མི་བཞི་གར་སོང་ཆ་མེད་དུ་གྱུར་པ།

ཕྱི་ལོ ༢༠༡༢ ཟླ ༤ ཚེས ༢༩ ནས་ཡར་བརྩིས་པའི་ཟླ་བ་གསུམ་གྱི་གོང་སྟེ་ཕྱི་ལོ ༢༠༡༢ ཟླ ༡ ཚེས ༢༣ ཉིན་མོར་བོད་མདོ་ཁམས་བྲག་མགོ་རྫོང་ཐོག་ཏུ་གཞི་རྒྱ་ཆེ་བའི་བོད་མིའི་ཞི་རྒོལ་གྱི་ལས་འགུལ་བྱུང་ཞིང། ངོ་རྒོལ་དེ་བྱུང་བའི་ཉིན་གསུམ་བཞི་ཙམ་གྱི་རྗེས་སུ་རྒྱ་ནག་ཁྲིན་ཏུའུ་གྲོང་ཁྱེར་ནས། བྲག་མགོ་སྒོ་ཆེན་དགོན་པའི་སྤྲུལ་སྐུ་བློ་བཟང་བསྟན་འཛིན་རིན་པོ་ཆེ་དང། བྲག་མགོ་དགོན་པའི་སློབ་དགེ་དགེ་བཤེས་ཚེ་དབང་རྣམ་རྒྱལ། དགོན་པའི་ཚོང་པ་འཕྲིན་ལས། དགོན་པའི་རྩིས་པ་དང་དྲུང་ཡིག་གཅིག་ལྕོགས་དགྲ་ལྷ་བཅས། ཉེན་རྟོག་པས་འཇུ་བཟུང་བྱས་ཏེ་ད་བར་ཟླ་བ་གསུམ་ལྷག་སོང་ཡོད་ཀྱང། ཁོང་རྣམས་ཤི་གསོན་ཅི་ཡིན་དང་། གར་ཡོད་གར་ཁྲིད་ཀྱི་གནས་ཚུལ་ཅི་ཡང་གོ་རྒྱུ་མེད།

བོད་ནས་གནས་ཚུལ་མཁོ་སྤྲོད་པ་གཅིག་གིས་ཟེར་ན་ཁོང་ཚོ་ལས་གཅིག་རྒྱ་དམར་གྱིས་དམར་གསོད་བྱས་ཟིན་པར་བཤད་ཡོད་ཀྱང། རྒྱ་དམར་གྱིས་ད་བར་ཁོང་རྣམས་ཤི་གསོན་ཅི་ཡིན་གནས་ཚུལ་གང་ཡང་ཁྱབ་བསྒྲགས་བྱས་མེད་ལ། གལ་ཏེ་ཁོང་རྣམ་པས་གུང་ཁྲན་ཏང་གི་མཁྲེགས་བཟུང་གི་སྲིད་བྱུས་ལས་འགལ་བའི་ནག་ཉེས་བསགས་ཡོད་ཚེ་ད་ནི་ཁྲིམས་ཐག་གཅོད་པའི་དུས་ལ་བབ་ཡོད་ཀྱང། ད་དུང་ཁྲིམས་ཐག་མ་བཅད་པ་འདིས་ཁོང་རྣམས་ཤི་གསོན་ཅི་ཡིན་དེ་ལས་དྭོགས་པ་ཆེ་དུ་སོང་ཡོད།


སྤྲུལ་སྐུ་བློ་བཟང་བསྟན་འཛིན།སྤྲུལ་སྐུ་བློ་བཟང་བསྟན་འཛིན།སྤྲུལ་སྐུ་བློ་བཟང་བསྟན་འཛིན།

དགུང་ལོ་ ༤༠ ལྷག་ལ་སོན་པའི་སྤྲུལ་སྐུ་བློ་བཟང་བསྟན་འཛིན་མཆོག་ནི་ཡབ་པད་མཁྱེན་དང་ཡུམ་མགོན་པོ་ལྷ་མོ་གཉིས་ཀྱི་སྲས་སུ་བྲག་མགོ་དཔེ་མེད་སྒང་གྲོང་ཚོ་རུ་འཁྲུངས་ཤིང་ནར་སོན་པ་དང་གསེར་རྟ་བླ་རུང་ཆོས་སྒར་དུ་ཞུགས། དེ་རྗེས་སྒོ་ཆེན་དགོན་པའི་སྤྲུལ་སྐུར་ངོས་འཛིན་གནང་སྟེ་དགོན་དེར་བཤད་གྲྭ་དང་སྒྲུབ་གྲྭ་གསར་འཛུག་དང་དགོན་པའི་འདུ་ཁང་གསར་རྒྱག་བྱས་པ་སོགས་བསྟན་པའི་བྱ་བར་ལས་དོན་སྒྲུབ་མུས་སུ་མཆིས། ཕྱི་ལོ ༢༠༡༢ ཟླ ༡ ཚེས ༢༣ ཉིན་བྲག་མགོ་མི་མང་གིས་ཞི་བའི་ཡར་ལངས་བྱས་པའི་ཉིན་ཤས་རྗེས་རྒྱ་ནག་གི་གྲོང་ཁྱེར་ཁྲིན་ཏུའུ་རུ་ཉེན་རྟོག་པས་འཛིན་བཟུང་བྱས་ཏེ་གར་སོང་ཆ་མེད་དུ་གྱུར།

 


 

དགེ་བཤེས་ཚེ་དབང་རྣམ་རྒྱལ།དགེ་བཤེས་ཚེ་དབང་རྣམ་རྒྱལ།དགེ་བཤེས་ཚེ་དབང་རྣམ་རྒྱལ།

དགེ་བཤེས་ཚེ་དབང་རྣམ་རྒྱལ་ལགས་ནི། ཕྱི་ལོ ༡༩༧༠ ལོར་བྲག་མགོའི་ཆུ་དབར་གྲོང་དུ་ཕ་རྡོ་དགའ་དང་མ་ཚེ་འཛིན་ལྷ་མོ་གཉིས་སུ་སྐྱེས་ཤིང་། ཆུང་དུས་སློབ་གྲྭར་འགྲིམས་ཏེ་རྒྱ་བོད་ཀྱི་ཡིག་རིགས་ལ་སྦྱང་བརྩོན་བྱས། ཕྱི་ལོ་༡༩༨༧ ལོར་རྒྱ་གར་ལ་ཕེབས་ཏེ་འབྲས་བློ་གླིང་གྲྭ་ཚང་གི་ཆོས་སྒོར་ཞུགས། དགོན་དེའི་སློབ་གྲྭ་སོགས་ནས་ནང་དོན་རིག་པ་དང་དབྱིན་བོད་ཧིན་གསུམ་ལ་སྦྱང་པ་གནང་། ༡༩༩༤ ལོར་རྡ་སའི་རིགས་སློབ་ཏུ་ཕེབས་ཏེ་རིས་མེད་ཆོས་རྒྱུད་ཆེན་པོའི་ལྟ་གྲུབ་ལ་སྦྱང་པ་མཐར་སོན་གནང་ཐོག་སློབ་གཉེར་ཁང་དེ་ནས་རིས་མེད་སློབ་དཔོན་ཀྱི་མཚན་རྟགས་བཞེས། འབྲས་སྤུངས་བློ་གླིང་གྲྭ་ཚང་དུ་གཞུང་ལུགས་རབ་འབྱམས་སྨྲ་བའི་དགེ་བཤེས་དམ་བཅའ་བཞག ཕྱི་ལོ ༢༠༡༡ ལོར་ཕྱིར་རང་ཡུལ་ཕེབས་ཏེ་བྲག་མགོ་དགོན་པའི་སློབ་དགེ་ཡི་ཐུགས་འགན་བཞེས། ཕྱི་ལོ ༢༠༡༢ ཟླ ༡ ཚེས་༢༣ ཉིན་བྲག་མགོའི་མིང་མང་གིས་ཞི་རྒོལ་བྱས་པའི་ཉིན་ཤས་རྗེས་སུ་རྒྱ་ནག་གི་གྲོང་ཁྱེར་ཁྲིན་ཏུའུ་ནས་ཉེན་རྟོག་པས་འཇུ་བཟུང་བྱས་ཏེ་ཆར་གར་ཡོད་ཆ་མེད་དུ་གྱུར།


ཚོང་པ་འཕྲིན་ལས།ཚོང་པ་འཕྲིན་ལས།ཚོང་པ་འཕྲིན་ལས།

རང་ལོ་ ༤༢ ལ་སོན་པའི་འཕྲིན་ལས་ལགས་ནི་ཕ་ཁམས་ཐར་དང་མ་ལྷ་སྐྱིད་གཉིས་སུ་བྲག་མགོ་རྦ་དག་གྲོང་དུ་སྐྱེས། ཆུང་དུས་སློབ་ཆུང་འགྲིམས་ཤིང་དེ་རྗེས་བྲག་མགོ་དགོན་པའི་ཆོས་སྒོར་ཞུགས། ལོ་ཤས་སྔོན་དུ་བྲག་མགོ་དགོན་པའི་ཕྱག་མཛོད་ཀྱི་འགན་བཞེས་ཤིང། ད་སྐབས་དགོན་པའི་ཚོང་ལས་གཉེར་མུས་ལ། ཕྱི་ལོ ༢༠༡༢ ཟླ ༡ ཚེས ༢༣ ཉིན་བྲག་མགོ་མི་མང་གིས་ཞི་རྒོལ་བྱས་པའི་ཉིན་ཁ་ཤས་ཀྱི་རྗེས་སུ་རྒྱ་ནག་གི་གྲོང་ཁྱེར་ཁྲིན་ཏུའུ་རུ་ཉེན་རྟོག་པས་འཛིན་བཟུང་བྱས་ཏེ་གར་ཡོད་ཆ་མེད་དུ་གྱུར།


རྩིས་པ་དགྲ་ལྷ།རྩིས་པ་དགྲ་ལྷ།རྩིས་པ་དགྲ་ལྷ།

རང་ལོ་ ༣༡ ཡིན་པའི་དགྲ་ལྷ་འམ་བཀྲ་ཤིས་སྟོབས་རྒྱལ་ལགས་ནི་ཕ་དཔལ་ལྡན་རྡོ་རྗེ་དང་མ་ཚུལ་ཁྲིམས་སྒྲོལ་མ་གཉིས་སུ་བྲག་མགོ་དགོན་སར་གྲོང་དུ་སྐྱེས། ཆུང་དུས་སུ་སློབ་ཆུང་དང་སློབ་འབྲིང་འགྲིམས། ཕྱི་ལོ ༢༠༠༠ ལོར་བྲག་མགོ་དགོན་པའི་ཆོས་སྒོར་ཞུགས་ཤིང་དགོན་པའི་སློབ་གྲྭར་ལོ་ལྔ་ལྷག་འགྲིམས་ཏེ་དགོན་པའི་རྩིས་པ་དང་དྲུང་ཡིག་གི་ལས་དོན་སྒྲུབ་མུས་ཐོག ཕྱི་ལོ ༢༠༡༢ ཟླ ༡ ཚེས ༢༣ ཉིན་བྲག་མགོའི་མི་མང་གིས་ཞི་བའི་ཡར་ལངས་བྱས་པའི་ཉིན་ཤས་རྗེས་སུ་རྒྱ་ནག་གི་གྲོང་ཁྱེར་ཁྲིན་ཏུ་རུ་ཉེན་རྟོག་པས་འཛིན་བཟུང་བྱས་ཏེ་གར་ཡོད་ཆ་མེད་དུ་གྱུར།

ཕྱི་ལོ་ ༢༠༡༢ ཟླ་ ༤ ཚེས་༣༠ ཉིན་བྲག་མགོའི་ཛ་དྲག་ཚོགས་ཆུང་གིས་གནས་ཚུལ་མཁོ་སྤྲོད་གནང་བྱུང།

Menu