༄༅། །སྐབས་ ༡༦ པའི་བོད་མི་མང་སྤྱི་འཐུས་བསྟན་པ་ཡར་འཕེལ་མཆོག་དང་། སྤྱི་འཐུས་དགེ་བཤེས་ལྷ་རམས་པ་གོ་བོ་བློ་བཟང་ཕན་བདེ་མཆོག་རྣམ་གཉིས་ཕྱི་ལོ་ ༢༠༡༨ ཟླ་ ༩ ཚེས་ ༧ ནས་ ༡༤ བར་ཀ་སྦུག་ས་འགོའི་ཁྱབ་ཁོངས་ས་གནས་ཁག་ལ་ས་བགོས་ཕྱོགས་སྐྱོད་ཀྱི་གཟིགས་སྐོར་ལེགས་གྲུབ་བྱུང་ཡོད་པ་རེད།

ཕྱི་ཚེས་ ༡༠ ཉིན་ཀ་སྦུག་ནས་ལ་ཝར་ཕེབས་ཐོན་གནང་སྟེ། ༸སྐྱབས་རྗེ་འཇམ་དགོན་ཀོང་སྤྲུལ་རིན་པོ་ཆེའི་བྱེས་ཀྱི་གདན་ས་བཀའ་བརྒྱུད་ཐེག་ཆེན་གླིང་དགོན་པའི་ཕྱག་མཛོད་དང་དགེ་བསྐོས་བཅས་ནས་ཕེབས་བསུའི་སྣེ་ལེན་གནང་། དགོན་པ་མཆོད་མཇལ་གྲུབ་རྗེས་རླངས་འཁོར་ནང་ཆུ་ཚོད་ཕྱེད་ཙམ་གྱི་སར་༸སྐྱབས་རྗེ་འཁོར་ཁྱིམ་རིན་པོ་ཆེའི་དགོན་པ་ཨོ་རྒྱན་བསམ་གཏན་སྨིན་གྲོལ་གླིང་དུ་ཕེབས་ཏེ་དགོན་པའི་ལས་སྣེ་རྣམས་ནས་སྣེ་ལེན་གྱིས་དགོན་པ་མཆོད་མཇལ་དང་། གདན་ས་དབུས་མ་ཀ་ལ་མན་ཀྲོན་སྨིན་གྲོལ་གླིང་གི་མཆོད་རྟེན་ཆེན་མོའི་ཕྱེད་ཀ་ཙམ་ཡོད་པའི་མཆོད་རྟེན་དང་། ནང་དུ་ལྷ་ཁང་གི་བཀོད་པ་ཕུན་སུམ་ཚོགས་པ་ཐོག་བརྩེགས་གསུམ་གྱི་དང་པོར་གུ་རུ་སྣང་སྲིད་ཟིལ་གནོན་ཐོག་བརྩེགས་གཅིག་ཅན་ལ་གཡས་གཡོན་རྣམས་སུ་གུ་རུ་མཚན་བརྒྱད་མི་ཚད་ཙམ་དང་། ཐོག་བརྩེགས་གཉིས་པར་སྟོན་པ་ཤཱཀྱ་ཐུབ་པ་མི་ཚད་ཙམ་ལ་འཁོར་དུ་རྫོགས་ཆེན་སྟོན་པ་བཅུ་གཉིས། ཐོག་བརྩེགས་གསུམ་པ་ལ་རྒྱལ་བའི་བཀའ་བསྟན་འགྱུར་གྱིས་གཙོས་པའི་གསུང་རབས་ཀྱི་དཔེ་མཛོད་ཁང་བཅས་གསར་བཞེངས་གནང་ཡོད་པ་མཇལ་གནང་བ་དང་། དེ་རྗེས་༸སྐྱབས་རྗེ་འཁོར་ཁྱིམ་རིན་པོ་ཆེས་གསར་འཛུགས་གནང་བའི་སློབ་གྲྭར་གཟིགས་སྐོར་གནང་། འཛིན་གྲྭ་དང་པོ་ནས་དྲུག་པ་བར་སློབ་ཕྲུག་ ༡༧༠ ལྷག་ཙམ་འདུག་པར་སློབ་གྲྭའི་ཁོར་ཡུག་གཙང་ལ་འཛིན་སྐྱོང་ཚགས་ཚུད་ཐོག་སློབ་ཕྲུག་ཐོན་རིམ་བཞིན་ཀ་སྦུག་སམ་བྷོ་ཊ་དང་ཡུལ་མིའི་སློབ་གྲྭ་སོགས་སུ་སློབ་མ་སོ་སོའི་འདོད་མོས་བཞིན་འགྲོ་ཆོག་པ་བཟོས་ཡོད་པ་སོགས་སློབ་གྲྭ་སྤྱི་ཡོངས་ཀྱི་གནས་སྟངས་སྐོར་སློབ་གྲྭའི་དབུ་འཛིན་མཆོག་ནས་འགྲེལ་བཤད་གནང་།