རྒྱ་གར་རང་བཙན་ཉིན་མོ་ཐེངས་ ༧༡ གི་དུས་ཆེན་སྲུང་བརྩིའི་མཛད་སྒོའི་ཐོག་དཔལ་ལྡན་ཚོགས་གཞོན་མཆོག་དང་སྤྱི་འཐུས་གེ་བ་ཚང་ངག་དབང་ཐར་པ་མཆོག་རྣམ་གཉིས་མཉམ་ཞུགས་གནང་བ།

༄༅། །ཕྱི་ལོ་ ༢༠༡༧ ཟླ་  ༨ ཚེས་ ༡༥ རེས་གཟའ་མིག་དམར་ཉིན་གྱི་སྔ་དྲོའི་ཕྱག་ཚོད་ ༡༠།༤༠ ཙམ་ལ་ཧི་མ་ཅཱལ་མངའ་སྡེའི་ཀངྒ་ར་རྫོང་ལས་ཁུངས་ཀྱི་གོ་སྒྲིག་འོག་རྡ་སའི་སྐོར་སྲུང་ཉེན་རྟོག་ཐང་ཆེན་དུ་རྒྱ་གར་རང་བཙན་ཉིན་མོ་ཐེངས་ ༧༡ གི་མཛད་སྒོ་གཟབ་རྒྱས་ངང་ཚོགས་གནང་ཡོད།

སྐབས་དེར་ཧི་མ་ཅཱལ་རྫོང་སྡེ་ལས་ཁུངས་ནས་དགའ་ལྡན་ཕོ་བྲང་བརྒྱུད་མགྲོན་ཤོག་གནང་འབྱོར་ལྟར་མཛད་སྒོའི་སྐུ་མགྲོན་དུ་དཔལ་ལྡན་ཚོགས་གཞོན་ཨཅཱརྱ་ཡེ་ཤེས་ཕུན་ཚོགས་མཆོག་དང་། སྤྱི་འཐུས་གེ་བ་ཚང་ངག་དབང་ཐར་པ་མཆོག་རྣམ་གཉིས་ཆེད་ཕེབས་གནང་བ་དང་། དེ་བཞིན་མཛད་སྒོའི་སྐུ་མགྲོན་གཙོ་བོར་རྒྱ་གར་ཧི་མ་ཅཱལ་མངའ་སྡེའི་སྡོད་ཁང་དང་གྲོང་ཁྱེར་ཡར་རྒྱས། གྲོང་ཁྱེར་དང་གྲོང་སྡེ་འཆར་འགོད་ཀྱི་བློན་ཆེན་སྐུ་ཞབས་སུ་དྷིར་ཤར་མ་ (Shri Sudhir Sharma) མཆོག་ཕེབས་གནང་ཡོད། དེ་ཡང་མཛད་སྒོའི་ཐོག་མར་སྐུ་མགྲོན་གཙོ་བོ་མཆོག་ནས་རྒྱ་གར་རྒྱལ་དར་མཁའ་དབྱིངས་སུ་སྒྲེང་འཛུགས་གནང་བ་དང་། དེ་རྗེས་མཛད་སྒོ་དང་འབྲེལ་བའི་གསུང་བཤད་གནང་གྲུབ་མཚམས་ས་གནས་མི་མང་ནས་རིག་གཞུང་འཁྲབ་སྟོན་གཟིགས་འབུལ་ཞུས་གནང་བ་བཅས་ཀྱི་གནས་ཚུལ་དུ།།

Menu