རྒྱལ་སྤྱིའི་བུད་མེད་ཚོར་དྲག་སྤྱོད་སྤོང་བའི་ཉིན་མོའི་ཐོག་དཔལ་ལྡན་ཚོགས་གཞོན་མཆོག་གིས་གསུང་བཤད་གནང་བ།

༄༅། ། ཕྱི་ལོ་ ༢༠༢༡ ཟླ་ ༡༡ ཚེས་ ༢༥ ཉིན་རྒྱལ་སྤྱིའི་བུད་མེད་ཚོར་དྲག་སྤྱོད་སྤོང་བའི་ཉིན་མོ་ (International Day for the Elimination of Violence against Women) དང་སྟབས་བསྟུན། དཔལ་འབྱོར་ལས་ཁུངས་ཀྱི་བུད་མེད་ནུས་སྟོབས་གོང་སྤེལ་ཚན་པས་གངས་སྐྱིད་སྲིད་སྐྱོང་ཚོགས་ཁང་དུ་བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་རྣམས་ལ་གསུང་བཤད་དང་དྲི་བ་དྲིས་ལན་གྱི་ལས་རིམ་ཞིག་གོ་སྒྲིག་ཞུས་པའི་ཐོག་དཔལ་ལྡན་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་གདན་ཞུས་ལྟར་ཆེད་ཕེབས་ཀྱིས་གསུང་བཤད་གནང་སོང་།

སྐབས་དེར་དཔལ་ལྡན་ཚོགས་གཞོན་མཆོག་གིས་ཚོགས་བཅར་བ་ཡོངས་ལ་འཚམས་འདྲི་དང་སྦྲགས། གསུང་དོན། རྒྱ་གར་འཚེ་མེད་ཞི་བ་དང་སྤྱི་ཚོགས་ལས་འགུལ་བ་སྐུ་ཞབས་དམ་པ་ཨཅཱརྱ་ཝེ་ནོ་བ་ བྷ་ཝེ་ (Acharya Vinoba Bhave) མཆོག་གིས་ལྗགས་རྩོམ་གནང་བའི་དཔེ་དེབ་ཅིག་གི་ནང་། སྡིག་པ་དང་ན་ཚ་གཉིས་ཇི་ཙམ་སྦད་པ་ཡིན་ན། དེ་ཙམ་གྱིས་དེ་སྡུག་ཏུ་འགྲོ་གི་རེད་ཅེས་གསུངས་འདུག སྤྱིར་བུད་མེད་ལ་རྩུབ་སྤྱོད་བྱས་པ་དེ་སྡིག་པ་ཞིག་རེད་ལ། སྤྱི་ཚོགས་ཀྱི་ན་ཚ་ཞིག་ཀྱང་ཆགས་བསྡད་ཀྱི་ཡོད་རེད། དེ་འདྲའི་ཐོག་ནས་སོ་སོ་རང་ཉིད་ལ་དེ་འདྲའི་རྩུབ་སྤྱོད་མྱངས་ཡོད་ན། དེ་བཤད་དགོས་པ་གལ་ཆེན་པོ་ཞེ་དྲག་ཆགས་ཀྱི་ཡོད་པ་མ་ཟད། རང་ཉིད་ལ་དེ་འདྲའི་རྩུབ་སྤྱོད་བྱུང་མེད་ནའང་། དེའི་ཉེ་འཁོར་ལ་བྱུང་བསྡད་པ་དེ་ཚོ་བཤད་ཐུབ་པའི་གདེང་ཚོད་དང་། བློ་ཁོག་མེད་པ་ཚོའི་ཚབ་བྱེད་དགོས་པའང་གལ་ཆེན་པོ་ཆགས་ཀྱི་ཡོད། དེ་བྱས་པ་ཡིན་ན་སྤྱི་ཚོགས་ནང་གོ་རྟོགས་འཕེལ་གྱི་རེད་ལ། སྤྱི་ཚོགས་ནང་དེ་དང་འབྲེལ་བའི་གནད་དོན་ཡོང་བའི་སྐབས་ལ་སྔོན་འགོག་བྱེད་ཐུབ་རྒྱུར་ཐུགས་ཕན་གསོས་ཀྱི་རེད། སྤྱིར་བཏང་ལུས་ལ་རྩུབ་སྤྱོད་དང་། ངག་གི་རྩུབ་སྤྱོད། བསམ་བློའི་རྩུབ་སྤྱོད་བཅས་ཀྱི་ཐོག་ལ་གོང་ནས་བཀའ་མོལ་མང་པོ་ཞིག་གནང་སོང་། གཞན་རྩུབ་སྤྱོད་གཅིག་གང་རེད་ཅེས་ཞུས་ན། ཕྲུ་གུ་ན་ཆུང་ཞིག་ལ་ཁྱིམ་ཚང་ཞིག་གི་བརྩེ་བ་དང་འཚར་ལོངས་ཀྱི་མཐུན་རྐྱེན་མ་རག་པ་ཡིན་ན། དེའང་རྩུབ་སྤྱོད་ཅིག་ཆགས་བསྡད་ཀྱི་ཡོད་རེད། ཁོང་ཚོའི་ཐོག་ལ་སུས་འགན་བཞེས་ཀྱི་རེད་དམ། ཁོང་ཚོར་ཕ་མ་མེད་པར་མ་ཟད། བརྩེ་བ་ནི་དེ་བས་ཀྱང་རག་གི་ཡོད་མ་རེད། སྤྱི་ཚོགས་ནང་ལ་ཆེ་མཐོང་དང་ངོས་འཛིན་ཙམ་ཡང་མེད་པའི་ན་གཞོན་ལྷག་བསྡད་པ་དེ་ཚོར་ང་ཚོས་ཇི་ལྟར་བདག་པོ་བརྒྱབ་དགོས་ཀྱི་རེད་ཅེས་པའི་དྲི་བ་དེ་གལ་ཆེན་པོ་ཞིག་ཆགས་ཀྱི་ཡོད་རེད། ཕ་མ་དང་གཉེན་ཚན་སོགས་གང་ཡང་མེད་པ་སྤྱི་ཚོགས་ནང་མཐའ་ལ་ལྷུངས་བསྡད་པའི་དགོས་ངེས་ཅན་དེ་ཚོར་ང་ཚོས་བདག་པོ་བརྒྱབ་དགོས་པ་ཧ་ཅང་གི་གལ་ཆེན་པོ་རེད་བསམ་གྱི་འདུག་དེ་གཅིག་ཞུ་རྒྱུ་ཡིན།

རྩ་བའི་མི་ཟེར་མཁན་དེ་ཉོན་མོངས་དུག་གསུམ་ལས་གྲུབ་པ་ཞིག་ཡིན་དུས། རྩུབ་སྤྱོད་དེ་འཛམ་གླིང་ནང་ནས་གཅིག་ཀྱང་མེད་པ་ཞིག་བཟོ་ཐུབ་རྒྱུ་ཁག་པོ་ཞེ་དྲག་རེད་དེ། གང་ཉུང་ཉུང་བཟོ་རྒྱུར་ཐབས་ཤེས་བྱེད་དགོས་པ་ཧ་ཅང་གི་གལ་ཆེན་པོ་རེད་བསམ་གྱི་འདུག་ཅེས་གསུངས་པ་དང་། དེ་བཞིན་སྐུ་ངོ་མཆོག་སྔོན་མ་དགེ་རྒན་གྱི་ཕྱག་ལས་གནང་བའི་སྐབས། སློབ་གྲྭའི་ནང་རྩུབ་སྤྱོད་ཇི་ལྟར་བྱུང་གི་ཡོད་པའི་སྐོར་འགྲེལ་བརྗོད་དང་། ཕ་མ་ཚོས་སོ་སོའི་ཕྲུ་གུའི་འཚར་ལོངས་ལ་རྒྱུན་ཏུ་ནས་དོ་སྣང་བྱེད་དགོས་པ་མ་ཟད། ཕྲུ་གུའི་འཚར་ལོངས་ཡག་པོ་ཡོང་བར་ཕ་མ་ནང་ཁུལ་འཆམ་མཐུན་དགོས་པ། ཕྲུ་གུས་ཕ་མར་དྲི་བ་གང་བཏང་ནའང་དེར་ངོས་བཞེས་གནང་སྟེ། ཕྲུ་གུ་དང་ཕ་མའི་དབར་ཡིད་ཆེས་སླེབས་ཐུབ་པ་བཟོ་དགོས་གནད། ཕྲུ་གུའི་སྡུག་བསྔལ་བཤད་ས་དེ་ནང་ཁྱིམ་ཚང་ལ་ཁ་ཕྱོགས་བསྒྱུར་ཐབས་བཟོ་དགོས་ཞེས་དང་། ལྷག་པར་དུ་བོད་མི་རིགས་ཆགས་འཇིག་ལ་གནས་པའི་སྐབས་འདིར། ཕྲུ་གུ་གསོ་སྐྱོང་ཡག་པོ་གནང་རྒྱུ་ནི་མི་རིགས་ཀྱི་འཐབ་རྩོད་ཀྱི་ལས་འགན་ཞིག་ཡིན་བསམས་ནས། ལས་བྱེད་རྣམ་པས་སོ་སོའི་ཁྱིམ་ཚང་ཙམ་མ་ཡིན་པར། ཉེ་འཁོར་ལ་ཡོད་པའི་མ་ཤེས་པ་ཚོར་བསླབས་ནས་སྤྱི་ཚོགས་ནང་འགྱུར་བ་གཏོང་རྒྱུའི་འགན་ཁུར་དགོས་ཞེས་དང་།

གཞན་ཡང་དཔལ་ལྡན་ཚོགས་གཞོན་མཆོག་གིས་འགོ་འཁྲིད་ཟེར་ན་དམིགས་ཚད་ཡོད་པ་ཞིག་དང་། དམིགས་ཚད་ཡོད་པ་གཞིར་བཟུང་འཆར་གཞི་བསྒྲིག་ཐུབ་མཁན། འཆར་གཞི་བསྒྲིགས་པ་ནང་བཞིན་མཉམ་འཁྲིད་ཐུབ་མཁན་ཞིག་དགོས་པ་དང་། ཁྱིམ་ཚང་ཞིག་གི་ནང་ཕ་མ་དེ་འགོ་འཁྲིད་ལྟ་བུ་ཆགས་ཀྱི་ཡོད་དུས། སོ་སོའི་ཕྲུ་གུའི་འཚར་ལོངས་དང་། སེམས་ཁམས་ལ་རྒྱུན་ཏུ་ནས་དོ་སྣང་བྱེད་དགོས་པ། བཙན་བྱོལ་བོད་མིའི་གཞི་རིམ་གྱི་ཤེས་ཡོན་སྲིད་བྱུས་ནང་ཕྲུ་གུའི་འཚར་ལོངས་ལ་ཕ་མ་གལ་ཆེན་པོ་ཡིན་པ་གསལ་ཡོད་པ་ལྟར་ཚང་མས་དེའི་ཐོག་དོ་སྣང་གནང་དགོས་པ་སོགས་གསུངས་གནང་སོང་།

གཞན་ཡང་ལས་རིམ་ཐོག་ (Martha Farrell Foundation) ཚོགས་པའི་འགན་འཛིན་ལྕམ་སྐུ་ (Ms. Nandita Bhatt) ལགས་དང་། བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་འགྲོ་བ་མིའི་ཐོབ་ཐང་ཚན་པའི་འགན་འཛིན་འབྲུག་བསྟན་སྐྱིད་ལགས། གྲོགས་མོ་ཚོགས་པའི་འགན་འཛིན་སྐལ་བཟང་ལགས་བཅས་ནས་གསུང་བཤད་གནང་ཡོད་པ་བཅས། །

 

Menu