རྒྱལ་གཅེས་དཔའ་བོ་གྲྭ་སྐལ་བཟང་ཡེ་ཤེས་ལགས་ཀྱིས་རྒྱ་གཞུང་གི་ནོར་འཁྲུལ་དང་གདུག་རྩུབ་ཅན་གྱི་སྲིད་བྱུས་ལ་ངོ་རྒོལ་གྱིས་རང་ལུས་མེར་བསྲེགས་གནང་བར་བོད་མི་མང་སྤྱི་འཐུས་ལྷན་ཚོགས་ཀྱི་གསར་འགོད་བསྒྲགས་གཏམ།

image༄༅། །ཕྱི་ལོ་ ༢༠༡༤ ཟླ་ ༡༢ ཚེས་ ༢༣ ཉིན་བོད་ནང་གི་སྔ་དྲོའི་ཆུ་ཚོད་ ༡༡།༢༠ ཙམ་ལ་ཁམས་དཀར་མཛེས་རྟའུ་ཉ་མཚོ་དགོན་པའི་གྲྭ་སྐལ་བཟང་ཡེ་ཤེས་ལགས་ཀྱིས་ རྟའུ་ཉ་མཚོ་དགོན་པའི་རྒྱ་གཞུང་གི་ལྟ་སྲུང་ཉེན་རྟོག་ལས་ཁུངས་སྒོ་འགྲམ་དུ་རྒྱ་གཞུང་གི་བཙན་གནོན་དང་གདུག་རྩུབ་ཅན་གྱི་སྲིད་བྱུས་ལ་ཞི་བའི་ངོ་རྒོལ་གནང་སྟེ་“༧རྒྱལ་དབང་བསྟན་འཛིན་རྒྱ་མཚོ་བོད་ནང་གདན་འདྲེན་ཞུ་དགོས། བོད་མི་རིགས་ལ་རང་དབང་སྤྲོད་དགོས།” ཞེས་པའི་འབོད་ཚིག་སྒྲོག་བཞིན་རང་ལུས་མེར་བསྲེགས་གནང་ནས་སྐུ་གྲོངས་ཡོད་པའི་གནས་ཚུལ་ཐོན་འདུག་པ་དང་། ཁོང་གི་སྐུ་ཕུང་རྒྱ་གཞུང་ཉེན་རྟོག་པས་རྟའུ་རྫོང་ཉེན་རྟོག་ལས་ཁུངས་སུ་བཙན་འཁྱེར་བྱས་པས། ས་གནས་མང་ཚོགས་ཕོན་ཆེན་པོ་འདུ་འཛོམས་བྱས་ཏེ། སྐལ་བཟང་ཡེ་ཤེས་ལགས་ཀྱི་སྐུ་ཕུང་ཕྱིར་མང་ཚོགས་ལ་སྤྲོད་དགོས་པ་དང་། ཁོང་སྐུ་གྲོངས་ཟིན་ཡོད་སྟབས་བོད་ལུགས་དགོན་པའི་འགྲོ་སྟངས་ལྟར་འདས་པོར་ཆོས་ཀྱི་བྱེད་སྒོ་སྤེལ་རྒྱུ་ཡིན་ཚུལ་བརྗོད་ཡོད་འདུག་པ་དང་། དེའི་རྗེས་ཀྱི་ཞིབ་ཕྲའི་གནས་ཚུལ་ཁ་གསལ་ལག་སོན་མ་བྱུང་།

རྒྱལ་གཅེས་དཔའ་བོ་གྲྭ་སྐལ་བཟང་ཡེ་ཤེས་ལགས་ནི་དེང་སྐབས་རྒྱ་གཞུང་གིས་བཅད་བཟུང་ས་བགོས་ལྟར་གྱི་སི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ཁུལ། རྟའུ་རྫོང་ཐེ་ཝ་ཡུལ་ཚོའི་གྲོང་ཚོ་ནས་ཡིན་ཞིང་། ཁོང་ད་ལྟ་རང་ལོ་ ༣༧ ཡིན། ཁོང་གི་ཕའི་མིང་ལ་བྱམས་པ་དང་མ་མིང་ལ་རྡོ་རྗེ་ཞུ་བཞིན་ཡོད་འདུག གྲྭ་སྐལ་བཟང་ཡེ་ཤེས་ལགས་སྔོན་ཆད་རྒྱ་གར་ལྷོ་ཕྱོགས་དགའ་ལྡན་བྱང་རྩེ་གྲྭ་ཚང་དུ་སློབ་གཉེར་གནང་མྱོང་ཡོད་པ་དང་། ཕྱིས་སུ་ཕྱིར་ཕ་ཡུལ་དུ་ལོག་ནས་དགོན་པའི་གྲྭ་བ་ཆུང་ཆུང་ཚོ་དང་། ཉམ་ཐག་བྱིས་པ། ལོ་ལོན་རྒན་རྒོན་བཅས་ལ་བོད་ཡིག་སློབ་ཁྲིད་བྱེད་པ་སོགས་རིག་གནས་འཆད་སྤེལ་གྱི་ཕྱག་ལས་གནང་མཁན་ཞིག་ཡིན་འདུག་པས། ས་གནས་མང་ཚོགས་རྣམས་ཀྱིས་བརྩི་བཀུར་བྱེད་སའི་དགེ་འདུན་པ་ཞིག་རེད་འདུག

རྒྱལ་གཅེས་དཔའ་བོ་གྲྭ་སྐལ་བཟང་ཡེ་ཤེས་ལགས་ཀྱིས་རང་ལུས་མེར་བསྲེགས་གནང་བ་འདི་ནི། ཕྱི་ལོ་ ༢༠༠༩། ༢། ༢༧ ནས་ ༢༠༡༤། ༡༢། ༢༣ བར་རང་ལུས་མེར་བསྲེགས་གནང་མཁན་གྱི་གནས་ཚུལ་ཤེས་རྟོགས་གསལ་ཁ་བྱུང་བའི་གྲངས་ ༡༣༥ པ་དེ་ཆགས་ཡོད། དེའི་ནང་འདས་གྲོངས་སུ་ཕྱིན་པའི་གྲངས་ ༡༡༦ དང་། ལྷག་མའི་མི་གྲངས་ ༡༩ ཡི་འདས་གསོན་གནས་སྟངས་གསལ་ཁ་ཡོང་ཐུབ་ཀྱི་མེད།

ད་ལྟའི་བར་དུ་རྒྱ་གཞུང་གིས་བོད་ཡུལ་སྟོད་སྨད་བར་གསུམ་གྱི་ཞིང་འབྲོག་དང་། དགོན་སྡེ། སློབ་གྲྭ་བཅས་ཀྱི་བོད་མི་རྒན་དར་གཞོན་གསུམ་གྱིས་ཞི་བའི་སྐད་འབོད་བྱེད་པ་དང་། ལྷག་པར་དུ་རང་ལུས་མེར་བསྲེགས་གནང་མཁན་རྣམས་ལ་དམའ་འབེབས་དང་སྡིགས་ར་སྐུལ་བ། ཁོ་ཚོ་ནི་རིག་འཚོ་མ་ཟིན་པ་དང་། བཟའ་ཚང་མ་འཆམ་པ། གཞན་གྱིས་བརྒྱུད་སྐུལ་དང་བཙན་སྐུལ་kalsang yeshe(1)བྱས་པ་རེད་ཟེར་བ་སོགས་ཁུངས་ལུང་མེད་པ་དང་གནས་ལུགས་ལ་རྒྱབ་འགལ་དུ་འགྲོ་བའི་རྒྱག་གཏམ་འབའ་ཞིག་གིས་བསྙོན་དཀྲི་བཙན་འགེལ་བྱེད་པ་དང་། ད་དུང་ཁོང་ཅག་རྣམས་ཀྱི་ནང་མི། གཉེན་ཉེ་དུ། སྤུན་མཛའ་གྲོགས་སོགས། འབྲེལ་ཡོད་སྡེ་ཚོ་རེ་རེ་ལའང་དོན་མེད་ཁག་དཀྲི་སྣ་ཚོགས་བྱེད་པ་དང་། ཁྱིམ་ཚང་སྡེ་ཚོ་སོགས་ཀྱི་འཚོ་བའི་ཡོང་ཁུངས་བཙན་གྱིས་བཅད་དེ་བོད་རིགས་ཡུལ་མི་རྣམས་ལ་བཀྲེས་སྐོམ་མྱོང་དུ་བཅུག་ནས་སྤྲང་འཁྱམས་དབུལ་ཕོངས་ཀྱི་གནས་སུ་གྱར་དུ་བཅུག་ན། མང་ཚོགས་རང་བཞིན་གྱི༌ས་རང་ལུས་མེ་སྲེག་ལ་ཚོད་འཛིན་བྱ་ཐུབ་པའི་འདོད་རྔམ་བཅངས་ཏེ། རང་ལུས་མེ་སྲེག་ལ་ཚོད་འཛིན་དང་ཁ་སྒྱུར་བྱེད་འདོད་པ་ཙམ་ལས། ཁོང་རྣམས་ཀྱིས་གཞན་ལ་འཚེ་བ་མེད་པའི་ཐོག་ནས་རང་ཉིད་ཀྱི་ལུས་སྲོག་ལོངས་སྤྱོད་དང་བཅས་པ་བློས་གཏོང་གནང་དགོས་པའི་འཕྲལ་ཕུགས་ཀྱི་རྒྱུ་རྐྱེན་ངོ་མ་སྟེ། ཁོང་ཚོའི་མངོན་འདོད་དང་རེ་བ་ཇི་ཡིན་ལ་རྟོག་ཞིབ་ཀྱིས་གནད་དོན་དངོས་ཐག་གཅོད་ཀྱི་འགན་ཁུར་གང་ཡང་མེད་པའི་ཁར། “ རྒྱལ་ཁབ་ཁ་བྲལ ” ཟེར་བའི་ཉེས་མིང་ཞིག་བཀལ་བ་ཙམ་གྱིས་རྒྱལ་སྤྱིའི་འགྲོ་བ་མིའི་ཐོབ་ཐང་དང་། མང་གཙོ། རང་དབང༌། དྲང་བདེན་བཅས་པ་རྒྱང་དུ་དོར་ཆོག་ཆོག་དང་། ཞི་བདེ་དང་དྲང་བདེན་མང་གཙོ་བཅས་ལ་དགའ་བའི་རྒྱལ་ཁབ་ཁག་གི་གཞུང་དང་། གྲོས་ཚོགས། རྒྱལ་སྤྱིའི་གནད་ཡོད་དབུ་འཁྲིད་རྣམ་པ། གཞུང་སྒེར་ཚོགས་སྡེ་སོགས་ཀྱིས་བོད་མིའི་དཀའ་ངལ་སེལ་ཐབས་སུ་གྲོས་ཆོད་རིམ་འཇོག་དང་འབོད་སྐུལ་ཇི་གནང་བཅས་ཚང་མར་བརྩི་མེད་ཀྱིས་རྒྱ་གཞུང་གིས་རང་འདོད་ཁོ་ན་ལག་བསྟར་བྱས་དང་བྱེད་བཞིན་པའི་མཇུག་འབྲས་མཐའ་དག་རྒྱ་ནག་གཞུང་ཕྱོགས་ཀྱི་སྐབས་འབྲེལ་འགོ་ཁྲིད་རྣམས་ཀྱིས་འགན་ཆ་ཚང་འཁུར་དགོས་པ་བཅས།

བོད་མི་མང་སྤྱི་འཐུས་ལྷན་ཚོགས་ཀྱིས་ཕྱི་ལོ་༢༠༡༤ ཟླ ༡༢ ཚེས་ ༢༤ ལ།

Menu