བོད་མི་མང་སྤྱི་འཐུས་སྐུ་ཚབ་ཚོགས་ཆུང་ནས་རྒྱ་གར་གྲོས་ཚོགས་གོང་འོག་གཉིས་ཀྱི་འཐུས་མི་ཁག་ཅིག་དང་། ཨ་རིའི་གཞུང་ཚབ་ཁང་གི་གནད་ཡོད་མི་སྣ་གཉིས་མཇལ་འཕྲད་ཀྱིས་བོད་དོན་ཞུ་སྐུལ་ཉིན་བདུན་པ་ལེགས་གྲུབ།

རྒྱ་གར་དབུས་གཞུང་གི་ལག་རྩལ་གོང་སྤེལ་དང་། བཟོ་ཚོང་། དེ་བཞིན་འཕྲུལ་རིག་བློན་ཆེན་སྐུ་ཞབས་རཱ་ཇེབ་ཅནྡྲ་ཤེ་ཀར་མཆོག

༄༅། ། རྒྱ་གར་རྒྱལ་ས་ལྡི་ལིར་དགུན་ཁའི་གྲོས་ཚོགས་འཚོགས་བཞིན་པའི་སྐབས་དང་བསྟུན། སྤྱི་འཐུས་གསེར་རྟ་ཚུལ་ཁྲིམས་མཆོག་དང་། སྤྱི་འཐུས་དགེ་བཤེས་ལྷ་རམས་པ་གོ་བོ་བློ་བཟང་ཕན་བདེ་མཆོག སྤྱི་འཐུས་ལྷ་རྒྱ་རི་རྣམ་རྒྱལ་སྒྲོལ་དཀར་མཆོག སྤྱི་འཐུས་དགེ་བཤེས་ཨ་ཀྲོང་རིན་ཆེན་རྒྱལ་མཚན་མཆོག སྤྱི་འཐུས་ཆོས་གྲགས་རྒྱ་མཚོ་མཆོག་བཅས་ལས་གྲུབ་པའི་བོད་མི་མང་སྤྱི་འཐུས་སྐུ་ཚབ་ཚོགས་ཆུང་ནས་ཕྱི་ལོ་ ༢༠༢༡ ཟླ་ ༡༢ ཚེས་ ༡༣ ནས་ ༢༣ བར་རྒྱལ་ས་ལྡི་ལིར་རྒྱ་གར་དབུས་གཞུང་གི་གྲོས་ཚོགས་གོང་འོག་གཉིས་ཀྱི་འཐུས་མི་དང་། ཕྱི་རྒྱལ་གཞུང་ཚབ་སོགས་གནད་ཡོད་མི་སྣ་ཁག་ཅིག་མཇལ་འཕྲད་ཀྱིས་བོད་དོན་ཞུ་སྐུལ་གྱི་ལས་འགུལ་སྤེལ་བཞིན་ཡོད་པ་ལྟར། ཕྱི་ཚེས་ ༢༠ བོད་དོན་ཞུ་སྐུལ་གྱི་ཉིན་བདུན་པར། བོད་མི་མང་སྤྱི་འཐུས་སྐུ་ཚབ་ཚོགས་ཆུང་ནས་རྒྱ་གར་གྲོས་ཚོགས་གོང་འོག་གཉིས་ཀྱི་འཐུས་མི་ཁག་ཅིག་དང་། ཨ་རིའི་ལྡི་ལི་གཞུང་ཚབ་ཁང་གི་ཆབ་སྲིད་སྡེ་ཚན་གྱི་འགན་འཛིན་སྐུ་ཞབས་གྷ་རཱམ་ ཌི་ མཱེ་ཡེར་མཆོག་དང་། ཨ་རིའི་གཞུང་ཚབ་ཁང་གི་དྲུང་ཆེ་སྐུ་ཞབས་ཇཱོན་ ཨེན་ ཝིན་སི་ཊཱེཌ་མཆོག་དང་མཇལ་འཕྲད་ཀྱིས་བོད་དོན་ཞུ་སྐུལ་གནང་ཡོད།

རྒྱ་གར་གྲོས་ཚོགས་འོག་མའི་ཧི་མ་ཅལ་མངའ་སྡེའི་འཐུས་མི་སྐུ་ཞབས་སུ་རེ་ཤ་ཀུ་མར་ཀཱ་ཤཱབ་མཆོག

དེ་ཡང་ཕྱི་ལོ་ ༢༠༢༡ ཟླ་ ༡༢ ཚེས་ ༢༠ རེས་གཟའ་ཟླ་བའི་ཉིན་གྱི་སྔ་དྲོ་ཆུ་ཚོད་ ༩།༣༠ ནས་དགོང་དྲོ་ཆུ་ཚོད་ ༧ བར་རིམ་པས། བོད་མི་མང་སྤྱི་འཐུས་སྐུ་ཚབ་ཚོགས་ཆུང་ནས་རྒྱ་གར་དབུས་གཞུང་གི་ལག་རྩལ་གོང་སྤེལ་དང་། བཟོ་ཚོང་། དེ་བཞིན་འཕྲུལ་རིག་བློན་ཆེན་དང་། རྒྱ་གར་གྲོས་ཚོགས་གོང་མའི་ཀར་ན་ཊ་ཀ་མངའ་སྡེའི་འཐུས་མི་སྐུ་ཞབས་རཱ་ཇེབ་ཅནྡྲ་ཤེ་ཀར་ (Shri Rajeev Chandrasekhar, Minister of State for Skill Development & Entrepreneurship and Electronics & Information Technology of India) མཆོག་དང་། རྒྱ་གར་གྲོས་ཚོགས་འོག་མའི་ཧི་མ་ཅལ་མངའ་སྡེའི་འཐུས་མི་སྐུ་ཞབས་སུ་རེ་ཤ་ཀུ་མར་ཀཱ་ཤཱབ་ (Shri Suresh Kumar Kashyap, Lok Sabha member from Himachal) མཆོག རྒྱ་གར་གྲོས་ཚོགས་འོག་མའི་ནུབ་བྷེང་གྷལ་མངའ་སྡེའི་འཐུས་མི་སྐུ་ཞབས་རཱ་ཇུ་བྷི་སི་ཏཱ་ (Shri Raju Bista, Lok Sabha member from West Bengal) མཆོག  རྒྱ་གར་གྲོས་ཚོགས་འོག་མའི་པན་ཇབ་མངའ་སྡེའི་འཐུས་མི་སྐུ་ཞབས་མཱ་ནེ་ཤི་ཏེ་ཝཱ་རི་ (Shri Manish Tewari, Lok Sabha member from Punjab) མཆོག  རྒྱ་གར་གྲོས་ཚོགས་འོག་མའི་ཨོ་དྷི་ཤ་མངའ་སྡེའི་འཐུས་མི་སྐུ་ཞབས་སཱབ་ཏ་གྷཧི་རི་ ཨུལ་ཀཱ་ (Shri Sabtagiri Ulka, Lok Sabha member from Odisha) མཆོག་བཅས་དང་ལྷན་རིམ་པས་མཇལ་འཕྲད་ཀྱིས་བོད་དོན་ཞུ་སྐུལ་གནང་ཡོད།

རྒྱ་གར་གྲོས་ཚོགས་འོག་མའི་ནུབ་བྷེང་གྷལ་མངའ་སྡེའི་འཐུས་མི་སྐུ་ཞབས་རཱ་ཇུ་བྷི་སི་ཏཱ་མཆོག 

དེ་བཞིན་ཨ་རིའི་ལྡི་ལི་གཞུང་ཚབ་ཁང་དུ་གཞུང་ཚབ་ཀྱི་ཆབ་སྲིད་སྡེ་ཚན་གྱི་འགན་འཛིན་སྐུ་ཞབས་གྷ་རཱམ་ཌི་མཱེ་ཡེར་ (Graham D. Mayer, Counselor for Political Affairs, U.S Embassy in Delhi) མཆོག་དང་། ཨ་རིའི་གཞུང་ཚབ་ཁང་གི་དྲུང་ཆེ་སྐུ་ཞབས་ཇཱོན་ ཨེན་ ཝིན་སི་ཊཱེཌ་ (John N. Winstead, Secretary, U.S Embassy in Delhi) མཆོག་རྣམ་གཉིས་དང་ལྷན་མཇལ་འཕྲད་ཀྱིས་བོད་ནང་གི་གནས་སྟངས་དང་། བོད་དོན་ལ་རྒྱབ་སྐྱོར་སྔར་ལྷག་ཡོང་བའི་འབོད་སྐུལ་ཞུས་ཡོད་པ་མ་ཟད། ཕན་ཚུན་བཀའ་བསྡུར་དང་དྲི་བ་དྲིས་ལན་ཆུ་ཚོད་གཉིས་མ་ཟིན་ཙམ་གནང་ཡོད་འདུག

རྒྱ་གར་གྲོས་ཚོགས་འོག་མའི་པན་ཇབ་མངའ་སྡེའི་འཐུས་མི་སྐུ་ཞབས་མཱ་ནེ་ཤི་ཏེ་ཝཱ་རི་མཆོག

བོད་དོན་ཞུ་སྐུལ་གྱི་ལས་འགུལ་སྤེལ་སྐབས་སྤྱི་འཐུས་རྣམ་པས་གཙོ་བོ་རྒྱ་གར་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་སླར་གསོ་ཡོང་ཐབས་དང་། དེ་བཞིན་བོད་མི་རིགས་ཀྱི་ངོ་བོ་དང་རིག་གཞུང་མུ་མཐུད་རྒྱུན་གནས་ཆེད་རྒྱལ་སྤྱིའི་ཐོག་ཏུ་བོད་དོན་གླེང་སློང་ཡོང་བར་རྒྱ་གར་གཞུང་གིས་ཐུགས་འགན་གཙོ་བོ་བཞེས་དགོས་པའི་འབོད་སྐུལ་དང་། རྒྱལ་སྤྱིའི་དབུ་ཁྲིད་རྣམ་པ་མཉམ་འབྲེལ་གྱི་ཐོག་ནས་བོད་ནང་འགྲོ་བ་མིའི་ཐོབ་ཐང་དང་། ཆོས་དད་རང་དབང་ལ་རྒྱབ་སྐྱོར། ༧གོང་ས་མཆོག་གི་སྐུ་ཚབ་དང་། རྒྱ་ནག་གཞུང་གི་དབར་ཞི་མོལ་ཡོང་ཐབས།

རྒྱ་གར་གྲོས་ཚོགས་འོག་མའི་ཨོ་དྷི་ཤ་མངའ་སྡེའི་འཐུས་མི་སྐུ་ཞབས་སཱབ་ཏ་གྷཧི་རི་ ཨུལ་ཀཱ་མཆོག 

མཉམ་འབྲེལ་རྒྱལ་ཚོགས་ཀྱི་གནམ་གཤིས་དང་ཁོར་ཡུག་གི་ཚོགས་འདུ་སོགས་ཀྱི་ཐོག་བོད་ཀྱི་རང་བྱུང་ཁོར་ཡུག་གིས་རྒྱལ་སྤྱིའི་ཐོག་ལ་ཤུགས་རྐྱེན་གང་འདྲ་ཐེབས་ཀྱི་ཡོད་མེད་ཐད་ཚན་རིག་དང་མཐུན་པའི་ཞིབ་འཇུག་ཡོང་ཐབས་བཅས་ཀྱི་སྐོར་རྒྱབ་སྐྱོར་དང་། བོད་ནང་གི་བོད་མི་རྣམས་ལ་ཚད་ལས་བརྒལ་བའི་སྡུག་སྦྱོང་མནར་གཅོད་གཏོང་བཞིན་པར་གདུང་སེམས་མཉམ་བསྐྱེད་མཚོན་སླད། དགུན་དུས་ཨོ་ལིམ་པིག་རྩེད་འགྲན་ལ་གཞུང་འབྲེལ་མཛད་གཙོ་རྣམས་མཉམ་ཞུགས་མི་གནང་བའི་འབོད་སྐུལ་བཅས་ཞུས་གནང་ཡོད་འདུག

ཨ་རིའི་གཞུང་ཚབ་ཀྱི་ཆབ་སྲིད་སྡེ་ཚན་གྱི་འགན་འཛིན་སྐུ་ཞབས་གྷ་རཱམ་ཌི་མཱེ་ཡེར་མཆོག་དང་། དྲུང་ཆེ་སྐུ་ཞབས་ཇཱོན་ ཨེན་ ཝིན་སི་ཊཱེཌ་མཆོག་རྣམ་གཉིས།

ཐེངས་འདིའི་བོད་དོན་ཞུ་སྐུལ་ནི་ཕྱི་ལོ་ ༢༠༢༡ ཟླ་ ༡༢ ཚེས་ ༡༤ ནས་དངོས་སུ་འགོ་འཛུགས་ཏེ། ཚེས་ ༢༣ བར་ཉིན་གྲངས་བཅུའི་རིང་གནང་རྒྱུ་ཡིན་པ་དང་། ཞུ་སྐུལ་སྐབས་ཚོགས་དྲུང་ལས་ཁུངས་ཀྱི་ལས་བྱེད་བསྟན་འཛིན་གསལ་སྒྲོན་ལགས་དང་། འཕགས་བོད་འབྲེལ་མཐུད་ལས་ཁུངས་ཀྱི་འབྲེལ་ཡོད་ལས་བྱེད་ཆོས་ཉིད་ཚེ་རིང་ལགས་རྣམ་གཉིས་མཉམ་བཅར་ཞུས་གནང་ཡོད་པ་བཅས། །

Menu