༄༅། ། དཔལ་མཉམ་མེད་རི་བོ་དགེ་ལྡན་པའི་བསྟན་པའི་སྲོལ་འཛིན་འཇམ་མགོན་རྒྱལ་བའི་རྒྱལ་ཚབ་༸སྐྱབས་རྗེ་དགའ་ལྡན་ཁྲི་ཟུར་རི་རྫོང་རིན་པོ་ཆེ་མཆོག་དགོངས་པ་གཞན་དོན་དུ་གཤེགས་པའི་ཡིད་སྐྱོའི་གནས་ཚུལ་ཐོན་པར། བོད་མི་མང་སྤྱི་འཐུས་ལྷན་ཚོགས་ནས་ཕྱི་ལོ་ ༢༠༢༢ ཟླ་ ༡༢ ཚེས་ ༡༣ ཉིན་རིན་པོ་ཆེ་མཆོག་གི་བླ་བྲང་དང་། འབྲེལ་ཡོད་གྲྭ་ཚང་བཅས་ལ་ཐུགས་གསོའི་འཕྲིན་ཡིག་ཕུལ་བའི་ནང་འཁོད་དོན། ཞྭ་སེར་བསྟན་པའི་མངའ་བདག་༸སྐྱབས་རྗེ་དགའ་ལྡན་ཁྲི་ཟུར་རི་རྫོང་རིན་པོ་ཆེ་མཆོག་དགོངས་པ་གཞན་དོན་དུ་གཤེགས་ཚུལ་བསྟན་པ་འདི་ནི་བསྟན་སྲིད་སྤྱི་དང་། ཡང་སྒོས་དགེ་ལྡན་པའི་བསྟན་པར་ཤིན་ཏུ་ཕངས་པའི་ཡིད་སྐྱོའི་གནས་ཚུལ་ལ་སོང་བོད་མི་མང་སྤྱི་འཐུས་ལྷན་ཚོགས་ལ་ཡིད་གདུང་དྲག་པོ་བྱུང་ཞིང། དེ་ཡང་འཇམ་མགོན་རྒྱལ་བའི་རྒྱལ་ཚབ་སྐྱབས་རྗེ་དགའ་ལྡན་ཁྲི་ཟུར་རི་རྫོང་རིན་པོ་ཆེ་རྗེ་བཙུན་ཐུབ་བསྟན་ཉི་མ་ལུང་རྟོགས་བསྟན་འཛིན་ནོར་བུ་དཔལ་བཟང་པོ་མཆོག་ནི། ཕྱི་ལོ་ ༡༩༢༧ ལོར་ལ་དྭགས་མང་སྤྲོ་ཞེས་པར་བཙན་པོའི་གདུང་རྒྱུད་ཡབ་རྒྱལ་པོ་ཕུན་ཚོགས་རྣམ་རྒྱལ་དང༌། ཡུམ་ཚེ་རིང་ལྷ་སྒྲོན་གཉིས་ཀྱི་སྲས་སུ་སྐུ་འཁྲུངས། ༸གོང་ས་སྐུ་ཕྲེང་བཅུ་གསུམ་པ་ཆེན་པོས་ངོས་འཛིན་མཛད་དེ་དགུང་ལོ་བཞི་ཙམ་ནས་རི་རྫོང་དགོན་དུ་འབྲི་ཀློག་དང་། འདོན་སྤྱོད་སྦྱངས་ཤིང་། དེ་ནས་རིམ་པས་དགེ་བསྙེན་དང་རབ་བྱུང་གི་སྡོམ་པ་བཞེས།
ཕྱི་ལོ་ ༡༩༤༥ ལོར་བོད་དུ་ཕེབས་ཏེ་དགའ་ལྡན་ཁྲི་ཐོག་གོ་བཞི་པ་རྗེ་བཙུན་ལྷུན་གྲུབ་བརྩོན་འགྲུས་མཆོག་ནས་ལམ་རིམ་ཆེན་མོ་མཆན་བཞི་སྦྲགས་དང་། འདུལ་བ། རྣམ་འགྲེལ་སོགས་གཞུང་ཆེན་ཁག་དཔེ་ཁྲིད་གསན་པ་དང་། བསྙེན་རྫོགས་ཀྱི་སྡོམ་པ་ཞུས། གདན་ས་ཆེན་པོ་དཔལ་ལྡན་འབྲས་སྤུངས་བློ་གསལ་གླིང་དུ་ཆོས་ཞུགས་མཛད་ནས་སྐྱེས་ཆེན་མང་པོའི་ཞབས་ལ་གཏུགས་ཏེ་མདོ་སྔགས་ཀྱི་ཟབ་ཆོས་དུ་མ་གསན་བསམ་དཔྱིས་ཕྱིན་པ་མཛད་ནས། ཕྱི་ལོ་ ༡༩༧༢ ལོར་དགེ་བཤེས་ལྷ་རམས་འཕར་མའི་མཚན་རྟགས་བཞེས། དེ་མུར་དཔལ་ལྡན་རྒྱུད་སྨད་དུ་སྒྲིག་ཞུགས་མཛད་ནས་སྔགས་ཀྱི་འཆད་ཉན་གྲུབ་སྟེ་རྒྱུད་པའི་དགེ་བསྐོས་དང་བླ་མ་དབུ་མཛད། མཁན་པོ་སོགས་མཛད།
ཕྱི་ལོ་ ༡༩༩༥ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས། བྱང་རྩེ་ཆོས་རྗེར་བསྐོ་བཞག་གི་ཕྱག་རྟགས་བསྩལ་དོན་བཞིན། ཟླ་བ་ ༩ ཚེས་ ༡ འཇམ་མགོན་བསྟན་པའི་གསལ་བྱེད་དགའ་ལྡན་བྱང་རྩེ་ཆོས་རྗེའི་ཁྲིར་མངའ་གསོལ་ཞིང་། བསྟན་འགྲོར་སྨན་པའི་མཛད་བཟང་རྒྱ་ཆེར་སྐྱོང་བཞིན་པའི་མུར། ཕྱི་ལོ་ ༢༠༠༩ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་དགའ་ལྡན་ཁྲི་ཐོག་བརྒྱ་དང་གཉིས་པའི་ཕྱག་རྟགས་བསྩལ་དོན་དང་འབྲེལ་རྡ་ས་ནོར་གླིང་དུ་༸མགོན་པོ་གང་ཉིད་དབུ་བཞུགས་ཐོག་རྟེན་འབྲེལ་མཛད་སྒོ་བསྐྱངས་རྗེས། འཕགས་ཡུལ་ལྷོ་ཕྱོགས་དགའ་ལྡན་རྣམ་པར་རྒྱལ་བའི་གླིང་དུ་འཇམ་མགོན་རྒྱལ་བའི་རྒྱལ་ཚབ་ཀྱི་ཁྲི་འཕང་མཐོན་པོར་ཞབས་སོར་བཀོད། ཕྱི་ལོ་ ༢༠༡༦ བར་དགའ་ལྡན་ཁྲི་པའི་མཛད་འཁུར་ལོ་བདུན་བསྐྱངས། ཁྲི་པའི་མཛད་འགན་སྐྱོང་པའི་མུར་འཕགས་པའི་ཡུལ་གྱི་དགེ་ལྡན་པའི་གདན་ས་ཁག་དང་། ལ་དྭགས། མོན། རྒྱ་ནག་རི་བོ་རྩེ་ལྔ། སོག་ཡུལ། ཐེ་ཝན། ཨིན་ཡུལ། ཨ་རི། ཨི་ཊ་ལི། ཉི་ཧོང་། རྒྱ་གར་སོགས་རྒྱལ་ཁབ་དང་མི་རིགས་འདྲ་མིན་གྱི་ཡུལ་ལུང་ཁག་ཏུ་དད་ལྡན་སྐྱེ་འགྲོ་རྣམས་ཀྱི་རེ་བ་སྐོང་བ་སོགས་བསྟན་འགྲོར་སྨན་པའི་མཛད་འཕྲིན་རྒྱ་ཆེར་བསྐྱངས་ཡོད་པ་མ་ཟད། ༸སྐྱབས་རྗེ་གང་ཉིད་ཀྱི་དྲུང་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཀྱང་ཟབ་པ་དང་རྒྱ་ཆེ་བའི་ཆོས་ཚན་ཁག་ཅིག་གསན་བཞེས་མཛད་ཡོད།
དགའ་ལྡན་ཁྲི་ཟུར་གང་ཉིད་དགུང་གྲངས་ ༩༦ རབ་གནས་ཆུ་སྟག་བོད་ཟླ་ ༡༠ ཚེས་ ༡༥ ཕྱི་ལོ་ ༢༠༢༢ ཟླ་ ༡༢ ཚེས་ ༨ ཉིན་འཕགས་ཡུལ་ལྷོ་ཕྱོགས་གདན་ས་འབྲས་སྤུངས་རི་རྫོང་བླ་བྲང་དུ་དགོངས་པ་ཞི་བར་གཤེགས། ༸སྐྱབས་རྗེ་མཆོག་དགོངས་པ་ཆོས་དབྱིངས་སུ་ཐིམ་ཚུལ་བསྟན་པ་འདིས་བསྟན་འགྲོ་སྤྱི་དང། ཁྱད་པར་གང་གི་སྐྱོང་ཡུལ་རྣམས་ལ་གོད་ཆག་ཆེན་པོ་བྱུང་བ་ནི་བརྗོད་མ་དགོས་པ་ཞིག་ཡིན། དེར་བརྟེན་ཞིང་གཤེགས་དམ་པའི་བླ་བྲང་དང། འབྲེལ་ཡོད་གྲྭ་ཚང་དང་དགོན་སྡེ་ཁག སློབ་མ། ལས་སྣེ་བཅས་ལ་བོད་མི་མང་སྤྱི་འཐུས་ལྷན་ཚོགས་ནས་ཡིད་གདུང་དྲག་པོས་ཐུགས་གསོ་ཞུ་རྒྱུ་དང། མགོན་པོ་གང་གི་ཐུགས་དགོངས་ཟབ་མོ་རྣམས་ཡོངས་སུ་རྫོགས་ཤིང། སླར་ཡང་བསྟན་འགྲོའི་མགོན་དཔུང་དམ་པར་ཡང་སྲིད་མཆོག་སྤྲུལ་མྱུར་དུ་འབྱོན་པའི་སྨོན་འདུན་ཤུགས་དྲག་ཞུ་རྒྱུ་དང་སྦྲགས། དགོངས་རྫོགས་མཆོད་དོད་དང་བཅས། ཞེས་འཁོད་འདུག