སྤྱི་འཐུས་ཚོགས་གཞོན་ཟུར་པ་བྱ་རྒོད་ཚང་སྲས་དོན་ཡོད་མཆོག་སྐུ་གཤེགས་པའི་ཡིད་སྐྱོའི་གནས་ཚུལ།

བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་ཟུར་པ་བྱ་རྒོད་ཚང་སྲས་དོན་ཡོད་མཆོག་ཕྱི་ལོ་ ༢༠༡༡ ཟླ་ ༡༢ ཚེས་ ༡༩ ཉིན་གྱི་སྔ་དྲོ་ཆུ་ཚོད་ ༡༡ ཐོག་གློ་བུར་དུ་སྐུ་ཚེ་མ་ཟིན་པའི་ཡིད་སྐྱོའི་གནས་ཚུལ་ཐོན་འདུག

དམ་པ་ཁོང་ནི་ཕ་རྡོ་རྗེ་དང་མ་བདེ་ཆེན་སྒྲོལ་མ་གཉིས་ཀྱི་སྲས་སུ་ཕྱི་ལོ་ ༡༩༣༧ ཟླ་ ༣ ཚེས་ ༡༠ ཉིན་ཁམས་སྡེ་དགེ་ཁུལ་དུ་སྐུ་འཁྲུངས་ཤིང་།   ཕྱི་ལོ་ ༡༩༥༠ ལོར་རྒྱ་གར་དུ་འབྱོར་ཏེ་ལོ་ཤས་རིང་དབྱིན་དགེ་ཟུར་བསྟེན་གྱིས་དབྱིན་ཡིག་སྦྱོང་བརྡར་དང་།  ཕྱི་ལོ་ ༡༩༥༨ ལོར་ལྷོ་ཁ་ལྕགས་ཚ་གྲི་གུ་ཐང་དུ་མདོ་ཁམས་ཆུ་བཞི་སྒང་དྲུག་བོད་ཀྱི་བསྟན་སྲུང་དང་བླངས་དམག་དབུ་བརྙེས་སྐབས་སྒྲིག་ཁོངས་སུ་ཞུགས། ཕྱི་ལོ་ ༡༩༥༩ ལོར་རྒྱ་གར་བརྒྱུད་ཨ་རིར་དྲག་པོའི་དམག་སྦྱོང་དུ་བསྐྱོད་ཅིང་ལོ་དེར་ལྕགས་ར་དཔལ་འབར་ཕྱོགས་སུ་གནམ་གྲུ་ལས་མཆོངས་བབས་ཀྱིས་ལོ་གཅིག་རིང་ཁུལ་དེའི་ཡུལ་དམག་དང་ཡུལ་བྱོལ་བཙན་རྒོལ་བ་བཅས་ལ་གོ་ལག་རྫས་མདེལ་མཁོ་སྤྲོད་དང་། དམག་འཐབ་ནང་མཉམ་ཞུགས་ཀྱིས་རྒྱ་དམག་དང་འཐབ་འཛིང་བྱས་མཐར་བཙན་རྒོལ་བ་ཉུང་ཤས་ཤིག་དང་མཉམ་རྒྱ་གར་དུ་ཐེངས་གཉིས་པ་འབྱོར། ཕྱི་ལོ་ ༡༩༦༤ ནས་ ༡༩༦༧ བར་མ་སུ་རི་རེ་ཀྲིང་སློབ་གྲྭར་སྐད་ཡིག་སློབ་སྦྱོང་གནང་། ཕྱི་ལོ་ ༡༩༦༨ ལོར་ཨ་རིར་མཐོ་སློབ་དུ་སློབ་སྦྱོང་ཆེད་ཕེབས་ཏེ་ charman  college southern  Calf college university of  Redlands  California U.S.A ཚོང་དོན་རིག་པ་དང་།  དཔལ་འབྱོར་རིག་པའི་གཞུང་ལུགས་ཐོག་སློབ་གཉེར་གནང་། ཕྱི་ལོ་ ༡༩༧༧ ལོར་རྒྱ་གར་དུ་ཕྱིར་འཁོར་བ་ནས་བཟུང་སྦིར་སྡེ་དགེ་ཚོགས་པའི་གཙོ་འཛིན་གྱི་ལས་འཁུར་བཞེས་པ་དང་། དེ་མཚུངས་སུ་ཕྱི་ལོ་ ༡༩༧༧ ལོ་ནས་༡༩༩༤ བར་ཆུ་སྒང་འགན་འཛིན་ལྷན་ཚོགས་ཀྱི་ཚོགས་མི་དང། ༡༩༩༤ ལོར་མདོ་ཁམས་ཆུ་བཞི་སྒང་དྲུག་དབུས་སྤྱི་ཁྱབ་རྒྱུན་ལས་ཁང་གི་ཚོགས་གཞོན་དུ་འདེམས་ཐོན་བྱུང་བ་ལྟར་ ༢༠༠༡ བར་ལས་གནས་དེ་གའི་ཐོག་ཞབས་འདེགས་ཞུས། ཕྱི་ལོ་ ༡༩༨༢ ཟླ་ ༩ ཚེས་ ༢ ནས་ཕྱི་ལོ་ ༡༩༨༧ ཟླ་ ༩ ཚེས་ ༡ བར་སྐབས་ ༨ པའི་བོད་མི་མང་སྤྱི་འཐུས་དང་། ཕྱི་ལོ་ ༡༩༨༧ ཟླ་ ༩ ཚེས་ ༢ ནས་ཕྱི་ལོ་ ༡༩༨༨ ཟླ་ ༩ པའི་ཚེས་ ༡ བར་སྐབས་ ༩ པའི་མདོ་སྟོད་སྤྱི་འཐུས་གནང་། ཕྱི་ལོ་ ༡༩༨༨ ཟླ་ ༩ ཚེས་ ༢ ནས་ཕྱི་ལོ་ ༡༩༨༨ ཟླ་ ༡༡ ཚེས་ ༢༦ བར་སྐབས་ ༡༠ པའི་སྤྱི་འཐུས་དང་ཚོགས་གཞོན་གྱི་ལས་འཁུར་བཞེས་ཡོད། ཕྱི་ལོ ༡༩༩༣ ཟླ་ ༧ ཚེས་ ༡ ནས་བསྐྱར་དུ་སྦིར་སྡེ་དགེ་གཞིས་ཆགས་ཀྱི་ས་འགོ་གནང་།  ཕྱི་ལོ་ ༢༠༠༣ ཟླ་ ༤ ཚེས་ ༡༠ ནས་ཕྱི་ལོ་ ༢༠༠༦ ཟླ་ ༤ ཚེས་ ༩ བར་དང་།  ཕྱི་ལོ་ ༢༠༠༦ ཟླ་ ༦ ཚེས་ ༡ ནས་ཕྱི་ལོ་ ༢༠༠༩ ཟླ་ ༥ ཚེས་ ༣༡ བར།  དེ་བཞིན་ཕྱི་ལོ་ ༢༠༡༠ ཟླ་ ༢ པའི་ཚེས་ ༢ ནས་ད་བར་བཅས་སོ་སོར་སྦིར་སྡེ་དགེ་གཞིས་ཆགས་མང་ཚོགས་ནས་ས་གནས་འགོ་འཛིན་དུ་འོས་འདེམས་གནང་སྟེ་ལས་འཁུར་བཞེས་མུས་དང་། དེ་བཞིན་ཕྱི་ལོ་ ༢༠༠༤ ལོར་སྦིར་ཅོན་ཏ་ར་བུ་ཁྱིམ་སློབ་གྲྭ་བཙུགས་པ་ནས་ད་བར་འགན་འཛིན་ལྷན་ཚོགས་ཀྱི་ཚོགས་མིའི་འགན་ཁུར་བཞེས་བཞིན་པའི་སྐབས་ཏེ་ཕྱི་ལོ་ ༢༠༡༡ ཟླ་ ༡༢ ཚེས་ ༡༩ ཉིན་གྱི་སྔ་དྲོ་ཆུ་ཚོད་ ༡༡ ཐོག་གློ་བུར་དུ་སྐུ་ཚེ་མ་ཟིན་པའི་ཡིད་སྐྱོའི་གནས་ཚུལ་ཐོན་འདུག

ཡིད་སྐྱོའི་གནས་ཚུལ་ཐོན་མ་ཐག  སྤྱི་འཐུས་རྒྱུན་ལས་ལྷན་འཛོམས་ཀྱིས་དམ་པ་གང་གི་ནང་མིར་ཐུགས་གསོའི་ཕྱག་བྲིས་དང་།  དཀར་མེའི་ཞལ་འདེབས་བཅས་འབུལ་རྒྱུ་གནང་ཐོག  བཀའ་ཤག་གི་བཀའ་ཁྱབ་ལྟར་ཉིན་རྒྱབ་ཆུ་ཚོད་ ༣ པ་ནས་ ༤ པའི་བར་བོད་མིའི་སྒྲིག་འཛུགས་ཀྱི་ལས་བྱེད་རྣམས་ཀྱིས་སྨོན་ལམ་གསུང་འདོན་གནང་བ་བཞིན་དཔའ་ལྡན་ཚོགས་གཙོ་སྦྲེལ་པོ་མཆོག་གིས་དབུས་སྤྱི་འཐུས་རྒྱུན་ལས་རྣམ་པ་དང་།  ཚོགས་དྲུང་ལས་ཁུངས་ཀྱི་ལས་བྱེད་བཅས་ཀྱང་མཉམ་ཞུགས་གནང་ཞིང་།  ཉིན་རྒྱབ་ཆུ་ཚོད་ ༤ པ་ནས་མྱ་ངན་གུས་འདུད་སླད་ལས་ཁུངས་ཡོངས་རྫོགས་སྒོ་བཅད་གནང་ཡོད།  དེའི་དགོང་དྲོ་རང་དུ་བོད་མི་མང་སྤྱི་འཐུས་ལྷན་ཁང་གི་སྐུ་ཚབ་ཏུ་ཚོགས་དྲུང་ལས་ཁུངས་ཀྱི་སྤྱི་ཁྱབ་དྲུང་ཆེ་སྟོབས་རྒྱལ་ལགས་སྦིར་བོད་མིའི་གཞིས་ཆགས་སུ་ཆེད་གཏོང་གནང་སྟེ་འདས་པོའི་ཆེད་དཀར་མེའི་ཞལ་འདེབས་དང་།  ཤུལ་ལུས་ནང་མི་རྣམ་པར་ཐུགས་གསོའི་འཚམས་འདྲི་ཞུས་ཤིང་།  སྤྱི་ལྷན་གྱི་ཐུགས་གསོའི་འཚམས་འཕྲིན་ཡང་ཕུལ་ཡོད་པ་རེད།

གཞན་ཡང་ཁོང་གིས་༸སྐྱབས་རྗེ་གྲུབ་དབང་པད་ནོར་རིན་པོ་ཆེ་མཆོག་དང་། བྱ་བྲལ་རིན་པོ་ཆེ་མཆོག་སོགས་སྐྱེས་ཆེན་དུ་མའི་ཞལ་སྔ་ནས་དབང་ལུང་མན་ངག་ཁྲིད་གདམས་རྣམས་གསན་ཏེ་རྒྱུན་དུ་དགེ་སྦྱོར་ལྷོད་མེད་གནང་བ་དང་། མདོར་ན་ཁོང་ནི་ཆོས་སྲིད་གཉིས་ཀར་མཁྱེན་རྒྱ་ཡངས་ཤིང་ཞི་དྲག་གཉིས་ཀྱི་སྒོ་ནས་སྐུ་ཚེ་ཧྲིལ་པོ་བོད་བསྟན་སྲིད་ཀྱི་དོན་དུ་ལེགས་སྐྱེས་སུ་འབུལ་མཁན་གྱི་བྱས་རྗེས་ཅན་ཞིག་ཡིན། །

Menu