བོད་མི་མང་སྤྱི་འཐུས་ཚོགས་གཙོ་གཞོན་པ་མཁན་པོ་བསོད་ནམས་བསྟན་འཕེལ་མཆོག་གིས་གཙོས་སྤྱི་འཐུས་རྒྱ་རི་བུ་ཕྲུག་མཆོག་དང་། སྤྱི་འཐུས་ཀརྨ་ཡེ་ཤེས་མཆོག སྤྱི་འཐུས་རྨོག་རུ་བསྟན་པ་མཆོག་བཅས་སྤྱི་འཐུས་བཞི་ལས་གྲུབ་པའི་ཚོགས་ཆུང་ཞིག་གཞུང་འབྲེལ་ཐོག་ཐེ་ཝན་གྱི་རྒྱལ་ས་ཐེ་པེ་རུ་ཕེབས་འབྱོར་གནང་ཡོད་པ་དང་། འདི་ཟླའི་ཕྱི་ཚེས་ ༧ ནས་བཟུང་གསར་འགོད་པ་དང་། ཐེ་ཝན་གྲོས་ཚོགས་འཐུས་མི། བོད་རྒྱ་མཐུན་ཚོགས་ཀྱི་ཚོགས་གཙོ་གཙོས་ཚོགས་མི་རྣམ་པ་དང་། བོད་ཀྱི་ཆོས་ཚོགས་ཁག་ཅིག་ཏུ་མཇལ་འཕྲད་དང་གཟིགས་སྐོར་སོགས་ཀྱི་མཛད་འཆར་སྐྱོང་བཞིན་ཡོད་པ་རེད།
འདི་ཟླའི་ཕྱི་ཚེས་ ༨ ཉིན་བོད་མི་མང་སྤྱི་འཐུས་རྣམ་པ་བོད་བརྒྱུད་ནང་བསྟན་ཆོས་ཚོགས་ཁག་ཅིག་ཏུ་གཟིགས་སྐོར་གནང་སྟེ་ཆོས་ཚོགས་ཁག་གི་ཚོགས་གཙོ་སོགས་དང་ལྷན་༸གོང་ས་༸སྐྱབས་མགོན་ཆེན་པོ་མཆོག་གི་རླབས་ཆེན་གྱི་མཛད་འཕྲིན་སྐོར་དང་། བོད་ཀྱི་ཆོས་དང་རིག་གཞུང་འབྲེལ་བའི་སྐོར་ལ་ཕན་ཚུན་ངོ་སྤྲོད་གནང་ཡོད་པ་དང་། ཉིན་རྒྱབ་ཆུ་ཚོད་ ༣ པའི་ཐོག་ཐེ་ཝན་རྒྱལ་སར་ཡོད་པའི་ཐེ་ཝན་གྲོས་ཚོགས་ལས་ཁུངས་ཀྱི་ཚོགས་ཁང་ ༡༠༥ ནང་ཐེ་ཝན་གྲོས་ཚོགས་འཐུས་མི་ལྕམ་སྐུ་ཤའོ་མེ་ཆིན་མཆོག་དང་། སྤྱི་འཐུས་ལྕམ་སྐུ་ཁྲིན་ཇེ་རུག་མཆོག་རྣམ་གཉིས་དང་མཇལ་མོལ་གནང་ཡོད། མཇལ་མོལ་སྐབས་བོད་མི་མང་སྤྱི་འཐུས་ཚོགས་གཙོ་གཞོན་པ་སློབ་དཔོན་བསོད་ནམས་བསྟན་འཕེལ་མཆོག་གིས་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་ཞིག་ཐེ་ཝན་དུ་ཡོང་དགོས་པའི་རྒྱུ་མཚན་རྣམས་ངོ་སྤྲོད་དང་འབྲེལ་། རང་ལུས་མེར་བསྲེགས་ཀྱིས་མཚོན་པའི་བོད་ནང་གི་གནས་བབ་ཛ་དྲག་ལ་རྒྱབ་སྐྱོར་དང་གདུང་སེམས་མཉམ་བསྐྱེད་ཡོང་ཐབས་སོགས་ཞུས་རྗེས་ཐེ་ཝན་གྲོས་ཚོགས་འཐུས་མི་རྣམ་གཉིས་ནས་ཐེ་ཝན་གྲོས་ཚོགས་འཐུས་མི་མང་པོས་བོད་དོན་ལ་རྒྱབ་སྐྱོར་ཡོད་པ་དང་། བོད་ཀྱི་གཞོན་སྐྱེས་མང་པོ་ཞིག་གིས་རང་ལུས་མེར་བསྲེགས་གནང་བར་གདུང་སེམས་མཉམ་བསྐྱེད་ཡོད། བོད་ཀྱི་རང་ལུས་མེར་བསྲེགས་ལས་འགུལ་དེ་ནི་རང་དབང་མེད་པའི་གནས་བབ་འོག་གདམ་ཀ་གཞན་མེད་པ་ཞིག་ཡིན་པས་དེ་ལ་གདུང་སེམས་མཉམ་བསྐྱེད་བྱེད་དགོས་པ་གལ་ཆེན་པོ་ཡིན་པ་དང་། རྒྱ་ནག་དམར་པོའི་དབང་ཤུགས་འོག་གསར་འགྱུར་རང་དབང་ལ་བཀག་སྡོམ་ཆེན་པོ་ཡོད་ནའང་དེང་དུས་དྲ་རྒྱའི་མཐུན་རྐྱེན་སྟབས་བདེ་དབང་གིས་གནས་ཚུལ་ཅུང་ཙམ་རག་ཐུབ་པ་དེ་ཡང་གོ་སྐབས་བཟང་པོ་ཞིག་ཡིན་ཚུལ་སོགས་གསུངས་ཡོད་པ་རེད། བོད་མི་མང་སྤྱི་འཐུས་རྣམ་པས་ཀྱང་བོད་ནང་གི་རང་ལུས་མེར་བསྲེགས་ལ་གདུང་སེམས་མཉམ་བསྐྱེད་ཡོང་ཐབས་དང་། ཐེ་ཝན་བོད་དོན་རྒྱབ་སྐྱོར་ཚོགས་པ་གསར་འཛུགས་ཡོང་ཐབས། ཐེ་ཝན་མཐོ་སློབ་ཁག་ཏུ་བོད་ཀྱི་སློབ་ཕྲུག་གསར་འཇུག་ཡོང་ཐབས། ཐེ་ཝན་གྲོས་ཚོགས་འཐུས་མི་ཁག་བཞུགས་སྒར་རྡ་རམ་ས་ལར་འཚམས་འདྲིར་ཕེབས་ཐབས། ཕྱི་སྐྱོད་ལག་དེབ་སེར་པོ་བསྣམ་པའི་ཐེ་ཝན་ནང་བཞུགས་དགེ་འདུན་པ་ཚོ་ཟླ་གཉིས་རེའི་མཚམས་རྒྱལ་ཁོངས་གཞན་དུ་ཐོངས་མཆན་ཞུ་བར་བཅར་དགོས་པའི་དཀའ་ངལ་སེལ་ཐབས་སོགས་ཀྱི་སྐོར་ཞུས་ཡོད་པ་རེད། དེ་ནས་དགོང་དྲོ་ཆུ་ཚོད་ ༨ པ་ནས་བོད་རྒྱ་མཐུན་ཚོགས་ཀྱི་ཚོགས་གཙོ་གཙོས་པའི་ཚོགས་མི་རྣམ་པར་མཇལ་འཕྲད་དང་། ཐེ་ཝན་དོན་གཅོད་ཁང་དང་། བོད་རྒྱ་མཐུན་ཚོགས་ཐུན་མོང་གི་གོ་སྒྲིག་འོག་བོད་རྒྱ་མཐུན་ཚོགས་ཀྱི་ཚོགས་འདུ་ཞིག་སྐོང་འཚོགས་གནང་བ་དང་། བོད་དོན་སྐོར་གྱི་བགྲོ་གླེང་དང་དྲི་བར་དྲིས་ལན་སོགས་གནང་ཡོད་པ་མ་ཟད། སྐབས་དེར་རང་ལུས་མེར་བསྲེགས་དང་འབྲེལ་བའི་བོད་དོན་གློག་བརྙན་གཟིགས་འབུལ་ཡང་གནང་ཡོད་འདུག ཐེངས་འདིའི་བོད་རྒྱ་མཐུན་ཚོགས་ཀྱི་ཚོགས་འདུར་རྒྱ་ནག་སྐམ་ས་ནས་ཡོང་བའི་རྒྱ་རིགས་དོན་གཉེར་ཅན་དང་། གཞུང་ཞབས་པ། མཐོ་སློབ་ཁག་གི་སློབ་ཕྲུག་དང་སྤྱི་ཚོགས་ཞབས་ཞུ་བ། མང་གཙོ་ཡར་ཐོན་ཚོགས་པའི་སྲིད་བྱུས་འགན་འཛིན་གཙོས་ཆབ་སྲིད་མི་སྣ་སོགས་ལས་རིགས་མང་པོའི་མི་སྣ་ཕེབས་འཛོམས་གནང་ཡོད་པ་རེད།
ཕྱི་ཚེས་ ༩ ཉིན་གྱི་ཞོགས་པར་ཆོས་ཚོགས་ཁག་ཅིག་ཏུ་འཚམས་གཟིགས་མཇལ་འཕྲད་གནང་བ་དང་། ཉིན་རྒྱབ་ཆུ་ཚོད་ ༢ ནས་ཐེ་ཝན་རྒྱལ་སྤྱིའི་བོད་བརྒྱུད་ནང་བསྟན་མཐུན་ཚོགས་ཀྱི་གོ་སྒྲིག་འོག་སྤྱི་འཐུས་རྣམ་པ་དབུ་བཞུགས་ཐོག་བོད་བརྒྱུད་ནང་བསྟན་ཆོས་ཚོགས་ཁག་གི་དབུ་ལས་རྣམ་པ་དང་ལྷན་བཞུགས་མོལ་ཚོགས་འདུ་ཞིག་ཀྱང་གནང་ཡོད་པ་དང་། ཚོགས་འདུའི་སྟེང་སྤྱི་ལྷན་ཚོགས་གཞོན་མཆོག་གིས་འཚམས་གཟིགས་སྐོར་ངོ་སྤྲོད་དང་། ལྷག་པར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་དང་། བོད་ཀྱི་ད་ལྟའི་གནས་བབ་སོགས་ངོ་སྤྲོད་གནང་ཡོད་པ་རེད། དེ་རྗེས་ཚོགས་བཅར་ཆོས་ཚོགས་ཁག་གིས་ཚོགས་གཙོ་དང་འཐུས་མི་རྣམ་པས་ཆོས་ཚོགས་ཁག་ངོ་སྤྲོད་གནང་བ་དང་། དྲི་བ་དྲིས་ལན་སྐབས་སྤྱི་འཐུས་རྣམ་པས་ལན་འདེབས་གསལ་བཤད་དང་དགོངས་འཆར་ཡང་གནང་ཡོད་པ་རེད་འདུག སྤྱི་འཐུས་རྣམ་པའི་གཟིགས་སྐོར་གྱི་ལས་རིམ་ཁག་ཏུ་སྤྱི་འཐུས་འབའ་བ་སྐལ་བཟང་རྒྱལ་མཚན་མཆོག་དང་། སྤྱི་འཐུས་མཁན་པོ་ནོར་བུ་ཚེ་རིང་མཆོག་རྣམ་གཉིས་ཀྱང་མཉམ་ཞུགས་གནང་ཡོད་པ་མ་ཟད། སྤྱི་འཐུས་འབའ་བ་སྐལ་བཟང་རྒྱ་མཚན་མཆོག་ནས་ལས་རིམ་ཁག་གི་གསུང་སྒྱུར་ཡང་གནང་ཡོད་པ་རེད་འདུག
སང་ཉིན་ནས་སྤྱི་འཐུས་རྣམ་པ༸གོང་ས་མཆོག་ལ་ནོ་ཝེ་ཞི་བདེ་གཟེངས་རྟགས་འབུལ་བཞེས་མཛད་པའི་མཛད་སྒོ་དང་ལས་རིམ་གཞན་ཁག་ཅིག་ཏུའང་མཉམ་ཞུགས་ཀྱི་ཆ་ཤས་གནང་འཆར་ཡོད་པ་རེད་འདུག སྤྱི་འཐུས་ཚོགས་དྲུང་ལས་ཁུངས་ནས་ཕྱི་ལོ་ ༢༠༡༤ ཟླ་ ༡༢ ཚེས་ ༩ ལ།།