༄༅། །ཕྱི་ལོ་ ༢༠༢༥ ཟླ་ ༧ པའི་ཚེས་ ༤ ཉིན་གྱི་ཕྱི་དྲོར་སྒྲུབ་བརྒྱུད་བསྟན་པའི་མངའ་བདག་༧དཔལ་རྒྱལ་བའི་དབང་པོ་ཀརྨ་པ་མཆོག་གི་སྐུ་ཚབ་འབོ་དཀར་མཁན་ཆེན་བློ་གྲོས་དོན་ཡོད་རིན་པོ་ཆེ་མཆོག་བཞུགས་སྒར་རྡ་རམ་ས་ལར་ཞབས་སོར་བདེ་བར་འཁོད་གནང་བ་དང་། སྐབས་དེར་བོད་མི་མང་བཀའ་བརྒྱུད་སྤྱི་འཐུས་ཀུན་དགའ་བསོད་སྟོབས་མཆོག་དང་། ཆོས་རིག་ལས་ཁུངས་ཀྱི་དྲུང་ཆེ། མཚུར་སྒར་བླ་བྲང་། ཆོས་ཚོགས་ཐེངས་བཅོ་ལྔར་ཕེབས་པའི་ཀཾ་ཚང་དགོན་སྡེ་ཁག་གི་སྐུ་ཚབ་བཅས་ནས་གཞུང་འབྲེལ་སྣེ་ལེན་ཕེབས་བསུ་ཞུས་གནང་ཡོད།
གཞི་རྩའི་རིན་པོ་ཆེ་མཆོག་སང་ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་བོད་མིའི་སྒྲིག་འཛུགས་ནས་བོད་གཞིས་བྱེས་ལྷ་མི་ཡོངས་ཀྱི་ཚབ་ཞུས་ཏེ་བརྟན་བཞུགས་བསྟར་འབུལ་སྐབས་དང་། ཕྱི་ཟླ་ ༧ པའི་ཚེས་ ༦ ཉིན་གཞུང་འབྲེལ་༧སྐུའི་གོ་སྟོན་སྲུང་བརྩིའི་མཛད་སྒོ་བཅས་ཀྱི་སླད་བཞུགས་སྒར་རྡ་རམ་ས་ལར་ཆིབས་བསྒྱུར་བཀའ་དྲིན་བསྐྱངས་ཡོད་པ་བཅས།
