༄༅། །ཕྱི་ལོ་ ༢༠༡༤ ཟླ་ ༡༢ ཚེས་ ༡༦ ཉིན་ཏེ་དགའ་ལྡན་ལྔ་མཆོད་ཀྱི་སྐབས་བོད་རྒྱལ་གཅེས་དཔའ་བོ་སངས་རྒྱས་མཁར་ལགས་ཀྱིས་ཉིན་དེའི་སྔ་དྲོའི་ཆུ་ཚོད་ ༩ པ་ཙམ་ལ་མདོ་སྨད་བླ་བྲང་ཨ་མཆོག་ཡུལ་ཚོའི་རྒྱ་གཞུང་ཉེན་རྟོག་ཁང་གི་སྒོ་ཁར་བོད་བསྟན་པ་ཆབ་སྲིད་ཀྱི་ཆེད་དུ་རང་ལུས་མེར་བསྲེགས་ཀྱིས་རྒྱ་གཞུང་གི་ནོར་འཁྲུལ་དང་གདུག་རྩུབ་ཅན་གྱི་སྲིད་བྱུས་ལ་ངོ་རྒོལ་བྱས་ཏེ་འདས་གྲོངས་སུ་གྱུར་པའི་གནས་ཚུལ་ཐོན་འདུག།
ཕ་དབང་ལོ་དང་མ་གཡུ་སྒྲོན་གཉིས་ཀྱི་བུ་རྒྱལ་གཅེས་དཔའ་བོ་སངས་རྒྱས་མཁར་ལགས་ནི། དེང་སྐབས་རྒྱ་གཞུང་གིས་བཅད་བཟུང་ས་བགོས་ལྟར་གྱི་ཀན་སུའུ་ཞིང་ཆེན་ཀན་ལྷོ་བོད་རིགས་རང་སྐྱོང་ཁུལ། གསང་ཆུ་རྫོང་ཨ་མཆོག་ཁྱུང་རུ་ཐང་ཡུལ་ཚོ་ནས་ཡིན་ཞིང་། ཁོང་རང་ལོ་ ༣༤ ཡིན་ལ་ཕྲུ་གུ་བུ་མོ་གཉིས་ཡོད་འདུག། རྒྱལ་གཅེས་དཔའ་བོ་སངས་རྒྱས་མཁར་ལགས་ཀྱིས་རང་ལུས་མེར་བསྲེགས་ཀྱི་ཞི་རྒོལ་བྱུང་རྗེས་ས་གནས་དེའི་ཉེན་རྟོག་པ་ཟེར་བ་མང་པོ་འཕྲལ་མར་འབྱོར་ཏེ་དམ་བསྒྲགས་ཤུགས་ཆེན་བྱེད་འགོ་བཙུགས་པ་མ་ཟད། སངས་རྒྱས་མཁར་ལགས་ཀྱི་སྐུ་ཕུང་བཙན་འཕྲོག་བྱས་ཡོད་འདུག། ཡུལ་དངོས་ཀྱི་མང་ཚོགས་རྣམས་ཀྱིས་ཁོང་གི་སྐུ་ཕུང་གསང་ཆུ་རྫོང་དུ་ཁྱེར་ཡོད་པའི་ཚོད་དཔག་བྱེད་པ་ཙམ་ལས་རྗེས་ཀྱི་གནས་སྟངས་ཞིབ་ཕྲ་ཁ་གསལ་བྱུང་མེད།
རྒྱལ་གཅེས་དཔའ་བོ་སངས་རྒྱས་མཁར་ལགས་ཀྱིས་རང་ལུས་མེར་བསྲེགས་གནང་བ་འདི་ནི། ཕྱི་ལོ་ ༢༠༠༩།༢།༢༧ ནས་ ༢༠༡༤།༡༢།༡༦ བར་རང་ལུས་མེར་བསྲེགས་གནང་མཁན་གྱི་གནས་ཚུལ་ཤེས་རྟོགས་གསལ་ཁ་བྱུང་བའི་གྲངས་ ༡༣༣ པ་དེ་ཆགས་ཡོད། དེའི་ནང་འདས་གྲོངས་སུ་ཕྱིན་པའི་གྲངས་ ༡༡༤ དང་། ལྷག་མའི་མི་གྲངས་ ༡༩ ཡི་ནང་ཁག་ཅིག་གི་འདས་གསོན་གནས་སྟངས་གསལ་ཁ་ཡོང་ཐུབ་ཀྱི་མེད།
ད་ལྟའི་བར་དུ་རྒྱ་གཞུང་གིས་བོད་ཡུལ་སྟོད་སྨད་བར་གསུམ་གྱི་ཞིང་འབྲོག་དང་། དགོན་སྡེ། སློབ་གྲྭ་བཅས་ཀྱི་བོད་མི་རྒན་དར་གཞོན་གསུམ་གྱིས་ཞི་བའི་སྐད་འབོད་བྱེད་པ་དང་། དམིགས་བསལ་རང་ལུས་མེ་བསྲེག་གནང་མཁན་རྣམས་ལ་དམའ་འབེབས་དང་སྡིགས་ར་སྐུལ་བ། ཁོ་ཚོ་ནི་རིག་འཚོ་མ་ཟིན་པ་དང་། བཟའ་ཚང་མ་འཆམ་པ། གཞན་གྱིས་བརྒྱུད་སྐུལ་དང་བཙན་སྐུལ་བྱས་པ་རེད་ཟེར་བ་སོགས་ཁུངས་ལུང་མེད་པ་དང་གནས་ལུགས་ལ་རྒྱབ་འགལ་དུ་འགྲོ་བའི་རྒྱག་གཏམ་འབའ་ཞིག་གིས་བསྙོན་དཀྲི་བཙན་འགེལ་བྱེད་པ་དང་། ད་དུང་ཁོང་ཅག་རྣམས་ཀྱི་ནང་མི། གཉེན་ཉེ་དུ། སྤུན་མཛའ་གྲོགས་སོགས། འབྲེལ་ཡོད་སྡེ་ཚོ་རེ་རེ་ལའང་དོན་མེད་ཁག་དཀྲི་སྣ་ཚོགས་བྱེད་པ་དང་། ཁྱིམ་ཚང་སྡེ་ཚོ་སོགས་ཀྱི་འཚོ་བའི་ཡོང་ཁུངས་བཙན་གྱིས་བཅད་དེ་བོད་རིགས་ཡུལ་མི་རྣམས་ལ་བཀྲེས་སྐོམ་མྱོང་དུ་བཅུག་ནས་སྤྲང་འཁྱམས་དབུལ་ཕོངས་ཀྱི་གནས་སུ་གྱར་དུ་བཅུག་ན། མང་ཚོགས་རང་བཞིན་གྱིས་རང་ལུས་མེ་བསྲེག་ལ་ཚོད་འཛིན་བྱ་ཐུབ་པའི་འདོད་རྔམ་བཅང་སྟེ། རང་ལུས་མེ་བསྲེག་ལ་ཚོད་འཛིན་དང་ཁ་སྒྱུར་བྱེད་འདོད་པ་ཙམ་ལས། ཁོང་རྣམས་ཀྱིས་གཞན་ལ་འཚེ་བ་མེད་པའི་ཐོག་ནས་རང་ཉིད་ཀྱི་ལུས་སྲོག་ལོངས་སྤྱོད་དང་བཅས་པ་བློས་གཏོང་གནང་དགོས་པའི་འཕྲལ་ཕུགས་ཀྱི་རྒྱུ་རྐྱེན་ངོ་མ་སྟེ། ཁོང་ཚོའི་མངོན་འདོད་དང་རེ་བ་ཇི་ཡིན་ལ་རྟོག་ཞིབ་ཀྱིས་གནད་དོན་དངོས་ཐག་གཅོད་ཀྱི་འགན་ཁུར་གང་ཡང་མེད་པའི་ཁར། རྒྱལ་ཁབ་ཁ་བྲལ་ཟེར་བའི་ཉེས་མིང་ཞིག་བཀལ་བ་ཙམ་གྱིས་རྒྱལ་སྤྱིའི་འགྲོ་བ་མིའི་ཐོབ་ཐང་དང་། མང་གཙོ། རང་དབང༌། དྲང་བདེན་བཅས་པ་རྒྱང་དུ་དོར་ཆོག་ཆོག་དང་། ཞི་བདེ་དང་དྲང་བདེན་མང་གཙོ་བཅས་ལ་དགའ་བའི་རྒྱལ་ཁབ་ཁག་གི་གཞུང་དང་། གྲོས་ཚོགས། རྒྱལ་སྤྱིའི་གནད་ཡོད་དབུ་འཁྲིད་རྣམ་པ། གཞུང་སྒེར་ཚོགས་སྡེ་སོགས་ཀྱིས་བོད་མིའི་དཀའ་ངལ་སེལ་ཐབས་སུ་གྲོས་ཆོད་རིམ་འཇོག་དང་འབོད་སྐུལ་ཇི་གནང་བཅས་ཚང་མར་བརྩི་མེད་ཀྱིས་རྒྱ་གཞུང་གིས་རང་འདོད་ཁོ་ན་ལག་བསྟར་བྱས་དང་བྱེད་བཞིན་པའི་མཇུག་འབྲས་མཐའ་དག་རྒྱ་ནག་གཞུང་ཕྱོགས་ཀྱི་སྐབས་འབྲེལ་འགོ་ཁྲིད་རྣམས་ཀྱིས་འགན་ཆ་ཚང་འཁུར་དགོས་པ་བཅས།
བོད་མི་མང་སྤྱི་འཐུས་ལྷན་ཚོགས་ཀྱིས་ཕྱི་ལོ་༢༠༡༤ ཟླ ༡༢ ཚེས་ ༡༨ ལ།