན་འདོད་ཡིན། འོན་ཀྱང་༸གོང་ས་མཆོག་གིས་འཚེ་མེད་ཞི་བའི་སྒོ་ནས་དབུ་མའི་ལམ་གྱི་སྲིད་བྱུས་གཏན་ལ་ཕབ་སྟེ་རང་སྲིད་རང་སྐྱོང་གི་ཐོབ་ཐང་ལ་འབད་བརྩོན་གནང་བ་ལ། བོད་མི་ས་ཡ་དྲུག་གི་ཁོང་གི་བཀའ་དགོངས་སྤྱི་བོར་བཀུར་ཏེ་ཡུན་རིང་རེ་སྒུག་བྱས་ཀྱང་། རྒྱ་གཞུང་གིས་དེའི་ཕྱོགས་ལ་ཐུགས་ཁུར་དང་རྒྱབ་སྐྱོར་ཕུད། བོད་པའི་བདེ་སྡུག་གླེང་བ་ཙམ་གྱིས་འཛིན་བཟུང་དང་མནར་གཅོད་ཚད་ལ་རྒལ་བ་གཏོང་བས་མ་ཚད། ༸གོང་ས་མཆོག་ལ་མཚན་སྨད་དང་བོད་འདི་ཀྲུང་གོའི་ཆ་ཤས་ཡིན་པའི་དམ་བཅའ་བརྟན་པོ་མེད་ཚེ། ལྐོག་གསོད་གཏོང་སྟེ་གར་སོང་ཆ་མེད་དུ་འགྲོ་བ་ལས། བོད་མིའི་བདེ་སྡུག་ལ་དོ་སྣང་དང་དྲིལ་བསྒྲགས་ཅི་ཡང་མེད་སྟབས། ང་ཚོ་ཞི་བའི་འཐབ་རྩོད་འདི་རྣོ་ངར་ཆེ་རུ་གཏང་སྟེ། བོད་པའི་དངོས་ཡོད་ཀྱི་གནས་ཚུལ་རྣམས་དྲིལ་བསྒྲགས་དང་བདེན་དཔང་གི་ཆེད་དུ་། རང་ལུས་མེ་རུ་མཆོད་དེ་བོད་རང་བཙན་གྱི་འབོད་སྒྲ་སྒྲོག་དོན། ཀྱེ་ནམ་མཁའི་ལྷ་ཆེན་པོ་ཁྱེད་ཀྱི་སྤྱན་ཟུང་བོད་ལ་གཟིགས་དང་། མ་ཡུམ་གྱི་ས་ཆེན་པོ་ཁྱེད་ཀྱི་བྱམས་བརྩེ་བོད་ལ་དགོངས་དང་། བར་གནས་ཀྱི་འཛམ་གླིང་ཡོངས་ཀྱིས་དྲང་བདེན་ལ་མཐོང་ཆེན་གནང་རོགས། དྭངས་གཙང་ཁ་བའི་ལྗོངས་འདིར་དམར་པོ་ཁྲག་ལ་བསྒྱུར་བས་མ་ཚད། དྲག་པོ་དམག་གིས་ས་གཞི་བཀང་སྟེ་བར་མི་ཆད་པའི་དྲག་གནོན་རྒོད་ཀྱང་། དཔའ་ངར་ཞུམ་པ་མེད་པའི་གངས་ཕྲུག་རྣམས་ཀྱིས་བློ་གྲོས་ཀྱི་གཞུ་མོ་བཀུག ཚེ་སྲོག་གི་མདའ་མོ་འཕེན་ཏེ། དྲང་བདེན་ཀྱི་གཡུལ་ངོ་ཟློག་རྒྱུ་ཡིན། མཇུག་ཏུ་ཁ་བ་རི་པའི་ཕུ་ནུ་མིང་སྲིང་ཚོས། འདྲ་མཉམ་དང་རང་དབང་གི་ཐོབ་ཐང་ལོངས་སུ་སྤྱོད་ཕྱིར་། གངས་ཅན་པའི་སྤྱི་དོན་ལ་གཙོ་བོ་དང་། སྒེར་དོན་ལ་ཕལ་པ་བྱེད་དེ། རྡོག་རྩ་ཆིག་སྒྲིལ་གྱི་མདུན་དུ་སྐྱོད་རྒྱུ་ནི་ངའི་རེ་བ་ཡིན། འབྲི་རུ་བ་དགུ་འགྲུབ་ནས། ༢༠༡༢ ཟླ་༣ ཚེས་༡༤། ”ཅེས་མཁོད་འདུག
དེ་བཞིན་ཞལ་ཆེམས་གཉིས་པའི་ནང་མཁོད་དོན། “སྤུན་ཟླའི་བརྩེ་སེམས།” ཁ་བ་རི་པའི་ཕུ་ནུ་མིང་སྲིང་ཚོ་ང་ཚོས་འདས་སོང་ལ་ཕྱིར་མིག་ཞིག་བལྟས་ཚེ། ཕངས་སེམས་དང་ཁོང་ཁྲོ་སྐྱོ་གདུང་དང་མིག་ཆུ་ཞིག་ལས་དགའ་སྤྲོའི་རྣམ་པ་མ་མཐོང་ཡང་། མདུན་ནས་བསུ་བའི་ཆུ་འབྲུག་གནམ་ལོ་གསར་ཚེས་འདི་ནང་ནས་ཁྱེད་རྣམས་སྐུ་ཁམས་བདེ་ཐང་དང། བྱ་བ་ལམ་འགྲོ་རེ་སྒུག་མངོན་འགྱུར་ཡོང་པའི་སྨོན་འདུན་ཡང་ཡང་ཞུ་བ་དང་ཆབས་ཅིག་ཁྱེད་རྣམས་ཀྱིས་རང་རིགས་ཀྱི་སྤོབས་པ་གཟེངས་སུ་བསྟོད་དེ། རང་ཕྱོགས་སུ་ཕམ་ཁ་དང་གྱོང་གུད་ཅི་ཙམ་བྱུང་ཡང་བློ་སྟོབས་མ་ཉམས་པའི་སྒོ་ནས་ཆིག་སྒྲིལ་ལ་འབད་འབུང་དམ་ཟབ་ཡོང་བའི་རེ་བ་ཤིན་ཏུ་ཆེ། འབྲི་རུ་བ་དགུ་འགྲུབ་ནས།”ཞེས་འཁོད་ཡོད་འདུག
རྒྱལ་གཅེས་དཔའ་བོ་འབྲི་རུ་དགུ་འགྲུབ་ནི་རྩོམ་པ་པོ་ཞིག་ཡིན་པ་དང་། སྨྱུག་མིང་ལ་གངས་ཁྲོད་ཀྱི་ན་གཞོན་ཟེར་གྱི་ཡོད་འདུག ཁོང་བོད་དོན་ལ་སེམས་ཤུགས་ཆེན་པོ་ཡོད་མཁན་ཞིག་ཡིན་པ་མ་ཟད། རྟག་ཏུ་བོད་ཀྱི་རྒྱལ་རབས་ལོ་རྒྱུས་ཀློག་རྒྱུར་དགའ་པོ་ཡོད་འདུག ཁོང་སྔོན་མ་རྒྱ་གར་དུ་ཡོང་ནས་གསོག་སྒར་སློབ་གྲྭར་སོང་ཡོད་པ་དང་། ༢༠༠༥ ལོར་ཕྱིར་བོད་ལ་ལོགས་སྐབས་རྒྱ་ཡི་བཙོན་འོག་ཏུའང་སྡོད་དགོས་བྱུང་ཡོད་འདུག།།
ཕྱི་ལོ་ ༢༠༡༢ ཟླ་ ༩ ཚེས་༢༩ ཉིན་གྱི་ཕྱི་དྲོ་ཆུ་ཚོད་ ༧ ཙམ་ལ་ཁམས་ཡུལ་ཤུལ་ཁུལ། དགེ་འབྲོང་རྫ་སྟོད་དུ་གནས་སྡོད་བྱེད་ཡོད་པའི་རྒྱལ་གཅེས་དཔའ་བོ་རང་ལོ་ ༢༧ ལ་སོན་པ་གཡུང་དྲུང་ལགས་ཀྱིས་རང་ལུས་མེར་སྲེག་གནང་ནས་བདུན་གཅིག་མ་སོང་བར། ཟླ་ ༡༠ ཚེས་ ༤ ཉིན་བོད་ནང་གི་ཆུ་ཚོད་༡༠ པའི་ཐོག་ཁམས་འབྲི་རུ་རྫོང་ཤག་ཆུ་གྲོང་བརྡལ་གྲོང་ཚོ་ཉི་ཤུ་ཡུངས་དཀར་ལྷའི་གྲོང་ནས་ནས་ཡིན་ཞིང་། རང་ལོ་༤༣ ལ་སོན་པ་མིང་ལ་དགུ་འགྲུབ་ལགས་ཀྱིས། ནག་ཆུ་གྲོང་ཁྱེར་གྱི་ཁྲོམ་གཞུང་དུ་རང་ལུས་མེར་སྲེག་གཏོང་དགོས་བྱུང་ཡོད། ཕྱི་ལོ་ ༢༠༠༩ ནས་བཟུང་དུས་དེ་རིང་གི་བར་བོད་ནང་རང་ལུས་མེར་སྲེག་གནང་མཁན་ ༥༣ དང་། དེའི་ནང་ནས་སྐུ་འདས་གྲོངས་སུ་གྱུར་པ་ ༤༣ ཆགས་ཡོད། དུས་ཚོད་ཐུང་ངུ་ཞིག་གི་ནང་བོད་དུ་རང་ལུས་མེར་སྲེག་ཕོན་ཆེན་བྱུང་དང་འབྱུང་བཞིན་པ་དག་གི་རྒྱུ་རྐྱེན་ནི། རྒྱ་གཞུང་གིས་བོད་ཐོག་འཛིན་པའི་མཁྲེགས་འཛིན་དང་ཕྱོགས་སུ་ལྷུང་བའི་སྲིད་བྱུས་ལ་བརྟེན་ནས་ཡོང་གི་ཡོད་པ། བོད་མི་མང་སྤྱི་འཐུས་ལྷན་ཚོགས་ཀྱི་གསར་འགོད་བསྒྲགས་གཏམ་རིམ་པའི་ནང་བཀོད་ཡོད་པ་ལྟར་ད་དུང་ཡང་དེ་བཞིན་ནན་བརྗོད་བྱེད་རྒྱུ་ཡིན།
རང་ལུས་མེར་སྲེག་གནང་མཁན་དེ་དག་ལ། རྒྱ་གཞུང་གིས་དྲ་ལམ་སོགས་སུ་འཁྱོག་བཤད་རི་ཙམ་བྱས་ནས་བདེན་པ་གཡག་ཙམ་ཐོབ་ཆེད་དུ། རང་ལུས་མེར་སྲེག་གནང་མཁན་ཚོ་རིག་འཚོ་མ་ཟིན་པ་དང་། འཇིགས་སྐུལ་རིང་ལུགས་པ་རེད་ཟེར་བ་དང་། ཡང་བོད་པའི་སྐྱབས་བཅོལ་སྲིད་གཞུང་གིས་བརྒྱུད་སྐུལ་བྱས་པ་རེད་ཟེར་བ་སོགས། ཁ་གཡར་ཐབས་སྣ་ཚོགས་བྱེད་བཞིན་ཡོད་པ་དེ་དངོས་ཡོད་གནས་ཚུལ་ཡིན་ན། བོད་ནང་རང་དབང་ལྡན་པའི་ཞིབ་འཇུག་ཚོགས་ཆུང་དང་། རྒྱལ་སྤྱིའི་སྐུ་ཚབ། གསར་འགོད་པ་སོགས་རྒྱ་ནག་གཞུང་རང་གི་ཁེ་ཕན་གྱི་ཆེད་དུ་གཏོང་དགོས་ངེས་ཡིན། ཡིན་ནའང་དེ་དག་ཡོངས་རྫོགས་བཀག་བསྡོམས་བྱས་པ་དེ། རྒྱ་ནག་གིས་བཤད་པ་ཡོངས་རྫོགས་འཁྱོག་བཤད་དང་རྫུན་སྒྲིག རྒྱ་ནག་མི་མང་དང་འཛམ་གླིང་མི་མང་མགོ་སྐོར་གཏོང་ཆེད་ཁོ་ན་ཡིན་པར། བོད་མི་མང་སྤྱི་འཐུས་ལྷན་ཚོགས་ཀྱིས་ངོས་འཛིན་བྱེད་བཞིན་ཡོད། ད་དུང་ཡང་ཇི་སྲིད་བོད་ནང་རྒྱལ་སྤྱིའི་གསར་འགོད་པ་དང་རྒྱལ་སྤྱིའི་སྐུ་ཚབ། ཞིབ་འཇུག་པ་སོགས་མ་བཏང་བར་དེ་སྲིད་དུ་རྒྱ་གཞུང་གིས་བོད་མི་ཚོར་སྐྱོན་བརྗོད་བྱེད་བཞིན་པ་རྣམས་གཞི་མེད་ཀྱི་འཁྱོག་བཤད་དང་རྫུན་སྒྲིག་ཡིན་པ་ངོས་འཛིན་བྱེད་རྒྱུ་ཡིན་པར་ནན་བརྗོད་བྱེད་རྒྱུ་ཡིན་ལ། རྒྱལ་སྤྱིའི་ཚོགས་སྡེ་ཁག་གིས་ཀྱང་དེ་བཞིན་དུ་ངོས་འཛིན་ཡོང་བར་རེ་སྐུལ་ནན་པོ་ཞུ་རྒྱུ་ཡིན།
ཞེས་བོད་མི་མང་སྤྱི་འཐུས་ལྷན་ཚོགས་ནས་ཕྱི་ལོ་ ༢༠༡༢ ཟླ་ ༡༠ ཚེས་ ༥ ཉིན།།