༄༅། ། ཕྱི་ལོ་ ༢༠༢༤ ཟླ་ ༧ པའི་ཚེས་ ༡༥ ཉིན་སྔ་དྲོ་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་ཊོ་རོན་ཊོ་གངས་ལྗོངས་བོད་ཀྱི་སྐད་དང་རིག་གཞུང་སློབ་གྲྭའི་དཔེ་སྟོན་ལས་རིམ་ཐོག་མཉམ་ཞུགས་གནང་མཁན་སློབ་ཕྲུག་རྣམས་ལ་བཙན་བྱོལ་བོད་མིའི་མང་གཙོའི་འཕེལ་རིམ་སྐོར་དང་། བོད་མི་མང་སྤྱི་འཐུས་ལྷན་ཚོགས་ཀྱི་ལས་དོན་གནང་ཕྱོགས་སྐོར་ངོ་སྤྲོད་སྙིང་བསྡུས་གནང་སོང་།
དེ་ཡང་དཔལ་ལྡན་ཚོགས་གཙོ་མཆོག་གིས་ཐོག་མར་སློབ་ཕྲུག་རྣམས་མཇལ་འཕྲད་གནང་རྒྱུ་བྱུང་བར་དགའ་ཚོར་ཆེན་པོ་བྱུང་ཞེས་གསུངས་པ་དང་སྦྲགས། ཁོང་ཉིད་བོད་ནང་འཚར་ལོངས་བྱེད་སྐབས་དང་། ལྷ་སར་གནས་མཇལ་ཕེབས་སྐབས་ཀྱི་ཉམས་མྱོང་དང་འབྲེལ་ཏེ། བོད་ནང་རྒྱ་ནག་དམར་གཞུང་གིས་མི་རིགས་དབྱེ་འབྱེད་དང་། བོད་མི་རྣམས་ལ་དམིགས་བསལ་གྱིས་དམ་བསྒྲགས་ཤུགས་ཆེ་བྱེད་ཀྱི་ཡོད་པ་དངོས་སུ་མྱོང་ཚོར་བྱུང་བའི་སྐོར་དང་། དེ་ནས་རྒྱ་གར་ལ་བཙན་བྱོལ་དུ་ཕེབས་འབྱོར་རྗེས། སྔ་འགྱུར་རྙིང་མའི་གདན་ས་རྣམ་གྲོལ་གླིང་ལ་ནང་ཆོས་སློབ་གཉེར་མཐར་ཕྱིན་གནང་སྟེ། རིམ་པས་བོད་མི་མང་སྤྱི་འཐུས་དང་། སྤྱི་འཐུས་ཚོགས་གཞོན། སྤྱི་འཐུས་ཚོགས་གཙོ་བཅས་ཀྱི་ཐུགས་འགན་བཞེས་པའི་སྐོར་ངོ་སྤྲོད་གནང་སོང་།
དེ་ནས་བཙན་བྱོལ་བོད་མིའི་མང་གཙོའི་འཕེལ་རིམ་སྐོར་ལ་གསུངས་དོན། སྤྱི་ཚོགས་ཀྱི་གནས་སྟངས་དང་དགོས་མཁོར་གཞིགས་ཏེ་འཛམ་གླིང་ཁྱོན་ཡོངས་སུ་མང་གཙོའི་ལམ་ལུགས་དར་འཕེལ་བྱུང་བ་དང་། ང་ཚོའི་མང་གཙོ་ནི་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་མར་མི་མང་ལ་གསོལ་སྩལ་གནང་བ་ཞིག་ཆགས་ཀྱི་ཡོད་ཅིང་། དེ་ཡང་ཕྱི་ལོ་ ༡༩༥༤ ལོར་༸གོང་ས་མཆོག་རྒྱ་ནག་ལ་ཕེབས་ཏེ་མའོ་ཙི་ཏུང་མཚོན་པའི་རྒྱ་ནག་གི་འགོ་ཁྲིད་མང་ཆེ་བ་དང་མཇལ་འཕྲད་གནང་ནས་རྒྱ་ནག་གི་ཆབ་སྲིད་ཀྱི་འགྲོ་སྟངས་ལ་གཟིགས་ཞིབ་གནང་ཡོད་པ་དང་། ཕྱིས་སུ་ཕྱི་ལོ་ ༡༩༥༦ ལོར་རྒྱ་གར་ལ་བདག་ཅག་གི་སྟོན་པ་ཤཱཀྱ་ཐུབ་པ་སྐུ་མྱ་ངན་ལས་འདས་ནས་ལོ་ངོ་ ༢༥༠༠ འཁོར་བའི་དུས་དྲན་སྲུང་རྩིའི་ཐོག་གདན་འདྲེན་ཞུས་པ་བཞིན་ཆིབས་བསྒྱུར་བསྐྱངས་ནས། སྐབས་དེའི་རྒྱ་གར་གྱི་སྲིད་བློན་ནེ་རུ་མཆོག་གིས་གཙོས་དཔོན་རིགས་མང་པོ་ཞིག་དང་མཇལ་འཕྲད་དང་། རྒྱ་གར་གྱི་གྲོས་ཚོགས་གོང་འོག་གཉིས་ཀར་ཕེབས་གནང་མཛད་ནས་རྒྱ་གར་གྱི་མང་གཙོའི་སྒྲོམ་གཞིར་མཁྱེན་རྟོགས་གནང་བ་མ་ཟད། མང་གཙོའི་གཞུང་གི་འགྲོ་སྟངས་ལ་ཐུགས་སྣང་ཤུགས་ཆེ་དང་། གལ་ཆེར་གཟིགས་ཏེ། བོད་ནང་ལེགས་བཅོས་ཚོགས་ཆུང་སོགས་བཙུགས་ནས་བོད་ཀྱི་དེ་སྔའི་གཞུང་གི་ལམ་ལུགས་ལ་འགྱུར་བ་གཏོང་འགོ་བཙུགས་ཀྱང་། ཕྱི་ལོ་ ༡༩༥༩ ལོར་རྒྱ་ནག་དམར་གཞུང་གིས་བོད་ས་ཡོངས་རྫོགས་བཙན་བཟུང་བྱས་པར་བརྟེན་མགོན་པོ་གང་ཉིད་ཀྱི་དགོངས་པ་ཇི་བཞིན་བསྒྲུབས་ཐུབ་མེད་པ་དང་།
དེ་ནས་བཙན་བྱོལ་དུ་ཞབས་སོར་འཁོད་རྗེས། ཕྱི་ལོ་ ༡༩༦༠ ཟླ་ ༢ པའི་ནང་གནས་མཆོག་རྡོ་རྗེ་གདན་དུ་ཆོལ་གསུམ་ཆོས་ལུགས་དང་བཅས་པའི་སྐུ་ཚབ་ནས་༧གོང་ས་མཆོག་ལ་བརྟན་ཞུགས་བསྟར་འབུལ་ཞུས་པ་དང་འབྲེལ། མནའ་གན་མཐུ་མོ་ཆེ་བཞག་ཅིང་། སྐབས་དེར་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་ཆོལ་ཁ་གསུམ་ནས་འཐུས་མི་གསུམ་རེ་དང་། ཆོས་བརྒྱུད་ཆེན་པོ་བཞི་ནས་འཐུས་མི་རེ་རེ་འདེམས་དགོས་པའི་བཀའ་སློབ་ཕེབས་དོན་ལྟར། ལོ་དེའི་ཟླ་ ༩ ཚེས་ ༢ ཉིན་སྤྱི་འཐུས་སྐབས་དང་པོས་དམ་འབུལ་ཞུས་ཏེ་བོད་མི་མང་སྤྱི་འཐུས་ལྷན་ཚོགས་དབུ་བརྙེས་པ་དང་། ཕྱི་ལོ་ ༡༩༩༡ ལོར་བཙན་བྱོལ་བོད་མིའི་བཅའ་ཁྲིམས་གཏན་འབེབས་གནང་བ། རིམ་པས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་སྐུ་དབང་ཡོངས་རྫོགས་མི་མང་གིས་འོས་འདེམས་བྱས་པའི་དབུ་འཁྲིད་ཁག་ལ་གསོལ་སྩལ་གནང་བ་སོགས་མང་གཙོའི་ཀ་བ་གསུམ་གྱི་འབྱུང་རིམ་དང་། ལོ་དུས་སོ་སོའི་ནང་བཙན་བྱོལ་བོད་མིའི་མང་གཙོའི་འཕེལ་རིམ་ཇི་ལྟར་བྱུང་བའི་སྐོར་སྙིང་བསྡུས་དང་། དེ་བཞིན་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གཉིས་ཀྱི་སྐོར་དང་། རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་བསྐོང་ཚོགས་གནང་རྒྱུ། རྒྱལ་སྤྱི་དང་རྒྱ་གར་གྱི་མངའ་སྡེ་ཁག་ནང་བོད་དོན་ཞུ་སྐུལ་གནང་རྒྱུ་སོགས་བོད་མི་མང་སྤྱི་འཐུས་ལྷན་ཚོགས་ཀྱི་གལ་ཆེའི་ལས་དོན་ཁག་གི་སྐོར་ངོ་སྤྲོད་གནང་རྗེས། སློབ་ཕྲུག་རྣམ་པའི་དྲི་བར་ལན་འདེབས་གསལ་བཤད་དང་། དེ་ནས་ཟུང་དྲུང་ཚེ་རིང་ལྷ་མོ་ལགས་ཀྱིས་སློབ་ཕྲུག་རྣམས་གྲོས་ཚོགས་ཀྱི་ཚོགས་ཁང་ནང་གཟིགས་སྐོར་སྣེ་ཁྲིད་གནང་སོང་།
གཞི་རྩའི་ལས་རིམ་དེ་བཞིན་ཊོ་རོན་ཊོ་གངས་ལྗོངས་བོད་ཀྱི་སྐད་དང་རིག་གཞུང་སློབ་གྲྭ་དང་། ཤེས་རིག་ལས་ཁུངས། མེས་དབོན་གཙུག་ལག་སློབ་གྲྭ་བཅས་ཐུན་མོང་ནས་གོ་སྒྲིག་ཞུས་ཤིང་། སློབ་ཕྲུག་རྣམས་འདས་པའི་བདུན་ཕྲག་གཅིག་ཙམ་རིང་མེས་དབོན་གཙུག་ལག་དཔེ་སྟོན་སློབ་གྲྭའི་ཉིན་རེའི་བྱེད་སྒོ་ཁག་ལ་མཉམ་ཞུགས་ཀྱིས་བོད་ཀྱི་སྐད་དང་། རིག་གཞུང་སོགས་ལ་སློབ་གཉེར་གནང་འདུག་པ་དང་། ཕྱི་ཚེས་ ༡༥ ནས་འགོ་འཛུགས་ཏེ་བདུན་ཕྲག་གཅིག་ཙམ་རིང་བོད་མིའི་སྒྲིག་འཛུགས་ཀྱི་ལས་ཁུངས་སོགས་ལ་ཤེས་ཡོན་ལྟ་སྐོར་གནང་གཏན་ཁེལ་འདུག་པ་བཅས།
