བོད་དོན་རྒྱབ་སྐྱོར་བ་རྒན་གྲས་ལྕམ་སྐུ་ཀ་པི་ལ་ཝ་ཏི་སེ་ཡ་ཡན་མཆོག་སྐུ་ཚེའི་འཕེན་པ་རྫོགས་པར་དཔལ་ལྡན་ཚོགས་གཙོ་མཆོག་གིས་ཐུགས་གསོ་གནང་བ།

༄༅། །བོད་དོན་རྒྱབ་སྐྱོར་བ་རྒན་གྲས་དང་། རྒྱ་གར་གྱི་གྲོས་ཚོགས་འཐུས་མི་ཟུར་པ། ཤེས་ལྡན་མི་སྣ་གྲགས་ཅན།  དེ་བཞིན་རྒྱ་གར་གྱི་མི་སེར་གཟེངས་རྟགས་མཐོ་ཤོས་གཉིས་པ་པདྨ་ཝི་བྷུ་ཤན་ (Padma Vibhushan) བཞེས་མྱོང་མཁན་ལྕམ་སྐུ་ཀ་པི་ལ་ཝ་ཏི་སེ་ཡ་ཡན་ (Kapila Vatsyayan) མཆོག་དགུང་ལོ་ ༩༡ ཐོག་སྐུ་ཚེའི་འཕེན་པ་རྫོགས་པའི་ཡིད་སྐྱོའི་གནས་ཚུལ་ཐོན་པར། ཕྱི་ལོ་ ༢༠༢༠ ཟླ་ ༩ ཚེས་ ༡༨ ཉིིན་དཔལ་ལྡན་བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས་མཆོག་གིས་གཞིས་བྱེས་བོད་མི་ཡོངས་ཀྱི་ཚབ་ཞུས་ཏེ་དམ་པ་ཁོང་གི་ནང་མི་ཉེ་འབྲེལ་ལྟོས་བཅས་ཡོངས་ལ་ཐུགས་གསོའི་འཕྲིན་ཡིག་ཅིག་ཕུལ་གནང་འདུག
ཐུགས་གསོའི་འཕྲིན་ཡིག་ནང་འཁོད་དོན། དམ་པ་ཁོང་གི་སྐུ་ཚེའི་བྱ་གཞག་གི་བརྒྱུད་རིམ་ནང་། ཁོང་གིས་རྒྱ་གར་གྱི་གྲོས་ཚོགས་འཐུས་མི་གནང་མྱོང་ཡོད་པ་མ་ཟད། རྒྱ་གར་གཞུང་གི་ཤེས་ཡོན་ལྷན་ཁང་གི་དྲུང་ཆེ་གནང་སྟེ། མཐོ་སློབ་ཤེས་ཡོན་བསྟི་གནས་ཁང་མང་པོ་ཞིག་གསར་འཛུགས་གནང་རྒྱུར་ནུས་པ་ཆེན་པོ་བཏོན་ཡོད། དེ་བཞིན་ཁོང་གིས་ཨིན་དི་རཱ་གན་དྷི་རྒྱལ་ཡོངས་སྒྱུ་རྩལ་བསྟི་གནས་ཁང་ (Indira Gandhi National Centre for the Arts) གི་ངེས་སྟོན་པ་དང་།  རྒྱ་གར་རྒྱལ་སྤྱིའི་བསྟི་གནས་ཁང་ (India International Centre) གི་ཚོགས་གཙོ་སོགས་གནང་ཡོད། མདོར་ན་དམ་པ་ཁོང་ནི་རྒྱ་གར་སྲོལ་རྒྱུན་གྱི་ཞབས་བྲོ་དང་། སྒྱུ་རྩལ། སྒྱུ་རྩལ་གྱི་ལོ་རྒྱུས། བཟོ་བཀོད་སོགས་ཀྱི་ཐོག་སྙན་གྲགས་ཡོད་པའི་མཁས་པ་ཞིག་ཡིན།
དམ་པ་ཁོང་གིས་སྤྱི་ཚོགས་ནང་ལེགས་སྐྱེས་གང་ལེགས་ཕུལ་བར། བསྔགས་བརྗོད་གཟེངས་རྟགས་མང་པོ་ཐོབ་ཡོད་པ་དང་། ལྷག་པར་དུ་ཕྱི་ལོ་ ༢༠༡༡ ལོར་རྒྱ་གར་དབུས་གཞུང་ནས་དམ་པ་དེ་ཉིད་ལ་རྒྱ་གར་གྱི་མི་སེར་གཟེངས་རྟགས་མཐོ་ཤོས་གཉིས་པ་པདྨ་ཝི་བྷུ་ཤན་ (Padma Vibhushan) གནང་ཡོད།
ལྕམ་སྐུ་དམ་པ་ཀ་པི་ལ་མཆོག་ནི་བོད་མིའི་བླ་ན་མེད་པའི་དབུ་འཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་ཐུགས་ཉེ་པོ་ཡོད་པའི་གྲོགས་པོ་ཞིག་དང་། བོད་མིའི་རྩ་དོན་ཐོག་རྟག་ཏུ་རྒྱབ་སྐྱོར་ཤུགས་ཆེ་གནང་མཁན་ཞིག་རེད།
 ཁོང་གིས་ང་ཚོའི་རྩ་དོན་ཐོག་ཡུན་རིང་རྒྱབ་སྐྱོར་གནང་བ་དང་། ལྷག་པར་དུ་ཕྱི་ལོ་ ༡༩༦༧ ནང་ཝཱ་ཎ་དབུས་བོད་ཀྱི་ཆེས་མཐོའི་གཙུག་ལག་སློབ་གཉེར་ཁང་གསར་འཛུགས་གནང་སྐབས་རྒྱབ་སྐྱོར་དང་ནུས་པ་ཆེན་པོ་བཏོན་ཡོད་པ་རྣམས་ང་ཚོ་བོད་པ་ཚོས་རྟག་ཏུ་དྲན་བཞིན་ཡོད། མཐོ་སློབ་གསར་འཛུགས་ཐོག་རྒྱབ་སྐྱོར་ཙམ་མིན་པར། མུ་མཐུད་ཁོང་གིས་མཐོ་སློབ་ཀྱི་མཐུན་རྐྱེན་དང་། ཤེས་ཡོན་ལམ་ལུགས། འཛིན་སྐྱོང་སྒྲོམ་གཞི་བཅས་ཀྱི་ཡར་རྒྱས་ཐོག་ལའང་རྒྱབ་སྐྱོར་གནང་ཡོད། ཁོང་གིས་བོད་ཀྱི་རྩ་དོན་ཐོག་ནུས་པ་ཆེན་པོ་བཏོན་པར་ང་ཚོས་བཀའ་དྲིན་ཆེ་ཞུ་རྒྱུ་ཡིན། དམ་པ་ཁོང་ནི་ང་ཚོར་སེམས་ཤུགས་སྤར་མཁན་ཞིག་དང་། ང་ཚོའི་སེམས་ནང་ནས་རྟག་ཏུ་བྲལ་ཐབས་མེད་པ་ཞིག་ཡིན།
ངས་སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ། དམ་པ་ཁོང་གི་ནང་མི་ཉེ་འབྲེལ་ལྟོས་བཅས་ཡོངས་ལ་ཐུགས་གསོ་ཞུ་རྒྱུ་ཡིན།
ལྕམ་སྐུ་མཆོག་སྐུ་གཤེགས་པ་དེས་རྒྱ་གར་རྒྱལ་ཁབ་ཡོངས་ལ་གྱོང་གུད་ཆེན་པོ་ཕོག་ཡོད་པ་མ་ཟད། ང་ཚོ་བོད་པ་ཚོར་མཚོན་ནའང་བོད་པའི་གྲོགས་པོ་བློས་ཐུབ་གཅིག་མེད་པ་ཆགས་ཡོད་ཅེས་འཁོད་གནང་འདུག་པ་བཅས། །
Menu