༄༅། །སྐབས་ ༡༧ པའི་བོད་མི་མང་སྤྱི་འཐུས་རྣམ་པ་ལོ་གཉིས་དང་ཕྱེད་ཕྱི་མའི་ནང་མང་ཚོགས་ལ་ཆབ་སྲིད་ལམ་སྟོན་དང་། བདེ་སྡུག་གཟིགས་ཞིབ་སླད་ཕེབས་རྒྱུའི་ལས་རིམ་ཡོད་པ་ལྟར། བོད་མི་མང་སྤྱི་འཐུས་དགེ་བཤེས་སྨོན་ལམ་མཐར་ཕྱིན་མཆོག་དང་། སྤྱི་འཐུས་ཀུན་དགའ་བསོད་སྟོབས་མཆོག་རྣམ་གཉིས་ཕྱི་ལོ་ ༢༠༢༥ ཟླ་ ༤ ཚེས་ ༣ ནས་ ༡༣ བར་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་གཞིས་ཆགས་དང་། གྷོ་ཝ་བོད་མི་གནས་སྡོད་བཅས་སུ་ས་བགོས་ཕྱོགས་བསྐྱོད་གནང་འགོ་བཙུགས་ཏེ་ཕྱི་ལོ་ ༢༠༢༥ ཟླ་ ༤ ཚེས་ ༣ ཉིན་རྒྱལ་ས་ལྡི་ལི་ནས་ཧུབ་ལི་གནམ་ཐང་དུ་ཞབས་སོར་འཁོད་པ་དང་།
མོན་གྷོ་ས་གནས་འགོ་འཛིན་རིན་ཆེན་དབང་མོ་ལགས་དང་། ས་འཐུས་ཚོགས་གཙོ་པདྨ་རྡོ་རྗེ་ལགས་རྣམ་གཉིས་ནས་ཕེབས་བསུ་ཞུས་པ་དང་། ཕྱི་དྲོ་མོན་གྷོ་བླ་མ་བླ་སྤྱིའི་གསོལ་མགྲོན་ཁང་དུ་ཞབས་སོར་འཁོད་སྐབས་ཚོགས་པ་ ༢༦ གི་འཐུས་མི་རྣམས་ཀྱིས་ཕེབས་བསུ་ཞུས།
༢༠༢༥ ཟླ་ ༤ ཚེས་ ༤ སྔ་དྲོ་མོན་གྷོ་འདོད་རྒུ་གླིང་ས་གནས་འགོ་འཛིན་ལས་ཁུངས་དང་། བོད་རང་དབང་བདེན་པའི་ལས་འགུལ་ཚོགས་ཆུང་། མཉམ་འབྲེལ་ལས་ཁུངས། ས་གནས་འཐུས་ཚོགས། རྒྱལ་བའི་གཟིམ་ཆུང་། ལེགས་བཅོས་ལས་འཆར། ཞི་བ་འཚོ་དཔེ་མཛོད་ཁང་། གཞིས་གྲོང་གསུམ་པའི་སྨན་རྩིས་ཁང་བཅས་སུ་གཟིགས་སྐོར་གནང་བ་དང་། གུང་ཡོལ་གཞིས་སྤྱི་ལྷ་མོའི་ཚོགས་པ་དང་། བུད་མེད་ཚོགས་པ། གཞོན་ནུ་ཚོགས་པ། དམག་ཟུར་ཚོགས་པ་བཅས་སུ་གཟིགས་སྐོར་གནང་སྐབས་སྡེ་ཚན་སོ་སོའི་འགན་འཛིན་དང་ལས་བྱེད་རྣམས་ནས་སྣེ་ལེན་ཟབ་རྒྱས་ཞུས་པ་དང་། ཚོགས་སྡེ་སོ་སོའི་གནས་སྟངས་དང་འཛིན་སྐྱོང་བྱེད་ཕྱོགས་སོགས་ལ་རྒྱུས་ལོན། སྐབས་བསྟུན་གྱི་བསམ་ཚུལ་བརྗེ་ལེན། བདེ་སྡུག་ཞུས་རིགས་ལ་གསན་འཇོག དབུས་དང་ས་གནས་ཀྱི་འབྲེལ་ལམ་གནང་ཕྱོགས་སོགས་ལམ་སྟོན་གནང་སྟེ་མོན་གྷོར་ཕྱོགས་བསྐྱོད་ལས་རིམ་དབུ་འཛུགས་གནང་ཡོད་པ་བཅས།
