༄༅། །ཕྱི་ལོ་ ༢༠༢༢ ཟླ་ ༡༡ པའི་ཚེས་ ༨ ཉིན་མེག་སི་ཀོ་གྲོས་ཚོགས་ནང་སྐུ་ཞབས་སལ་ཝ་ཌོར་ ཁེ་རོ་ ཁེ་བྷི་རི་རཱ་ (Deputy Salvador Caro Cabrera) མཆོག་གིས་མེག་སི་ཀོ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་གསར་འཛུགས་གནང་བའི་གསལ་བསྒྲགས་གནང་ཡོད།
དེ་ཡང་སྐུ་ཞབས་སལ་ཝ་ཌོར་ ཁེ་རོ་ ཁེ་བྷི་རི་རཱ་མཆོག་གིས་ཚོགས་འདུ་གཙོ་སྐྱོང་འོག ཐོག་མར་ཚོགས་མི་གྲོས་ཚོགས་འཐུས་མི་རྣམ་པ་ངོ་སྤྲོད་དང་། རིམ་པས་ཚོགས་པའི་འགན་འཛིན་ལྷན་ཚོགས་ཀྱི་ཚོགས་མི་འདེམས་སྒྲུག དེ་བཞིན་ཚོགས་པ་གསར་འཛུགས་དང་། མ་འོངས་ལས་དོན་གནང་ཕྱོགས་སོགས་ངོ་སྤྲོད་གནང་རྗེས། མེག་སི་ཀོ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་དངོས་སུ་གསར་འཛུགས་གནང་བའི་གསལ་བསྒྲགས་གནང་ཡོད་ཅིང་། སྐབས་དེར་ལྷོ་ཨ་མི་རི་ཀའི་སྐུ་ཚབ་དོན་གཅོད་འཇིགས་མེད་ཚེ་རིང་ལགས་ཆེད་བཅར་གནང་བ་མ་ཟད། དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་རྣམ་གཉིས་ཀྱིས་བཏང་བའི་ཐུགས་རྗེ་ཆེ་ཞུའི་འཕྲིན་ཡིག་སྙན་སྒྲོན་ཞུས་གནང་འདུག
དཔལ་ལྡན་ཚོགས་གཙོ་མཆོག་གིས་སྐུ་ཞབས་སལ་ཝ་ཌོར་ ཁེ་རོ་ ཁེ་བྷི་རི་རཱ་མཆོག་ལ་ཕུལ་བའི་ཐུགས་རྗེ་ཆེ་ཞུའི་འཕྲིན་ཡིག་ནང་འཁོད་དོན། མེག་སི་ཀོ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་གསར་འཛུགས་གནང་བ་ཐོས་འཕྲལ་ང་ཚོ་ཚང་མ་དགའ་ཚོར་ཆེན་པོ་བྱུང་། ངས་གཞིས་བྱེས་བོད་མི་ཡོངས་དང་། བོད་མི་མང་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ། སྐུ་ཉིད་དང་། མེག་སི་ཀོ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་མི་ཡོངས་ལ་ཐུགས་རྗེ་ཆེ་ཞུ་རྒྱུ་ཡིན། ཚོགས་པ་འདི་བརྒྱུད་ལྷོ་ཨ་མི་རི་ཀའི་ནང་བོད་ཀྱི་བདེན་པའི་འཐབ་རྩོད་ཐོག་ང་ཚོ་མཉམ་རུབ་ཀྱིས་ལས་འགུལ་སྤེལ་རྒྱུར་ཕན་རླབས་ཆེན་པོ་ཡོད་པ་རེད། ཁྱེད་རྣམ་པའི་རྒྱབ་སྐྱོར་ནི་ང་ཚོར་དགོས་མཁོ་ཤིན་ཏུ་ཆེན་པོ་ཆགས་ཀྱི་ཡོད་པ་དང་། སྤྱིར་མེག་སི་ཀོ་རྒྱལ་ཁབ་ནང་ང་ཚོར་དུས་ཡུན་རིང་པོར་གང་ཟག་སྒེར་གྱི་ཐོག་ནས་རྒྱབ་སྐྱོར་གནང་མཁན་མང་པོ་ཡོད་ཅིང་། ངས་ད་རེས་གོ་སྐབས་འདི་བརྒྱུད་ཁོང་རྣམས་ལའང་ཐུགས་རྗེ་ཆེ་ཞུ་རྒྱུ་ཡིན། འབྱུང་འགྱུར་ཁྱེད་རྣམས་དང་ལྷན་ཕྱག་ལས་གནང་རྒྱུ་དང་། དངོས་སུ་མཇལ་རྒྱུའི་རེ་བ་ཆེན་པོ་ཡོད། ངས་སླར་ཡང་ཁྱེད་རྣམ་པར་ཐུགས་རྗེ་ཆེ་ཞུ་རྒྱུ་དང་། ཁྱེད་རྣམ་པའི་ལས་དོན་ཐམས་ཅད་ལམ་ལྷོངས་ཡོང་བའི་སྨོན་འདུན་ཞུ་རྒྱུ་ཡིན་ཞེས་འཁོད་འདུག་པ་བཅས། །