༄༅། །ཕྱི་ལོ་ ༢༠༢༤ ཟླ་ ༨ ཚེས་ ༢༦ ཉིན་བོད་མི་མང་སྤྱི་འཐུས་ལྷན་ཚོགས་ནས་མོན་གྷོ་འདོད་རྒུ་གླིང་གཞིས་ཆགས་སུ་གོ་སྒྲིག་ཞུས་པའི་ཉིན་གྲངས་ལྔའི་རིང་གི་ས་གནས་འཐུས་ཚོགས་ཚགས་ཚུད་དང་སྲ་བརྟན་སླད་ལས་དོན་བྱེད་ཕྱོགས་ཀྱི་ཟབ་སྦྱོང་མཇུག་བསྒྲིལ་གནང་ཡོད་འདུག
ཐེངས་འདིའི་ཟབ་སྦྱོང་ནང་མོན་གྷོ་འདོད་རྒུ་གླིང་གི་ས་གནས་འཐུས་ཚོགས་ཀྱི་འཐུས་མི་ ༡༠ དང་། ས་གནས་འགོ་འཛིན་ ༡། ས་གནས་རང་བདེན་ཚོགས་ཆུང་གི་ཚོགས་མི་ ༥། བཅས་ཁྱོན་ཚོགས་བཅར་བ་མི་གྲངས་ ༡༦ མཉམ་ཞུགས་གནང་ཡོད་འདུག
དེ་ཡང་ཕྱི་ཚེས་ ༢༤ ཉིན་ཟབ་ཁྲིད་གནང་མཁན་སྤྱི་འཐུས་རྣམ་གཉིས་ཀྱི་ལམ་སྟོན་འོག ཟབ་སྦྱོང་ནང་མཉམ་ཞུགས་གནང་མཁན་རྣམས་ཚོགས་ཆུང་ཁག་ལ་ཆ་བགོས་ཀྱིས་ཕྱི་ཚེས་ ༢༥ དང་ ༢༦ བཅས་ཉིན་གཉིས་རིང་གི་དམར་ཁྲིད་གྲོས་ཚོགས་བསྐྱང་རྒྱུའི་ལས་རིམ་དང་ཡིག་ཆ་ཁག་བཅས་གྲ་སྒྲིག་གནང་བ་དང་། ཟབ་སྦྱོང་ཉིན་བཞི་པ་དང་། ལྔ་པའི་དམར་ཁྲིད་སྐབས་ཚོགས་བཅར་བ་རྣམས་ནས་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་དངོས་སུ་འཚོགས་པ་ལྟར། ཐོག་མར་རྟེན་འབྲེལ་གསོལ་ཇ་འབྲས་སིལ་འདེགས་འབུལ་དང། རིམ་པས་ཚོགས་གཙོས་ཚོགས་འདུ་དབུ་འཛུགས་ཀྱི་གསལ་བསྒྲགས་གནང་རྗེས། བོད་རྒྱལ་ཁབ་ཆེན་པོའི་རྒྱལ་གླུ་བཏང་བ། ས་འཐུས་ཚོགས་གཙོས་ཚོགས་འདུ་དབུ་འཛུགས་ཀྱི་གསུང་བཤད་གནང་བ་སོགས་དམར་ཁྲིད་གྲོས་ཚོགས་ཚོགས་འདུག་པ་དང་།
ཉིན་གཉིས་ཀྱི་དམར་ཁྲིད་སྐབས། ས་འཐུས་རིམ་པས་ཚོགས་འདུ་གཙོ་སྐྱོང་གནང་ཞིང་། དེའི་སྐབས་ཚོགས་བཅར་བ་རྣམས་ཀྱིས་གཞུང་འབྲེལ་གདུང་སེམས་མཉམ་སྐྱེད་ཀྱི་གྲོས་ཆོད་གྲོས་འཆར་གཅིག་དང་། སྐར་རྟགས་ཅན་གྱི་དྲི་བ་གཉིས། ཐུགས་སྣང་གཞེན་བསྐུལ་གྱི་གྲོས་འཆར་གཉིས། ལོ་འཁོར་ལས་བསྡོམས་གཅིག
སྒྲིག་གཞི་བསྐྱར་བཅོས་གཉིས། ས་འཐུས་སྒེར་གྱི་གྲོས་ཆོད་གྲོས་འཆར་གཉིས། སྔོན་རྩིས་ཚོད་དཔག་འཆར་རྩིས་ཚོགས་ཆུང་གི་སྙན་ཐོ། གཅོག་ཆ་དང་སྤར་ཆའི་གྲོས་འཆར་གཉིས། གཏོང་ལེན་ཁྲིམས་ཡིག་སོགས་ལས་ཉིན་སོ་སོའི་གྲོས་ཚོགས་ཀྱི་ལས་རིམ་དང་བཅས་པ་དཔེ་མཚོན་གྱིས་ཡིག་ཆ་ཆ་ཚང་ཡོད་པའི་ཐོག་དམར་ཁྲིད་ལས་རིམ་བསྐྱངས་གནང་བ་དང་། དམར་ཁྲིད་ལས་རིམ་སྐབས་ཟབ་སྦྱོང་ནང་མཉམ་ཞུགས་གནང་མཁན་ཚང་མས་ཐུགས་སྣང་ཆེན་པོས་མཉམ་ཞུགས་དང་ཆ་ཤས་བླངས་ཡོད་ལ། ཟབ་ཁྲིད་གནང་མཁན་བོད་མི་མང་སྤྱི་འཐུས་རྣམ་གཉིས་ནས་སྐབས་དུས་སོ་སོར་སྐྱོན་གནད་ཡོ་བསྲང་གི་སློབ་སྟོན་ཡང་གནང་ཡོད་འདུག
ཟབ་སྦྱོང་ཉིན་མཐའ་མ་ཕྱི་ཚེས་ ༢༦ ཉིན་མཇུག་བསྡོམས་མཛད་སྒོ་ཞིག་ཚོགས་ཤིང་། དེ་ཡང་ཐོག་མར་ཟབ་སྦྱོང་ནང་མཉམ་ཞུགས་གནང་མཁན་ཁག་ཅིག་ནས་སོ་སོའི་མྱོང་ཚོར་སྐོར་གསུངས་པ་དང་། དེ་རྗེས་མོན་གྷོ་འདོད་རྒུ་གླིང་ས་གནས་འགོ་འཛིན་ལྷག་པ་སྒྲོལ་མ་ལགས་ཀྱིས་མཇུག་བསྡོམས་གསུང་བཤད་དང་།
བོད་མི་མང་སྤྱི་འཐུས་ཀུན་དགའ་བསོད་སྟོབས་མཆོག་གིས་ཟབ་སྦྱོང་བ་རྣམ་པས་ཉིན་ལྔའི་རིང་ཐུགས་སྣང་ཆེན་པོས་ཟབ་སྦྱོང་ནང་མཉམ་ཞུགས་དང་ཆ་ཤས་གང་ལེགས་ལེན་པར་ལེགས་སོའི་བསྔགས་བརྗོད་དང་། མ་འོངས་པར་ས་གནས་འཐུས་ཚོགས་འཚོགས་སྐབས་ཕན་ཐོགས་ཡོང་རྒྱུ་སོགས་གསུངས་གནང་སོང་། དེ་བཞིན་བོད་མི་མང་སྤྱི་འཐུས་དགེ་བཤེས་སྨོན་ལམ་མཐར་ཕྱིན་མཆོག་གིས་ཟབ་སྦྱོང་ནང་མཉམ་ཞུགས་གནང་མཁན་ཚོས་ཟབ་སྦྱོང་གོ་སྒྲིག་ཞུས་པ་བཞིན་འགན་ཁུར་ཡག་པོ་བཞེས་པའི་སྐོར་དང་། ས་གནས་འཐུས་མི་རྣམ་པ་ཚོས་རྒྱུན་དུ་བོད་མིའི་སྒྲིག་འཛུགས་ཀྱི་ཁྲིམས་སྒྲིག་སོགས་ལ་ཐུགས་སྣང་གནང་གལ་ཆེན་པོ་ཡིན་པ། ད་རེས་ཟབ་སྦྱོང་གི་གོ་སྐབས་ཐོབ་པ་བརྒྱུད་ས་གནས་འཐུས་ཚོགས་འཚོགས་སྐབས་དབུས་ཀྱི་གྲོས་ཚོགས་ཚོགས་པ་བཞིན་གནང་ཐུབ་ན་ཕན་ཐོགས་ཡོད་པ་སོགས་ཀྱི་སྐོར་གསུངས་གནང་། མཐར་མོན་གྷོ་འདོད་རྒུ་གླིང་ས་གནས་འཐུས་ཚོགས་ཀྱི་ཚོགས་གཙོ་པདྨ་རྡོ་རྗེ་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་རྗེས། ཟབ་སྦྱོང་གི་མཇུག་བསྡོམས་མཛད་སྒོ་མཇུག་བསྒྲིལ་གནང་ཡོད་འདུག
ཟབ་སྦྱོང་གི་ཉིན་མཐའ་མ་ཕྱི་ཟླ་ ༨ ཚེས་ ༢༦ ཉིན་གུང་ཚོགས་བཅར་བ་ཡོངས་དང་། མོན་གྷོ་འདོད་རྒུ་གླིང་གི་གཞུང་འབྲེལ་དང་གཞུང་འབྲེལ་མིན་པའི་ཚོགས་སྐྱིད་ཁག་གི་གནད་ཡོད་མི་སྣ་ཁག་མགྲོན་འབོད་ཞུས་པ་ལྟར་ལྷན་འཛོམས་ཀྱིས་གསོལ་སྟོན་གོ་སྒྲིག་ཞུས་པ་ལེགས་པར་གྲུབ་རྗེས། ཐེངས་འདིའི་ཟབ་སྦྱོང་གི་ལས་དོན་ཡོངས་སུ་ལེགས་གྲུབ་བྱུང་ཡོད།
རྩ་བའི་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ནས་ད་བར་བཞུགས་སྒར་རྡ་ས་དང་། ཨོ་རི་ས། ལ་དྭགས། སྒང་ཏོག ས་ལུ་སྒར། ཌལ་ཧོར། སྡེ་ར་ལྡུན། སྦིར། གྷོ་ཝ་ཧ་ཀྲི། ཧོན་སུར་བཅས་ལ་ས་འཐུས་ཟབ་སྦྱོང་གོ་སྒྲིག་ཞུས་ཟིན་པ་དང་། ད་རེས་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་གཞིས་ཆགས་སུ་ས་འཐུས་ཟབ་སྦྱོང་གོ་སྒྲིག་ཞུས་པ་དེ་བཞིན་ས་འཐུས་ཟབ་སྦྱོང་ཐེངས་བཅུ་གཅིག་པ་ཆགས་ཀྱི་ཡོད་པ་བཅས།
