༄༅། །ཕྱི་ལོ་ ༢༠༢༣ ཟླ་བ་ ༡༠ ཚེས་ ༡༤ ནས་ ༡༥ བར་ཉིན་གྲངས་གཉིས་རིང་ཨོ་སི་ཀྲོ་ལི་ཡའི་རྒྱལ་ཡོངས་བོད་རིགས་སྤྱི་མཐུན་ཚོགས་པའི་འགན་འཛིན་ལྷན་ཚོགས་ཐེངས་བདུན་པ་ཝ་ག་ཝ་ག་གྲོང་ཁྱེར་ (Wagga Wagga City) དུ་བསྐོང་ཚོགས་གནང་བའི་ཐོག ཨོ་སེ་ཀྲེ་ལེ་ཨེ་ཤི་ཡའི་ཕྱོགས་བཞུགས་བོད་མི་མང་སྤྱི་འཐུས་རྡོ་རིང་བསྟན་འཛིན་ཕུན་ཚོགས་མཆོག་དམིགས་བསལ་སྐུ་མགྲོན་དུ་གདན་ཞུས་ལྟར་གཞུང་འབྲེལ་ཆེད་ཕེབས་གནང་ཡོད་འདུག

ཉིན་གྲངས་གཉིས་རིང་གི་ལས་རིམ་ཐོག་ཨོ་སི་ཀྲོ་ལི་ཡའི་རྒྱལ་ཡོངས་བོད་རིགས་སྤྱི་མཐུན་ཚོགས་པའི་འགན་འཛིན་ལྷན་ཚོགས་ཀྱི་ཚོགས་འདུ་དང་། ཝ་ག་ཝ་ག་གྲོང་ཁྱེར་དཔེ་མཛོད་ཁང་དུ་བོད་ཡིག་དཔེ་དེབ་ཀྱི་སྡེ་ཚན་གསར་པ་ཞིག་དབུ་འབྱེད་གནང་འདུག

དེ་ཡང་ཕྱི་ཟླ་ ༡༠ པའི་ཚེས་ ༡༤ ཉིན་གྱི་སྔ་དྲོ་ཨོ་སི་ཀྲོ་ལི་ཡའི་རྒྱལ་ཡོངས་བོད་རིགས་སྤྱི་མཐུན་ཚོགས་པའི་འགན་འཛིན་ལྷན་ཚོགས་ཀྱི་ཚོགས་འདུ་དངོས་སུ་དབུ་འཛུགས་གནང་ཞིང་། དེ་ཡང་ཐོག་མར་སྐུ་མགྲོན་རྣམ་པས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེར་མཇལ་དར་བསྒྲོན་འབུལ་དང་། དེ་རྗེས་ཚང་མ་སྐུ་བཞེངས་ཐོག་བོད་རྒྱལ་ཁབ་ཆེན་པོའི་རྒྱལ་གླུ་བཏང་བ་དང་། རྒྱལ་གཅེས་དཔའ་བོ་དཔའ་མོ་རྣམས་ཀྱི་ཆེད་ངག་བཅད་མྱ་ངན་སྐར་མ་གཅིག་རིང་ཞུས། སྐབས་དེར་བོད་མི་མང་སྤྱི་འཐུས་རྡོ་རིང་བསྟན་འཛིན་ཕུན་ཚོགས་མཆོག་གིས་ཚོགས་འདུའི་ཐོག་ཕེབས་པའི་བོད་རིགས་སྤྱི་མཐུན་ཚོགས་པ་ཁག་བདུན་གྱི་ལས་སྣེ་རྣམས་ལ་འཚམས་འདྲི་དང་འབྲེལ། ཚོགས་འདུའི་ནང་བགློ་གླེང་ཚགས་ཚུད་ཡོང་རྒྱུའི་ཐོག་ལམ་སྟོན་གསུང་བཤད་སྙིང་བསྡུས་ཤིག་གནང་འདུག ཐེངས་འདིའི་ཚོགས་འདུའི་ཐོག་ཁེན་བྷེ་ར་དང་། སིཊ་ནི། ཁུན་སི་ལེནྡ། ཝིཀ་ཀྲོ་རི་ཡ། གནས་མཁར་གསར། བོད་དགའ། ནོར་རྭ་བོད་རིགས་མཐུན་ཚོགས་ཀྱི་ཚོགས་གཙོ་ཚོགས་གཞོན་སོགས་ལྷན་ཞུགས་གནང་འདུག གཞི་རྩའི་ཚོགས་འདུ་དེ་བཞིན་ལོ་གཉིས་རེའི་མཚམས་ལ་འཚོགས་ཀྱི་ཡོད་ཅིང་། དེའི་སྐབས་གཙོ་བོ་ཨོ་གླིང་ནང་གི་གནས་སྡོད་བོད་མི་རྣམས་ཀྱི་གནད་དོན་དང་འབྲེལ་བའི་ཐོག་མ་འོངས་བྱེད་ཕྱོགས་ཐད་བགྲོ་གླེང་ལྷུགས་པོ་གནང་སྟེ། གྲོས་ཆོད་གཏན་འབེབས་དང་། ཨོ་སི་ཀྲོ་ལི་ཡའི་རྒྱལ་ཡོངས་བོད་རིགས་སྤྱི་མཐུན་ཚོགས་པའི་ཚོགས་གཙོ་དང་། དྲུང་ཆེ་འོས་འདེམས་གནང་གི་ཡོད་འདུག

ཕྱི་ཚེས་ ༡༥ ཉིན་ཝ་ག་ཝ་ག་གྲོང་ཁྱེར་གྱི་དཔེ་མཛོད་ཁང་དུ་བོད་ཡིག་དཔེ་དེབ་ཀྱི་སྡེ་ཚན་གསར་པ་ཞིག་གསར་འཛུགས་ཀྱིས་དབུ་འབྱེད་གནང་རྒྱུའི་མཛད་སྒོ་ཞིག་ཚོགས་པའི་ཐོག ཕྱོགས་བཞུགས་སྤྱི་འཐུས་རྡོ་རིང་བསྟན་འཛིན་ཕུན་ཚོགས་མཆོག་དང་། ཨོ་གླིང་སྐུ་ཚབ་དོན་གཅོད་ཀརྨ་སེངྒེ་ལགས་མཉམ་ཞུགས་གནང་བ་དང་། སྐབས་དེར་ཕྱོགས་བཞུགས་སྤྱི་འཐུས་མཆོག་གིས་ཝ་ག་ཝ་ག་གྲོང་ཁྱེར་ཁོངས་ནས་ཡིན་པའི་ཨོ་གླིང་གྲོས་ཚོགས་འཐུས་མི་འབུམ་རམས་པ་ཇོ་ མེཀ་གིར་ (Dr Joe McGirr) མཆོག་དང་། ཝ་ག་ཝ་ག་གྲོང་ཁྱེར་གྱི་སྤྱི་ཁྱབ་ ཌ་ལ་སེ་ (Mayor & Councillor Mr. Dallas) མཆོག་རྣམ་གཉིས་དང་ལྷན་མཇལ་འཕྲད་ཀྱིས་བོད་མི་མང་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ། ཁོང་རྣམ་པ་གཉིས་ནས་དེ་གའི་གྲོང་ཁྱེར་ནང་གི་གནས་སྡོད་བོད་མི་རྣམས་ཀྱི་ཆེད་འདི་ལྟ་བུའི་ལས་དོན་ཞིག་སྒྲུབ་རྒྱུར་མཐུན་འགྱུར་རྒྱབ་སྐྱོར་གནང་བར་ཐུགས་རྗེ་ཆེ་ཞུས་འདུག མཛད་སྒོའི་ཐོག་ཨོ་སི་ཀྲོ་ལ་ཡའི་སྐུ་ཚབ་དོན་ཁང་གི་རྒྱ་རིགས་འབྲེལ་མཐུད་པ་ཟླ་བ་བཟང་མོ་ལགས་དང་། ཨོ་སོ་ཀྲོ་ལི་ཡའི་རྒྱལ་ཡོངས་བོད་རིགས་སྤྱི་མཐུན་ཚོགས་པའི་ཚོགས་གཙོ་དང་། དྲུང་ཆེ། ཚོགས་འདུའི་ཐོག་ཕེབས་མཁན་ཚོགས་བཅར་བ་རྣམ་པ། ཝ་ག་ཝ་ག་བོད་རིགས་སྤྱི་མཐུན་ཚོགས་པའི་ཚོགས་མི་སོགས་ཕེབས་འདུག

སྐབས་དེར་ཕྱོགས་བཞུགས་སྤྱི་འཐུས་མཆོག་གིས་ད་རེས་ཝ་ག་ཝ་ག་གྲོང་ཁྱེར་གྱི་དཔེ་མཛོད་ཁང་དུ་བོད་ཡིག་དཔེ་དེབ་ཀྱི་སྡེ་ཚན་གསར་པ་ཞིག་གསར་འཛུགས་གནང་བ་དེས། དེ་གའི་གྲོང་ཁྱེར་དང་། མངའ་སྡེ། རྒྱལ་ཁབ་ནང་གནས་སྡོད་བྱེད་མཁན་བོད་མི་ཚོར་ཕྱག་རྟགས་གནང་བ་ཙམ་མིན་པར། རྒྱ་ནག་དམར་གཞུང་འོག་སྡུག་སྦྱོང་མནར་གཅོད་མྱོང་མཁན་གཞིས་བཞུགས་བོད་མི་རྣམས་ལའང་ཕྱག་རྟགས་ཕུལ་བ་ཞིག་ཆགས་ཀྱི་ཡོད་པའི་སྐོར་དང་། དེ་བཞིན་བོད་ཀྱི་སྐད་ཡིག་དང་། རིག་གཞུང་ཆེད་རྒྱའི་བཙོན་ཁང་ནང་ཚུད་པའི་བོད་མི་ཆབ་སྲིད་བཙོན་པ་རྣམས་ཀྱིས་དེ་རིང་གི་གནས་ཚུལ་ཐོས་རྗེས་དགའ་ཚོར་བྱུང་ངེས་ཡིན་སྐོར་སོགས་གསུངས་གནང་འདུག

ཚོགས་འདུའི་ཐོག་ཨོ་གླིང་རྒྱལ་ཡོངས་བོད་རིགས་སྤྱི་མཐུན་ཚོགས་པའི་ཚོགས་གཙོ་གསར་པ་སིཌ་ཎི་བོད་རིགས་མཐུན་ཚོགས་ཀྱི་ཚོགས་གཙོ་རྔ་བ་ཆོས་འཛིན་ལགས་དང་། དྲུང་ཆེ་ནོར་ར་བོད་རིགས་མཐུན་ཚོགས་ཀྱི་ཚོགས་གཙོ་ཁང་གཉེར་ཚང་ཕུར་བུ་བཀྲ་ཤིས་ལགས་གཉིས་བདམས་ཐོན་བྱུང་རྗེས། ཐེངས་འདིའི་ཚོགས་འདུ་མཇུག་བསྒྲིལ་བ་དང་། སྐབས་དེར་སྐུ་མགྲོན་གཙོ་བོ་དང་། ཆེ་བསྟོད་སྐུ་མགྲོན་རྣམ་གཉིས་ནས་ལས་འཁྱུར་ཚོགས་གཙོ་སྐལ་བཟང་ཚེ་རིང་ལགས་དང་། དྲུང་ཆེ་མགུར་འབུམ་རྒྱལ་ལགས་རྣམ་གཉིས་ལ་བསྔགས་བརྗོད་གནང་ཡོད་འདུག་པ་བཅས། །