༄༅། །སྐབས་ ༡༧ པའི་བོད་མི་མང་སྤྱི་འཐུས་རྣམ་པ་ལོ་གཉིས་དང་ཕྱེད་སྔ་མའི་ནང་མང་ཚོགས་ལ་ཆབ་སྲིད་སོགས་ཀྱི་ལམ་སྟོན་དང་། བདེ་སྡུག་གཟིགས་ཞིབ་སླད་ཕེབས་རྒྱུའི་ལས་རིམ་ཡོད་པ་ལྟར། སྤྱི་འཐུས་དགེ་བཤེས་ཨ་ཀྲུག་ཚེ་བརྟན་མཆོག་དང་། སྤྱི་འཐུས་ཆོས་གྲགས་རྒྱ་མཚོ་མཆོག་རྣམ་གཉིས་ཕྱི་ལོ་ ༢༠༢༢ ཟླ་ ༡༡ ཚེས་ ༤ ནས་ཚེས་ ༡༧ བར་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་གཞིས་ཆགས་དང་། མུམ་བྷེ། གྷོ་ཝ་བཅས་ལ་གཞུང་འབྲེལ་ཕྱོགས་བསྐྱོད་གནང་གཏན་ཁེལ་ཡོད།
དེ་ཡང་སྤྱི་འཐུས་ཆོས་གྲགས་རྒྱ་མཚོ་མཆོག་ཕྱི་ཚེས་ ༤ ཉིན་རྡ་ས་ནས་ལྡི་ལིར་ཕེབས་ཐོན་གནང་སྟེ། ཕྱི་ཚེས་ ༥ ཉིན་ལྡི་ལི་ནས་མུམ་བྷེ་ལ་ཕེབས་ཐོན་གནང་རྒྱུ་དང་། སྤྱི་འཐུས་དགེ་བཤེས་ཨ་ཀྲུག་ཚེ་བརྟན་མཆོག་ཕྱི་ཚེས་ ༥ ཉིན་བཞུགས་གནས་མོན་གྷོ་འདོད་རྒུ་གླིང་གཞིས་ཆགས་ནས་མུམ་བྷེ་ལ་ཕེབས་ཐོན་གནང་རྒྱུ། ཕྱི་ཚེས་ ༦ ཉིན་ས་གནས་སུ་ལས་རིམ། ཕྱི་ཚེས་ ༧ ཉིན་མུམ་བྷེ་ནས་གྷོ་ཝ་ལ་ཕེབས་ཐོན་གྱིས་ཕྱི་ཚེས་ ༨ ཉིན་ས་གནས་སུ་ལས་རིམ། ཕྱི་ཚེས་ ༩ ཉིན་གྷོ་ཝ་ནས་མོན་གྷོ་འདོད་རྒུ་གླིང་གཞིས་ཆགས་སུ་ཕེབས་ཐོན་གྱིས་ཕྱི་ཚེས་ ༡༠ ནས་ ༡༥ བར་ས་གནས་སུ་ལས་རིམ། ཕྱི་ཚེས་ ༡༧ ཉིན་སྤྱི་འཐུས་ཆོས་གྲགས་རྒྱ་མཚོ་མཆོག་ལྡི་ལི་བརྒྱུད་རྡ་སར་ཕྱིར་ཕེབས་གནང་རྒྱུ་ཡིན་པ་བཅས། །