བོད་མི་མང་སྤྱི་འཐུས་སྐབས་ ༡༦ པའི་གྲོས་ཚོགས་ཚོགས་དུས་དྲུག་པའི་ལས་ཉིན་ལྔ་པའི་གནས་ཚུལ།

༄༅། ། ཕྱི་ལོ་ ༢༠༡༨ ཟླ་ ༩ ཚེས་ ༡༨ ནས་བོད་མི་མང་སྤྱི་འཐུས་སྐབས་ ༡༦ པའི་གྲོས་ཚོགས་ཚོགས་དུས་དྲུག་པ་འཚོགས་བཞིན་ཡོད་པ་ལྟར། ཟླ་ ༩ ཚེས་ ༢༢ ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་དཔལ་ལྡན་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དབུ་བཞུགས་ཐོག་གྲོས་ཚོགས་ཚོགས་དུས་དྲུག་པའི་ལས་ཉིན་ལྔ་པ་ཚོགས་གནང་ཡོད།

དེ་ཡང་སྔ་དྲོ་ཐོག་མར་ཁྲིམས་བཟོའི་ལས་དོན་བརྗོད་པ་གཉིས་པའི་ཐོག་ཕེབས་སྐབས། འོས་བསྡུའི་སྒྲིག་གཞི་བསྐྱར་བཅོས་མ་གནང་གོང་བཅའ་ཁྲིམས་ལ་བསྐྱར་བཅོས་གནང་དགོས་པའི་བཀའ་བསྡུར་བྱུང་རྗེས། དཔལ་ལྡན་ཚོགས་གཙོ་མཆོག་གིས་དཔལ་ལྡན་བཀའ་ཤག་ནས་དེ་འབྲེལ་བཅའ་ཁྲིམས་བསྐྱར་བཅོས་ཀྱི་ཁྲིམས་འཆར་བསྣམ་ཕེབས་དགོས་པའི་ལམ་སྟོན་གནང་ཡོད། དེ་ནས་དཔལ་ལྡན་ཤེས་རིག་བཀའ་བློན་པདྨ་དབྱངས་ཅན་མཆོག་གིས་ཤེས་རིག་ལས་ཁུངས་མ་ལག་དང་བཅས་པའི་ཕྱི་ལོ་ ༢༠༡༧ ཟླ་ ༤ ཚེས་ ༡ ནས་ཕྱི་ལོ་ ༢༠༡༨ ཟླ ༣ ཚེས་ ༣༡ བར་གྱི་ལས་བསྡོམས་སྙིང་བསྡུས་སྙན་སྒྲོན་གནང་རྗེས།

སྤྱི་འཐུས་རྒྱུན་ལས་ཀྱིས་ཤེས་རིག་ལས་ཁུངས་ཀྱི་ཕྱི་ལོ་ ༢༠༡༧་་་༢༠༡༨ ལོའི་ལས་བསྡོམས་རྒྱས་པར་ཞིབ་འཇུག་གནང་བའི་སྙན་ཐོ་སྤྱི་འཐུས་སློབ་དཔོན་ཐུབ་བསྟན་རྒྱལ་མཚན་མཆོག་གིས་སྙན་སྒྲོན་གནང་ཡོད།

དེ་ནས་སྤྱི་འཐུས་བློ་བཟང་ཡེ་ཤེས་མཆོག་གིས་གོང་གསལ་ལས་བསྡོམས་དང་། ཞིབ་འཇུག་གནང་བའི་སྙན་ཐོ་སྙན་སྒྲོན་ཟིན་པར་བགྲོ་གླེང་དགོས་པའི་གྲོས་འཆར་བཏོན་གནང་བར།

སྤྱི་འཐུས་འཇུ་ཆེན་དཀོན་མཆོག་ཆོས་སྒྲོན་མཆོག་གིས་རྒྱབ་སྐྱོར་གནང་ཡོད། དཔལ་ལྡན་ཤེས་རིག་བཀའ་བློན་མཆོག་གིས་གོང་གསལ་སྙན་ཐོ་ནང་གསལ་སྤྱི་འཐུས་རྒྱུན་ལས་ཀྱི་དྲི་བ་ཁག་ལ་བཀའ་ཤག་གི་གསལ་བཤད་གནང་རྗེས། ཤེས་རིག་ལས་ཁུངས་མ་ལག་དང་བཅས་པའི་ལས་བསྡོམས་ཐོག་སྤྱི་ཡོངས་ནས་བགྲོ་གླེང་གནང་འགོ་བཙུགས་པ་དང་། སྤྱི་འཐུས་རྣམ་པས་སློབ་གྲྭའི་འགན་འཛིན་འདེམས་ཕྱོགས་དང་། ཐ་སྙད་གཏན་འབེབས་ཟིན་པ་རྣམས་རྒྱུན་སྤྱོད་བྱེད་ཚུལ། སློབ་གྲྭ་ཁག་ལ་མཐུན་རྐྱེན་སྤྲོད་ཕྱོགས། བྱང་ཨ་རིའི་བོད་ཀྱི་སྐད་ཡིག་དང་རིག་གཞུང་སློབ་གྲྭའི་བོད་ཡིག་སློབ་དེབ་བསྐྱར་ཞིབ་དང་འབྲེལ་བའི་ལས་དོན། ཆོས་ལུགས་ལ་མ་བརྟེན་པའི་བཟང་སྤྱོད་སློབ་སྤེལ་ལས་འཆར། སློབ་ཡོན་གསལ་བསྒྲགས་གནང་ཕྱོགས་དང་།  སློབ་གྲྭ་ཁག་གི་ཀམ་པུ་ཊར་ནང་བོད་ཀྱི་ཡིག་གཟུགས་ (Tibetan font) འཇུག་དགོས་གལ། མཐོ་རིམ་སློབ་ཡོན་རོགས་རམ་ཐབས་འཚོལ། སློབ་གྲྭའི་ནང་བྱམས་དང་སྙིང་རྗེའི་ཁོར་ཡུག་བསྐྲུན་དགོས་གལ། བྱིས་པའི་འགུལ་བརྙན་གྱི་ལས་གཞིའི་ཕན་ཐོགས། སློབ་གྲྭ་ཁག་གི་དགེ་རྒན་དང་ལས་བྱེད་གསོལ་ཕོགས་སྤར་དགོས་གལ། ཀམ་པུ་ཊར་འཕྲུལ་ཆས་བརྒྱུད་སློབ་ཁྲིད་བྱེད་སའི་འཛིན་ཁང་ (Smart Class) མཐུན་རྐྱེན་སྦྱོར་སྤྲོད་དང་འབྲེལ་བ། མ་འོངས་སློབ་ཕྲུག་གི་ཤེས་ཡོན་ཡར་རྒྱས་གཏོང་ཕྱོགས་སོགས་ཀྱི་ཐོག་དགོངས་འཆར་དང་། དྲི་བ་འདོན་གནང་མཛད་པར། དཔལ་ལྡན་ཤེས་རིག་བཀའ་བློན་མཆོག་གིས་བཀའ་ཤག་གི་ལན་འདེབས་གསལ་བཤད་གནང་ཡོད་པ་དང་།

ཉིན་རྒྱབ་གྲོས་ཚོགས་ཚོགས་ཐུན་བཞི་པའི་སྐབས་དཔལ་ལྡན་ཚོགས་གཞོན་ཨཅྰརྱ་ཡེ་ཤེས་ཕུན་ཚོགས་མཆོག་དབུ་བཞུགས་ཐོག་མུ་མཐུད་ཤེས་རིག་ལས་ཁུངས་མ་ལག་དང་བཅས་པའི་ལས་བསྡོམས་ཐོག་སྤྱི་ཡོངས་ནས་བགྲོ་གླེང་གནང་བ་དང་། བགྲོ་གླེང་ཐོག་སྤྱི་འཐུས་ ༢༡ ཀྱིས་ཆ་ཤས་བླངས་ཡོད།

དེ་རྗེས་ཚོགས་དྲུང་ལྷ་ཁང་ཚེ་རིང་སྟོབས་རྒྱལ་ལགས་ཀྱིས་སྤྱི་འཐུས་རྣམ་པའི་དགོངས་ཤོག་ཁག་དང་། བདུན་རྗེས་མའི་ལས་རིམ་སྙན་སྒྲོན་ཞུས་གནང་ཡོད། གནངས་སྔ་དྲོ་ཆུ་ཚོད་ ༩།༣༠ ནས་མུ་མཐུད་ཤེས་རིག་ལས་ཁུངས་མ་ལག་དང་བཅས་པའི་ལས་བསྡོམས་ཐོག་བགྲོ་གླེང་གནང་རྒྱུ་ཡིན་པ་རེད།

དེ་རིང་གི་གྲོས་ཚོགས་ཐོག་སྤྱི་ཟུར་གླིང་ཚང་ཚེ་རྡོར་ལགས་ཟུར་ཉན་དུ་ཕེབས་པར་དཔལ་ལྡན་ཚོགས་གཙོ་མཆོག་གིས་གཙོས་སྤྱི་འཐུས་རྣམ་པས་འཚམས་འདྲི་གནང་ཡོད།

 

 

Menu