༄༅། ། བོད་མི་མང་སྤྱི་འཐུས་ལྷན་ཚོགས་ནས་གདན་ཞུས་ལྟར། ཕྱི་ལོ་ ༢༠༢༤ ཟླ་ ༥ པའི་ཚེས་ ༣༠ ཉིན་གྱི་སྔ་དྲོ་ཆུ་ཚོད་ ༩།༣༠ ཙམ་ལ་ རྒྱ་གར་གྲོས་ཚོགས་འོག་མའི་འཐུས་མི་དང་། རྒྱ་གར་དབུས་གཞུང་གི་ཕྱི་སྲིད་བློན་ཆེན་ཟུར་པ་སྐུ་ཞབས་ཤ་ཤི་ ཐ་རུར་ (Dr. Shashi Taroor) མཆོག་བོད་མི་མང་སྤྱི་འཐུས་ལྷན་ཁང་དུ་ཕེབས་གནང་སོང་།
སྐབས་དེར་དཔལ་ལྡན་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་གིས་གཙོས་སྤྱི་འཐུས་རྒྱུས་ལས་རྣམ་པ་དང་། མང་ཚོགས་རྩིས་ཁྲའི་ཚོགས་ཆུང་གི་ཚོགས་མི་སྤྱི་འཐུས་རྣམ་པ། ཚོགས་དྲུང་བསོད་ནམས་རྡོ་རྗེ་ལགས་ཀྱིས་གཙོས་ཚོགས་དྲུང་ལས་ཁུངས་ཀྱི་ལས་བྱེད་རྣམ་པས་སྣེ་ལེན་དང་། དེ་རྗེས་སྐུ་ཞབས་ཁོང་གྲོས་ཚོགས་ཀྱི་ཚོགས་ཁང་ནང་གཟིགས་སྐོར་སྣེ་ཁྲིད་དང་སྦྲགས། དཔལ་ལྡན་ཚོགས་གཞོན་མཆོག་གིས་བཙན་བྱོལ་བོད་མིའི་མང་གཙོའི་འཕེལ་རིམ་སྐོར་དང་། བོད་མི་མང་སྤྱི་འཐུས་ལྷན་ཚོགས་ཀྱི་ལས་དོན་གནང་ཕྱོགས་སྐོར་ངོ་སྤྲོད་སྙིང་བསྡུས་ཞུས་རྗེས། སྤྱི་འཐུས་རྒྱུན་ལས་ཚོགས་ཁང་ནང་དཔལ་ལྡན་ཚོགས་གཞོན་མཆོག་གིས་གཙོས་སྤྱི་འཐུས་རྣམ་པ་དང་། སྐུ་མགྲོན་རྣམ་པའི་དབར་མཇལ་མོལ་ལྷུགས་པོ་གནང་སོང་།
མཇལ་འཛོམས་སྐབས། དཔལ་ལྡན་ཚོགས་གཞོན་མཆོག་གིས། སྐུ་ཞབས་ཁོང་ནས་ད་བར་བོད་དོན་ཐོག་རྒྱབ་སྐྱོར་དང་། ལྷག་པར་དུ་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་རྒྱལ་ས་ལྡི་ལིར་བོད་དོན་ཞུ་སྐུལ་སླད་ཕེབས་སྐབས་སྐུ་ཞབས་ཁོང་དང་ལྷན་མཇལ་འཕྲད་གནང་རྒྱུའི་གོ་སྐབས་གནང་བ་སོགས་ལ་ཐུགས་རྗེ་ཆེ་ཞུས་པ་དང་ཆབས་ཅིག མ་འོངས་པར་མུ་མཐུད་དེ་ལྟར་རྒྱབ་སྐྱོར་གནང་སྐྱོང་ཡོང་བའི་རེ་སྐུལ་དང་། དེ་བཞིན་བོད་མི་མང་སྤྱི་འཐུས་ལྷན་ཚོགས་ཀྱི་རྒྱ་གར་མངའ་སྡེ་ཁག་ནང་བོད་དོན་ཞུ་སྐུལ་གྱི་ལས་རིམ་དང་འབྲེལ་ཏེ། བོད་ཀྱི་ཆབ་སྲིད་ཙམ་མ་ཡིན་པར། ས་བབ་དང་། ཁོར་ཡུག་སོགས་རྒྱལ་སྤྱི་དང་། རྒྱ་གར་སོགས་ལ་གལ་གནད་ཆེན་པོ་ཆགས་ཀྱི་ཡོད་པའི་སྐོར་སོགས་ཞུས་པ་མ་ཟད། དེ་སྔོན་སྐུ་ཞབས་ཁོང་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་ ༨ པའི་ཐོག་གདན་ཞུས་ལྟར་ཆེད་ཕེབས་གནང་བ་ལྟར། མ་འོངས་པའི་ཚོགས་ཆེན་ཐོག་ལའང་ཕེབས་གནང་ཡོང་བའི་རེ་སྐུལ་བཅས་ཞུས་གནང་སོང་།
རྒྱ་གར་གྲོས་ཚོགས་འོག་མའི་འཐུས་མི་སྐུ་ཞབས་ཤ་ཤི་ ཐ་རུར་ (Dr. Shashi Taroor) མཆོག་གིས་བོད་དང་། བོད་མིའི་གནད་དོན་ཐོག་རྒྱ་གར་སྲིད་དོན་ཚོགས་པ་ཚང་མས་གཅིག་མཚུངས་ཀྱི་རྒྱབ་སྐྱོར་ཡོད་སྐོར་དང་། སྔ་དྲོ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་མཇལ་ཁ་ཞུས་པའི་སྐོར། དེ་བཞིན་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་རྒྱ་གར་གཙོས་པའི་འཛམ་གླིང་ཁྱོན་ཡོངས་ནང་བྱམས་པ་དང་། སྙིང་རྗེའི་གལ་གནད་སྐོར་གོང་སྤེལ་ཤུགས་ཆེ་གནང་ཡོད་སྐོར་སོགས་གསུངས་གནང་རྗེས། སྤྱི་འཐུས་རྣམ་པ་དང་། སྐུ་ཞབས་ཁོང་གི་དབར་ཕན་ཚུན་བོད་དོན་ཐོག་བཀའ་བསྡུར་ལྷུགས་པོ་གནང་བ་དང་། མཐར་དཔལ་ལྡན་ཚོགས་གཞོན་མཆོག་གིས་སྐུ་ཞབས་ཁོང་ལ་སྐུ་ཐང་ཞིག་ཕྱག་རྟགས་སུ་ཕུལ་གནང་ཡོད་པ་བཅས།
