༄༅། །ཕྱི་ལོ་ ༢༠༢༣ ཟླ་ ༩ པའི་ཚེས་ ༢༣ ཉིན་གྱི་ཕྱི་དྲོ་རྒྱ་གར་རྒྱལ་ཡོངས་སྤྱི་ཚོགས་ཞབས་ཞུ་ཚོགས་པ་ (Rashtriya Swayamsewak Sangh) ཡི་བྱང་ཕྱོགས་ས་ཁུལ་གྱི་ཚོགས་མི་ཁག་ཅིག་ལས་གྲུབ་པའི་སྐུ་ཚབ་ཚོགས་ཆུང་ཞིག་བོད་མི་མང་སྤྱི་འཐུས་ལྷན་ཁང་དུ་གཟིགས་སྐོར་ཕེབས་སྐབས། དཔལ་ལྡན་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་གིས་སྣེ་ལེན་མཇལ་འཕྲད་གནང་སོང་།

མཇལ་འཕྲད་སྐབས་དཔལ་ལྡན་ཚོགས་གཞོན་མཆོག་གིས་ཐོག་མར་ཁོང་རྣམས་གྲོས་ཚོགས་སུ་ཕེབས་པར་འཚམས་འདྲི་དང་སྦྲགས། བོད་ནང་གི་ད་ལྟའི་ཛ་དྲག་གནས་སྟངས་སྐོར་དང་། བཙན་བྱོལ་ནང་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་ཐོག་མར་ཇི་ལྟར་མང་གཙོ་གསོལ་སྩལ་གནང་བ་དང་། རིམ་པས་མགོན་པོ་གང་ཉིད་ཀྱི་ལམ་སྟོན་འོག མང་གཙོའི་འཕེལ་རིམ་ཐོག་སྐབས་དུས་སོ་སོར་བསྒྱུར་བ་ཇི་བྱུང་བཅས་ཀྱི་སྐོར་ངོ་སྤྲོད་དང་། དེ་བཞིན་བོད་མི་མང་སྤྱི་འཐུས་ལྷན་ཚོགས་ཀྱི་གྲུབ་ཆ་དང་ལས་དོན་གནང་ཕྱོགས། གྲོས་ཚོགས་ཚོགས་དུས་གཉིས་ཀྱི་སྐོར། བོད་ཀྱི་གནད་དོན་དེ་བཞིན་རྒྱ་གར་རྒྱལ་ཁབ་ཀྱི་བདེ་འཇགས་ལ་གལ་གནད་ཆེན་པོ་ཡིན་པ། བོད་མིའི་སྒྲིག་འཛུགས་ཀྱི་བསྒྲུབ་བྱའི་དམིགས་ཡུལ་སོགས་ཀྱི་ཐོག་འགྲེལ་བརྗོད་སྙིང་བསྡུས་གནང་རྗེས། བོད་དོན་ཐོག་རྒྱ་གར་གཞུང་མང་གཉིས་ནས་ད་བར་མཐུན་འགྱུར་རྒྱབ་སྐྱོར་ཤུགས་ཆེ་གནང་བར་ཐུགས་རྗེ་ཆེ་ཞུས་པ་དང་། ཆབས་ཅིག་ཁོང་རྣམས་བརྒྱུད་བོད་ཀྱི་གནད་དོན་སོ་སོའི་ཁྱབ་ཁོངས་ས་གནས་སུ་སྔར་ལྷག་ཁྱབ་སྤེལ་གནང་རྒྱུར་འབོད་སྐུལ་ཞུས་གནང་སོང་།

གཞན་ཡང་སྐུ་མགྲོན་རྣམ་པས་བོད་མིའི་སྒྲིག་འཛུགས་ཀྱི་ལས་དོན་གནང་ཕྱོགས་དང་། བཙན་བྱོལ་ནང་འོས་བསྡུ་གནང་ཕྱོགས། བཙན་བྱོལ་བོད་མིའི་སློབ་གྲྭའི་སྐོར་སོགས་ཀྱི་ཐོག་དོགས་འདྲི་ཕུལ་བར། དཔལ་ལྡན་ཚོགས་གཞོན་མཆོག་གིས་ལན་འདེབས་གསལ་བཤད་གནང་ཡོད་པ་བཅས། །