༄༅། །ཕྱི་ལོ ༢༠༢༥ ཟླ་ ༥ པའི་ཚེས་ ༩ ཉིན་གྱི་དགོང་དྲོ་ཆུ་ཚོད་ ༥།༣༠ ཐོག་བོད་མི་མང་སྤྱི་འཐུས་དགེ་བཤེས་ལྷ་རམས་པ་གོ་བོ་བློ་བཟང་ཕན་བདེ་མཆོག་དང་། སྤྱི་འཐུས་དབང་འདུས་རྡོ་རྗེ་མཆོག་རྣམ་གཉིས་ཀྱིས་རྒྱ་གར་བྱང་ཤར་མེ་གྷ་ལ་ཡ་མངའ་སྡེའི་གཞུང་གི་ལྷན་ཁང་ཁག་བཞིའི་བློན་ཆེན་སྐུ་ཞབས་ཨེ་ལེཀ་ཛན་ཌར་ ལ་ལོ་ ཧེཀ་ (Shri Alexander Laloo Hek, Minister of Animal Husbandry & Veterinary, Fisheries, Printing & Stationery, Secretariat Administration) མཆོག་དང་ལྷན་མཇལ་འཕྲད་ཀྱིས་ཐེངས་འདིའི་རྒྱ་གར་བྱང་ཤར་ཁུལ་གྱི་གཞུང་འབྲེལ་ས་བགོས་ཕྱོགས་བསྐྱོད་ཀྱི་ལས་དོན་ཁག་དབུ་འཛུགས་གནང་ཡོད་པ་རེད།

མཇལ་འཕྲད་སྐབས། བོད་མི་མང་སྤྱི་འཐུས་རྣམ་གཉིས་ཀྱིས་བློན་ཆེན་མཆོག་ལ་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་ལྗགས་རྩོམ་མཛད་པའི་བོད་དང་བོད་མིའི་མགྲིན་ཚབ་ (Voice for the Voiceless) ཞེས་པའི་ཕྱག་དེབ་ཕུལ་བ་དང་སྦྲགས། བོད་དོན་ཐོག་སྔར་བཞིན་རྒྱབ་སྐྱོར་གནང་རྒྱུའི་རེ་སྐུལ་ཞུས་འདུག

སྐབས་དེར་སྤྱི་འཐུས་རྣམ་གཉིས་དང་ལྷན་ས་གནས་འཐུས་ཚོགས་ཀྱི་ཚོགས་གཙོ་ངག་དབང་དོན་འགྲུབ་ལགས་དང་། ས་གནས་འགོ་འཛིན་ལས་ཁུངས་ཀྱི་ལས་དྲུང་ཚེ་རིང་ཆོས་འཕེལ་ལགས་རྣམ་གཉིས་མཉམ་བཅར་ཞུས་འདུག་པ་བཅས།