༄༅། ། ཕྱི་ལོ་ ༢༠༢༤ ཟླ་ ༨ པའི་ཚེས་ ༡༩ ནས་ ༢༢ བར་ཨ་རིའི་རྒྱལ་ཡོངས་མང་གཙོ་ལྟེ་གནས་ཁང་གིས་ཨ་རིའི་གྲོང་ཁྱེར་ཤཱི་ཁ་གྷོ་ (Chicago) ནང་གོ་སྒྲིག་ཞུས་པའི་རྒྱལ་སྤྱིའི་དབུ་ཁྲིད་ཀྱི་ཚོགས་འདུ་ (International Leaders Forum) ཞེས་པའི་ཐོག་བོད་མི་མང་སྤྱི་འཐུས་ཀརྨ་དགེ་ལེགས་མཆོག་དང་། སྤྱི་འཐུས་བསྟན་འཛིན་ཆོས་འཛིན་མཆོག སྤྱི་འཐུས་བློ་བཟང་རྒྱ་མཚོ་སྲི་ཐར་མཆོག་བཅས་ལས་གྲུབ་པའི་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་མཉམ་ཞུགས་གནང་ཡོད་པ་རེད། འཛམ་གླིང་རྒྱལ་ཁབ་ཁག་འདྲ་མིན་ནས་ཕེབས་པའི་དབུ་ཁྲིད་རྣམས་དང་ལྷན་ཕན་ཚུན་འབྲེལ་བ་དམ་ཟབ་ཡོང་སླད་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆེན་དེའི་ཐོག་གདན་ཞུས་གནང་བ་ཞིག་ཆགས་ཀྱི་ཡོད།

ཕྱི་ཚེས་ ༡༩ ཉིན་ཤཱི་ཁ་གྷོར་རྟེན་གཞི་བྱས་པའི་ཨོ་བྷ་མ་བསྟི་གནས་ཁང་ (Obama Foundation) དུ་གཞུང་འབྲེལ་གཟིགས་སྐོར་ཞིག་གོ་སྒྲིག་ཞུས་པའི་ཐོག་ཕྱོགས་ཕེབས་བོད་མི་མང་སྤྱི་འཐུས་བསྟན་འཛིན་ཆོས་འཛིན་མཆོག་གདན་ཞུས་གནང་བ་ལྟར། འཛམ་གླིང་རྒྱལ་ཁབ་ཁག་འདྲ་མིན་ནས་ཕེབས་པའི་གྲོས་ཚོགས་འཐུས་མི་དང་། ལས་འགུལ་བ་སོགས་གཞོན་སྐྱེས་དབུ་ཁྲིད་ཁག་ཅིག་དང་ལྷན་མཉམ་ཞུགས་གནང་ཡོད། དེ་ཉིན་དགོང་དྲོ་བོད་མི་མང་སྤྱི་འཐུས་རྣམ་པ་ཚོགས་འདུའི་ཕེབས་བསུའི་མཛད་སྒོ་དང་། ཨ་རིའི་རྒྱལ་ཡོངས་ཚོགས་ཆེན་གྱི་ལས་རིམ་བརྙན་ལམ་བརྒྱུད་གཟིགས་འབུལ་ཞུ་རྒྱུའི་ལས་རིམ་ཞིག་གོ་སྒྲིག་ཞུས་པའི་ཐོག་མཉམ་ཞུགས་གནང་སྟེ། ཚོགས་ཆེན་ལ་གཟིགས་ཞིབ་དང་། ཚོགས་ཆེན་གྱི་ལས་རིམ་འགྲོ་སྟངས་ཐོག་རྒྱལ་སྤྱིའི་དབུ་ཁྲིད་ཀྱི་ཚོགས་འདུའི་ཐོག་ཕེབས་པའི་ཚོགས་བཅར་བ་ཕན་ཚུན་གོ་བསྡུར། དེ་བཞིན་རྒྱལ་སྤྱིའི་དབུ་ཁྲིད་རྣམས་དང་ལྷན་ཕན་ཚུན་འབྲེལ་བ་བཟོ་རྒྱུའི་གོ་སྐབས་བྱུང་ཡོད་འདུག

ཉིན་གསུམ་རིང་གི་རྒྱལ་སྤྱིའི་དབུ་ཁྲིད་ཀྱི་ཚོགས་འདུའི་ཐོག་སྤྱི་འཐུས་རྣམ་པས་ཚོགས་བཅར་བ་རྒྱལ་སྤྱིའི་དབུ་ཁྲིད་རྣམས་ལ་བོད་ནང་གི་ད་ལྟའི་ཛ་དྲག་གནས་སྟངས་སྐོར་ངོ་སྤྲོད་དང་། ཚོགས་འདུའི་ཐོག་གསུང་བཤད་གནང་མཁན་རྣམས་ལ་དྲི་བ་དྲིས་ལན་གྱི་ལས་རིམ་ཐོག་ནས་བོད་ནང་གི་གནས་སྟངས་དང་། ཨ་རིའི་གྲོས་ཚོགས་ནང་སྲིད་དོན་ཚོགས་པ་ཐུན་མོང་གིས་བོད་དོན་ཐོག་ཇི་ལྟར་རྒྱབ་སྐྱོར་གནང་གི་ཡོད་པའི་སྐོར་དང་། ད་ལྟའི་འོས་བསྡུའི་ལས་རིམ་སྐབས་ཀྱི་ཕྱི་འབྲེལ་སྲིད་བྱུས་ཀྱི་བགྲོ་གླེང་དེ་བཞིན་བོད་ཙམ་མ་ཡིན་པར་རྒྱལ་སྤྱི་ཁྱོན་ཡོངས་དང་འབྲེལ་བ་ཇི་ལྟར་ཆགས་ཀྱི་ཡོད་པ་སོགས་ཀྱི་ཐོག་གླེང་སློང་གནང་ཡོད་འདུག་པ་བཅས།