༄༅། །སྐབས་ ༡༧ པའི་བོད་མི་མང་སྤྱི་འཐུས་རྣམས་ཕྱི་ནང་ཡུལ་གྲུ་ཁག་ཏུ་གྲོས་ཚོགས་འཐུས་མི་སོགས་གནད་ཡོད་མི་སྣ་མཇལ་འཕྲད་དང་། བོད་དོན་རྒྱབ་སྐྱོར་སྔར་ལྷག་ཐོབ་ཐབས་ཆེད་ཕྱོགས་བསྐྱོད་གནང་རྒྱུའི་ལས་རིམ་ཡོད་པ་བཞིན། ཕྱི་ལོ་ ༢༠༢༣ ཟླ་ ༦ ཚེས་ ༢༧ ནས་ཟླ་ ༧ ཚེས་ ༡༠ བར་བོད་མི་མང་སྤྱི་འཐུས་མཁན་པོ་འཇམ་དཔལ་བསྟན་འཛིན་མཆོག་དང་། སྤྱི་འཐུས་སློབ་དཔོན་ཐུབ་བསྟན་རྒྱལ་མཚན་མཆོག སྤྱི་འཐུས་རྡོ་རྗེ་ཚེ་བརྟན་མཆོག་བཅས་ལས་གྲུབ་པའི་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་ཞིག་སྦེལ་ཇམ་དང་། ཕ་རན་སི། འཇར་མ་ནི་བཅས་ཡུ་རོབ་རྒྱལ་ཁབ་གསུམ་གྱི་ནང་གཞུང་འབྲེལ་ཕྱོགས་བསྐྱོད་གནང་གཏན་ཁེལ་ཡོད།
དེ་ཡང་སྤྱི་འཐུས་རྣམ་པ་ཕྱི་ཚེས་ ༢༧ ཉིན་གྱི་དགོང་དྲོ་རྒྱལ་ས་ལྡི་ལི་ནས་སྦེལ་ཇམ་རྒྱལ་ས་སྦར་སིལ་ལ་ཕེབས་ཐོན་གནང་རྒྱུ་དང་། ཕྱི་ཚེས་ ༢༨ ནས་ཕྱི་ཟླ་ ༧ པའི་ཚེས་ ༡ བར་སྦེལ་ཇམ་རྒྱལ་ཁབ་ནང་ལས་རིམ། ཕྱི་ཟླ་ ༧ པའི་ཚེས་ ༢ ནས་ ༥ བར་ཕ་རན་སི་རྒྱལ་ཁབ་ནང་ལས་རིམ། ཕྱི་ཚེས་ ༦ ནས་ ༡༠ བར་འཇར་མ་ནི་རྒྱལ་ཁབ་ནང་ལས་རིམ་བསྐྱང་རྒྱུ་ཡིན་པ་བཅས། །