༄༅། ། ཕྱི་ལོ་ ༢༠༢༢ ཟླ་ ༡༡ ཚེས་ ༢༥ ཉིན་བོད་མི་མང་སྤྱི་འཐུས་ལྷན་ཚོགས་ནས་ཉིན་གྲངས་བཞིའི་རིང་གོ་སྒྲིག་ཞུས་པའི་ “བོད་མི་མང་སྤྱི་འཐུས་ལྷན་ཚོགས་ཀྱི་ཐབས་བྱུས་ཚོགས་འདུ།” ཐེངས་གཉིས་པ་དེ་བཞིན་རྒྱལ་ཁའི་ངང་མཇུག་བསྒྲིལ་གནང་སོང་།
དེ་ཡང་གོང་ཚེས་ཉིན་གྱི་ཕྱི་དྲོ་ཆུ་ཚོད་ ༣།༣༠ ཐོག་དཔལ་ལྡན་ཚོགས་གཙོ་སྦྲེལ་པོ་མཆོག་གིས་གཙོ་སྐྱོང་འོག ཚོགས་བཅར་བ་སྤྱི་འཐུས་རྣམ་པས་མ་འོངས་པའི་ལས་འཆར་སྤེལ་ཕྱོགས་དང་འབྲེལ་བའི་ཐོག་དགོངས་ཚུལ་ལྷུགས་པོར་གསུངས་གནང་རྗེས། དཔལ་ལྡན་ཚོགས་གཙོ་མཆོག་གིས་གཙོ་བོ་ཐེངས་འདིའི་ཐབས་བྱུས་ཚོགས་འདུའི་ཐོག་གསུང་བཤད་གནང་མཁན་གདན་ཞུས་གནང་ཕྱོགས་དང་། ཚོགས་འདུ་གོ་སྒྲིག་གནང་ཕྱོགས་སྐོར་དང་། སྤྱི་འཐུས་རྣམ་པའི་དགོངས་ཚུལ་དང་འབྲེལ་བའི་ཐོག་གསལ་བཤད་དགོས་རིགས་ཁག་གནང་སོང་།
མཐར། དཔལ་ལྡན་ཚོགས་གཞོན་མཆོག་གིས་ཚོགས་འདུ་མཇུག་བསྡོམས་ཀྱི་གསུང་བཤད་གནང་དོན། ད་རེས་ཉིན་གྲངས་བཞིའི་རིང་ཚོགས་པའི་ཐབས་བྱུས་ཚོགས་འདུ་འདི་དང་འབྲེལ་བའི་ཐོག་སྤྱི་འཐུས་རྣམ་པས་ལེགས་སྤེལ་ཉེས་འགོག་གི་དགོངས་འཆར་གང་གནང་བ་དེ། ཚོགས་གཙོ་སྦྲེལ་པོས་དབུས་པའི་རྒྱུན་ལས་རྣམ་པ་ཚོས་མཁྱེན་རྟོགས་བྱུང་ཡོད་རེད་ཅེས་ཞུ་རྒྱུ་དང་། རྩ་བའི་ཕྱི་ཟླ་གསུམ་པའི་སྐབས་བོད་མི་མང་སྤྱི་འཐུས་རྣམ་པ་ཚང་མ་མཉམ་འཛོམས་ཀྱིས་ལས་འཆར་གང་དང་གང་དགོས་ཀྱི་ཡོད་པའི་ཐོ་འགོད་དང་། དེ་བཞིན་ཕྱི་ཟླ་ ༩ པའི་ནང་ཧར་ཡ་ནར་ཐབས་བྱུས་ཚོགས་འདུ་ཚོགས་པའི་སྐབས་སུ་མ་འོངས་བྱེད་འཆར་གྱི་དགོངས་འཆར་གང་ཕེབས་པ་བཅས་གཞིར་བཞག་སྟེ། ཚོགས་གཙོ་སྦྲེལ་པོས་ལས་འཆར་བང་བསྒྲིགས་དང་སྒྲིག་བཞིན་ཡོད།
དེ་རིང་རྣམ་པ་ཚོས་དགོངས་འཆར་གནང་བ་ཁག་ལ་ང་ཚོས་མ་འོངས་པར་དགོངས་པ་བཞེས་ཐུབ་ཀྱི་རེད་ཅེས་གསུངས་པ་དང་། གཞན་ཡང་ད་རེས་ཉིན་གྲངས་བཞིའི་རིང་ཐབས་བྱུས་ཚོགས་འདུའི་སྐབས་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་འདུའི་འགྲོ་ལུགས་དང་། ལས་དོན་བྱེད་ཕྱོགས་ཐོག་ཚོགས་གཙོའི་གསུང་བཤད་ཀྱི་ལས་རིམ་དང་། དེ་བཞིན་བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་པ་རྣམ་པས་སོ་སོའི་ཉམས་ཞིབ་ཀྱི་བརྗོད་གཞི་དང་འབྲེལ་བའི་གཏམ་བཤད་ཀྱི་ལས་རིམ་བཞག་དགོས་དོན་དང་། མ་འོངས་པའི་ལས་འཆར་སྐོར་སོགས་ངོ་སྤྲོད་གནང་སོང་།
གཞན་ཡང་དཔལ་ལྡན་ཚོགས་གཙོ་སྦྲེལ་པོ་མཆོག་གིས་ད་རེས་ཀྱི་ཚོགས་འདུའི་ཐོག་ཚོགས་བཅར་བ་སྤྱི་འཐུས་རྣམ་པས་ཚོགས་འདུའི་ཐོག་འགན་ཁུར་མཉམ་ཞུགས་གང་ལེགས་གནང་བར་ཐུགས་རྗེ་ཆེ་ཞུས་པ་དང་། དེ་བཞིན་ཚོགས་དྲུང་ལས་ཁུངས་ཀྱི་དྲུང་ཆེ་གཙོས་པའི་ལས་བྱེད་ཡོངས་ནས་ཚོགས་འདུ་གྲ་སྒྲིག་སླད་ཞུ་སྒོ་གང་ཅིར་འཐུས་ཤོར་མེད་པར་ཚགས་ཚུད་གནང་བར་ཐུགས་རྗེ་ཆེ་ཞུས་གནང་སོང་།
ཕྱི་ཚེས་ ༢༢ ནས་འགོ་བཙུགས་པའི་ཉིན་གྲངས་བཞིའི་རིང་གི་ཐབས་བྱུས་ཚོགས་འདུ་འདིའི་ཐོག་ཝཱ་ཎ་དབུས་བོད་ཀྱི་གཙུག་ལག་སློབ་གཉེར་ཁང་གི་བོད་ཀྱི་ལོ་རྒྱུས་ཉམས་ཞིབ་པ་དང་ལོ་རྒྱུས་སློབ་དཔོན་བྱམས་པ་བསམ་གཏན་ལགས་ཀྱིས་ “བོད་ཀྱི་ལོ་རྒྱུས་ཀྱི་གནས་བབ།” ཅེས་པའི་བརྗོད་གཞིའི་ཐོག་གསུང་བཤད་དང་།
བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས་ཀྱིས་ “རྒྱ་ནག་གཞུང་གི་སྒྲོམ་གཞི་དང་། ཚོགས་འདུ་རིམ་པའི་ནང་དོན་སྐོར།” ཞེས་པའི་བརྗོད་གཞིའི་ཐོག་གསུང་བཤད། ༧གོང་ས་མཆོག་གི་སྐུ་ཚབ་ཟུར་པ་དང་། གཏན་འཇགས་ཐབས་ཇུས་འཆར་འགོད་ཚོགས་ཆུང་གི་སློབ་སྟོན་པ་སྐལ་བཟང་རྒྱལ་མཚན་ལགས་ཀྱིས་“བོད་རྒྱ་འབྲེལ་མོལ་འབྱུང་རིམ་དང་། དེ་འབྲེལ་རྒྱལ་སྤྱིའི་ནང་ཆབ་སྲིད་འགྲོ་སྟངས།” ཞེས་པའི་བརྗོད་གཞིའི་ཐོག་གསུང་བཤད། དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོོ་བསོད་ནམས་བསྟན་འཕེལ་མཆོག་གིས་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་འདུའི་འགྲོ་ལུགས་དང་ལས་དོན་བྱེད་ཕྱོགས་སྐོར་ལ་གསུང་བཤད། བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་པ་རྣམ་པས། “བོད་མཐོ་སྒང་གི་ཁོར་ཡུག་གནས་བབ།” དང་། “བོད་ནང་འགྲོ་བ་མིའི་ཐོབ་ཐང་གི་གནས་སྟངས།” “རྒྱ་གཞུང་གིས་བོད་ནང་དཔལ་འབྱོར་སྲིད་བྱུས་ཀྱི་གནས་བབ།” “བོད་ནང་ཆོས་དད་རང་དབང་།” “རྒྱ་ནག་གི་དམག་དོན་སྐོར།” བཅས་ཀྱི་བརྗོད་གཞིའི་ཐོག་གཏམ་བཤད་གནང་བ་མ་ཟད། ཚོགས་བཅར་བ་སྤྱི་འཐུས་རྣམ་པས་སྐབས་ཐོག་སོ་སོར་དོགས་འདྲི་དང་། དགོངས་ཚུལ་ལྷུགས་པོ་གནང་སོང་།
གཞན་ཡང་སྐབས་འདིའི་ཐབས་བྱུས་ཚོགས་འདུའི་ཐོག་བོད་ཀྱི་རྩོད་རྙོག་འདུམ་སྒྲིག་ལྟེ་གནས་ཁང་གི་འགན་འཛིན་ཀརྨ་ལེགས་བཤད་ལགས་དང་། འགན་འཛིན་གཞོན་པ་བསོད་ནམས་བདེ་ཆེན་ལགས་རྣམ་གཉིས་ཀྱིས་རྩོད་རྙོག་འདུམ་སྒྲིག་གནང་ཕྱོགས་དང་འབྲེལ་བའི་ལས་རིམ་ཁག་ཅིག་བཅས་བསྐྱངས་གནང་ཡོད་པ་བཅས། །
