༄༅། ། ཕྱི་ལོ་ ༢༠༢༣ ཟླ་ ༩ ཚེས་ ༢༧ ཉིན་གྱི་སྔ་དྲོ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་འཕགས་ཡུལ་བཀྲ་ཤིས་ལྗོངས་གདན་ས་ཁམས་པ་སྒར་གྱི་བཤད་གྲྭ་ཁམས་སྒར་འབྲུག་མཐོ་སློབ་དྷརྨ་ཀཱ་རའི་གཙུག་ལག་སློབ་གཉེར་ཁང་གསར་པ་རྟེན་དང་བརྟེན་པ་བཅས་པ་གསར་བཞེངས་ལེགས་གྲུབ་བྱུང་བ་དེ་བཞིན་དབུ་འབྱེད་རབ་གནས་དང་། མཛད་སྒོའི་ཐོག་བཀའ་སློབ་བཀའ་དྲིན་སྩལ་གནང་སོང་།

སྐབས་དེའི་དབུ་འབྱེད་མཛད་སྒོའི་ཐོག་༧སྐྱབས་རྗེ་ཁམས་སྤྲུལ་རིན་པོ་ཆེ་མཆོག་དང་། དམིགས་བསལ་སྐུ་མགྲོན་དུ་དཔལ་ལྡན་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག ཆེ་བསྟོད་སྐུ་མགྲོན་དུ་ཧི་མ་ཅལ་མངའ་སྡེའི་གྲོས་ཚོགས་ཀྱི་སྤྱི་ཁྱབ་དྲུང་ཆེ་སྐུ་ཞབས་ཀི་ཤོ་རི་ ལལ་ (Shri Kishori Lal, Chief Parliamentary Secretary, HP) མཆོག གཞན་སྐུ་མགྲོན་དུ་བོད་མི་མང་སྤྱི་འཐུས་རྣམ་པ་དང་། ཆོས་རིག་ལས་ཁུངས་དང་ཤེས་རིག་ལས་ཁུངས་ཀྱི་དྲུང་ཆེ་སོགས་ཕེབས་གནང་འདུག

སྐབས་དེར་དམིགས་བསལ་སྐུ་མགྲོན་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཆོག་གིས་གསུང་དོན། ས་བསྟན་རྒྱལ་བསྟན་ཡོངས་རྫོགས་ཀྱི་མངའ་བདག་འགྲོ་བ་ལྷ་དང་བཅས་པའི་མགོན་སྐྱབས་མཚུངས་ཟླ་མ་མཆིས་པ་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་སྒོ་གསུམ་གུས་ཕྱག་སྔོན་དུ་ཕུལ་བའི་ཐོག་ནས་དེ་རིང་བྱེས་ཀྱི་གདན་ས་ཁམས་པ་སྒར་གྱི་བཤད་གྲྭའི་གཙུག་ལག་ཁང་ཆེན་པོ་དབུ་འབྱེད་ཀྱི་མཛད་སྒོའི་ཐོག་ཕེབས་པའི་ཁམས་སྒར་བསྟན་པའི་བདག་པོ་༧སྐྱབས་རྗེ་ཁམས་སྤྲུལ་རིན་པོ་ཆེ་མཆོག་གིས་དབུས་པའི་རྒྱལ་སྲས་བླ་སྤྲུལ་དང་། དགེ་འདུན་པ་རྣམ་པ་དང་། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་མཆོག་གིས་དབུས་པའི་སྐུ་མགྲོན་རྣམ་པ། དེ་བཞིན་རྒྱ་གར་གྱི་གནད་ཡོད་སྐུ་ཞབས་ཀི་ཤོ་རི་ ལལ་མཆོག དད་ལྡན་སྦྱིན་བདག་རྣམ་པ། མང་ཚོགས་སློབ་ཕྲུག་བཅས་ལ་བོད་མི་མང་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ། ཐོག་མར་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན།

དེ་རིང་བཀྲ་ཤིས་ལྗོངས་ཁམས་པ་སྒར་གྱི་བཤད་གྲྭའི་གཙུག་ལག་ཁང་རྟེན་དང་བརྟེན་པ་བཅས་པ་ལེགས་པར་གྲུབ་པའི་དབུ་འབྱེད་ཀྱི་མཛད་སྒོའི་ཐོག་ལ་འགྲོ་བ་ལྷ་དང་བཅས་པའི་མགོན་སྐྱབས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ཞབས་ཀྱི་མངོན་པར་འཁོད་པའི་དེ་རིང་བཀའ་དྲིན་ཆེན་པོའི་ཐོག་ནས་ང་ཚོ་གདུལ་བྱ་རྣམས་ཀྱི་ངོར་དངོས་སུ་ཆིབས་བསྒྱུར་བསྐྱངས་ནས་མཛད་སྒོའི་ཚོགས་མགོན་དུ་དབུ་ཞུགས་གནང་ཐུབ་པ་དེ་ང་རང་ཚོའི་སྐྱེ་བ་མང་པོའི་རིང་བསོད་ནམས་ཀྱི་ཚོགས་བསགས་པའི་འབྲས་བུ་ཞིག་ལ་ངོས་འཛིན་ཞུ་ཡི་ཡོད། དེ་བཞིན་གདན་ས་འདིའི་ཐོག་ནས་བསྟན་པ་སྤྱི་དང་བྱེ་བྲག ལྷག་པར་དུ་འབྲུག་པ་བཀའ་བརྒྱུད་ཀྱི་བཤད་སྒྲུབ་གཉིས་ཀྱི་འབྱུང་ཁུངས་ལྟ་བུ་ཆགས་ཐུབ་པ་འདི་ཧ་ཅང་གི་རླབས་ཆེན་པོའི་བྱ་གཞག་ཅིག་ཡིན་དུས་དེའི་འབྲེལ་ཡོད་ཚང་མ་ལ་བསྔགས་བརྗོད་དང་ཐུགས་རྗེ་ཆེ་ཞུ་རྒྱུ་ཡིན།

གཙོ་བོ་སློབ་དཔོན་དབྱིགས་གཉེན་གྱིས་གསུངས་པ་བཞིན་རེད།  རྒྱལ་བའི་བསྟན་པ་རིན་པོ་ཆེ་འདི་ཉིད་ལུང་དང་རྟོགས་པའི་བསྟན་པ་གཉིས་སུ་བསྡུས་པ་ཞིག་ཡིན་དུས། དེའི་ཐོག་ང་རང་ཚོས་བཤད་སྒྲུབ་གཉིས་ཀྱི་ཐོག་ནས་བསྟན་པ་འཛིན་སྐྱོང་སྤེལ་གསུམ་བྱེད་དགོས་པ་དེ་གལ་ཆེན་པོ་ཆགས་ཀྱི་ཡོད། དེ་ཡང་གཙོ་བོ་གོང་དུ་༧སྐྱབས་རྗེ་ཁམས་སྤྲུལ་རིན་པོ་ཆེས་གཙུག་ལག་ཁང་དང་། བཤད་གྲྭའི་འབྱུང་རིམ་དེ་ཚོ་ཁམས་སྤྲུལ་སྐུ་གོང་འོག་གི་ཐོག་ནས་དམིགས་བསལ་གྱིས་སྐུ་ལས་ཞེ་པོ་བསྐྱོན་གནང་འདུག དེ་ཡིན་དུས། རྗེས་འཇུག་རྣམས་ཀྱིས་སྐུ་གོང་འོག་གི་དགོངས་པ་གང་ཡོད་པ་དེ་དག་བསྐང་ཐུབ་རྒྱུར་ཚང་མས་ལྷག་བསམ་རྣམ་དག་གིས་ཞབས་ཏོག་བསྒྲུབ་ཐུབ་དགོས་པ་གལ་ཆེན་པོ་རེད་འདུག་ཅེས་གསོལ་འདེབས་ཞུ་རྒྱུ་ཡིན།

དེ་བཞིན་གཙུག་ལག་ཁང་ཆེན་པོ་འདི་ལྟ་བུ་ཞིག་ང་ཚོའི་མིག་གི་ཡུལ་དུ་མཇལ་ཐུབ་པ་དེའི་རྒྱུ་རྐྱེན་གཙོ་བོ་གཅིག་བསྟན་པའི་སྦྱིན་བདག་རྣམ་པའི་བཀའ་དྲིན་ལ་བརྟེན་ནས་བྱུང་བ་ཡིན་ཞིང་། བསྟན་པའི་སྦྱིན་བདག་རྣམ་པར་དེ་རིང་འདི་འདྲ་བའི་བསྐལ་བ་བཟང་པོའི་གོ་སྐབས་ཤིག་བྱུང་ཐུབ་པ་འདིར་ཚང་མས་དགའ་བ་སྒོམ་དགོས་པ་ཞིག་དང་། སོ་སོའི་བསོད་ནམས་ཀྱི་ཚོགས་ཀྱི་རྒྱུ་ཆེན་པོ་ཞིག་ཆགས་པ་ཡིན་དུས། དུས་རྒྱུན་དུ་སོ་སོའི་ངོས་ནས་བསྔོ་བ་འདྲ་པོ་རྒྱ་ཆེན་པོ་བྱེད་ཐུབ་དགོས་པ་གལ་ཆེན་པོ་རེད་འདུག་ཅེས་ཞུ་རྒྱུ་ཡིན། དེ་བཞིན་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་ལ་བརྟེན་ནས་ང་རང་ཚོའི་བོད་གངས་ཅན་གྱི་བསྟན་པ་འདི་ཐོག་མར་མདོ་ལུང་ནས་ཟིན་པ་ནང་བཞིན། བྱང་ནས་བྱང་དུ་དར་ཞེས་པ་ལྟར་རྒྱ་གར་ནས་བོད་ལ་དར་བ་དང་། བོད་ནས་སོག་པོ་དང་། དེང་སང་གི་དུས་ཚོད་ལ་འཛམ་གླིང་ཁྱོན་ལ་ནང་པའི་བསྟན་པ་འདི་ཉིད་དར་ཡོད་པ་རེད། དར་བ་གཞིར་བཟུང་གི་ཐོག་ནས་གཙོ་བོ་བོད་ཀྱི་ལོ་རྒྱུས་ལ་བྱུང་མ་མྱོང་བའི་གནས་སྟངས་ཤིག་སྟེ། བོད་ཀྱི་ཆོས་བརྒྱུད་ཚང་མ་འཆམ་མཐུན་གྱི་ཐོག་ནས་དམ་ཚིག་འོ་ཆུ་གཅིག་འདྲེས་ལྟ་བུ་བྱུང་ཐུབ་པ་དེ་ཡང་གཙོ་བོ་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་རླབས་ཆེན་གྱི་མཛད་པ་འཕྲིན་ལས་ལ་བརྟེན་ནས་བྱུང་བ་ཡིན་དུས་ང་རང་ཚོས་མུ་མཐུད་ནས་རྒྱལ་བའི་བསྟན་པ་རིན་པོ་ཆེ་འདི་ཉིད་འཛམ་གླིང་ཕྱོགས་ཀུན་ལ་མི་ཉམས་གོང་སྤེལ་དང་། ཉམས་པ་སོར་ཆུད་གནང་ཐུབ་དགོས་པ་དེ་གལ་ཆེན་པོ་རེད་འདུག་ཅེས་གསོལ་འདེབས་ཞུ་རྒྱུ་ཡིན།

མཐའ་དོན་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་སྐུ་ཚེ་ཞབས་པད་བསྐལ་བརྒྱར་བརྟན་པ་དང་། དེ་བཞིན་༧སྐྱབས་རྗེ་ཁམས་སྤྲུལ་རིན་པོ་ཆེ་མཆོག་གིས་དབུས་པའི་གདན་ས་ཁམས་པ་སྒར་གྱི་བྱ་བ་ཐམས་ཅད་གོང་ནས་གོང་དུ་འཕེལ་བའི་སྨོན་འདུན་ཞུ་རྒྱུ་ཡིན་ཞེས་གསུངས་གནང་སོང་།

གཞན་ཡང་མཛད་སྒོའི་ཐོག་༧སྐྱབས་རྗེ་ཁམས་སྤྲུལ་རིན་པོ་ཆེ་མཆོག་གིས་ཕེབས་བསུའི་གསུང་བཤད་དང་། དམིགས་བསལ་སྐུ་མགྲོན་དཔལ་ལྡན་སྲིད་སྐྱོང་མཆོག་དང་།  ཆེ་བསྟོད་སྐུ་མགྲོན་ཧི་མ་ཅལ་མངའ་སྡེའི་གྲོས་ཚོགས་ཀྱི་སྤྱི་ཁྱབ་དྲུང་ཆེ་སྐུ་ཞབས་ཀི་ཤོ་རི་ ལལ་མཆོག་ནས་མཛད་སྒོ་དང་འབྲེལ་བའི་གསུང་བཤད་གནང་ཡོད་པ་བཅས།